¿Technankilia Biblia nochi tlen timotlajtlaniaj?

¿Ijkon yotimotlajtlani? Tla ijkon, amo san tejuatsin. Miakej tlaltikpaktlakamej kinekij kajsiskej intlanankilis tlajtlanilmej tlen okachi inpati itech tonemilis. ¿Uelis tikinmajsiskej?

Miakej tlaltikpaktlakamej kijtoaj kema. ¿Tleka? Pampa okajsikej tlanankilistli itech Biblia. ¿Mitspaktiskia tikmatis tlen kijtoa? Tla timomachtis iuan iTlaixpantijkauan Jehová amo itlaj tiktlaxtlauas.a

Ijkuak moneki se momachtis Biblia, miakej kijtoaj amo majxiliaj, sapanoa oui noso kijtoaj okachi kuali san ijkon ma yetokan. Pero axkan ma tikitakan tlen kijtoaj sekimej tlen opejkej momachtiaj Biblia.

• “Oniaya itech teopan, itech okseki tlaneltokalismej, itech se tlaneltokalistli itoka sij, monasterio budista uan onimomachti Teología itech universidad. Pero amo onechnankilijkej tlen onimotlajtlaniaya. Ijkuakon onechtlajpaloto se iTlaixpantijka Jehová. Sapanoa onechtlajtlachialti pampa onechnankili ika Biblia, ik non, onikseli ma nechmachtikan.” (Gill, Inglaterra.)

• “Miak tlamantli onechtekipachoaya itech tonemilis, pero tlen onechnankiliaya teopixki amo okachi onikneltokaya. Uan se iTlaixpantijka Jehová onechnankili san ika Biblia. Uan ijkuak onechtlajtlani kox oniknekiaya okachi nimomachtis, onikilui kema.” (Koffi, Benín.)

• “Oniknekiaya nikmatis tlen kinpanoa akinmej yomikej. Onikneltokaya yejuan uelis techtlajyouiltiskej uan onimotlajtlaniaya tlen tlanankilia Biblia. Ik non, opejki nimomachtia iuan se noyolikni tlen iTlaixpantijka Jehová.” (José, Brasil.)

• “Opejki niktlajtoltia Biblia, pero amo itlaj onikajsikamatiaya. Se tonal iTlaixpantijkauan Jehová oualajkej nokalijtik uan onechyekiluijkej miak tlamantli tlen satepan panos. Ik non oniknekiaya okachi nikmatis.” (Dennize, México.)

• “Onimotlajtlaniaya kox notech omotekipachoaya toTajtsin Dios. Ik non, opejki niktlatlaujtia toTajtsin Dios tlen moijtoa itech Biblia. Mostlatika. Oualajkej iTlaixpantijkauan Jehová uan onechtlajtlanijkej kox nikneki nimomachtis uan onikijto kema.” (Anju, Nepal.)

Nochi tlen nikan omoijto kipaleuia tlen Jesús okijto: “Ma yolpakikan akinmej kimatij moneki kitemoskej toTajtsin Dios” (Mateo 5:3, TNM). Tinochtin tiknekij tikmatiskej itech toTajtsin Dios. Uan toTajtsin Dios techpaleuia ika Biblia.

¿Ken titlamachtiaj? ¿Ken uelis mitspaleuis? Ma tikitakan.