¿SE TONAL MOYEKTLALIS TLALTIKPAK?

ATL CHIPAUAK

AMO uelis tiyoltoskiaj tla amo yetoskia atl chipauak. Nochi tlen yoltok kipia atl itech icuerpo. Tejuan uan yolkamej amo tiyoltoskiaj tla amo yetoskiaj lagos, aueyamej, kanin meya atl uan kanin momana. Noijki tla amo yetoskia atl amo uelis katekiskiaj tlen kitokaj.

Ayakmo onka miak atl chipauak

Akinmej tlapaleuiaj itech Organización Meteorológica Mundial, okijtojkej ipan nochi tlaltikpak onka miak atl pero “san onka kanaj 0.5% atl chipauak tlen uelis tiknejnekiskej”. Atl tlapaleuia matiyoltokan maski mota amo miak. Axkan okachi sokio kisa atl uan okachi oui tikpiaskej atl chipauak. Ijkon panoua porque sapanoua tlatotonia uan tiknokiaj miak atl. Ixtlamatkej kijtouaj ipan 30 xiuitl kanaj 5,000 millones personas ayakmo kipiaskej atl chipauak.

Tlaltikpak okichijchijkej para uelis tiyoltoskej

Tlaltikpak okichijchijkej para makipia miak atl. Tonaltsin tlapaleuia mamochipaua atl. Noijki tlali uan yolkamej tlen katej ijtik atl. Matikitakan seki tlamantli tlen kiteititia tlaltikpak okichijchijkej para uelis tiyoltoskej.

Tlali tlapaleuia mayeto chipauak atl. Noijki moskaltia xiuitl kanin momana atl uan non xiuitl kipojpoloua nitrógeno, fósforo uan kipojpoloua okseki tlamantli tlen kisokiotia atl.
Ixtlamatkej yokitakej atl mochipaua iselti. Atl mochipaua ijkuak motlalojtok uan noijki okuilimej kichipauaj.
Almejas uan mejillones okachi kuali kichipauaj atl uan amo miak tonal uejkauaj. Yejuan okachi san niman kichipauaj uan amo kichiuaj ijkon ken akinmej kitlaliaj se tepostli tlen kichipaua atl.
Tlaltikpak kipia miak atl porque mochipajti uan non tlapaleuia amo matlami.

¿OTIKMATIAYA?

Tlali tlapaleuia mamochipaua atl

Tlali kichipaua atl. Tlali kipalanaltia tepostli, kipalanaltia tlajsoli tlen palani, kichichina tlen kisokiotia atl uan okseki tlamantli. Atl yochipauik ijkuak ajsi uejkatlan uan yiuelis tikoniskej.

Xali uan tetl tlapaleuiaj mamochipaua atl

Xali uan tetl kipiaj seki tlamantli tlen kimokauia tlen sokio uan ijkon chipaui atl.

Okuilimej tlapaleuiaj mamochipaua atl

Tlali kinpia okuilimej tlen kipojpolouaj tlen uelis kichiuas matimokokokan. Ijkuak kinokiaj aceite tlen uelis techmiktis, sekimej okuilimej kiyektlaliaj uan kikopaj dióxido de carbono uan noijki kikopaj atl.

Tlali kitilana seki tlamantli para mamochipaua atl

Tlali ueli kitilana seki tlamantli tlen uelis techmiktis. Tlali kipia tepoxoktetl tlen kitilana seki tlamantli tlen kipia amonio tlen teijtlakoua uan ijkon chipaui atl.

Ixtlamatkej kijtouaj tlen moneki tikchiuaskej

Fotos: 1. Se tlakatl kiyektlalia icarro para amo manokiui aceite. Kinechikoua aceite para amo manokiui ipan tlali. 2. Se tlakatl okiuikak seki tlamantli tlen uelis techmiktis kanin moneki para amitlaj matechpano. — Tikpiaskej atl chipauak tla amo tiknokiaj aceite uan amo san kanin tiktlamotlaj tlen uelis techmiktis.

Ixtlamatkej kijtouaj amo san matiknokikan atl. Noijki kijtouaj para amo tiksokiotiskej atl amo matikkauakan manokiui iaceite se carro, amo matiktlamotlakan pajtli ijtik baño uan amo matiktlamotlakan tlen uelis kisokiotis atl.

Sekimej ixtlamatkej yokinchijkej seki teposmej tlen kikixtilia istatl atl tlen kajki mar. Ijkon kichiuaj porque kinekij oksekimej makipiakan atl chipauak.

Pero nin amo okachi tlapaleuia. Amo okachi tlapaleuia porque moneki miak tomin para kikixtiliskej istatl atl uan moneki miak electricidad. Akinmej pouij itech Naciones Unidas okijtojkej 2021, “moneki tinochtin okachi tikmaluiskej atl”.

¿Tlen kijtoua Biblia panos satepan?

“Ye kichiua matlejko atl, kichiua mixtli mamochiua atl uan ijkon satepan mixtli kichiua makiaui ipan nochtin akinmej chantij ipan tlaltikpak”(Job 36:26-28).

ToTajtsin Dios okichi mamochipajti atl tlen onka tlaltikpak (Eclesiastés 1:7).

ToTajtsin Dios okichi mamochipajti atl. Non techititia uelis kichipauas tlaltikpak. Xikita tlamachtil “ToTajtsin Dios kijtoua kiyektlalis tlaltikpak” tlen kajki página 15.