Tein kinpaleuia siuamej akin kintajyouiltiaj
“Itech nochi taltikpak, miakej siuamej uan siuapipil kintajyouiltiaj. ¿Tejuatsin tikonpanotok nejon? Nikan tikonmatis keniuj Dios kineki maj yetokan siuamej uan toni kichiuas para kinpaleuis”.
Ika nejin tajtolmej peua tamachtilis tein moajsi itech jw.org tein motokaytia “¿Se tonal amo kintajyouiltiskejok siuamej? ¿Toni kijtoua Biblia?”. Kampa tami nejin tamachtilis kijtoua keniuj uelis tikonamakixtis para uelis tikonkelpachos. Se tokniuj siuat de Estados Unidos akin monotsa Stacy kijtoua: “Nikamakixtij miak de nejin tamachtilis uan niajki iuan okse tokniuj siuat kampa kinkalotiaj siuamej akin kintajyouiltiaj. Nejon kali yetok kampa titanojnotsaj”.
Se siuat akin ompa tekiti tajtanik maj kimakakan okachi amatsitsin para kinmakas siuamej akin ompa nemiaj. Nejon tapaleuij maj motemakanij 40 de nejon amatsitsin uan 30 tarjetas tein ika tikteixmatiltiaj jw.org. Satepan, siuat akin taixyekana itech nejon kali kinekik maj tikinnextilikan siuamej keniuj titamachtiaj ika Biblia.
Stacy uan ome tokniuan siuamej no kuali kinselijkej keman yajkej itech okse kali kampa kinkalotiaj siuamej. Ompa kitemakakej makuil de nejon amatsitsin uan kintajtanijkej okachiok. Se siuat akin ompa tekiti kijtoj: “Nejin amatsin kinpaleuis siuamej akin nikan tikinkalotiaj. Semi tapaleuis”. Keman nejon tokniuan mokepkej, seki siuamej kinekiaj kimatiskej keniuj se momachtia Biblia uan omen kijtojkej ke kiuelitaskiaj yaskej nechikol itamian nejon semana.
Stacy kijtoua: “Tikmojkaitakej keman tikitakej keniuj yolpakkej nejon siuamej keman kilerojkej tamachtilis. Keman tikamakixtijkej uan tikelpachojkej kualtsin moitak uan tapaleuij maj nejon siuamej kiixmatikan iTaixyekanalis Dios. Tel kualtsin timomachilijkej keman tikitakej keniuj yolpakkej keman kilerojkej nejon tamachtilis. Tiknekijya tikitaskej keniuj Jehová techpaleuis maj tiksentokakan tikinixmatiltikan kuali tanauatilmej nejin siuamej”.