¿Tleka moneki timotemakaskej ixpan Jehová?
“Porke nin yúali onechmonextili se iángel Dios, akin niteaxka inawak iwa niktekitilia” (HECH. 27:23).
1. ¿Tlen moneki kichiuas akin kineki moapolaktis uan tlen tlajtlanilmej tikinnankiliskej?
“¿YOTIMOYOLKOPKI, yotimotemakak ixpan Jehová uan tikneltoka toTajtsin Dios techmakixtia san ika Jesucristo?”. Ijkin kintlajtlaniaj itech ueyi nechikol akinmej kinekij moapolaktiskej. Xamo timotlajtlania ¿tleka moneki motemakaskej ixpan Jehová akinmej kichiuaj ken Cristo? ¿Ken kinpaleuia ijkuak ijkon kichiuaj? ¿Tleka moneki motemakaskej tla kinekij toTajtsin Dios makiseli tlen kichiuaj? Para uelis tikinnankiliskej ninmej tlajtlanilmej, moneki tikmatiskej tlen kijtosneki ijkuak ikaj motemaka ixpan Jehová.
2. ¿Tlen moneki tikchiuaskej para timotemakaskej ixpan Jehová?
2 ¿Tlen kijtosneki timotemakaskej ixpan Jehová? Para tikajsikamatiskej moneki tikitaskej tlen okijto Pablo ijkuak oyaya itech se barco tlen apolakiskia, ye okijto: “Dios, akin niteaxka [...] iwa niktekitilia” (xiktlajtolti Hechos 27:22-24). Miakej “kinnawatijtok n satanás” pero akinmej tikchiuaj ken Cristo tiiaxkauan Jehová (1 Juan 5:19). ¿Ken timotemakaj ixpan Jehová? Ijkuak timotlatlaujtiaj uan tikiluiaj nochipa tiktekichiuiliskej, ijkuak ijkon yotikchijkej uelis timoapolaktiskej.
3. ¿Tlen okiteititi Jesús ijkuak omoapolakti uan ken tikchiuaj ken ye?
3 Ijkuak Jesús omoapolakti, okiteititi inmixpan nochtin okinekiaya kitlakamatis iTajtsin uan ijkon otechmachti tlen moneki tikchiuaskej. Ye amo omonekiaya motemakas ixpan Jehová, porque ijkuak oneski yopouiaya itech altepetl Israel uan yejuan yokatkaj iaxkauan toTajtsin Dios. Ijkuak omoapolakti amo san okitlakamatki itlanauatil Moisés. Okilui Jehová: “Nika nika [...] nikchiwas tlan Tejwatsi tikmonekiltia” (Heb. 10:7; Luc. 3:21). Ijkon okiteititi kichiuaskia nochi tlen iTajtsin kinekiskia. Tejuan noijki ijkon tikchiuaj ijkuak timoapolaktiaj, pero noijki tikteititiaj inmixpan nochtin, yotimotemakakej ixpan Jehová.
¿Ken techpaleuia ijkuak timotemakaj ixpan Jehová?
4. ¿Tlen techmachtia ken omouikayaj David uan Jonatán?
4 Amo san ajauili ijkuak timotemakaj ixpan Jehová. Ipati matikchiuakan tlen otikijtojkej, ¿ken techpaleuis tla ijkon tikchiuaj? Para tikajsikamatiskej matikitakan tlen panoua ijkuak tikchiuaj tlen yotikijtojkej. Para tikpiaskej se toyolikni moneki tikteititiskej kuali iuan timouikaskej, noijki moneki tikchiuaskej tlen yotikiluijkej uan tikmaluiskej. Biblia kijtoua David uan Jonatán kuali omouikayaj uan omotlasojtlayaj, ik non, omokajkej itlaj kichiuaskiaj (xiktlajtolti 1 Samuel 17:57 uan 18:1, 3). Axkan ayakmo miakej mouikaj ijkon ken yejuan, pero tla tikchiuaj tlen yotikijtojkej uan tikteititiaj titetlasojtla uelis tikinpiaskej toyolikniuan (Prov. 17:17; 18:24).
5. ¿Tlen uelis kichiuaskia se tlakeuali tla okinekiaya nochipa yetos iuan iteko?
5 Ompa Israel se tlakeuali uelis kijtoskia tla nochipa kitekichiuiliskia iteko. Itlanauatil Moisés okijtouaya: “Pero tla tlakeuali nochipa kijtoua ‘Amo nikneki nias, porque niktlasojtla noteko, nosiua uan nokoneuan’, iteko kiuikas ixpan toTajtsin Dios tlen melauak. Satepan kiuikas kanin kajki puerta noso itech kuauitl kanin mokitskijtok puerta uan kinakaskoyonis ika se tepostli uitstik. Ijkon nochipa yetos itlakeual” (Éx. 21:5, 6). Ken tikitaj, tlakeuali uelis nochipa yetoskia iuan iteko tla okiluiaya amo okinekiaya yas.
6, 7. (a) ¿Ken techpaleuia ijkuak tikchiuaj tlen tikijtouaj? (b) ¿Tlen moneki tikchiuaskej tla tiknekij timouikaskej iuan Jehová?
6 Ijkuak ikaj monamiktia kitlalia ifirma ipan se amatl, pero moneki kiteititis kichiuas tlen yokijto iuan inamik noso isiua. Tla ome san sekan chantij pero ayamo monamiktiaj inmixpan tekiuajkej, amo uelis san sekan kinmaluiskej inkoneuan uan xamo amo kichiuaskej tlen okimoiluijkej. Noijki amo kuali mouikaj uan amo kichiuaj tlen moneki kichiuaskej, pero tla monamiktiaj inmixpan tekiuajkej, okachi mochijchikauaskej kichiuaskej tlen yokijtojkej (Mat. 19:5, 6; 1 Cor. 13:7, 8; Heb. 13:4).
7 Ijkuak titekipanouaj moneki tikchiuaskej tlen yotikijtojkej. Yiuejkika ijkuak otekipanouayaj omotlapouiayaj uan okijtouayaj tlen kichiuaskiaj (Mat. 20:1, 2, 8). Axkan noijki ijkon panoua, tla kitlaliaj infirma ipan se amatl, ijkuak peuas san sekan tekipanoskej, kinpaleuis para kichiaskej tlen yokijtojkej. Ijkuak tikinpiaj toyolikniuan, timonamiktiaj noso iuan ikaj titekipanouaj nochi kuali kisa tla tikchiuaj tlen yotikijtojkej. Pero tla tiknekij kuali timouikaskej iuan Jehová, moneki ixpan timotemakaskej uan tikiluiskej nochipa tiktekichiuiliskej. Axkan matikitakan ken okinpaleuiayaj ijkuak omotemakayaj ixpan Jehová uan tleka miak ipati tlen okichiuayaj.
Israelitas kuali okatka ijkuak omotemakakej ixpan Jehová
8. ¿Tlen opanok ijkuak israelitas omotemakakej ixpan Jehová?
8 Israelitas omotemakakej ixpan Jehová ijkuak okijtojkej kitekichiuiliskiaj. Jehová okinnechiko iyekapan tepetl Sinaí uan okinmilui: “Tla namejuan kuali nankitlakamatij notlajtol uan melauak nankitlatiaj notlajtolsenkaualis, ijkuakon melauak nanyetoskej noaxkauan tlen nikpatioita itech nochi okseki altepemej”. Satepan nochtin okijtojkej: “Nochi tlen Jehová okijto tiknekij tikchiuaskej” (Éx. 19:4-8). Ijkon omotemakakej ixpan Jehová uan okijtojkej yetoskiaj iaxkauan uan Jehová okijto kinmaluiskia.
9. ¿Ken okatkaj israelitas porque omotemakakej ixpan Jehová?
9 Israelitas amitlaj okintekipachouaya porque okatkaj iaxkauan Jehová. Ye okinmitaya ken ikoneuan, okinmaluiaya uan okintlasojtlaya. Ik non, okinmilui: “¿Uelis kilkauas se siuatl ikone tlen ok kichichitia? Noso ¿amo kiknomatis ikone tlen okatka ijtik? Ninmej siuamej uelis kinmilkauaskej inkoneuan pero ne amo keman nimitsilkauas” (Is. 49:15). Jehová okinmalui israelitas ijkuak okinmakak tlanauatilmej, okintitlanili profetas uan okinmalui ika iángeles. Ik non, salmista okijto: “Kiluia itlajtol Jacob, itlanauatiluan uan tlen kipanos Israel. Amo ijkon okichi iuan okse altepetl” (Sal. 147:19, 20; xiktlajtolti Salmo 34:7, 19 uan 48:14). Ijkon ken Jehová okinmalui israelitas porque okatka iaxkauan, axkan noijki techmaluia ijkuak ixpan timotemakaj.
¿Tleka moneki timotemakaskej ixpan Jehová?
10, 11. ¿Tleka ijkuak tinesij amo tipouij itech ifamilia Jehová?
10 Sekimej mokuayejyekouaj amo moneki motemakaskej ixpan Jehová para uelis kitekichiuiliskej. Pero tla tikilnamikij ken techita Jehová, techpaleuis tikajsikamatiskej tleka ipati ijkon tikchiuaskej. Ken Adán otlajtlakolchi, ijkuak tinesij tinochtin titlajtlakolejkej uan amo tipouij itech ifamilia Jehová (Rom. 3:23; 5:12). Pero tla timotemakaj ixpan Jehová, ye uelis techselis. Matikitakan tleka ijkon tikijtouaj.
11 Maski toTajtsin Dios okinekiaya kuali matiyetokan, ijkuak tinesij totatajuan techpanoltiliaj tlajtlakoli (1 Tim. 6:19). Ijkon panoua porque achto siuatl uan tlakatl otlajtlakolchijkej, ik non, ijkuak tinesij toTajtsin Dios amo techita ken ikoneuan uan amo ueli iuan timouikaj (noijki xikita Deuteronomio 32:5). Ijkuak tinesij amo tipouij itech ifamilia Jehová porque titlajtlakolejkej.
12. (a) ¿Ken uelis timouikaskej iuan Jehová maski titlajtlakolejkej? (b) ¿Tlen moneki tikchiuaskej achto timoapolaktiskej?
12 Maski tinochtin titlajtlakolejkej uelis tiktlajtlaniliskej Jehová matechseli itech ifamilia.a Pero ¿uelis kuali timouikaskej iuan Jehová tla titlajtlakolejkej? Kema, Pablo okijto: “Ijkuak amo otimoyekvikayah ivan toYejwatzi, Ye okichi Ivan ma timoyektlalikah ika imikilis iKone” (Rom. 5:10, Itlajtol Totajtzin Dios [NSUNT]). Ijkon, jkuak timoapolaktiaj yetoskia ken tikiluiaj toTajtsin Dios matechmaka se chipauak totlalnamikilis para uelis kuali iuan timouikaskej (1 Ped. 3:21). Pero achto timoapolaktiskej, moneki tikchiuaskej seki tlamantli. Achto moneki kuali tikixmatiskej Jehová uan itech titlaneltokaskej, satepan moneki timoyolkopaskej uan tikpatlaskej tonemilis (Juan 17:3; Hech. 3:19; Heb. 11:6). ¿Tlen okachi moneki tikchiuaskej?
13. ¿Tleka moneki timotemakaskej ixpan Jehová tla tiknekij tipouiskej itech ifamilia?
13 Para uelis tipouiskej itech ifamilia Jehová, moneki timotemakaskej ixpan ye. ¿Tleka? Matikijtokan se telpochtli amo kinpia itatajuan uan se tlakatl kiluia uelis pouis itech ifamilia, pero tlakatl kiluia telpochtli moneki kitas ken itajtsin, kitlasojtlas uan kitlakamatis. Tla ye ijkon kichiuas tlakatl kiselis ken ikone. Noijki para uelis tipouiskej itech ifamilia Jehová moneki ixpan timotemakaskej uan tikchiuaskej tlen ye techiluia. Biblia kijtoua: “Nokniwah, nomechtlatlaujtia ika iteiknomatilis Dios, ximotemaktikah nomejwah nomonewiah kemi se tlamíktili non yolitok, chipawak ijkó kemi Ye kipaktia” (Rom. 12:1).
Ijkuak timotemakaj tikteititiaj titetlasojtlaj uan titlaneltokaj
14. ¿Tleka ijkuak timotemakaj ixpan Jehová tikteititiaj tiktlasojtla?
14 Ijkuak timotemakaj ixpan Jehová tikteititiaj tiktlasojtlaj. Yetoskia ken ijkuak monamiktiaj, non tonal tlakatl akin kichiua ken Cristo, kiluia siuatl nochipa kitlasojtlas uan kimaluis maski san tlen panos, amo san kitlaliaj ifirma ipan se amatl, kimoiluiaj nochipa san sekan yetoskej uan amo mokajkayauaskej. Tla amo ijkon kichiuaskiaj, amo uelis san sekan chantiskiaj. Noijki ijkon, tla amo timotemakaj ixpan Jehová, amo uelis tipouiskej itech ifamilia uan amo uelis tikpiaskej itlateochiualis (Mat. 22:37).
15. ¿Tleka ijkuak timotemakaj ixpan Jehová tikteititiaj titlaneltokaj?
15 Timotemakaj ixpan Jehová porque itech titlaneltokaj uan tikmatij kuali tiyetoskej tla iuan timouikaj (Sal. 73:28). Xamo ualeua oui tikitaskej tiktekichiuiliskej toTajtsin Dios porque tikatej “intsalko n amokualteh iwa n tlajtlakolchijkeh”. Pero tla timochijchikauaj, ye techteochiuas ijkon ken yokijto (Filip. 2:15; 4:13). Jehová techtlasojtla, ik non, tla tikchiuaj itlaj tlen amo kuali, uelis techtlapojpoluis porque kimati titlajtlakolejkej (xiktlajtolti Salmo 103:13,14 uan Romanos 7:21-25). Jehová techteochiuas tla timochijchikauaj uan tiktlakamatij (Job 27:5).
Tiyolpakiskej tla timotemakaj ixpan Jehová
16, 17. ¿Tleka tiyolpakij ijkuak timotemakaj ixpan Jehová?
16 Ijkuak timotemakaj ixpan Jehová tiyolpakij porque tikmakaj tonemilis ijkon ken okijto Jesús: “Okachi yolpaki akin itlaj kitemaka uan amo ijkuak itlaj kiselia” (Hech. 20:35). Ijkon okichi Jesús ijkuak nikan ouala, ye oyolpakik porque okitekichiuiliaya iTajtsin. Okachi okipatioitaya kinmachtis oksekimej tlen melauak, ik non, ualeua amo omoseuiaya, amo otlakuaya uan amo okichiuaya tlen ye okinekiaya (Juan 4:34). Okiyolpaktiaya kichiuas tlen iTajtsin okinekiaya, ik non, okijto: “Nochipa nikchiwa tlan Ye kipaktia” (Juan 8:29; Prov. 27:11).
17 Jesús okijto ken uelis tiyolpakiskej: “Tla ikaj kineki kichiuas ken ne, makixtopeua tlen kineki kichiuas” (Mat. 16:24). Ijkuak tikixtopeuaj tlen tiknekij tikchiuaskej noso tlen amo kuali, okachi kuali timouikaj iuan Jehová uan non kichiua matiyolpakikan.
18. ¿Tleka okachi tiyolpakij ijkuak timotemakaj ixpan Jehová uan amo ijkuak tiktemouaj okseki tlamantli?
18 Akinmej motemakaj ixpan Jehová uan kichiuaj tlen ye kineki okachi yolpakij uan amo ken akinmej kitemouaj okseki tlamantli noso kinekij kipiaskej tomin. Akinmej tikchiuaj ken Cristo melauak tiyolpakij (Mat. 6:24). Tiyolpakij porque “tejwah san titlapalewijkeh itech iteki Dios” pero nin tekitl tikchiuaj porque tiktlasojtlaj toTajtsin Dios (1 Cor. 3:9). Jehová sapanoua kipatioita tlen tejuan tikchiuaj porque tiyolmelajkej, maski ualeua titlajyouiaj tikmatij satepan oksepa titelpochtiskej uan kuali tiyetoskej porque ye technauatis (Job 33:25; xiktlajtolti Hebreos 6:10).
19. ¿Tleka ipati timotemakaskej ixpan Jehová?
19 Biblia techiluia: “Xiwalmijkuanikah inawak Dios, iwa Ye mijkuanis nomonawak” (Sant. 4:8; Sal. 25:14). Ik non, akinmej motemakaj ixpan Jehová uelis okachi kuali iuan mouikaskej. Itech okse tlamachtil tikitaskej tleka uelis tikneltokaskej kuali tiyetoskej tla timotemakaj ixpan Jehová.
[Nota]
a “Oksikimeh ichkameh” yetoskej ikoneuan toTajtsin Dios hasta ijkuak tlamis mil xiuitl. Pero ijkuak motemakaj ixpan Jehová uelis kitaskej ken inTajtsin uan Jehová uelis kinmitas ken ikoneuan (Juan 10:16; Is. 64:8; Mat. 6:9; Apoc. 20:5).
¿Tlen titlanankiliskia?
• ¿Tlen kijtosneki timotemakaskej ixpan Jehová?
• ¿Ken techpaleuia ijkuak timotemakaj ixpan Jehová?
• ¿Tleka moneki timotemakaskej ixpan Jehová akinmej tikchiuaj ken Cristo?
[Foto]
Okachi tiyolpakiskej tla tikchiuaj tlen otikijtojkej ijkuak otimotemakakej ixpan Jehová