TLAMACHTIL 6
Ma kajsikamatikan tlen kuali
¿TLEN KIJTOSNEKI?
Miakej kajsikamatij tlen kuali uan tlen amo kuali. Amo kipatlaj inyelis ijkuak itlaj kinpanoa porque nochipa moyekanaj ika seki tlanauatilmej maski amikaj kinmitaj.
¿TLEKA MIAK IPATI?
Axkan miakej konemej amo kuali kinmiluiaj tlen kuali uan tlen amo kuali. Porque ijkon kinmititiaj itech televisión, akinmej iuan mouikaj uan ijkuak kikakij tlatsotsonali. Nochi non amo kinpaleuia ma kimatikan tlen kichiuaskej.
Okachi ijkon kinpanoa ijkuak moskaltijtokej. Amochtli Beyond the Big Talk (Después de “la charla padre e hijo”) kijtoa: “Telpokamej uan ichpokamej moneki kuali mokuayejyekoskej tlen kichiuaskej porque miakej kinmiluiskej ma kichiuakan seki tlamantli tla kinekij inmiuan ma mouikakan. Yejuan Moneki kichiuaskej tlen kuali maski ayakmo inmiuan mouikaskej”. Nin techititia tetajmej moneki kinmachtiskej inkoneuan ijkuak ok tsikitsitsintin.
¿KEN NANKINMACHTISKEJ TLEN KUALI?
Xikinmititikan tlen kuali uan tlen amo kuali
PRINCIPIO BÍBLICO KIJTOA: Akinmej yikuali kimatij tlen kichiuaskej, “kuali kimatih kiyejyekoliah tlan kuali iwa tlan amokuali” (Hebreos 5:14).
Xikinyekiluikan tlen kuali uan tlen amo kuali. Xiktekitiltikan tlen mojmostla namechpanoa para nankinmititiskej tlen kuali uan tlen amo. Ma tikijtokan ikaj tlakajkayaua, namokoneuan uelis nankinmiluiskej: “Amo kuali tlen okichi porque otlakajkaya”. Tla namokoneuan amo tlakajkayauaj, uelis nankinmiluiskej: “Kuali tlen onankichijkej porque onankijtojkej tlen melauak”. Tla ikaj amo kipaleuia akin yikipia miak xiuitl, uelis nankinmiluiskej: “Non amo kuali porque moneki tikpaleuiskej”. Tla namokoneuan kipaleuiaj akin yikipia miak xiuitl, xikinyolchikauakan uan xikinmiluikan: “Kuali onankichijkej porque onankiteititijkej nankipiaj kuali namoyelis”. Ijkon kilnamiktoskej tlen moneki kichiuaskej uan tlen amo.
Xikinyekiluikan tleka seki tlamantli kuali uan okseki amo kuali. Ximotlapouikan iuan namokoneuan uan ijkon kipiaskej kuali intlalnamikilis. Xikintlajtlanikan: “¿Tleka amo kuali ma titlakajkayauakan?”, “¿Tleka ayakmo tikinpiaskej toyolikniuan tla titlakajkayauaj?” noso “¿Tleka tlajtlakoli titlachtekiskej?”.
Xikinmiluikan ken kinpaleuis tla kichiuaskej tlen kuali. Uelis nankinmiluiskej: “Namechneltokiliskej tla nochipa nankijtoskej tlen melauak” noso “Miakej kinpaktis namouan yetoskej tla nankipiaj kuali namoyelis”.
Nochtin namokalchanejkauan ma kiteititikan kichiuaj tlen kuali
PRINCIPIO BÍBLICO KIJTOA: “Nomonewiah ximoyejyekokah” (2 Corintios 13:5).
Tla nochtin namokalchanejkauan kichiuaj tlen kuali, uelis nankijtoskej:
“Tejuan amo titlakajkayauaj”.
“Tejuan amo timoteuiaj nion timotsatsajtsiliaj”.
“Tejuan amo timouijuikaltiaj”.
Ijkon namokoneuan kitaskej namokalchanejkauan kichiuaj tlen kuali.
Ika tlen mojmostla namechpanoa xikinpaleuikan namokoneuan ma kimatikan tleka moneki kichiuaskej tlen kuali. Uelis nankintlapouiskej tlen panoa itech televisión noso tlen kichiuaj akinmej inmiuan momachtiaj. Xikintlajtlanikan: “¿Tlen nankichiuaskej tla ijkon namechpanos?” noso “¿Tlen kichiuaskej tokalchanejkauan?”.
Xikinyolchikauakan nochipa ma kichiuakan tlen kuali
PRINCIPIO BÍBLICO KIJTOA: “Xikpiakan kuali namotlalnamikilis” (1 Pedro 3:16, TNM).
Xikinyolchikauakan ijkuak itlaj kuali kichiuaj. Xikinyolchikauakan uan xikinyekiluikan tleka kuali tlen okichijkej. Uelis nankinmiluiskej: “Tiyolpakij porque amo nantlakajkayauaj”. Noijki xikintlasojkamatilikan ijkuak namechiluiaj okichijkej itlaj amo kuali uan amo san niman xikinmajuakan.
Xikinyekiluikan tlen amo kuali kichiuaj. Moneki kimatiskej tlen amo kuali okichijkej uan xikinmiluikan tleka namejuan amo nankitaj kuali. Sekimej tetajmej amo kinekij kinyektlaliskej inkoneuan porque amo kinekij kinyolkokoskej. Tla inmiuan motlapouiskej, kinpaleuiskej kuali ma kipiakan intlalnamikilis uan ma kimatikan tlen kuali uan tlen amo kuali.