Ma tikpatioitakan titekitiskej iuan Jehová
“Titlapalewijkeh itech iteki Dios.” (1 COR. 3:9)
1. 1) ¿Ken kita Jehová tekitl? 2) ¿Tlen kinmaka nochtin akinmej okinchijchi?
JEHOVÁ nochipa yolpaki ijkuak tekiti (Sal. 135:6; Juan 5:17). Uan kineki ángeles uan tlaltikpaktlakamej noijki ma yolpakikan, ik non, kinmaka tekitl tlen kinyolpaktia. Se neskayotl, okikauili iKone ma kipaleui ijkuak okichijchi nochi (xiktlajtolti Colosenses 1:16). Ik non, Biblia techiluia achto ualaskia Tlaltikpak, Jesús okatka iuan toTajtsin Dios itech iluikak “ken se kuali tekipanojki” (Prov. 8:30).
2. ¿Tleka tikijtoaj Jehová nochipa kinmaka ángeles tekitl tlen kinyolpaktia?
2 Itech nochi Biblia techtlapouia ken Jehová okinmakak tekitl sekimej ángeles. Ijkuak Adán uan Eva otlajtlakolchijkej uan okinkixtijkej itech xochitlali Edén, toTajtsin Dios okintlali “sekimej querubines uan se espada tlen oxotlatoka ma momalakachojto, pampa amo ikaj ma uia itech ojtli ik kanin okatka kuauitl tlen okitemakaya yolilistli” (Gén. 3:24). Uan Apocalipsis 22:6 kijtoa Jehová “yokitítlanki iángel makinmatilti itekitwah tlan totoka tlamochiwas”.
TOTAJTSIN DIOS KINMAKA TEKITL TLALTIKPAKTLAKAMEJ
3. ¿Ken okichi Jesús ijkon ken iTajtsin?
3 Ijkuak Jesús okatka Tlaltikpak okichi nochi tlen Jehová okinauati, uan okichi ika yolpakilistli. Uan ijkon ken Jehová, Jesús noijki okinmakak tekitl imachtijkauan. Okinmilui uelis kichiuaskiaj miak tlamantli, ik non, okinmilui: “Akin nechneltoka, noiwa weletis kichiwas tlan Ne nikchiwa. Iwa weletis kinchiwas okachi weyi, porke Ne nio inawak Notajtsi” (Juan 14:12). Noijki okinmilui omonekiaya tekitiskej chikauak: “Iwa axa kemi ok tlanestok, nikpia niktekitilis Akin onechaltítlanki, porke ajsiki n yúali ijkuak ayakmaka weleti tekiti” (Juan 9:4).
4-6. 1) ¿Tleka tiktlasojkamatiliaj Noé pampa okitlakamatki Jehová? 2) ¿Ken techpaleuia pampa Moisés okitlakamatki nochi tlen Jehová okinauati? 3) ¿Tlen ome tlamantli mochiua ijkuak Jehová kinmaka tekitl tlaltikpaktlakamej?
4 Achto ualaskia Jesús, Jehová okinmakak tekitl sekimej tlaltikpaktlakamej, tekitl tlen kinyolpaktiskia. Maski Adán uan Eva amo okichijkej tekitl tlen toTajtsin Dios okinmakak, oksekimej kema okichijkej (Gén. 1:28). Se neskayotl, toTajtsin Dios okinauati Noé ma kichijchiua se akali pampa ye uan ikalchanejkauan uelis momakixtiskiaj ijkuak atemiskia Tlaltikpak. Uan axkan tiyoltokej pampa Noé otetlakamatki (Gén. 6:14-16, 22; 2 Ped. 2:5).
5 Moisés noijki okitlakamatki nochi tlen Jehová okilui pampa uelis kichijchiuaskia tabernáculo uan noijki kinyekanaskia teopixkej (Éx. 39:32; 40:12-16). Uan noijki techpaleuia pampa Moisés otetlakamatki, ¿ken techpaleuia? Ken okijto tlatitlanil Pablo, tabernáculo uan teopixkej okineskayotijkej itlaj tlen okachi ipati tlen satepan mochiuaskia (Heb. 9:1-5, 9; 10:1).
6 Tekitl tlen toTajtsin Dios kinmaka itekipanojkauan mopatlati pampa mochijtok itlanekilis, pero nochipa kiueyichiua Jehová uan kinpaleuia itekipanojkauan yolmelajkej. Uan ijkon okichi Jesús, ijkuak okatka itech iluikak uan noijki ijkuak ouala nikan Tlaltikpak (Juan 4:34; 17:4). Uan noijki ijkon tikchiuaj ika tekitl tlen axkan tikpiaj (Mat. 5:16; xiktlajtolti 1 Corintios 15:58). ¿Ken kiueyichiua Jehová nin tekitl?
MA TIKPATIOITAKAN TEKITL TLEN TECHMAKA TOTAJTSIN DIOS
7, 8. 1) Xikyekijto tlen tekitl moneki tikchiuaskej axkan. 2) ¿Ken moneki tikseliskej itlayekanalis Jehová?
7 ¿Amo techyolpaktia tikmatiskej Jehová techmaka tekitl tlen miak ipati? (1 Cor. 3:9.) Akinmej kinchijchiuaj Kalmej kanin mochiuaj uejueyij nechikolmej, Kalmej kanin timonechikoaj uan kalmej kanin tekitij iTlaixpantijkauan Jehová, tlapaleuijtokej itech se tekitl ijkon ken okichijkej Noé uan Moisés. Uelis titlapaleuijtokej ijkuak tikchijchiuaj se Kali kanin timonechikoaj noso ijkuak tikchijchiuaj yankuik kali kanin kinyekanaj iTlaixpantijkauan Jehová itech Warwick (Nueva York) (xikita tlaixkopinal tlen ika peua tlamachtil). Tla titlapaleuijtokej, ma tikpatioitakan nin tekitl. Noijki onka se tekitl kanin nochtin uelis titlapaleuiskej. Tetlapouilistli tlen kiueyichiua Jehová uan kinpaleuia akinmej tetlakamatij (Hech. 13:47-49). Ialtepe Jehová techyekana pampa kuali ma tikchiuakan nin tekitl. Ik non, ualeua techmaka yankuik tekitl.
8 Itekipanojkauan yolmelajkej nochipa kitlakamatij tlayekanalistli tlen kinmaka ialtepe Jehová (xiktlajtolti Hebreos 13:7, 17). Uelis achto amo tikajsikamatij tleka moneki tikchiuaskej seki tlamantli. Pero techpaleuia ijkuak tikchiuaj nochi tlen Jehová techiluia ma tikchiuakan.
9. ¿Tlen kuali neskayotl kitemakaj tlayekankej?
9 Tlayekankej kiteititiaj melauak kinekij kichiuaskej itlanekilis Jehová ijkuak chikauak tekitij itech tlanechikol (2 Cor. 1:24; 1 Tes. 5:12, 13). Kinekij tekitiskej chikauak maski san tlen tlamantli panos. Ika miak yolpakilistli kichiuaj tlen kinmiluiaj pampa tetlapouiskej itech iTekiuajkayo toTajtsin Dios. Maski achto sekimej amo okimatiayaj ken tetlapouiskej ika teléfono, kanin moketsaj barcos noso kanin nemij miakej tlaltikpaktlakamej, ijkuak kichiuaj kitaj ken tlapaleuia tekitl tlen kichiuaj. Se neskayotl, eyi precursores tlen tekitij Alemania uan se tlayekanki tlen itoka Michael, omoyektlalijkej pampa tetlapouiskej kanin tlanemakaj tlen yiuejkika amo okintlapouiayaj. Michael kijtoa melauak omomojtiayaj pampa yiuejkika amo otetlapouiayaj kanin tlanemakaj. Ye kilnamiki: “Jehová okimatiaya tlen otikmachiliayaj, pampa non tonal melauak kuali otitetlapouijkej. ¡Melauak otiyolpakiayaj pampa otitlaneltokakej itech Jehová uan pampa otikchijkej ken kijtoa Toteki itech Tekiuajkayotl!”. ¿Tejuan noijki ijkon uelis tikijtoskej? ¿Timochijchikajtokej pampa okse tlamantli titetlapouiskej?
10. ¿Tlen tlamantli okipatlak ialtepe Jehová itech ninmej xiuitl?
10 Ualeua moneki mopatlas seki tlamantli itech kalmej kanin tekitij iTlaixpantijkauan Jehová. Itech xiuitl tlen opanokej sekimej kalmej kanin tekitij tlen amo okachi uejueyij okintsakej uan nochi tekitl axkan kichiuaj itech kalmej tlen okachi uejueyij. Maski nin okichi sekimej tokniuan ma kipatlakan innemilis, satepan okiselijkej miakej tlateochiualismej (Ecl. 7:8). ¡Melauak kipiaj se ueyi tlateochiualistli tlapaleuiskej itech nin ueyi tekitl tlen kichijtok ialtepe Jehová!
11-13. ¿Tlen okichijkej sekimej tokniuan pampa nochi tlen yokipatlak ialtepe Jehová?
11 Techmachtiaj miak tlamantli tokniuan akinmej okipatlakej innemilis pampa okitsakej se kali kanin tekitij iTlaixpantijkauan Jehová. Sekimej yokipiayaj miak xiuitl otekitiayaj itech Betel. Sekimej tokniuan tlen yomonamiktijkej uan akinmej otekitiayaj itech se kali Betel itech Centroamérica okinmiluijkej ma yakan México kanin okachi miakej tekitij itech Betel. Rogelio kijtoa: “Melauak oui otikitakej tikinkauaskej tokalchanejkauan uan toyolikniuan”. Juan, okse tokni tlen otekitito México kijtoa: “Yetoskia ken oksepa se peuas, moneki tikintemoskej yankuikej toyolikniuan, tikmatiskej okseki tlamantli uan okse tlamantli timokuayejyekoskej”.
12 Betelitas tlen otekitiayaj itech oksekimej uejueyij altepemej europeos noijki okitakej oui yaskej Betel tlen kajki Alemania. Nochtin akinmej kinpaktiaj ken motaj tepemej itech Suiza kimatij ken sapanoa oui kikauaskej nin ueyi altepetl. Uan achto, tokniuan akinmej otekitiayaj Austria okinekiayaj yetoskej ken ijkuak ompa okatkaj, pampa amo miakej otekitiayaj Betel.
13 Akinmej oyajkej itech oksekimej altepemej, moneki momatiskej kanin axkan chantiskej, tekitiskej iuan akinmej amo okinmixmatiayaj uan kipiaskej se yankuik tekitl. Noijki moneki momatiskej iuan oksekimej tokniuan itech tlanechikol, tetlapouiskej kanin amo tlaixmatij uan noijki ika okse tlajtoli. Maski oui kipatlaskej nochi nin, miakej betelitas okiselijkej kichiuaskej ijkon. ¿Tleka okichijkej?
14, 15. 1) ¿Ken kiteititiaj miakej tokniuan kipatioitaj kitekichiuiliskej Jehová maski san kanin yetoskej? 2) ¿Ken uelis tikchiuaskej ken yejuan?
14 Grethel kijtoa: “Onikseli nin yoleualistli pampa ijkon nikteititia niktlasojtla Jehová uan amo pampa niyetok itech se ueyi altepetl, kali noso nikpia se tekitl”. Dayska kijtoa: “Nin yoleualistli onechmakak Jehová, ik non, san niman onikseli”. André uan Gabriela noijki kijtoaj: “Otikitakej ijkon uelis tiktekichiuiliskej Jehová uan amo san timotekipachoskej itech tlen tiknekij”. Yejuan kineltokaj ijkuak ialtepe Jehová kipatla seki tlamantli moneki tikseliskej ika yolpakilistli uan amo tikixtopeuaskej.
Okachi kuali: ¡tikpaleuiskej Jehová!
15 Ijkuak kintsakuaj kalmej kanin tekitij iTlaixpantijkauan Jehová, sekimej betelitas kinyoleuaj ma tekitikan ken precursores. Nin opanok ijkuak okintsakej kalmej tlen otikinpiayaj itech Dinamarca, Noruega uan Suecia, pampa uelis kichijchiuaskiaj kali tlen kajki Escandinavia. Tokniuan Florian uan Anja ijkon okinpanok, yejuan okijtojkej: “Tikitaj nin tekitl ken itlaj tlen techyolpaktia. Melauak kuali Jehová ma techtekitilti maski san kanin tiyetoskej. Ika nochi toyolo uelis tikijtoskej yotikinselijkej miakej tlateochiualismej”. Maski amo keman techpanos ijkon ken tokniuan, ¿amo melauak uelis tikchiuaskej ijkon ken tokniuan uan achto tiknekiskej tikchiuaskej tlen kineki toTajtsin Dios? (Is. 6:8.) Jehová nochipa kinpatioita akinmej kipatioitaj kitekichiuiliskej maski san kanin yetoskej.
MA TIYOLPAKIKAN IKA TEKITL TLEN TECHMAKA JEHOVÁ
16. 1) ¿Tlen techiluia Gálatas 6:4? 2) ¿Tlen ueyi tekitl tinochtin uelis tikpiaskej?
16 Ken tinochtin titlajtlakolejkej non kichiua ma timoyejyekokan ika tlen oksekimej kichiuaj. Pero Biblia techiluia san ma tikitakan tlen sejse tejuan uelis kichiuas (xiktlajtolti Gálatas 6:4). Miakej amo tikpiaj se ueyi tekitl itech tlanechikol. Uan amo nochtin uelis titekitiskej ken precursores, misioneros noso betelitas. Pero amo keman ma tikilkauakan nochtin tikpiaj se ueyi tekitl: tikpaleuiskej Jehová ijkuak titetlapouiaj. ¡Se ueyi tlateochiualistli!
17. 1) ¿Tlen tlamantli amo uelis tikchiuaskej pampa ok tlanauatijtok Satanás? 2) ¿Tleka amo ma timoyolkokokan?
17 Pampa ok tlanauatijtok Satanás uelis amo tikchiuaskej nochi tlen tiknekiskej pampa tikchiuaskej itlanekilis Jehová. Pero amo ma timoyolkokokan. Maski tikpiaj tekitl iuan tokalchanejkauan, timokokoaj noso okseki tlamantli amo techkauilia okachi ma tiktekichiuilikan toTajtsin Dios, kema uelis titekitiskej iuan toTajtsin Dios ijkuak tiktematiltiaj iTekiuajkayo uan iToka san kanin tiyetoskej. ¡Nin tekitl melauak miak ipati! Okachi ipati ma tikchiuakan nochi tlen tiuelij tikchiuaj. Noijki ma tiktlatlaujtikan Jehová ma kinpaleui tokniuan akinmej okachi kitekichiuilijtokej. Ma tikilnamikikan Jehová kinpatioita akinmej kiueyichiuaj iToka.
18. ¿Tlen tiknekiskej tikchiuaskej, uan tleka?
18 Maski tinochtin titlajtlakolejkej uelis tikyolpaktiskej Jehová tla iuan titekitij. ¿Melauak tikpatioitaj tiktekichiuiliskej Jehová? Tla ijkon, tiknekiskej tikchiaskej xochitlali pampa tikpiaskej tlen tejuan tiknekij. Ijkuak ajsis non tonal tikpiaskej yolilistli tlen okachi kuali, yolilistli tlen amo keman tlamis uan tiyetoskej ika yolseuilistli uan yolpakilistli (1 Tim. 6:18, 19).
¿Tikpatioitaj titekitiskej iuan Jehová? (Xikita párrafos 16 a 18)
19. ¿Tlen techmakas Jehová satepan?
19 Ken ayakmo miak poliui pampa tiyetoskej itech yankuik tlali, ma timokuayejyekokan itech tlen Moisés okinmilui israelitas achto kimoaxkatiskiaj Tlali tlen Jehová okijto Kinmakaskia: “Uan Jehová moDios melauak kichiuas xikpia okachi miak tlamantli itech nochi moteki” (Deut. 30:9). Ijkuak panos Armagedón, Jehová kichiuas tlen okijto uan kinmakas Tlaltikpak akinmej iuan otekitikej. Ijkuakon tikseliskej se yankuik tekitl: nochi Tlaltikpak tikkuepaskej se kualtsin xochitlali.