Julio

Jesús mokuayejyekoua ken iTajtsin uan kichiua ken ye. Ijkon okiteititi ika tlen okichi uan tlen okijto ijkuak okinchi milagros (Juan 14:9). ¿Tlen techmachtia milagros tlen okinchi Jesús? Jesús uan iTajtsin sapanoua techtlasojtlaj. Ijkuak Jesús okatka nikan tlaltikpak, okiteititi okintlasojtlaya akinmej okinpajti porque okinpaleui ayakmo matlajyouikan. Se tonal, ome tlakamej tlen amo otlachiayaj okitsajtsilijkej Jesús makinpaleui (Mat. 20:​30-34). Biblia kijtoua ye “okinmiknoma” uan okichi oksepa matlachiakan. Nin tlajtoli ika griego “okinmiknoma” kijtosneki melauak okimachili tlen okinpanotoka nonmej tlakamej. Jesús oteiknomatiaya ikinon okiteititi sapanoua tetlasojtla. Non okiyolini miakej makintlamaka uan okipajti se tlakatl tlen opalaniaya inakayo (Mat. 15:32; Mar. 1:41). Jehová uan Jesús techiknomatij ikinon, sapanoua techtlasojtlaj uan moyolkokouaj ijkuak kitaj titlajyouiaj (Luc. 1:78; 1 Ped. 5:7). Yejuan kinekij kipojpoloskej nochi tlen techtlajyouiltia. w23.04 3 párrs. 4, 5

Moneki timochijchikauaskej amo timokuayejyekoskej tlen amo kuali para amo tikchiuaskej ken akinmej amo kitekichiuiliaj Jehová. Moneki tiktlajtoltiskej Biblia uan timomachtiskej tla tiknekij kuali timokuayejyekoskej. Noijki moneki matimonechikokan uan matitetlapouikan. Jehová amo kitekauilis matechyoltilana tlen amo uelis tikxikoskej (1 Cor. 10:​12, 13). Moneki okachi timotlatlaujtiskej tla amo tiknekij tikkauaskej toTajtsin Dios itlamian ninmej tonalmej. Jehová kineki ‘matikiluikan tlen tikpiaj itech toyolo’ (Sal. 62:8). Ikinon nochipa matimajxilikan matiktlatlaujtikan ika nochi toyolo. Matikueyichiuakan Jehová uan matiktlasojkamatilikan nochi tlen techmaka. Matikiluikan matechyolchikaua ijkuak titetlapouiaj. Noijki matikiluikan matechpaleui matitlaxikokan ijkuak titlajyouiaj uan matechpaleui amo matechyoltilana tlen amo kuali. Nochipa matiktlatlaujtikan Jehová uan amikaj nion amitlaj matechtsakuili ijkon matikchiuakan. w23.05 7 párrs. 17, 18

¿Tleka timonechikouaj? Ijkon tikchiuaj porque tiknekij tikueyichiuaskej Jehová (Sal. 26:12; 111:1). Axkan okachi panotok tlen amo kuali, ikinon timoyolchikauaj inuan tokniuan ijkuak timonechikouaj (1 Tes. 5:11). Ijkuak titlanankiliaj kanin timonechikouaj, tikueyichiuaj Jehová uan timoyolchikauaj inuan tokniuan. Pero onka seki tlamantli tlen uelis kichiuas amo ijkon matikchiuakan. Xamo sapanoua timomojtiaj uan amo titlanankiliaj. Noijki xamo tikajkouij miak uelta toma pero tokni akin tlamachtijtok amo techiluia matitlanankilikan. ¿Tlen uelis techpaleuis? Pablo okijto: “Moneki timosepanyolchikauaskej”. Matikilnamiktokan uelis tikinyolchikauaskej tokniuan maski amo miak tlamantli tikijtoskej ijkuak titlanankiliskej. Ijkon amo okachi timomojtiskej ijkuak titlanankiliskej. Pero maski amo titlanankiliaj ijkon ken tiknekiskiaj, tiyolpakij ijkuak oksekimej tlanankiliaj (1 Ped. 3:8). w23.04 20 párrs. 1-3

¡Yokijtojkaj! Judíos akinmej okatkaj kanaj 70 xiuitl ompa Babilonia yiueliskia mokopaskiaj Israel (Esd 1:​2-4). San Jehová ueliskia kinpaleuiskia judíos. Porque babilonios ayakmo okinkajkauayaj akinmej okinuikayaj Babilonia (Is. 14:​4, 17). Pero okimoaxkatijkej Babilonia uan tekiua tlen opejki tlanauatia okijto judíos yiueliskia mokopaskiaj. Ikinon nochtin judíos uan akinmej okinpiayaj infamilias omonekiaya kipejpenaskej kox kisaskiaj noso amo. Sekimej okitakej oui ijkon kichiuaskej. Sekimej yokipiayaj miak xiuitl uan sapanoua oui nejnemiskiaj uejka. Miakej judíos omoskaltijkej Babilonia ikinon san ompa otlaixmatiayaj. Okimatiayaj ompa Israel omoskaltijkej iuejkatatajuan. Oksekimej okipiayaj miak tlamantli ompa Babilonia. Ikinon xamo okitakej oui kikauaskej inkaluan, kanin otlanemakayaj uan yaskiaj itech okse altepetl tlen amo okixmatiayaj. w23.05 14 párrs. 1, 2

ITlajtol toTajtsin Dios techiluia matitlaxikokan, matiteiknomatikan uan matitetlasojtlakan. Lucas 21:19 kijtoua: “Iwa tla nochi nonkixikoskeh, nonmomakixtiskeh”. Colosenses 3:12 kijtoua matiteiknomatikan. Noijki 1 Tesalonicenses 4:​9, 10 kijtoua: “Porke inewia Totajtsi Dios yonomechmachti kenijki moneki nonmotlasojtlaskeh non nochteh. [...] Pero axa tokniwah, tomechtlatlaujtiah okachi mamomiakili nomolasojtlalis”. Nonmej tlajtolmej okinmijkuililijkej akinmej yotlaxikojtokaj, yoteiknomatiayaj uan yotetlasojtlayaj. Pero omonekiaya ok mochijchikauaskej para ijkon kichiuaskej. Tejuan noijki moneki ijkon tikchiuaskej. Pero ¿tlen techpaleuis ijkon matikchiuakan? Matimomachtikan tlen okinpaleui tokniuan itech achto siglo uan ken uelis tikchiuaskej ken yejuan. Ijkon uelis timoyektlaliskej para titlaxikoskej itech ueyi tlajyouilistli. Ijkon ijkuak peuas ueyi tlajyouilistli, tikmatiskej tlen tikchiuaskej uan nochipa titlaxikoskej. w23.07 3, 4 párrs. 4, 8

Nin ojtli axkan techpaleuiaj matikueyichiuakan Jehová ken ye kineki uan satepan techteochiuas ika iTekiuajkayo. Ikinon moneki tinejnentoskej itech “Ojtli tlen Santo” maski tiyetoskej tlapejpenalmej noso amo (Juan 10:16). Itech 1919 miakej tlakamej, siuamej uan konemej opejkej kisaj itech Ueyi Babilonia tlen kijtosneki nochtin religiones tlen tlakajkayauaj. Yejuan opejkej nejnemij itech ojtli tlen santo. Ijkuak judíos okiskej Babilonia, Jehová okichi amitlaj makintsakuili itech ojtli ijkuak mokopaskiaj Israel (Is. 57:14). ¿Okichi Jehová amitlaj matechtsakuili itech “Ojtli tlen Santo”? Kema ijkon okichi. Ijkuak ayamo oajsiaya 1919, Jehová okipejpenki sekimej tlakamej yolkualmej para kiyektlaliskej ojtli (Is. 40:3). Yejuan otlapaleuijkej para miakej akinmej yolkualmej makisakan itech Ueyi Babilonia. Ijkon uelis kiueyichiuaskiaj Jehová ken ye kineki inmiuan oksekimej tlen opejkej ijkon kichiuaj. w23.05 15, 16 párrs. 8, 9

Jehová kineki matipakikan uan matiktekichiuilikan ika nochi toyolo (2 Cor. 9:7). Ikinon ¿tleka moneki timochijchikauaskej okachi tiktekichiuiliskej maski ualeua amo tiknekij ijkon tikchiuaskej? Matikitakan tlen okichi apóstol Pablo. Ye okijto: “Niknajnawatia nokuerpo iwa niktoktia manechtlakita” (1 Cor. 9:​25-27). Pablo okichi tlen Jehová okinauati maski amo okinekiaya kichiuas. ¿Okiyolpaktiaya Jehová tlen okichiuaya Pablo? Kema. Ye okiteochi porque sapanoua okitekichiuili (2 Tim. 4:​7, 8). Jehová yolpaki ijkuak okachi timochijchikauaj tiktekichiuiliskej maski tikitaj oui. ¿Tleka? Porque tiktlasojtlaj uan tikchiuaj tlen yotikijtojkej maski ualeua amo techpaktia. Jehová techteochiuas tla timochijchikauaskej ijkon ken okiteochi Pablo (Sal. 126:5). Xamo okachi techyolinis matiktekichiuilikan Jehová ijkuak tikitaskej techteochiua. w23.05 29 párrs. 9, 10

Apóstol Pablo okijto sekimej yetoskia ken kochtokej, ikinon amo momakixtiskej. Ijkuak ikaj kochi amo kikaki tlen panotok nion amo kimachilia ken tlanesi. Noijki amo kimatij ijkuak itlaj miak ipati panotok nion ueli itlaj kichiuaj. Axkan miakej ijkon katej, yetoskia ken kochtokej (Rom. 11:8). Amo kitaj tlen kiteititia tikatej “iksemi tonatijmeh” uan noijki amo kimatij yiualajsitok ueyi tlajyouilistli (2 Ped. 3:​3, 4). Pero tejuan tikmatokej yiualajsitok ueyi tlajyouilistli ikinon moneki matiijsatokan (1 Tes. 5:6). Akin moyolseuijtok uan kuali mokuayejyekoua, kuali kipejpena tlen kichiuas. ¿Tleka miak ipati ijkon matikchiuakan? Uelis timokajkalakiskej itech política uan tikchiuaskej tlen oksekimej kichiuaj. Noijki ijkuak okachi yiajsiki itonal Jehová sekimej okachi kinekiskej matikchiuakan tlen yejuan kichiuaj. Pero amo moneki matimotekipachokan porque iespíritu toTajtsin Dios techpaleuis matimoyolseuijtokan uan kuali matikpejpenakan tlen tikchiuaskej (Luc. 12:​11, 12). w23.06 9, 10 párrs. 6, 7

¿Tlen timokuayejyekouaj ijkuak tikkakij itoka Sansón? Xamo timokuayejyekouaj okatka se tlakatl sapanoua chikauak. Melauak okatka chikauak pero noijki okichi itlaj tlen amo kuali. Jehová okitak sapanoua otlaneltokaya ikinon okika makijkuilokan itech Biblia tlen okichi para techmachtis. Jehová okichi Sansón makichiua miak tlamantli para kinpaleuis israelitas. Satepan ijkuak yoixpoliuik, Jehová okiyekanki Pablo para makijkuilo itoka Sansón itech hebreos capítulo 11 kanin okijto miakej sapanoua otlaneltokakej (Heb. 11:​32-34). Sansón okineltokak Jehová kipaleuiskia maski sapanoua otlajyouijtoka. Techyolchikaua tlen okipanok uan techmachtia miak tlamantli. w23.09 2 párrs. 1, 2

Techpaleuis matitlaxikokan tla nochipa tikiluiaj Jehová ken timomachiliaj (1 Tes. 5:17). Uelis axkan amo sapanoua titlajyouijtokej. Pero ¿tlen tikchiuaj ijkuak itlaj amo techpaktia, amo tikmatij tlen tikchiuaskej noso timotekipachouaj? ¿Tikiluiaj Jehová matechpaleui? Tla axkan nochipa tikiluiaj Jehová matechpaleui, noijki ijkon tikchiuaskej ijkuak okachi techtlajyouiltiskej. Tikneltokaskej Jehová techpaleuis ijkuak monekis (Sal. 27:​1, 3). Uelis titlaxikoskej ijkuak panos ueyi tlajyouilistli tla axkan titlaxikouaj ijkuak itlaj techpanoua (Rom. 5:3). Miakej tokniuan kijtouaj okachi tlaxikouaj ijkuak itlaj yokinpanok. Yejuan kitaj Jehová kinpaleuia ijkuak tlajyouiaj uan okachi kineltokaj ye kineki kinpaleuis. Ijkon satepan okachi tlaxikouaj (Sant. 1:​2-4). w23.07 3, 4 párrs. 7, 8

Jehová teajsikamati porque ye yolyamanki uan teiknomati. Ijkon okiteititi ijkuak kinmixpoloskia akinmej ochantiayaj Sodoma. Jehová okintitlanki sekimej ángeles makinmiluitij Lot uan ifamilia macholokan kanin tepeyo. Pero ye amo okinekiaya ompa yas porque omomojtiaya. Ikinon okitlatlaujti Jehová makikauili ye iuan ifamilia mokauaskiaj altepetl Zóar. Jehová uelis kichiualtiskia makitlakamati pero amo ijkon okichi. Ye okikauili Lot uan ifamilia ompa mauiaj maski noijki okinekiaya kipojpolos non altepetl (Gén. 19:​18-22). Satepan Jehová noijki okinmiknomatki akinmej ochantiayaj Nínive. Jehová okititlanki profeta Jonás para makinmiluiti kinmixpoloskia porque okatkaj sapanoua amo yolkualmej. Pero Jehová okinmiknomatki uan okintlapojpolui porque yejuan omoyolkopkej (Jon. 3:​1, 10; 4:​10, 11). w23.07 21 párr. 5

Jehoás okitekichiuili Jehová porque teopixki Jehoiadá okipaleui. Okatka ken se kuauitl tlen ineluayo amo uejkatlan otoktoka uan omonekiaya kitlaliliskej se kuauitl tlen kipaleuiskia amo mauetsi. Porque ijkuak oixpoliuik teopixki Jehoiadá, miakej opejkej kixnamikij Jehová ikinon Jehoás ayakmo otlaneltokak. Tlen okipanok Jehoás techmachtia amo uelis tiktekichiuiliskej Jehová san porque tokniuan noso tofamilia techpaleuiaj. Tejuan moneki toselti timomachtiskej, timokuayejyekoskej uan nochipa tiktlatlaujtiskej Jehová. Ijkon kuali iuan timouikaskej, okachi tiktlasojtlaskej uan tiktlakaitaskej (Jer. 17:​7, 8; Col. 2:​6, 7). Jehová amo techiluia matikchiuakan miak tlamantli. Eclesiastés 12:13 kijtoua: “Xiktlakaita akin melauak toTajtsin Dios uan xikintlakamati itlanauatiluan, nochi nin moneki kichiuas tlaltikpaktlakatl”. Tla tiktlakaitaj Jehová ijkuak titlajyouiskej uelis titlaxikoskej uan amo keman tikkauaskej Jehová. w23.06 18, 19 párrs. 17-19

Kanin peua versículo 5 ijkin kijtoua: “Akin okatka ipan trono okijto” (Apoc. 21:5a). Itech amochtli Apocalipsis Jehová eyi uelta otlajto. Ikinon sapanoua miak ipati tlen kijtoua versículo 5 kanin peua porque tlen ompa kijtoua ye okijto. Ijkon okijto Jehová uan amo okijto se ángel nion amo okijto Jesús. Non techpaleuia okachi matikneltokakan ninmej tlajtolmej. Jehová “amo tlakajkayaua” (Tito 1:2). Ikinon matikneltokakan tlen kijtoua Apocalipsis 21:​5, 6. Okijto: “Ne nochi nikyankuilijtok”. Tlen toTajtsin Dios okijto kijtosneki mochiuas satepan pero ye okijto ken yetoskia yimochijtok porque ye kimatok melauak ijkon mochiuas (Is. 46:10). w23.11 3, 4 párrs. 7, 8

Pedro omonekiaya mochijchikauas para amo motlapololtis. Matikitakan seki tlamantli tlen okichi. Se tonal okajuak Jesús ijkuak ye okijto omonekiaya tlajyouis uan mikis para mochiuaskiaj profecías tlen katej itech Biblia (Mar. 8:​31-33). Satepan Pedro uan oksekimej apóstoles omokualanijkej porque okinekiayaj kimatiskej akin okachi oueyititoka (Mar. 9:​33, 34). Youak ijkuak yikimiktiskiaj Jesús, Pedro okinakastek se tlakatl (Juan 18:10). Noijki non youak omomojti uan eyi uelta okijto amo okixmatiaya Jesús (Mar. 14:​66-72). Saiktlami sapanoua ochokak. Pedro sapanoua omoyolkokouaya pero Jesús amo okijto ayakmo uelis itlaj kichiuaskia. Ijkuak toTajtsin Dios okiyoliti Jesús, ye okikauili Pedro makiteititi kox ok okitlasojtlaya. Ye okilui mayeto yolyamanki uan makinmalui ichkauan (Juan 21:​15-17). Pedro ika nochi iyolo okichi tlen okilui Jesús. Ikinon ye inuan oksekimej okatkaj Jerusalén tonal pentecostés uan yejuan achto okinpejpenkej ika espíritu santo. w23.09 22 párrs. 6, 7

Pedro noijki okinmilui oksekimej tlayekankej makinmaluikan ichkauan toTajtsin Dios (1 Ped. 5:​1-4). Kuali tikmatij tlayekankej kintlasojtlaj tokniuan uan kinekij kinmaluiskej. Pero ualeua xamo kimachiliaj amo ueli ijkon kichiuaj porque amo majxiliaj noso sotlauaj. ¿Tlen uelis kichiuaskej tlayekankej tla ijkon kinpanoua? Makiluikan Jehová tlen kimachiliaj. Pedro okijkuilo: “Akin weleti tlapalewia makimpalewi oksikimeh, makichiwa ika nochi ichikawalis non Dios okimák” (1 Ped. 4:11). Xamo tokniuan itlaj kinpanoua tlen amo uelis kiyektlaliskej. Pero tlayekankej makilnamikikan Jesucristo uelis okachi kinpaleuis axkan uan noijki itech xochitlali. Jehová kineki yejuan makintlasojtlakan tokniuan, makinmaluikan uan makinmititikan tlen moneki kichiuaskej. w23.09 29, 30 párrs. 13, 14

Amo matikchiuakan tlen mokuayejyekouaj oksekimej. Uelis tikkauaskej Jehová uan ayakmo tiktlakamatiskej tla timokuayejyekoskej ken oksekimej (1 Cor. 3:19). “Inmixtlamatilis n tlaltikpaktlakah” kichiua makichiuakan tlen yejuan kinpaktia. Matikitakan tlen okinpanok tokniuan tlen omonechikouayaj Pérgamo uan Tiatira. Sekimej opejki auilnemij uan opejki kinueyichiuaj teotsitsintin ijkon ken okichiuayaj oksekimej. Jesús okinmajuak nonmej tokniuan porque okitekauiliayaj maauilnemikan (Apoc. 2:​14, 20). Axkan xamo oksekimej kinekiskej matimokuayejyekokan ijkon ken yejuan mokuayejyekouaj. Xamo tofamilia noso oksekimej techiluiskej matikchiuakan tlen techpaktia uan amo matiktlakamatikan Jehová. Uelis techiluiskej amo tlajtlakoli tikchiuaskej tlen tiknekij uan ayakmo techpaleuia tlen kijtoua Biblia. Ualeua xamo timokuayejyekoskej Jehová amo techyekiluia tlen moneki tikchiuaskej. Uan xamo tiknekiskej ‘tikixpanawiskeh itlajkuilol Dios’ (1 Cor. 4:6). w23.07 16 párrs. 10, 11

María omonekiaya yetos yolchikauak porque kipiaskia se konetl maski ayamo omonamiktiaya. Amo okimatiaya ken kiskaltis se konetl pero omonekiaya kiskaltis akin yetoskia Mesías. María ayamo keman omotekaya iuan se tlakatl pero omonekiaya kiluis José yokipiaya se konetl (Luc. 1:​26-33). ¿Ken omoyolchika María? Okinkauili oksekimej makipaleuikan. Okitlajtlani ángel Gabriel ken kichiuaskia tlen Jehová okinauati (Luc. 1:34). Satepan oyajki itech se altepetl tlen kajki Judá kanin okatka tepeyo uan okitato Elisabet tlen okatka ifamiliar. Elisabet opaki uan okiseli espíritu santo, ikinon okilui María ikonetsin tlapaleuiskia para mochiuaskia se profecía (Luc. 1:​39-45). María okijto Jehová “ika ichikaualis yokichi miak tlamantli tetlajtlachialti” (Luc. 1:​46-51). Jehová okinpaleui ángel Gabriel uan Elisabet makiyolchikauakan María. w23.10 14, 15 párrs. 10-12

Katej 144,000 (ciento cuarenta y cuatro mil) tlen yokinpejpenkej ika espíritu santo uan kuali mouikaj iuan Jehová. Yejuan yetoskej teopixkej iuan Jesús (Apoc. 14:1). ToTajtsin Dios kinpejpena ika iespíritu santo maski ok katej nikan tlaltikpak uan kinselia ken ikoneuan. Cuarto tlen okipiaya tabernáculo uan okitokayotiayaj Santo kineskayotia 144,000 (ciento cuarenta y cuatro mil) kuali mouikaj iuan toTajtsin Dios (Rom. 8:​15-17). Cuarto tlen okipiaya tabernáculo uan okitokayotiayaj Santísimo kineskayotia iluikak kanin kajki Jehová. “Tsotsoli tilauak” tlen okitlajkoxelouaya Santo uan Santísimo kineskayotia icuerpo Jesús. Icuerpo amo okikauiliaya mauia iluikak para yetoskia teopixki tlen tlayekana itech templo espiritual. Ijkuak topatka okitemakak icuerpo yetoskia ken okintlapoli ojtli tlapejpenalmej para mayakan iluikak. Tlapejpenalmej noijki moneki kikajteuaskej incuerpo para uelis yaskej iluikak (Heb. 10:​19, 20; 1 Cor. 15:50). w23.10 28 párr. 13

Gedeón amo okualanki ijkuak okitenejkej tlakamej tlen opouiayaj itech altepetl Efraín (Juec. 8:​1-3). Ye okinkak uan okinpaleui mamoyolseuikan. Tlayekankej tlen ixtlamatkej kichiuaj ken Gedeón. Tla ikaj kinteneua, yejuan achto kuali kikakij uan satepan kinankiliaj (Sant. 3:13). Ijkon kinpaleuiaj tokniuan kuali mayetokan. Gedeón amo okinek moueyinekis ijkuak okintlanili madianitas uan okinmilui israelitas makiueyichiuakan Jehová (Juec. 8:​22, 23). ¿Ken kiteititiskej tlayekankej kichiuaj ken Gedeón? Moneki kiueyichiuaskej Jehová ijkuak itlaj kuali kichiuaj (1 Cor. 4:​6, 7). Matikijtokan tokniuan kiluiaj se tlayekanki kuali otlamachti. Ye uelis kinnankilis otlamachti tlen kijtoua iTlajtol toTajtsin Dios uan kuali titlamachtiaj porque ialtepe techmachtia. Miak ipati tlayekankej makitakan kox kiueyichiuaj Jehová ijkuak tlamachtiaj noso san yejuan moueyinekij. w23.06 4 párrs. 7, 8

Uelis timotlajtlaniskej tla tikitaj Jehová amo san niman technankilia, “¿okachi ipati tlen niktlajtlanilia Jehová?”. Tejuan timokuayejyekouaj tlen tiktlajtlaniliaj okachi techpaleuis. Pero xamo tlen tiknekij satepan amo techpaleuis. Xamo tiknekij tikyektlaliskej itlaj pero Jehová okachi kimati ken kiyektlalis. Noijki xamo tlen tiktlajtlaniliaj Jehová amo kineki ijkon matikchiuakan (1 Juan 5:14). Matimokuayejyekokan ipapanuan se telpochtli. Yejuan okitlatlaujtijkej Jehová makipaleui intelpoch para nochipa makitekichiuili uan mota kuali tlen okitlajtlanilijkej. Pero Jehová amikaj kichiualtia makitekichiuili. Ye kineki tinochtin matikueyichiuakan inuan tokoneuan porque ijkon tikpejpenaj tikchiuaskej (Deut. 10:​12, 13; 30:​19, 20). Pero ¿tlen uelis kitlajtlaniliskej Jehová ipapanuan non telpochtli? Uelis kiluiskej makinpaleui para kipaleuiskej intelpoch makitlasojtla Jehová uan kuali iuan mamouika (Prov. 22:6; Efes. 6:4). w23.11 21 párr. 5; 23 párr. 12

¿Tleka tikijtouaj ijkuak tikinyolchikauaj oksekimej tikteititiaj tikintlasojtlaj? Se amochtli kijtoua tlajtoli “ximosepanyolchikauakan” kijtosneki “tiyetoskej inauak ikaj para tikyolchikauaskej ijkuak sapanoua tlajyouia”. Ijkuak tikyolchikauaj se tokni tlen tlajyouia tikpaleuiaj nochipa makitekichiuili Jehová. Tikteititiaj tiktlasojtlaj se tokni ijkuak tikyolchikauaj (2 Cor. 7:​6, 7, 13). ¿Tleka ijkuak titeiknomatij noijki moneki titeyolchikauaskej? Porque ijkuak tikiknomatij akin tlajyouia tiknekij tikyolchikauaskej uan tikpaleuiskej. Achto titeiknomatij uan non techyolinia matiknekikan tikinyolchikauaskej oksekimej. Jehová ijkon kichiua. Pablo okijto “ye toTajtsin Dios tlen sapanoua techiknomati uan nochipa techyolseuia” (2 Cor. 1:3). w23.11 9, 10 párrs. 8-10

Tinochtin akinmej tikchiuaj ken Cristo tikmatij titlajyouiskej. Matimokuayejyekokan tlen okinmilui apóstol Pablo tokniuan tlen okatkaj Tesalónica. Ye okinmilui: “Ijkuak namouan otikatkaj, yotimechiluijkaj titlajyouiskiaj uan namejuan nankimatij ijkon panotok” (1 Tes. 3:4). Tokniuan tlen okatkaj Corinto okinmijkuilili: “Tiknekij xikmatikan tlen ouijkayotl otikpixkej [...] uan otikijtouayaj yitiixpoliuiskiaj” (2 Cor. 1:8; 11:​23-27). Tlen okijto Pablo axkan noijki ijkon techpanoua (2 Tim. 3:12). Tikchiua ken Cristo ikinon xamo yomitspinauijkej moyolikniuan, mofamiliares noso itlaj yomitstoktijkej. ¿Titlajyouia kanin titekipanoua porque amo titlakajkayaua? (Heb. 13:18). ¿Yomitstlajyouiltijkej tekiuajkej porque tikintlapouia oksekimej tlen tikchia tikselis? Pablo okijto matipakikan maski san tlen tlamantli tikixnamikiskej. w23.12 10, 11 párrs. 9, 10

Jacob otlajyoui. Itelpochuan tlen omotokayotiayaj Simeón uan Leví okipinatijkej infamilia uan okisokiotijkej itoka Jehová. Isiua oixpoliuik ijkuak okipixki okse ikone. Noijki Jacob ochantito Egipto ijkuak okipiaya miak xiuitl porque otlaapistik (Gén. 35:​16-19; 37:28; 45:​9-11, 28). Jacob nochipa okineltokak Jehová kiteochiuaskia maski otlajyoui. Jehová noijki okiteititi okipaktiaya tlen okichiuaya Jacob. Jehová okipaleui makipia miak tlamantli. Noijki Jacob okitlasojkamatili toTajtsin Dios porque oksepa okitak José maski okimatiaya yoixpolika. Ye omouikaya iuan Jehová ikinon otlaxiko ijkuak otlajyoui (Gén. 30:43; 32:​9, 10; 46:​28-30). Tejuan noijki ualeua titlajyouiskej pero titlaxikoskej tla kuali timouikaj iuan Jehová. w23.04 15 párrs. 6, 7

Itech Salmo 23, David okijto okineltokaya Jehová okitlasojtlaya uan okimaluiaya. Ompa David okijto Jehová yetoskia ken se tlajpixki tlen kuali iuan omouikaya. David amo omomojtiaya porque okimatiaya Jehová okiyekanaya uan noijki okikauiliaya makipaleui. Okimatiaya Jehová nochipa kitlasojtlaskia. Matikitakan tlen okipaleui David ijkon makineltoka. David okimatiaya Jehová okimaluiaya porque nochipa okimakaya tlen okipolouaya. Noijki okimatiaya kuali iuan omouikaya uan okiseliaya tlen okichiuaya. Ikinon David okineltokaya Jehová nochipa kimakaskia tlen omonekiaya maski san tlen kipanoskia. Amo omotekipachouaya uan oyolpakiaya porque okineltokaya Jehová okitlasojtlaya uan nochipa kimaluiskia (Sal. 16:11). w24.01 28, 29 párrs. 12, 13

Ijkuak otlanki Segunda Guerra Mundial, tokniuan opejki kintlapouiaj oksekimej itech okseki altepemej. Miakej okixmatkej Jehová uan axkan titetlapouiaj ipan nochi tlaltikpak. Axkan akinmej pouij itech Cuerpo Gobernante kikauiliaj Cristo makinyekana. Yejuan mochijchikauaj technauatiskej ijkon ken kinekij Jehová uan Jesús. Nonmej tokniuan kinnauatiaj tlayekankej itech circuito uan oksekimej tlayekankej matechiluikan tlen moneki tikchiuaskej. Tlapejpenalmej tlen tlayekanaj uan oksekimej tlayekankej katej itech “iyekma” Cristo (Apoc. 2:1). Yejuan tlajtlakolejkej ikinon ualeua kichiuaj tlen amo kuali. Ijkon okinpanok Moisés, Josué uan apóstoles (Núm. 20:12; Jos. 9:​14, 15; Rom. 3:23). Pero tikmatij Jesús kiyekana tlakeuali yolmelajki uan tlayekankej uan ijkon kichijtos (Mat. 28:20). Ikinon uelis tikneltokaskej ye okintlali ninmej tokniuan ipatka matechyekanakan. w24.02 23 párrs. 13, 14

Tejuan noijki uelis tikueyichiuaskej Jehová tla tikteititiaj tiktlasojtlaj ijkuak itlaj tikijtouaj uan ijkuak timotlasojkamatij. Ijkuak titetlapouiaj tiknekij oksekimej makinekikan kixmatiskej toTajtsin Dios uan makitlasojtlakan ijkon ken tejuan tiktlasojtlaj (Sant. 4:8). Sapanoua techpaktia tikinmachtiskej oksekimej Jehová kipia kualtsin iyelis, ye tetlasojtla, kichiua tlen kuali, ixtlamatki uan kipia miak chikaualistli. Noijki tikueyichiuaj Jehová uan tikyolpaktiaj ijkuak timochijchikauaj tikchiuaskej ijkon ken ye kichiua. Akinmej techitaj xamo motlajtlaniaj tleka amo tikchiuaj ijkon ken oksekimej (Mat. 5:​14-16). Ualeua xamo uelis tikinmiluiskej tleka amo tikchiuaj ijkon ken oksekimej. Satepan akinmej yolkualmej kinekiskej kixmatiskej toTajtsin Dios. Tikyolpaktiaj Jehová ijkuak tikchiuaj tlen yotikijtojkej (1 Tim. 2:​3, 4). w24.02 10 párr. 7

Para okachi titlaneltokas moneki timomachtis tikchiuas seki tlamantli. Non mitspaleuis okachi xitlapaleui itech tlanechikol, tikpias kanin titekipanos uan ijkon tikpias tlen ika timopanoltis uan tikpaleuis mofamilia. Noijki mitspaleuis kuali timouikas inuan oksekimej. Ximomachti xiktlajtolti se amatl uan xitlajkuilo. Biblia kijtoua akin nochipa kitlajtoltia iTlajtol toTajtsin Dios uan mokuayejyekoua tlen kitlajtoltia, yolpaki uan kuali kisa tlen kichiua (Sal. 1:​1-3). Ijkon kajsikamati ken mokuayejyekoua Jehová uan non kipaleuia kuali mamokuayejyeko tlen kichiuas (Prov. 1:​3, 4). Tokniuan kinekij makinpaleuikan uan makinmachtikan tlen kijtoua Biblia. Tla tikmati tiktlajtoltis se amatl uan kuali titlajkuiloua, uelis timoyektlalis para titlamachtis uan titlanankilis kanin timonechikoua. Ijkon uelis tikinpaleuis tokniuan okachi matlaneltokakan. Noijki mitspaleuis xikijkuilo tlen okachi omitspakti. Non mitspaleuis okachi xitlaneltoka uan uelis tikinyolchikauas tokniuan ika tlen otikijkuilo. w23.12 26, 27 párrs. 9-11

Ijkuak timomojtis ximokuayejyeko tlen kichiuas Jehová satepan ijkuak Satanás ayakmo yetos. Itech ueyi nechikol regional 2014 okipanoltijkej se tlamachtil tlen techpaleuis. Ompa otikitakej se tokni okiluiaya ifamilia tlen kijtoskia 2 Timoteo 3:​1-5 tla yetoskia se profecía tlen mochiuaskia itech xochitlali. Okijto: “Itech xochitlali tiyolpakiskej. Porque nochtin motlasojtlaskej, kinpaktis iTlajtol toTajtsin Dios, amo moueyinekiskej uan yetoskej yolyamankej, kitlakaitaskej toTajtsin Dios, kintlakamatiskej inpapanuan, motlasojkamatiskej uan amo tekauaskej, kintlasojtlaskej infamilia, teajsikamatiskej, amo kinteneuaskej oksekimej para kuali makinmitakan, kimatiskej monauatiskej, yetoskej yolkualmej, kinpaktis kichiuaskej tlen kuali, amo tekajkayauaskej uan kuali mokuayejyekoskej tlen kichiuaskej, sepa amo moueyinekiskej, amo san moyolpaktiskej uan ika nochi inyolo kichiuaskej tlen toTajtsin Dios kineki. Te nochipa inuan ximouika”. ¿Timotlapouiaj inuan tokniuan uan tofamilia ken tiyetoskej ijkuak tichantiskej itech xochitlali? w24.01 6 párrs. 13, 14

Sapanoua tipakij ijkuak tikmatij “Jehová kiyolpaktia tlen kichiuaj itekipanojkauan” (Sal. 149:4). Pero ualeua sekimej sotlauaj uan mokuayejyekouaj Jehová paki tiktekichiuiliaj ken grupo. Pero xamo motlajtlaniaj: “¿Kox tisejse noijki tikyolpaktiaj Jehová?”. Miakej itekipanojkauan toTajtsin Dios tlen yiuejkika okatkaj noijki omokuayejyekouayaj kox okiyolpaktiaya tlen okichiuayaj (1 Sam. 1:​6-10; Job 29:​2, 4; Sal. 51:11). Biblia kijtoua uelis tikyolpaktiskej Jehová maski titlajtlakolejkej. ¿Tlen moneki tikchiuaskej? Moneki tikteititiskej tikneltokaj Jesucristo uan timoapolaktiskej (Juan 3:16). Ijkon oksekimej kitaskej yotimoyolkopkej uan yotikiluijkej toTajtsin Dios tikchiuaskej tlen ye kineki (Hech. 2:38; 3:19). Jehová sapanoua paki ijkuak kita timochijchikauaj iuan timouikaskej. Tikyolpaktiskej Jehová uan kuali iuan timouikaskej tla timochijchikauaj tikchiuaskej tlen otikiluijkej ijkuak ixpan otimotemakakej (Sal. 25:14). w24.03 26 párrs. 1, 2

Uelis tikchiuaskej ken imachtijkauan Jesús tla techiluiskej tekiuajkej ayakmo matitetlapouikan. Uelis tikneltokaskej Jehová techpaleuis matitetlapouikan ikinon matiktlatlaujtikan matechmaka ixtlamatilistli. Matikiluikan Jehová matechpaleui matitlaxikokan ijkuak titlajyouiaj. Xamo titlajyouiaj porque oixpoliuik ikaj akin tiktlasojtlaj. Noijki xamo techtlajyouiltiaj, kanaj techkojkouaj, timoyolkokouaj noso tlajyouia tofamilia. Okachi titlajyouiaj porque onka miak kokolistli uan noijki guerras. Ikinon matiktlatlaujtikan Jehová ika nochi toyolo. Matikiluikan nochi tlen techtekipachoua ijkon ken timotlapouiskiaj iuan se toyolikni. Jehová melauak techpaleuis (Sal. 37:​3, 5). Tla nochipa timotlatlaujtiaj, techpaleuis matitlaxikokan ijkuak titlajyouiaj (Rom. 12:12). Jehová kimati nochi tlen kinpanoua itekipanojkauan uan “kinkaki ijkuak kitlatlaujtiaj makinpaleui uan kinmakixtia” (Sal. 145:​18, 19). w23.05 5, 6 párrs. 12-15

Ijkuak itlaj tikpejpenaskej tikchiuaskej, moneki achto matikitakan “tlen Jehová kineki” uan satepan matikchiuakan (Efes. 5:17). Ijkuak timoyekanaj ika principios bíblicos, tikteititiaj timochijchikauaj tikitaskej ken kita Jehová tlen tiknekij tikchiuaskej. Kuali tikpejpenaskej tlen tikchiuaskej tla timoyekanaj ika principios bíblicos. Satanás kipaktiskia matiktemokan miak tlamantli tlen onka tlaltikpak uan amo matimajxilikan matiktekichiuilikan toTajtsin Dios (1 Juan 5:19). Amo oui tikixnekiskej tomin, tiknekiskej timomachtiskej noso titekipanoskej miak uan ayakmo tiktekichiuiliskej toTajtsin Dios. Tla ijkon tikchiuaskej kijtosneki timokuayejyekouaj ijkon ken akinmej amo kitekichiuiliaj Jehová. Amo kijtosneki tlajtlakoli tikpiaskej seki tlamantli pero amo okachi matikpatioitakan. w24.03 24 párrs. 16, 17