Agosto

Itech nin versículo kijtoua ome tlamantli miak ipati. Se tlamantli, akinmej yolkualmej tlajyouiaj uan okse tlamantli Jehová kinpaleuia. Jehová techpaleuia matikajsikamatikan tlen axkan panotok porque non techpaleuis ijkuak titlajyouiskej. Jehová kijtoua tiyolpakiskej tla tiktekichiuiliskej pero non amo kijtosneki amitlaj tikixnamikiskej (Is. 66:14). Jehová kineki matikilnamiktokan tlen tikchiuaskej itech xochitlali porque ye kineki nochipa matiyoltokan (2 Cor. 4:​16-18). Pero axkan ye ok techpaleuia (Lam. 3:​22-24). Tlen techmachtia tlen okichijkej sekimej itekipanojkauan Jehová tlen okatkaj yiuejkika uan oksekimej tokniuan. Ualeua titlajyouiskej pero Jehová nochipa techpaleuis tla tikneltokaj (Sal. 55:22). w23.04 14, 15 párrs. 3, 4

Techmachtia miak tlamantli tlen okichijkej José uan María. Yejuan okintlakamatiayaj tekiuajkej maski ualeua okitayaj oui ijkon kichiuaskej (Luc. 2:​1-6). Ijkuak María ijtik yokipiaya ikonetsin chiknaui metstli, omonekiaya kiteititiskej kox otetlakamatiayaj. “César Augusto otlanauati nochtin makijkuilotij intoka itech inmialtepe”. José uan María otetlakamatkej ikinon oyajkej altepetl Belén. Omonekiaya nejnemiskiaj kanaj 150 kilómetros ik kanin tepeyo ikinon María kitaskiaj oui nejnemiskia. Xamo José uan María omotekipachouayaj porque uelis itlaj kipanoskia María noso ikonetsin. Konetl uelis nesiskia ojtli. María yokipiaya konetsintli tlen yetoskia Mesías. ¿Uelis kijtoskiaj amo kitlakamatiskej non tlanauatil? José uan María otetlakamatkej maski omotekipachouayaj. Jehová okinteochi porque otetlakamatkej. María kuali oajsito ompa Belén uan ikonetsin kuali oneski. Noijki otlapaleui mamochiua se profecía tlen yiuejkika yomoijtojka (Miq. 5:2). w23.10 8 párr. 9; 9 párrs. 11, 12

Miakej tokniuan momojtiaj ijkuak mokuayejyekouaj tlanankiliskej. Moneki kuali timoyektlalis para titlanankilis non uelis mitspaleuis (Prov. 21:5). Ijkon tikmatis tlen tikijtos uan amo timomojtis. Noijki mitspaleuis tla amo miak tlamantli tikijtos (Prov. 15:23; 17:27). Ijkon tokniuan kajsikamatiskej tlen tikijtoua kitaskej tikajsikamati tlen otimomachti tla titlanankilis tlen timokuayejyekoua. ¿Tlen uelis tikchiuas tla yotimomachti pero san kanaj ome uelta titlanankilia? Xikilnamikto Jehová kipatioita ijkuak timochijchikaua titlanankilis (Luc. 21:​1-4). Pero Jehová kineki san xikchiua tlen tiueli (Filip. 4:5). Ximokuayejyeko tlen uelis tikchiuas, ximochijchikaua uan xikilui Jehová mamitsyolseui. Uelis timochijchikauas peuas titlanankilis pero amo miak tlamantli xikijto. w23.04 21 párrs. 6-8

Apóstol Pablo okijto tejuan tiyetoskiaj ken soldados tlen kimotlaliliaj tepostli tlen moneki uan moltlachilijtokej. Soldados moneki nochipa moyektlalijtoskej para moteuiskej ijkuak yetos se guerra. Tejuan noijki moneki axkan timoyektlaliskej para ijkuak ajsiki itonal Jehová. Matitlaneltokakan uan matitetlasojtlakan tla ijkon tikchiuaj yetoskia ken tikmoelpantlaliliaj tepostli. Noijki matikchiakan tlen tikseliskej satepan, ijkon yetoskia ken tikmotlaliliaj casco. Soldados moelpantlaliliayaj se tepostli para amitlaj makinpano. Noijki tejuan moneki titlaneltokaskej uan titetlasojtlaskej para tikmaluiskej toyolo. Tla ijkon tikchiuaj, techpaleuis matiktekichiuilijtokan Jehová uan matikchiuakan tlen Jesús otechmachti. Noijki tikneltokaskej Jehová kinteochiua akinmej kitemouaj (Heb. 11:6). Tla titlaneltokaj, techpaleuis nochipa matiktlakamatikan Jesús maski titlajyouiskej porque ye techyekana. Matikitakan ken tokniuan tlaxikouaj maski kintlajyouiltiaj noso amo kipiaj tomin. Non techyolchikauas para okachi matitlaneltokakan, matitlaxikokan ijkuak titlajyouiaj uan amo matiknekikan tikpiaskej miak tlamantli. Uelis tikchiuaskej ken tokniuan akinmej amo kipiaj miak tlamantli uan okachi kitekichiuiliaj Jehová. w23.06 10 párrs. 8, 9

Matikiluikan Jehová matechpaleui matimonauatikan. Akin ijkon kichiua kimati kinauatis tlen kimachilia uan tlen kichiua. Noijki techpaleuia matikchiuakan tlen kuali maski ualeua tikitaj oui noso amo tiknekij tikchiuaskej. Uelis ijkon tikchiuaskej porque iespíritu santo toTajtsin Dios techyekana. Ikinon moneki tiktlajtlaniliskej Jehová iespíritu santo tla tiknekij tikmatiskej timonauatiskej (Luc. 11:13; Gál. 5:​22, 23). Amo matikchiakan nochi tlamantli kuali mayeto. Axkan amo nochi kuali yetos. Amo keman itlaj tikchiuaskej tla tikchiaskej nochi kuali mayeto. Xamo amo tiknekij tikchiuaskej tlen yotikijtojkej porque tikitaj oui. Tla ijkon techpanotok, matikxexelokan tlen tikchiuaskej uan achto matikchiuakan tlen amo oui. Matikijtokan tiknekij itlaj tikpatlaskej itech tonemilis pero tikitaj oui. Xamo uelis tipeuaskej ika se tlamantli tlen amo oui. Tla tiknekij tiktlajtoltiskej nochi Biblia, achto matikchiuakan se programa uan amo miak matiktlajtoltikan. w23.05 29 párrs. 11-13

Itech ninmej tonalmej Jehová techpaleuia ika ialtepe para techmachtis iTlajtol. Ijkon kuali tinejnemiskej itech “Ojtli tlen Santo” (Is. 35:8; 48:17; 60:17). Ijkuak ikaj kiselia momachtis Biblia yetoskia ken peua nejnemi itech “Ojtli tlen Santo”. Sekimej amo uejka nejnemij porque kipejpenaj ayakmo momachtiskej. Pero oksekimej mochijchikauaj para nejnemiskej hasta ajsiskej kanin kinuika ojtli. Pero ¿kanin techuika? “Ojtli tlen Santo” kinuika tlapejpenalmej iluikak kanin tlanauatiskej (Apoc. 2:​7, TNM). Akinmej chantiskej nikan tlaltikpak “Ojtli tlen Santo” kinuika ijkuak Cristo tlamis tlanauatis mil xiuitl. Nochtin ayakmo tiyetoskej tlajtlakolejkej. Ikinon tla tinejnentokej itech non ojtli, matimochijchikauakan para tiajsiskej kanin techuika. w23.05 17 párr. 15; 19 párrs. 16-18

Okachi tiknekis timotemakas ixpan Jehová tla timokuayejyekos nochi tlen mopatka yokichi uan timotlasojkamati (Sal. 116:​12-14). Biblia kijtoua: “Nochi tetliokolil kuali uan ajsitok” techmaka Jehová (Sant. 1:17). Ijkuak topatka okitemakak iKone otechmakak se tetliokolil tlen sapanoua miak ipati. Non tetliokolil mitspaleuis kuali ximouika iuan toTajtsin Dios uan uelis nochipa tiyoltos (1 Juan 4:​9, 10). Ijkuak ixpan timotemakas tikteititis timotlasojkamati porque mitstlasojtla (Deut. 16:17; 2 Cor. 5:15). w24.03 5 párr. 8

Timomachiliaj ijkon ken Lot ijkuak tikitaj ken monauatiaj oksekimej. Lot se tlakatl tlen yiuejkika okatka uan okichiuaya tlen kuali. Ye okimatiaya toTajtsin Dios amo kipaktia matikchiuakan tlen amo kuali. Ikinon sapanoua omotekipachouaya “porke okimitaya kenijki otlajtlakolchijtinemiah n tlakah” (2 Ped. 2:​7, 8). Noijki Lot okitlasojtlaya uan okitlakaitaya ikinon Jehová amo okipaktiaya ijkuak oksekimej oauilnemiayaj. Axkan tejuan noijki ijkon techpanoua porque miakej amo kitlakaitaj toTajtsin Dios uan amo kichiuaj tlen ye technauatia. Tla tiktlasojtlaj toTajtsin Dios uan tiktlakaitaj, tikchiuaskej tlen kuali maski san tlen panos. Jehová techpaleuia matikchiuakan tlen kuali ikinon techyolchikaua ika tlen kijtoua amochtli Proverbios. Tlen kijtoua non amochtli kinpaleuia nochtin akinmej kichiuaj ken Cristo. Kinpaleuia tlakamej, siuamej, telpochmej uan akinmej yikipiaj miak xiuitl. Akin kitlakaita Jehová amo mokuayejyekoua amitlaj panos tla tlajtlakolchiuas. w23.06 20 párrs. 1, 2; 21 párr. 5

Xamo titlajyouiaj porque tofamilia amo kipaktia matimomachtikan Biblia. Xamo tiknekij okachi tiktekichiuiliskej toTajtsin Dios ikinon amo tikpiaj miak tlamantli (Mat. 6:33). Tla ijkon techpanoua, matikilnamiktokan Jehová kimati nochi tlen tikchiuaj para uelis okachi tiktekichiuiliskej (Heb. 6:10). Xamo yotikitakej panoua ijkon ken okijto Jesús. Ye okijto: “Akin okika ichan, ikniuan, imama, ipapa, ikoneuan noso itlaluan porque omochi nodiscípulo uan kitematiltia kuali tlajtoli, axkan kiselis 100 veces okachi tlen okika. Kinselis kalmej, ikniuan, imama, ikoneuan uan itlaluan maski kitlajyouiltiskej. Uan satepan nochipa yoltos” (Mar. 10:​29, 30). Jehová sapanoua yotechteochi maski yotitlajyouijkej (Sal. 37:4). w24.03 9 párr. 5

Tokniuan tlen ochantiayaj Judea otlajyouijkej porque amo okipiayaj tlen kikuaskej. Tokniuan tlen ochantiayaj Antioquía: “Omotlapowijkeh iwa omokajkeh kimpalewiskeh ika tlan weletis, iwa kintitlaniliskeh n tokniwah non ochantitokah Judea” (Hech. 11:​27-30). Tokniuan tlen ochantiayaj Antioquía okinpaleuijkej tokniuan tlen otlajyouijtokaj maski ochantiayaj uejka (1 Juan 3:​17, 18). Tejuan noijki uelis tikteititiskej tikinmiknomatij tokniuan ijkuak tlajyouiaj. Uelis tikintlajtlaniskej tlayekankej ken titlapaleuiskej, tiktemakaskej totomin ika nochi toyolo uan timotlatlaujtiskej inpatka tokniuan tlen tlajyouijtokej. Ijkuakon xamo monekis tikinmakaskej tokniuan tlen ika mopanoltiskej. Ijkuak totekiua Jesucristo tlaixkomakas tiknekij makita tejuan titeiknomatij. Ijkon ye techiluis: “Xikselikah nochi tlan nomechaxkatiliskeh” (Mat. 25:​34-40). w23.07 4 párrs. 9, 10; 6 párr. 12

Ijkuak Jesús okatka nikan tlaltikpak okiteititi teajsikamati ijkon ken Jehová. Maski Jesús san okintlapouiaya “n tlakah de Israel nonmoixpolojtinemih kemi ichkameh”, se tonal noijki okipaleui se siuatl tlen amo okatka israelita. Non siuatl okilui Jesús makipajti itakotsin porque okipiaya “se espíritu amokuali”. Jesús okiknomatki uan okipajti itakotsin (Mat. 15:​21-28). Matikilnamikikan ijkuak Jesús opejki tetlapouia. Ye okijto: “Tla aka kijtos teixpa, amo nechixmati, Ne noiwa nikijtos [...] amo nikixmati” (Mat. 10:33). Pero Jesús ok omouikak iuan Pedro maski ye okijto amo okixmatiaya eyi uelta. Ye okitlapojpolui Pedro porque okitak melauak omoyolkopki uan okatka yolkuali. Ijkuak Jehová okiyoliti Jesús ye okimonextili Pedro uan xamo okilui okitlapojpolui uan okitlasojtlaya (Luc. 24:​33, 34). Jehová uan Jesús teajsikamatij uan Jehová noijki kineki ijkon matikchiuakan. w23.07 21, 22 párrs. 6, 7

¿Tlen uelis tikinmiluiskej oksekimej para tikinpaleuiskej makineltokakan toTajtsin Dios melauak kichiuas tlen yokijto? Achto matikinmiluikan Jehová ye akin okijto tlen kichiuas. Amochtli Apocalipsis kijtoua: “Akin okatka ipan trono okijto: ‘Ne nochi nikyankuilijtok’”. Ye kineki kichiuas tlen yokijto porque ixtlamatki uan kipia chikaualistli para kichiuas. Satepan matikinmiluikan Jehová kimati melauak mochiuas tlen yokijto ikinon ijkuak okijto kichiuas se xochitlali okijto ken yetoskia yomochi. Ye okijto: “Porque melauak uan nochtin uelis kineltokaskej”. Noijki okijto: “¡Nin tlajtoli yomochi!”. Noijki matikinmiluikan Jehová kitlamia ijkuak itlaj kipeualtia. Ikinon iTlajtol kijtoua: “Ne niAlfa uan niOmega” (Apoc. 21:6). Jehová kiteititis Satanás san tlakajkayaua uan amitlaj ueli kichiua. Tla ikaj techiluia, ¿‘mokaki kualtsin pero amo kineltoka melauak mochiuas’? Uelis tikyekiluiskej Apocalipsis 21:​5, 6. Matikititikan tlen ompa kijtoua kiteititia Jehová melauak kichiuas tlen yokijto uan yetoskia ken yokitlali ifirma (Is. 65:16). w23.11 7 párrs. 18, 19

Abrahán okipiaya 75 xiuitl ijkuak Jehová ijkon okilui uan amo okipiaya nion se ikone. ¿Okitak Abrahán ijkuak omochi tlen Jehová okilui? Amo nochi okitak. Abrahán okipanoui aueyatl Éufrates uan omochixki 25 xiuitl. Jehová okichi makipiakan se inkone tlen omotokayoti Isaac. Satepan opanok 60 xiuitl uan oneskej ixuiuan tlen omotokayotijkej Esaú uan Jacob (Heb. 6:15). Pero Abrahán amo keman okinmitak ixuiuan mamomiaktilikan uan mamochiuakan se ueyi altepetl. Noijki amo okinmitak machantikan itech tlali tlen Jehová okinmilui kinmakaskia. Abrahán amo okitak nochi non tlamantli pero ye kuali omouikaya iuan Jehová (Sant. 2:23). ¿Timokuayejyekouaj ken yolpakis ijkuak kiyolitiskej? Ijkuakon kimatis nochi altepemej okinteochijkej porque ye otlaneltokak uan okimatki mochias (Gén. 22:18). ¿Tlen techmachtia? Xamo tejuan amo tikitaskej nochi tlen toTajtsin Dios yokijto kichiuas. Matikchiuakan ijkon ken Abrahán okichi uan Jehová techteochiuas axkan uan noijki itech xochitlali (Mar. 10:​29, 30). w23.08 24 párr. 14

Tekiua Uzías ijkuak okatka telpochtli okatka yolyamanki uan okitlasojtlaya toTajtsin Dios. Ye oyoltoka 68 xiuitl uan Jehová okiteochi miak xiuitl (2 Crón. 26:​1-4). Uzías okintlanili miakej altepemej tlen okinkokoliayaj uan okichi seki tlamantli para kuali mayeto altepetl Jerusalén (2 Crón. 26:​6-15). Ye opakiaya porque Jehová okipaleuiaya makichiua miak tlamantli (Ecl. 3:​12, 13). Tekiua Uzías okinmiluiaya oksekimej tlen omonekiaya kichiuaskej. Xamo ikinon omokuayejyeko uelis kichiuaskia tlen ye kinekiskia. Se tonal okalak itech iteokal Jehová uan okitlati kopali ipan altar maski tekiuajkej amo uelis ijkon kichiuaskiaj (2 Crón. 26:​16-18). Teopixki Azarías okilui Uzías amo kuali tlen okichijtoka uan ye sapanoua okualanki. Teyolkoko pero Uzías amo nochipa okichi tlen Jehová okinekiaya uan Jehová okitlajyouilti ika lepra (2 Crón. 26:​19-21). Amo ijkon kipanoskia tla nochipa yetoskia yolyamanki. w23.09 10 párrs. 9, 10

Apóstol Pedro ok omonekiaya mochijchikauas para amo motlapololtis maski yokipejpenkaj ika espíritu santo. Itech xiuitl 36 Pedro okitak Cornelio okiseli espíritu santo maski amo okatka judío. Tlen opanok okiteititi toTajtsin Dios amo techikoita uan akinmej chantij itech okseki altepemej uelis pouiskiaj itech ialtepe (Hech. 10:​34, 44, 45). Ijkuakon Pedro opejki tlakua inuan akinmej amo okatkaj judíos maski achto amo ijkon okichiuaya. Pero sekimej tokniuan tlen okatkaj judíos omokuayejyekouayaj amo kuali okatka tla judíos tlakuaskiaj inuan akinmej amo judíos. Ikinon Pedro ayakmo otlakua inuan akinmej amo okatkaj judíos ijkuak sekimej judíos oajsitoj Antioquía. Xamo ijkon okichi porque omomojtiaya makualanikan tokniuan tlen okatkaj judíos. Apóstol Pablo okitak tlen okichijtoka Pedro uan okajuak inmixpan oksekimej (Gál. 2:​13, 14). Pero Pedro amo omosotla uan omochijchika kichiuas tlen kuali. w23.09 22 párr. 8

Amo matimosotlauakan tla tikitaj itlaj amo tikchijtokej. Matikilnamiktokan “Toteko teiknomatih” uan ye techpaleuis matikchiuakan tlen moneki (1 Ped. 2:3). Apóstol Pedro okijto: “Dios nomechyekmilawas, nomechyekchikawas iwa nonyektlakxilitoskeh”. Se tonal Pedro omokuayejyeko amo okinamikiaya yetos ixpan iKone toTajtsin Dios (Luc. 5:8). Pero Jehová uan Jesús okipaleuijkej ikinon amo keman okika Cristo. Non okipaleui mapoui itech iTekiuajkayo toTeko Jesucristo tlen temakixtia uan non Tekiuajkayotl amo keman pojpoliuis (2 Ped. 1:11). Sapanoua kualtsin tlen okiseli Pedro. Tejuan noijki nochipa tiyoltoskej tla timochijchikauaj ijkon ken Pedro okichi uan tikkauiliaj Jehová ‘matechyekmilawa’ (1 Ped. 1:9). w23.09 31 párrs. 16, 17

Tabernáculo okipiaya se patio tlen okitlatsakuijkej uan teopixkej ompa otlapaleuiayaj. Ompa okatka ueyi altar de cobre kanin okitlatiayaj tetliokolil. Noijki ompa okatka se akaxitl de cobre tlen okipiaya atl uan teopixkej ompa omomajtekiayaj uan omokxipajpakayaj ijkuak yipeuaskia tekipanoskej (Éx. 30:​17-20; 40:​6-8). Tlapejpenalmej tlen ok katej nikan tlaltikpak yetoskia ken kitekichiuiliaj Jehová itech patio tlen kajki tlaijtik itech templo espiritual. Akaxitl de cobre tlen okatka itech tabernáculo uan itech templo, kinmilnamiktia tlapejpenalmej uan nochtin akinmej kichiuaj ken Cristo moneki yetoskej chipauakej ixpan toTajtsin Dios. ¿Kanin kiueyichiuaj toTajtsin Dios akinmej ‘sapanoua miakej tlen amikaj ueli kinpoua’? Apóstol Juan okitak “katej ixpan itrono toTajtsin Dios uan kitekichiuiliaj tlajka uan youak”. Akinmej “sapanoua miakej tlen amikaj ueli okinpouaya” kitekichiuiliaj Jehová nikan tlaltikpak uan yetoskia ken kichiuaj itech patio tlen kajki kiauak itech templo espiritual (Apoc. 7:​9, 13-15). Tipakij porque tinochtin uelis tikueyichiuaskej Jehová itech itemplo espiritual. w23.10 28, 29 párrs. 15, 16

Jehová noijki kinpaleuia tlayekankej matechyolchikauakan (Is. 32:​1, 2). Ikinon inuan matimotlapouikan ijkuak itlaj techtekipachos. Noijki matikinkauilikan matechpaleuikan porque Jehová ijkon techyolchikaua. Biblia kijtoua satepan nochipa tiyoltoskej itech se xochitlali noso itech iluikak uan techpaleuis matiyetokan tichikauakej (Rom. 4:​3, 18, 19). Non techpaleuia matitlaxikokan ijkuak titlajyouiaj, matitetlapouikan uan matikchiuakan toteki tlen tikpiaj kanin timonechikouaj (1 Tes. 1:3). Matikitakan ken okiyolchika Pablo tlen okineltokaya. Ye okitlajyouiltijkej uan amo okimatiaya tlen kichiuas. Noijki yiixpoliuiskia (2 Cor. 4:​8-10). ¿Tlen okipaleui Pablo matlaxiko? Ye okineltokaya tlen panoskia satepan (2 Cor. 4:​16-18). Pablo okineltokaya yas iluikak uan non okitaya itlaj miak ipati tlen oueyititoka. Ye omokuayejyekouaya tlen kiseliskia satepan ikinon okimachiliaya omoyankuiliaya iyolo. w23.10 15, 16 párrs. 14-17

Ijkuak timotlatlaujtis ximokuayejyeko kox san niman tikneki mamitsnankili Jehová. Xamo tiknekij Jehová san niman matechnankili ijkuak tiktlatlaujtiaj. Pero ye kimati keman technankilis (Heb. 4:16). Ijkuak Jehová amo san niman technankilia uelis timokuayejyekoskej amo technankilis. Pero xamo Jehová kita ok moneki timochiaskej. Matimotlapouikan tlen okipanok se telpochtli tlen okitlatlaujtiaya Jehová makipajti. Pero amo pajtij. Tla Jehová kipajtiskia, xamo Satanás kijtoskia non telpochtli kitekichiuilia Jehová porque okipajti (Job 1:​9-11; 2:4). Pero matikilnamikikan Jehová yokijto kipojpolos kokolistli (Is. 33:24; Apoc. 21:​3, 4). Ikinon axkan amo tikchiaj Jehová san niman matechpajti. ¿Tlen uelis kitlajtlanilis Jehová non telpochtli? Uelis kitlajtlanilis makimaka chikaualistli uan makiyolseui para kitekichiuilis maski mokokoua. w23.11 23 párr. 13

Sansón okichi tlen amo kuali pero amo omosotla. Ye ok okinekiaya moteuis inuan filisteos ijkon ken Jehová okinauati makichiua (Juec. 16:​28-30). Ikinon okitlatlaujti Jehová makipaleui mamomakopa. ToTajtsin Dios okikak uan oksepa okimakak chikaualistli. Ikinon non tonal okachi miakej filisteos okinmikti. Sansón otlajyoui ijkuak okichi tlen amo kuali pero nochipa omochijchika kichiuas tlen kineki toTajtsin Dios. Tejuan noijki amo matimosotlauakan tla tikchiuaj itlaj amo kuali uan techyektlaliskej noso ayakmo tikpiaskej se tekitl itech tlanechikol. Matikilnamiktokan Jehová amo kijtoua amo keman uelis itlaj kuali tikchiuaskej (Sal. 103:​8, 9). Ualeua tikchiuaj tlen amo kuali pero Jehová uelis techpaleuis matikchiuakan tlen ye kineki ijkon ken okipaleui Sansón. w23.09 6 párrs. 15, 16

Pablo okijto: “ToTajtsin Dios techselia ijkuak titlaxikouaj”. Non amo kijtosneki Jehová paki ijkuak titlajyouiaj. Ye paki porque titlaxikouaj. Techyolchikaua tikmatij uelis tikyolpaktiskej Jehová tla amo tikkauaj uan titlaxikouaj (Sal. 5:12). Matimokuayejyekokan tlen okichi Abrahán. Ye otlaxiko ikinon toTajtsin Dios okiseli. Jehová omouikaya iuan Abrahán uan okitak okatka yolkuali (Gén. 15:6; Rom. 4:​13, 22). Tejuan noijki uelis techitas tiyolkualmej toTajtsin Dios uan techselis tla amo keman tikkauaj uan titlaxikouaj. Ye amo techselis san porque tiktekichiuiliaj miak noso tikpiaj miak tekitl itech tlanechikol. Uelis techselis maski tikpiaskej miak xiuitl noso amo, maski itlaj mopatlas itech tonemilis uan maski san tlen tlamantli tikmatiskej tikchiuaskej. ¿Tikixnamikij itlaj oui? Matikilnamiktokan Jehová techselis tla titlaxikouaj. Ijkuak tikmatij tikyolpaktiaj Jehová, techpaleuia okachi matikneltokakan mochiuas tlen tikchiaj. w23.12 11 párrs. 13, 14

Tlakamej moneki mochijchikauaskej ijkon kichiuaskej. Nin kijtosneki moneki kinkakiskej oksekimej uan kinmajsikamatiskej ken mokuayejyekouaj uan ken momachiliaj (Prov. 20:5). Te uelis tikinmajsikamatis oksekimej tla tikinkaki ken tlajtouaj, tla tikinmita inmixko uan tla tikinmita ken moliniaj. Ijkon uelis tikchiuas tla timochijchikaua tiyetos inuan oksekimej. Okachi oui inuan timotlapouis tla san tikintitlanilia correos noso mensajes. Ikinon ximochijchikaua inuan xiyeto ijkuak timotlapouis inuan oksekimej (2 Juan 12). Akin kuali tlaneltoka moneki kimatis momaluis uan kimaluis ifamilia (1 Tim. 5:8). Moneki ximomachti se tekitl maski san kanin tichanti porque mitspaleuis xikpia tlen ika timopanoltis (Hech. 18:​2, 3; 20:34; Efes. 4:28). Ximochijchikaua nochipa kuali xitekipano uan xiktlami tekitl tlen tikpeualtia. Ijkon oksekimej kitaskej kuali titekipanoua uan non mitspaleuis tikpias nochipa kanin titekipanos. w23.12 27 párrs. 12, 13

Itonal Jehová itech Biblia kijtosneki ijkuak kinmixpoloua akinmej kikokoliaj uan kimakixtia ialtepe. Yiuejkika ijkon yokichi (Is. 13:​1, 6; Ezeq. 13:5; Sof. 1:8). Itonal Jehová peuas ijkuak kipojpoloskej Ueyi Babilonia uan tlamis itech Armagedón. Para uelis timomakixtiskej non tonal moneki axkan timoyektlaliskej. Jesús okijto ‘matiijsatokah’ ijkuak peuas ueyi tlajyouilistli uan okijto moneki nochipa ijkon matikchijtokan (Luc. 12:40; Mat. 24:21). Itech Primera Carta a los Tesalonicenses apóstol Pablo okijto seki tlamantli tlen kinpaleuiskia tokniuan. Ijkon kimatiskiaj tlen omonekiaya kichiuaskej achto ualaskia iueyi tonal Jehová. Ye okimatiaya ok opoliuiaya para ajsiki non tonal (2 Tes. 2:​1-3). Pero Pablo okinmilui omonekiayaj mokuayejyekoskej iueyi tonal Jehová yiualaskia. Non kinpaleuiskia san niman mamoyektlalikan. Tejuan noijki moneki ijkon matikchiuakan. w23.06 8 párrs. 1, 2

Itech 1978 ompa Japón okichijchijkej se kali tlen okipiaya 60 pisos. Akinmej ompa opanouayaj omotlajtlaniayaj kox tlaxikoskia non kali ijkuak tlalolinis. Pero non kali amo ouetski porque okichijchijkej chikauak uan ijkuak molinis amo maxitini. Akinmej tikchiuaj ken Cristo tiyetoskiaj ken non kali. ¿Tleka ijkon tikijtouaj? Akin kitekichiuilia Jehová moneki nochipa tlaneltokas uan kimatis keman teajsikamatis para tlaxikos ken non kali. Moneki tlaneltokas para kintlakamatis itlanauatiluan Jehová. Moneki kintlakamatis principios bíblicos tlen techinmaka toTajtsin Dios. Noijki teajsikamatis ijkuak moneki ijkon kichiuas (Sant. 3:17). Tla ijkon tikchiuaj, nochipa tikchiuaskej tlen moneki uan amo tikchiuaskej san tlen tejuan tiknekij. w23.07 14 párrs. 1, 2

Satepan okixnamik Satanás ijkuak okiyejyeko para makikaua toTajtsin Dios (Mat. 4:​1-11). Satanás okinekiaya Jesús matlajtlakolchiua uan ijkon ayakmo uelis topatka motemakaskia. Jesús okixnamik okseki tlamantli ijkuak otetlapouiaya. Akinmej okikokoliayaj okitlajyouiltijkej uan okiluijkej kimiktiskiaj (Luc. 4:​28, 29; 13:31). Okinxiko idiscípulos ijkuak okichiuayaj itlaj amo kuali (Mar. 9:​33, 34). Ijkuak okixkomakakej uan okijtojkej kimiktiskej, okitlajyouiltijkej uan okipinauijkej. Satepan okimiktijkej ijkon ken se tlakatl tlen kichiua tlen amo kuali uan sapanoua otlajyoui (Heb. 12:​1-3). Jehová ayakmo okipaleui ijkuak yimikiskia ikinon san iselti omoka hasta oixpoliuik (Mat. 27:46). Nochi nin tlamantli kiteititia Jesús sapanoua patio otechtlaxtla ijkuak otechmakixti. Ikinon okachi tiktlasojtlaj ijkuak timokuayejyekouaj nochi tlen okichi para techmakixtis. w24.01 10, 11 párrs. 7-9

Kuali timouikaj inmiuan oksekimej ijkuak tikmatij timochiaj. Noijki kuali tikinkakiskej oksekimej tla tikmatij timochiaskej (Sant. 1:19). Amo timokualaniskej inmiuan oksekimej, amo tiknekiskej san niman itlaj tikchiuaskej nion amo tikijtoskej itlaj tlen kinyolkokos oksekimej ijkuak itlaj techpanoua. Noijki amo san niman tikualaniskej ijkuak oksekimej techkualaniaj uan amo timomakopaskej. Matikinxikokan oksekimej uan matimotlapojpoluikan ika nochi toyolo (Col. 3:​12, 13). Kuali tikpejpenaskej tlen tikchiuaskej tla tikmatij timochiaskej. Moneki achto tikitaskej tlen techpaleuis uan amo san niman itlaj tikchiuaskej. Xamo ijkuak amo tikpiaj kanin titekipanoskej san niman tiknekiskej tikseliskej se tekitl. Pero tla tikmatij timochiaskej tikitaskej kox techpaleuis kuali matimouikakan iuan tofamilia uan noijki Jehová. Amo tikchiuaskej itlaj tlen amo kuali tla tikmatij timochiaskej. w23.08 22 párrs. 8, 9

Xamo timoyolkokouaj porque timokuayejyekouaj tikchiuaskej tlen amokuali. Pero uelis titlaxikoskej tla tikilnamiktokej tlen otikiluijkej Jehová tikchiuaskej ijkuak ixpan otimotemakakej. ¿Tleka ijkon tikijtouaj? Ijkuak timotemakaj ixpan Jehová ayakmo tikchiuaj san tlen tejuan tiknekij. Ikinon ayakmo tikchiuaj tlen amo kipaktia Jehová (Mat. 16:24). Ijkon tikmatiskej tlen tikchiuaskej ijkuak itlaj tikixnamikiskej. Tejuan nochipa tiknekij tiktlakamatiskej Jehová uan tikyolpaktiskej. Noijki ayakmo tikchiuaj tlen oksekimej kichiuaj. Tiknekij tikchiuaskej ijkon ken Job okichi. Ye otlajyoui pero okijto: “¡Nikpias noyolo ajsitok!” (Job 27:5). w24.03 9 párrs. 6, 7

Jehová “tetlasojtla” (2 Cor. 13:11). Ye kitekipachoua tlen tisejse techpanoua. Ijkon okachi tikneltokaj ye techtlasojtla (Sal. 32:10). Ijkuak timokuayejyekouaj ken yokiteititi techtlasojtla, okachi tikneltokaj ye kitekipachoua tlen techpanoua uan okachi iuan timouikaj. Ikinon matiktlatlaujtikan uan ika nochi toyolo matikiluikan matechtlasojtla. Uelis tikiluiskej nochi tlen techtekipachoua uan matikilnamiktokan ye techajsikamati uan kineki techpaleuis (Sal. 145:19). Kualtsin tikmachiliaj ijkuak tikitaj Jehová techtlasojtla. Yetoskiaj ken ijkuak seua titlatlatiaj uan timototoniaj. Nochipa tiknekij iuan tiyetoskej. Jehová kualtsin techtlasojtla maski itlasojtlalis kipia miak chikaualistli. Tiyolpakij porque Jehová sapanoua techtlasojtla. Tinochtin tiknekij tikijtoskej ‘tiktlasojtlaj Jehová’ (Sal. 116:1). w24.01 31 párrs. 19, 20

Jesús amo san okitematilti toTajtsin Dios itoka Jehová porque judíos yokimatiayaj itoka. Ye ‘okinpaleui makixmatikan’ (Juan 1:​17, 18). Escrituras hebreas kijtouaj Jehová teiknomati uan teajsikamati (Éx. 34:​5-7). Jesús ijkon okiteititi ijkuak okijto tlen okipanok telpochtli tlen san okauilti itomin. Ompa tiktlajtoltiaj ipapa okitak uejka oualaya, omotlalo okinamikito, okinapalo (okinauajtek) uan ika nochi iyolo okitlapojpolui. Non kiteititia Jehová teiknomati uan teajsikamati (Luc. 15:​11-32). Ijkon Jesús okinpaleui oksekimej makajsikamatikan ken iyelis Jehová. w24.02 10 párrs. 8, 9

Jehová kinyolseuia uan kinyolchikaua akinmej tlajyouiaj. ¿Tlen techpaleuis matikinmiknomatikan oksekimej uan matikinyolchikauakan ijkon ken Jehová kichiua? Matikchiuakan seki tlamantli tlen techpaleuis matiteyolchikauakan. Matikitakan tlen uelis tikchiuaskej. ¿Tlen techpaleuis nochipa matimotlasojtlakan uan matimoyolchikauakan? (1Tes. 4:18). Matimochijchikauakan matiteajsikamatikan, matimotlasojtlakan ken tiknimej uan matiyetokan tiyolkualmej (Col. 3:12; 1 Ped. 3:8). Tikinyolchikauaskej tokniuan ijkuak tlajyouiaj tla tikinmiknomatij uan techtekipachoua tlen kinpanoua. Jesús okijto: “Tlen kajki toyolipan non tlen tikijtouaj. Akin yolkuali kijtoua tlen kuali porque kuali mokuayejyekoua” (Mat. 12:​34, 35). Yotikajsikamatkej tikteititiaj tikintlasojtlaj tokniuan ijkuak tikinyolchikauaj. w23.11 10 párrs. 10, 11

Para tikinmajsikamatiskej profecías tlen katej itech Biblia moneki ikaj techpaleuis. Ximokuayejyeko otia otipaxialoto itech se altepetl kanin amo titlaixmati pero mouan oyajki se moyolikni tlen tlaixmati. Moyolikni kuali tlaixmati kanin nankatej uan kixmati ojtli. ¡Sapanoua yolkuali moyolikni porque mouan oyajki! Jehová noijki kimati tlen tonalmej tikatej uan kimati tlen panos satepan. Ikinon moneki tiyetoskej tiyolyamankej uan matikiluikan Jehová matechpaleui matikinmajsikamatikan profecías (Dan. 2:28; 2 Ped. 1:​19, 20). Ijkon ken se kuali teta, Jehová kineki mayolpakikan ikoneuan axkan uan noijki satepan (Jer. 29:11). Tetajmej amo uelis kinmiluiskej inkoneuan tlen panos satepan pero Jehová kimati nochi tlen panos. Ikinon otlanauati makinmijkuilokan profecías uan ijkon matikmatikan tlen miak ipati panos satepan (Is. 46:10). w23.08 8 párrs. 3, 4