Akin xiuejkejya uelis semi tapaleuiskejok itech nechikol

Tejuatsin xa no tionmomachilia kemej nejin tokniuj siuat, kemej tionxiuejya amo no ueli tikonchiuaok miak taman kemej achto. Uan maski tikonmati ke miak xiujmejya tikontekitiliani Jehová, xa mitsontayokoltia keman tikonita tein uelia tikonchiuaya sayoj ke axkan amo ueliok tikonchiua. ¿Toni uelis mitsonpaleuis xionyolpaki?

¿TONI KINEKI JEHOVÁ XIKONCHIUA?

Xionmotajtani: “¿Toni kineki Jehová maj nikchiua?”. Deuteronomio 6:5 kijtoua: “Xiktasojta moDios Jehová ika nochi moyolo, ika nochi tein tiuelis uan ika nochi mochikaualis”. Nejin tajtolmej semi tayolchikauaj. ¿Keyej?

Porin nejin versículo kinextia ke Jehová kineki xikontekitili nochi tein tionuelis. Komo tikonelnamiki nejin mitsonpaleuis amo xikonita tein oksekin kichiuaj ika tein tejua tikonchiua oso tein achto uelia tikonchiuaya.

Xikonnemili nejin: ¿keniuj tikontekitiliaya Jehová keman katka tiontelpoch oso tionichpoch? Xa ijkuak ipa tikonchiuaya nochi tein tionuelia. ¿Uan axkan keniuj tikontekitilijtok Jehová? Tikmatij ke axkan semi tionmochikaua tikonchiuas nochi tein tionueli. Nejin kinextia ke tikontekitilijtok Jehová kemej achto porin tikonsentoka tikonchiua nochi tein tionueli.

NOCHI TEIN TIKONPANOUANI UELIS KINPALEUIS OKSEKIN

Amo sayoj xikonnemilijto tein amo ueli tikonchiuaok, ta xikonnemili keniuj axkan ke tionxiuejya uelis tikonpaleuis oksekin. Axkan uelis tikonchiuas seki taman tein amo uelia tikonchiuaya achto. Maj tikitakan se taman.

Xikontapoui oksekin tein tikonpanouani. Itech xiontanemili nejin versículos tein kipia Biblia:

Tekiuaj David: “Nejua katka nitelpoch uan no niueuentsintiakya, sayoj ke amo akin nikitani akin yolmelauak maj kisenkauakan, nion ikoneuan maj kitemojtokan tein kikuaskej” (Sal. 37:25).

Josué: “Nejua amo niuejkauatiok uan namejuan kuali nankimatij ke mochiuak nochi tein toDios Jehová motenkaujka. Kichiuak nochi tein namechiluijka ke kichiuaskia para namechpaleuis. Nochi tein namechiluij, mochiuak” (Jos. 23:14).

David uan Josué kimatiaj ke melauj tein kijtouayaj porin kitekitilijkej Jehová miak xiujmej uan kipanokej miak taman. Yejua ika tein kijtojkej semi tapaleuij. Uan kemej tejuatsin no tikonpanouani miak taman, tein tikontapouis oksekin no semi kinpaleuis.

Komo tikontekitiliania Jehová miak xiujmej, uelis tikontapouis oksekin keniuj mitsonpaleuiani nejon uan keniuj Jehová mitsontatiochiuiani. ¿Kemansa tikonitak keniuj Jehová kinpaleuij itekitikauan? Komo kemaj, xikontapoui oksekin. Akin tikontapouis semi kiyolchikauas uan tejuatsin tionyolpakis (Rom. 1:​11, 12).

No uelis tikonyolchikauas oksekin komo nochipa keman tionueli tiouj nechikolmej itech Kali kampa tiMosentiliaj. Komo ijkon tikonchiua tikonyolchikauas tokniuan uan tejuatsin no mitsonpaleuis. Connie, akin achto ika titajtojkej, kijtoua: “Keman niouj nechikolmej itech Kali kampa tiMosentiliaj nechpaleuia maj amo nimosenkaua. Kemej tokniuan nochipa nechnextiliaj ke semi nechtasojtaj, amo keman nimotayokoltia. Uan nejua no nikinnextilia ke nikintasojta keman nikintayokolia teisa. Uan niksentoka nimochikaua niktekitilis Jehová iniuan tokniuan”.

JEHOVÁ KIPATIUITA TEIN TIKONCHIUA PARA TIKONTEKITILIS

Biblia ininka tajtoua miakej akin Jehová semi kintasojtaya maski amo ueliajok kichiuayaj miak taman. Itech xiontanemili Simeón, se israelita akin semi xiuejya katka keman Jesús yolik. Nochipa keman yaya templo kinitaya telpochmej akin kichiuayaj tekimej tein motelnekij. Sayoj ke Simeón xa kinemiliaya ke Jehová kiitaya ke amo semi tapaleuiayaok porin amo ueliaok kitekitiliaya kemej nejon telpochmej. Sayoj ke Jehová amo ijkon kiitaya, ta yejua kijtoj ke “katka yolmelauak uan semi taneltokaya”. Uan kichiuak maj kiita Jesús keman konetsinok katka. No kichiuak maj Simeón kitematiltiani ke Jesús yeskia Mesías (Luc. 2:​25-35). Nochi nejin technextilia ke Jehová amo kiitaya ox Simeón amo chikauakok katka, ta kiitaya ke semi takuaujtamatia. Uan “ichikaualis Dios itech yetoya”.

Maski amo ueli tikonchiuaok miak taman, xikonmati ke Jehová semi kipatiuita keman kiita ke tionmochikaua tikontekitilis. Yejua semi yolpaki keman kiita ke sejse itekitikauj mochikaua ‘kitemakas tein kipia uan amo tein amo kipia’ (2 Cor. 8:12).

Yejua ika, sayoj itech xiontanemili tein ueli tikonchiua. Xikonnemili keniuj uelis tiontanojnotsas maski tepitsin. No uelis tikonyolchikauas tokniuan komo tikonnotsa oso tikonijkuilouilia se amatsin. Maski amo tikonchiuas miak taman para tikonnextilis ke tikontasojta, tein tikonchiuas semi kinyolchikauas, uan okachiok porin miak xiujmejya tikontekitiliani Jehová.

Maski amo ueli tikonchiuaok miak taman, uelis semi tikontekitilisok Jehová. Tikonajsis tein kipanok se tokniuj akin xiuejya uan nemi África oriental itech recuadro “Se tokniuj siuat kikuik Biblia para kipaleuis se siuat”.

Xikonelnamiki ke kemej tikontekitiliani Jehová miak xiujmejya uan tikonsentoka tikontekitilia, uelis kinyolchikauas oksekin. Tejuatsin tikonnextiani ke ueli se taxikoua. Nochipa xikonelnamiki tein kijtoua Hebreos 6:10: “Dios yolmelauak uan amo kielkauas tein nankichiuaj nion keniuj nankitasojtakej itokay keman nankinpaleuijkej tokniuan uan nankisentokaj nankinpaleuiaj”.

NOCHIPA XIKONTEMO KENIUJ TIKONPALEUIS OKSEKIN

Seki motelmachtianij kijtouaj ke keman akin xiuejkejya kinpaleuiaj oksekin, okachi paktokej, okachi kuali tanemiliaj uan okachi miak xiujmej nemij.

Nejin amo kijtosneki ke komo tikonpaleuia oksekin amo tikonmachilis ke tionxiuejya. Nejon sayoj uelis panos keman iTaixyekanalis Dios kiajchiuas tajtakol tein kichiua maj tiueuentsintiakan uan maj timomikilikan (Rom. 5:12).

Maski ijkon nochi tein tikonchiua para tikontekitilis Jehová uan tikonpaleuis oksekin maj kiixmatikan, mitsonpaleuia okachi xikonneltoka tein tikonchia uan xa hasta mitsonpaleuia xionpakto. Noknitsin, nochipa xikonelnamiki ke Jehová semi kipatiuita nochi tein tikonchiua para tikontekitilis, uan ke tokniuan semi mitsontasojtaj porin tikonnextiani ke semi tiontakuaujtamati.