TLAMACHTIL 01
¿Ken uelis mitspaleuis tlen kijtoua Biblia?
Ualeua tiknekij tikmatiskej miak tlamantli, tleka titlajyouiaj, tleka tiixpoliuij uan tlen techpanos satepan. Noijki techtekipachoua ken uelis tikpiaskej tlen ika timopanoltiskej uan ken uelis tiyolpakiskej iuan tofamilia. Biblia technankilia tlen tiknekij tikmatiskej uan noijki techiluia tlen moneki tikchiuaskej para kuali tiyetoskej. ¿Tikixmati ikaj akin uelis kipaleuis tlen kijtoua Biblia?
1. ¿Tlen technankilia Biblia?
Biblia technankilia: ¿Tleka nikan tikatej? ¿Tleka tlajyouiaj akinmej kichiuaj tlen kuali? ¿Tlen kinpanoua akinmej ixpoliuij? Tla nochtin kinekij kuali yetoskej, ¿tleka onka guerras? Uan ¿tlen kipanos tlaltikpak? Biblia technankilia tlen tiknekij tikmatiskej. Miakej yolpakij porque itech Biblia yokajsikej tlen kinekij kimatiskej.
2. ¿Ken techpaleuia Biblia matiyolpakikan?
Tlen kijtoua Biblia techpaleuia, techiluia tlen moneki tikchiuaskej para tiyolpakiskej iuan tofamilia, techiluia tlen moneki tikchiuaskej para amo san timotekipachojtoskej uan ken techpaktis toteki. Ijkuak timomachtijtiaskej tikajsikamatis “nochi tlen ijkuilitok itech iTlajtol toTajtsin Dios [...] techpaleuia” (2 Timoteo 3:16).
Nin amatlajkuilol amo kipatkayotia Biblia pero mitspaleuis xikajsikamati tlen ompa kijtoua. Ikinon, xikintlajtolti nochi textos uan xikita kox kijtoua ijkon ken timomachtijtok.
MATIMOMACHTIKAN
Tikitaskej miakej yokinpaleui tlen kijtoua Biblia, noijki tlen moneki tikchiuaskej para techpaktis ijkuak tiktlajtoltiaj uan kox techpaleuis tla ikaj techmachtis Biblia.
3. Biblia techyekana
Biblia yetoskia ken techtlauilia, porque techpaleuia matikpejpenakan tlen moneki uan noijki techiluia tlen panos satepan.
Xiktlajtoltikan Salmo 119:105 uan satepan xikitakan tlen namechmachtia.
¿Ken okitaya Biblia akin okijkuilo nin salmo?
¿Ken tikita Biblia?
4. Biblia kijtoua tlen tiknekij tikmatiskej
Se siuatl okajsikamatki Biblia kijtoua tlen yiuejkika okinekiaya kimatis. Xikitakan VIDEO uan satepan xikitakan tlen namechmachtia.
¿Tlen okinekiaya kimatis se siuatl?
¿Ken okipaleui tlen omomachti itech Biblia?
Biblia kijtoua moneki tiktemoskej tlen tiknekij tikmatiskej. Xiktlajtoltikan Mateo 7:7 uan satepan xikitakan tlen namechmachtia.
¿Tikneltoka Biblia kijtoua tlen tikneki tikmatis? ¿Tlen uelis tikmatis itech Biblia?
5. Uelis techpaktis ijkuak tiktlajtoltiaj Biblia
Miakej kinpaktia kitlajtoltiskej Biblia uan kitaj ken kinpaleuia. Xikitakan VIDEO uan satepan xikitakan tlen namechmachtia.
¿Tlen okijtojkej telpochmej uan ichpochmej?
¿Tleka kinpaktia kitlajtoltiskej Biblia?
Tlen Biblia kijtoua techyolchikaua uan techpaleuia. Xiktlajtoltikan Romanos 15:4 uan satepan xikitakan tlen namechmachtia.
¿Mitspaktiskia tikmatis ken techpaleuia uan techyolchikaua Biblia?
6. Tla ikaj techpaleuis, tikajsikamatiskej tlen kijtoua Biblia
Miakej kinpaktia kitlajtoltiskej Biblia inselti pero yokitakej okachi kajsikamatij tla ikaj kinpaleuia. Xiktlajtoltikan Hechos 8:26-31 uan satepan xikitakan tlen namechmachtia.
¿Ken okachi kuali tikajsikamatiskej Biblia? (Xikitakan versículo 30 uan 31).
Se tlakatl tlen ochantiaya Etiopía okipaleuijkej makajsikamati tlen Biblia kijtoua. Axkan miakej noijki okachi kajsikamatij tlen kijtoua Biblia ijkuak ikaj kinpaleuia.
SEKIMEJ KIJTOUAJ: “Amitlaj ipati tiktlajtoltiskej Biblia”.
¿Tejuatsin tlen tikijtoua? ¿Tleka ijkon tikijtoua?
XIKILNAMIKTO
Tlen kijtoua Biblia techpaleuia matiyolpakikan, techiluia tlen tiknekij tikmatiskej uan noijki techyolchikaua.
Matikojpauikan
¿Ken techpaleuia tlen kijtoua Biblia?
¿Tlen technankilia Biblia?
¿Tlen tikneki mamitsnankili Biblia?
NIN NOIJKI MITSPAKTIS
Xikita tleka tlen kijtoua Biblia noijki techpaleuia axkan.
“Biblia nochipa kipia ixtlamatilistli” (Akin Tetlapouijtok, núm. 1, 2018)
Se tlakatl omoyolkokouaya pero xikita ken okiyolchika tlen kijtoua Biblia.
Biblia techpaleuia matiyolpakikan iuan tofamilia, xikita tlen techiluia.
“¿Tlen techpaleuis ma tiyolpakikan?” (¡Ma titlachixtokan!, núm. 2, 2018)
Xikita akin kijtoua Biblia tlanauatijtok nikan tlaltikpak.