Nanyetoskej se ueyi altepetl tlen tekitij ken teopixkej

1, 2. ¿Tleka omonekiaya ma kimaluikan iixui siuatl?

PAMPA mochiuas itlanekilis Jehová miak ipati tlen achto omoijto itech Biblia. Ijkuak Jehová okijto tlen kichiuaskia itech Edén, okijto: “Nikchiuas ximokualankaita te [Satanás] iuan siuatl. Uan mokualankaitaskej mokoneuan iuan ikoneuan ye”. ¿Tlen panos pampa mokokoliaj? Jehová okijto iixui siuatl ‘kixajxamanis itsonteko’ Satanás, uan ye ‘kikokos iikxi’ iixui siuatl (Gén. 3:15). Satanás uan siuatl melauak mokokoliskiaj, ik non, Satanás kinekiskia kimiktis iixui siuatl.

² Ik non, salmista okitlakuikili toTajtsin Dios: “¡Xikita!, akinmej mitskokoliaj sapanoa tsatsajtsij; uan akinmej melauak mitskokoliaj moueyinekij. Ok ichtaka tlajtojtokej itech moaltepe; uan tlajtojtokej itech akinmej tikinmaluia. Okijtojkej: ‘Xiualakan uan ma tikpojpolokan nin altepetl’” (Sal. 83:2-4). Satanás okinekiaya kinmixpolos ikalchanejkauan kanin nesiskia iixui siuatl. Pampa kimaluiskia iixui siuatl uan melauak mochiuaskia nochi ika Tekiuajkayotl mesiánico, Jehová okintlali okseki tlajtolsenkaualismej.

SE TLAJTOLSENKAUALISTLI TLEN KIMALUIA IIXUI SIUATL

3, 4. 1) ¿Keman opejki tlajtolsenkaualistli itech Tlanauatil? 2) ¿Tlen okijtojkej kichiuaskej israelitas? 3) ¿Tlen kimaluiskia tlajtolsenkaualistli itech Tlanauatil?

³ Ijkuak omomiaktilijkej iixuiuan Abrahán, Isaac uan Jacob, Jehová okintlali ken se ueyi altepetl: yiuejkika altepetl Israel. Ika Moisés, Jehová okichi se tlajtolsenkaualistli iuan israelitas: tlajtolsenkaualistli itech Tlanauatil. Ye okinmakak itlanauatiluan uan yejuan okijtojkej kintlakamatiskej. Biblia kijtoa: “Moisés [...] okonanki amochtli itech tlajtolsenkaualistli uan okintlajtoltili altepetl. Ijkuakon okijtojkej: ‘Nochi tlen Jehová okijto tiknekij tikchiuaskej uan tiktlakamatiskej’. Ijkuakon Moisés okonanki estli uan okiajtsolui altepetl uan okijto: ‘Nikan kajki ieso tlajtolsenkaualistli tlen Jehová okichi namouan ika nochi ninmej tlajtolmej’” (Éx. 24:3-8).

⁴ Tlajtolsenkaualistli itech Tlanauatil opejki itech tepetl Sinaí itech xiuitl 1513 achto itech xiuitl 1. Ika nin tlajtolsenkaualistli toTajtsin Dios okipejpenki altepetl Israel ken ialtepe. Ijkuakon omochi inJuez, akin Kitemaka Tlanauatilmej uan inTekiua (Is. 33:22). Tlen okipanok altepetl Israel techmachtia tlen panoa ijkuak tikintlakamatij itlanauatiluan Jehová uan tlen panoa ijkuak amo tikintlakamatij. Tlanauatil okijtoaya amo ma monamiktikan iuan akinmej amo otlaneltokayaj itech Jehová, noijki okijtoaya amo ma kinueyichiuakan teotsitsintin. Tlanauatil okimaluiaya iixui Abrahán pampa amo ma moijtlako (Éx. 20:4-6; 34:12-16).

5. 1) ¿Tlen uelis kipiaskiaj israelitas tla kichiuaskiaj ken kijtoa tlajtolsenkaualistli itech Tlanauatil? 2) ¿Tleka toTajtsin Dios ayakmo okinseli israelitas?

⁵ Tlajtolsenkaualistli itech Tlanauatil noijki okintlali sekimej teopixkej tlen kiteititiskiaj akinmej satepan yetoskiaj teopixkej tlen okachi kipiaskiaj inpati (Heb. 7:11; 10:1). Noijki tla israelitas kintlakamatiskiaj itlanauatiluan Jehová uelis yetoskiaj “se ueyi altepetl tlen tekitij ken [...] teopixkej” (xiktlajtolti Éxodo 19:5, 6). Pero israelitas amo okiselijkej Mesías, iixui Abrahán. Ik non, toTajtsin Dios ayakmo okinseli.

6. ¿Tlen okichi Tlanauatil?

⁶ Ken israelitas amo okatkaj yolmelajkej, yejuan ayakmo uelis yetoskiaj se ueyi altepetl tlen tekitij ken teopixkej. ¿Kijtosneki amo otlapaleui Tlanauatil? Amo. Ika Tlanauatil kimaluiskiaj iixui siuatl, uan noijki uelis kixmatiskiaj Mesías. Uan nin omochi ijkuak ouala Cristo uan sekimej okixmatkej. Ik non, Biblia kijtoa “itech Cristo omochiwako nochi tlan kijtoa itlanawatil” (Rom. 10:4). Pero ¿axkan akinmej uelis mochiuaskiaj se ueyi altepetl tlen tekitij ken teopixkej? Jehová okichijchi se yankuik tlajtolsenkaualistli pampa se yankuik altepetl.

MOCHIUA SE YANKUIK ALTEPETL

7. ¿Tlen okijto Jehová ika teotlajtojki Jeremías?

⁷ Miak xiuitl achto tlamiskia tlajtolsenkaualistli itech Tlanauatil, Jehová okijto ika teotlajtojki Jeremías ken kitlaliskia se yankuik tlajtolsenkaualistli iuan altepetl Israel (xiktlajtolti Jeremías 31:31-33). Nin yankuik tlajtolsenkaualistli amo okatka ken tlajtolsenkaualistli itech Tlanauatil, pampa ika nin yankuik tlajtolsenkaualistli ayakmo omonekiaya ma kinmiktikan yolkamej pampa uelis kintlapojpoluiskej intlajtlakoluan. ¿Ken mochiuaskia nin?

8, 9. 1) ¿Tlen kichiuas ieso Jesús? 2) ¿Tlen uelis kiseliskej akinmej katej itech yankuik tlajtolsenkaualistli? (Xikita tlaixkopinal tlen ika peua tlamachtil.)

⁸ Miak xiuitl satepan, itech tonal 14, metstli nisán, xiuitl 33, Jesús okichi iCena toTeko. Ijkuak otlajtojtoka itech copa tlen okipiaya vino, Jesús okinmilui 11 itlatitlaniluan yolmelajkej: “Nin kopa [kijtosneki, TNM] noesso non ika timotlajtolsenkawa, iwa motoyawas por nomejwah” (Luc. 22:20). Itech Mateo tiktlajtoltiaj tlen okijto Jesús itech vino: “Nin [kijtosneki, TNM] noesso non ika nimotlajtolsenkawa nomowah, nin noesso motoyawas para miakeh makintlapojpolwilikah intlajtlakolwah” (Mat. 26:27, 28).

⁹ Estli tlen okitemakak Jesús okichi ma yeto yankuik tlajtolsenkaualistli. Ieso noijki kichiua ma techtlapojpoluikan totlajtlakoluan uan ayakmo oksepa ma kinmilnamikikan. Jesús amo kiyektlalia nin yankuik tlajtolsenkaualistli. Pampa ye amo keman otlajtlakolchi, amo omonekiaya ma kitlapojpoluikan. Pero toTajtsin Dios okitekitilti ieso Jesús pampa kinpaleuis tlaltikpaktlakamej. Noijki uelis kinseliskia ken ikoneuan oksekimej tlaltikpaktlakamej yolmelajkej tlen okinpejpenkej ika espíritu santo (xiktlajtolti Romanos 8:14-17). Ken ixpan toTajtsin Dios amo kipiaj tlajtlakoli, katej ken Jesús, iKone toTajtsin Dios. Noijki tlanauatiskiaj iuan Cristo uan kipiaskiaj itlaj tlen altepetl Israel okipolo, uelis yetoskej se ueyi altepetl tlen tekitij ken teopixkej. Itech akinmej tlanauatiskej iuan Cristo tlatitlanil Pedro okijto: “Nomejwah Dios onomechpéjpenki. Nomejwah non tiopixkeh de Dios, nomejwah nonyolchipawakeh, se pueblo non iaxka Dios. Para nonkitematiltiskeh tlan tetlajtlachialti kichiwa, Akin onoméchnotski kan tleyuálistli iwa onomechwík xinemikah itech itlawil tetlajtlachialti” (1 Ped. 2:9). ¡Melauak miak ipati yankuik tlajtolsenkaualistli! Kitekaualia sekimej imachtijkauan Jesús noijki ma mochiuakan iixuiuan Abrahán.

PEUA YANKUIK TLAJTOLSENKAUALISTLI

10. 1) ¿Keman opejki yankuik tlajtolsenkaualistli? 2) ¿Tleka opejki itech Pentecostés?

¹⁰ ¿Keman opejki yankuik tlajtolsenkaualistli? Amo opejki ijkuak Jesús okichi iCena toTeko. Nin peuaskia ijkuak Jesús kitemakaskia ieso uan kimakaskia Jehová itech iluikak. Noijki omonekiaya ma kinpejpenakan ika espíritu santo akinmej tlanauatiskej iuan Jesús. Ik non, yankuik tlajtolsenkaualistli opejki itech Pentecostés itech xiuitl 33, ijkuak sekimej imachtijkauan Jesús tlen yolmelajkej okinpejpenkej ika espíritu santo.

11. 1) ¿Tleka ika yankuik tlajtolsenkaualistli akinmej judíos uan akinmej amo judíos uelis yetoskej itech Israel espiritual? 2) ¿Keski tlaltikpaktlakamej yetoskej itech yankuik tlajtolsenkaualistli?

¹¹ Maski Jehová okilui Jeremías kitlaliskia se yankuik tlajtolsenkaualistli, tlajtolsenkaualistli itech Tlanauatil otlanki ijkuak opejki yankuik tlajtolsenkaualistli (Heb. 8:13). Ijkuak ijkon opanok, toTajtsin Dios opejki kinselia judíos uan akinmej amo judíos, pampa axkan “sirkunsidado[s] itech i[n]yolo. Non sirkunsisión techtlalilia n Espíritu iwa amo porke se kitlakita tlan kijtoa itlanawatil Moisés” (Rom. 2:29). Ika yankuik tlajtolsenkaualistli, Jehová okijto: “Nikintlalis notlanawatilwah itech intlalnamikilis iwa nikintlalis itech inyolo” (Heb. 8:10). Itech nin yankuik tlajtolsenkaualistli katej 144,000. Nin yankuik altepetl kitokayotiaj: altepetl Israel tlen iaxka toTajtsin Dios, kijtosneki, Israel espiritual (Gál. 6:16; Apoc. 14:1, 4).

12. ¿Tleka tikijtoaj tlajtolsenkaualistli itech Tlanauatil noijki ijkon ken yankuik tlajtolsenkaualistli?

¹² ¿Tleka tikijtoaj tlajtolsenkaualistli itech Tlanauatil noijki ijkon ken yankuik tlajtolsenkaualistli? Tlajtolsenkaualistli itech Tlanauatil okiyektlaliayaj Jehová uan altepetl Israel, uan yankuik tlajtolsenkaualistli kiyektlaliaj Jehová uan Israel espiritual. Itech achto tlajtolsenkaualistli okinpaleui Moisés, uan itech yankuik tlajtolsenkaualistli kinpaleuia Jesús. Itech ome tlajtolsenkaualismej okitekitiltijkej estli: tlajtolsenkaualistli itech Tlanauatil okitekitiltiaya inmieso yolkamej, uan itech yankuik tlajtolsenkaualistli Jesús okinoki ieso. Ijkuak okatka tlajtolsenkaualistli itech Tlanauatil, Moisés okiyekanaya altepetl Israel, itech yankuik tlajtolsenkaualistli Jesús akin tlayekana itech tlanechikol, noijki kiyekana Israel espiritual (Efes. 1:22).

13, 14. 1) ¿Ken mouika yankuik tlajtolsenkaualistli iuan Tekiuajkayotl? 2) ¿Tlen omonekiaya pampa Israel espiritual uelis tlanauatis iuan Cristo itech iluikak?

¹³ ¿Ken mouika yankuik tlajtolsenkaualistli iuan Tekiuajkayotl? Itech nin yankuik tlajtolsenkaualistli kisaj sekimej tokniuan tlen uelis yetoskej tekiuajkej uan teopixkej itech Tekiuajkayotl tlen kajki iluikak. Nin altepetl noijki iixui Abrahán (Gál. 3:29). Ik non, yankuik tlajtolsenkaualistli techmatiltia melauak omochi tlajtolsenkaualistli iuan Abrahán.

¹⁴ Ken yotimomachtijkej, yankuik tlajtolsenkaualistli kiyektlalia Israel espiritual uan noijki kinkauilia akinmej katej itech non altepetl ma tlanauatikan iuan Cristo. Pero ok moneki se tlajtolsenkaualistli tlen kinpaleuis akinmej tlanauatiskej iuan Cristo itech Tekiuajkayotl tlen kajki iluikak, pampa uelis tekitiskej ken ueyi tekiuajkej uan teopixkej.

SE TLAJTOLSENKAUALISTLI TLEN KICHIUA OKSEKIMEJ MA TLANAUATIKAN IUAN CRISTO

15. ¿Tlen tlajtolsenkaualistli okichi Jesús iuan itlatitlaniluan yolmelajkej?

¹⁵ Ijkuak Jesús okichi iCena toTeko okichi se tlajtolsenkaualistli iuan 11 itlatitlaniluan yolmelajkej. Miakej kitokayotiaj tlajtolsenkaualistli itech Tekiuajkayotl (xiktlajtolti Lucas 22:28-30). Itech nin tlajtolsenkaualistli amo kajki Jehová, nin se tlajtolsenkaualistli tlen okichi Jesús iuan imachtijkauan tlapejpenalmej. Ijkuak Jesús okijto “ijkó kemi Notajtsi [okichi se tlajtolsenkaualistli nouan, TNM]”, ye otlajtojtoka itech tlajtolsenkaualistli tlen Jehová okichi pampa yetos ‘nochipa tiópixki, ijkó kemi okatka Melquisedec’ (Heb. 5:5, 6).

16. Ika tlajtolsenkaualistli itech Tekiuajkayotl, ¿tlen kiseliaj akinmej yokinpejpenkej?

¹⁶ Maski 11 itlatitlaniluan Jesús sapanoa otlajyouijkej amo keman okikajkej. Tlajtolsenkaualistli itech Tekiuajkayotl okinmatilti yetoskej iluikak, kanin yetoskej ken ueyi tekiuajkej uan teopixkej. Pero amo san 11 itlatitlaniluan yolmelajkej tlanauatiskej iuan Jesús. Jesucristo ika se kochtemikilistli okilui tlatitlanil Juan: “Akin tlatlanis, nikkawilis mamotlali nowa kan ne nitlanawatijtok, ijkó kemi ne onitlátlanki iwa onimotlali iwa n Notajtsi kan tlanawatijtok” (Apoc. 3:21). Ik non tikijtoaj tlajtolsenkaualistli itech Tekiuajkayotl noijki kinnamiki 144,000 tokniuan tlen yokinpejpenkej (Apoc. 5:9, 10; 7:4). Nin tlajtolsenkaualistli kinpaleuia pampa yejuan uelis tlanauatiskej iuan Jesús itech iluikak. Nin ken ijkuak se ichpochtli kipejpenaj pampa ma monamikti iuan se ueyi Tekiua, uan ijkuakon peua tlanauatia. Biblia kitokayotia “inovia” Cristo uan kijtoa kajki “kemi se íchpochtli chipawak” tlen monamiktis (Apoc. 19:7, 8; 21:9; 2 Cor. 11:2).

MELAUAK XITLANELTOKA ITECH ITEKIUAJKAYO TOTAJTSIN DIOS

17, 18. 1) Xikyekijto ken chikuase tlajtolsenkaualismej tlen otimomachtijkej mouikaj iuan Tekiuajkayotl. 2) ¿Tleka uelis melauak titlaneltokaskej itech Tekiuajkayotl?

¹⁷ Sejse tlajtolsenkaualismej tlen yotimomachtijkej yichikome uan axkan mouikaj iuan Tekiuajkayotl (xikita recuadro “¿Ken kichiuas toTajtsin Dios itlanekilis?” tlen kajki itech okse tlamachtil). Nin techmachtia Tekiuajkayotl mokitskijtok itech tlajtolsenkaualismej. Ik non, onka miak tlamantli tlen techpaleuia melauak ma titlaneltokakan itech Tekiuajkayotl mesiánico. Melauak nochi nin tlamantli kitekitiltijtok toTajtsin Dios pampa kichiuas itlanekilis pampa Tlaltikpak uan tlaltikpaktlakamej (Apoc. 11:15).

¹⁸ ¿Ikaj uelis kijtos Tekiuajkayotl amo techmakas tlateochiualismej? Melauak tikneltokaj iTekiuajkayo toTajtsin Dios uelis kiyektlalis nochi ouijkayotl tlen axkan tikpiaj. Ik non, ¡ika miak yolpakilistli ma tikintlapouikan oksekimej tlen kichiuas toTajtsin Dios! (Mat. 24:14.)