¿Tlen yokichi toTajtsin Dios?

Tla tiknekij ikaj tikixmatiskej moneki tikmatiskej tlen yokichi. Noijki tla tikneki tikixmatis toTajtsin Dios moneki tikmatis tlen yokichi. Mitstlajtlachialtis ijkuak tikitas techpaleuia nochi tlen yokichi uan noijki tlen kichiuas.

TOTAJTSIN DIOS OKICHIJCHI NOCHI TLEN ONKA PORQUE TECHTLASOJTLA

Jehová otechchijchi, ik non, techititia iyelis ijkuak “weleti tikitah itech nochi tlan ye okichijchi. Iwa desde ijkuak okichijchi n tlaltíkpaktli, nochi technextilia onka Dios” (Romanos 1:20). Noijki Biblia kijtoa: “Ye okichijchi tlaltikpak ika ichikaualis, ika ixtlamatilis ye okitlali tlaltikpak para ma tlamochiua uan ika itlamatilis okitlali iluikak” (Jeremías 10:12). Nochi tlen okichijchi toTajtsin Dios techititia techtlasojtla.

Sapanoa kuali timomachiliaj porque otechchijchi ken ye (Génesis 1:27). Ik non, tikteititiaj iyelis. Noijki otechchijchi ma tiknekikan ma tikixmatikan uan ijkon timokuayejyekoskej ken ye uan ma tikintlakamatikan itlanauatiluan. Sapanoa tiyolpakij ijkuak timoyekanaj ika itlanauatiluan. Non kichiua iuan ma timouikakan.

Noijki okiteititi techtlasojtla ijkuak otechchijchiuili tlaltikpak. Tlatitlanil Pablo okijto toTajtsin Dios “Ye Akin techaltitlanilia n kiawitl iwa kichiwa kuali matlatlaki, noiwa techmaka tlan techpoloa para matikpiakah tlan tikkuaskeh iwa matiyetokah ika pakílistli” (Hechos 14:17). Ijkuak toTajtsin Dios okichijchi tlaltikpak, amo san otechchijchiuili seki tlamantli. Ye otechmakak sapanoa miak tlamantli uan ijkon tiyolpakiskiaj. Nin kiteititia satepan noijki sapanoa techteochiuas.

Jehová okichijchi tlaltikpak para nochipa itech ma tichantikan. Biblia kijtoa: “Tlaltikpak okinmakak tlaltikpaktlakamej” uan okichijchi para itech “chantiskiaj” (Salmo 115:16; Isaías 45:18). ¿Akinmej itech chantiskej? Biblia kijtoa: “Yolmelauakej yetoskej tlaltikpak uan nochipa itech chantiskej” (Salmo 37:29).

Jehová okichijchi Adán uan Eva para nochipa ma chantikan tlaltikpak. Okinmilui ma chantikan itech xochitlali para ma motlatokikan uan kimaluiskiaj tlaltikpak (Génesis 2:8, 15). Okinmakak kuajkualtsin tekitl ijkuak okinnauati: “Ximomiaktilikan uan ximochiuakan nanmiakej, xiktemitikan tlaltikpak uan xikmaluikan” (Génesis 1:28). Adán uan Eva nochipa uelis yolpakiskiaj. Pero amo okitlakamatkej toTajtsin Dios uan ayakmo ochantikej nochipa itech tlaltikpak. Pero tikitaskej toTajtsin Dios ok kineki nochipa ma tichantikan tlaltikpak. Pero achto ma tikitakan tlen yotechmakak toTajtsin Dios.

TOTAJTSIN DIOS YOTECHMAKAK ITLAJTOL

¿Tleka toTajtsin Dios otechmakak iTlajtol? Porque kineki ma tikixmatikan (Proverbios 2:1-5). Maski Biblia amo nochi technankilis tlen timotlajtlaniaj itech toTajtsin Dios, amo onka okse amochtli tlen uelis technankilis (Eclesiastés 3:11). Pero nochi tlen ijkuilitok itech Biblia techpaleuia ma tikixmatikan toTajtsin Dios. Uelis tikmatiskej ken iyelis ijkuak tikitaj ken techiknomati. Noijki tikitaj akinmej kinselia (Salmo 15:1-5). Noijki tikmatiskej ken kineki ma tikueyichiuakan, ken kineki ma tikpiakan tonemilis uan ken mokuayejyekoa ijkuak tiknekij tikpiaskej miak tlamantli. Biblia techtlapouia itech Jesús uan nin techpaleuia okachi kuali ma tikixmatikan toTajtsin Dios (Juan 14:9).

Jehová otechmakak Biblia para ma tikmatikan ken tiyolpakiskej. Techiluia tlen moneki tikchiuaskej tla tiknekij ma yolpakikan tokalchanejkauan maski tikixnamikiskej ouijkayotl. Satepan tikitaskej Biblia noijki techmachtia tleka titlajyouiaj uan tlen techpanos satepan. Biblia noijki techyekiluia tlen yokichi toTajtsin Dios uan ijkon mochiuas tlen kineki.

Onka miak tlamantli tlen kiteititia toTajtsin Dios otlanauati ma kijkuilokan Biblia. Maski okijkuilojkej kanaj cuarenta tlakamej uan ouejkajkej kanaj 1,600 xiuitl, san se tlamantli techtlapouia itech toTajtsin Dios (2 Timoteo 3:16). San nin amochtli yikipia miak xiuitl uan amo ikaj ueli kipatilia tlen itech ijkuilitok. Biblia yimiak xiuitl kajki maski miakej amo kinekij ma kitlajtolkopakan, amo kinekij ma tikintemakakan uan amo kinekij ma tiktlajtoltikan. Axkan san ye nin amochtli okachi kitlajtolkopaj uan okachi monemaka. Nin tlamantli kiteititia iTlajtol toTajtsin Dios nochipa yetos (Isaías 40:8).

TOTAJTSIN DIOS YOKIJTO KICHIUAS TLEN YOKIJTO

Biblia techiluia toTajtsin Dios kichiuas tlen kijtoa. Achto yotikijtojkej kineki nochipa ma tichantikan itech tlaltikpak. Pero Adán amo okitlakamatki toTajtsin Dios uan otlajtlakolchi. Omikik uan ikoneuan noijki okinpanoltili tlajtlakoli. Biblia kijtoa: “Itlajtlakol se tlakatl n tlajtlákoli okalak itech nin tlaltíkpaktli iwa okualík mikílistli, ijkó noiwa nochteh mikkih porke nochteh otlajtlakolchijkeh” (Romanos 5:12). Adán otlajtlakolchi, ik non, omotak ayakmo mochiuaskia tlen toTajtsin Dios okinekiaya kichiuas. Pero ¿tlen okichi Jehová?

Jehová okiteititi ken iyelis ijkuak okipejpenki tlen kichiuaskia. Nochi okichi ika melajkayotl ijkuak okilui Adán uan Eva tlen kinpanoskia uan noijki okiteititi otetlasojtlaya ijkuak okijto tlen kichiuaskia. Jehová okiteititi ixtlamatki ijkuak okijto tlen kichiuaskia (Génesis 3:15). Okitemakak iKone ma mikiki uan ijkon otechmakixtiko. ¿Tlen kijtosneki?

Okiualtitlanki Jesús ma kinmachtiki oksekimej ken kiyolpaktiskej toTajtsin Dios uan topatka ma mikikia (Mateo 20:28; Juan 14:6). Jesús omotemakak porque amo kipia tlajtlakoli uan nochipa okitlakamatki iTajtsin maski okimiktijkej. Pero Jehová okiyoliti uan oksepa oyajki iluikak. Ijkon uelis tikpiaskej yolilistli tlen amo keman tlamis. Porque itlajtlakol “se tlakatl non amo otetlakitak, miakeh omokopkeh tlajtlakolejkeh. Pero ijkó noiwa, por se tlakatl, Cristo non otetlakitak, miakeh tlakah yetoskeh chipawakeh de intlajtlakol” (Romanos 5:19). ToTajtsin Dios techmakas yolilistli tlen amo keman tlamis porque Jesús topatka omotemakak.

Tlen okichi toTajtsin Dios ijkuak okixnamik Adán techpaleuia okachi ma tikixmatikan. Techmachtia nochipa kichiua tlen kineki (Isaías 55:11). Noijki kiteititia techtlasojtla. Porque toTajtsin Dios “otechnextili techtlasojtla, ijkuak okwaltítlanki Cristo itech nin tlaltíkpaktli non san Ye se Ikone, para matikpiakah yolílistli por Cristo. Ye n tlasojtlálistli: amo tejwah otiktlasojtlakeh Dios, Ye otechtlasojtlak iwa okualtítlanki Ikone para kitemaktis kemi se tlamánali para matechtlapojpolwi de totlajtlakolwah” (1 Juan 4:9, 10).

ToTajtsin Dios okinek kitemakas iKone topatka ma mikiki. Nin kiteititia satepan techteochiuas (Romanos 8:32). ¿Tlen okseki tlamantli yokijto techmakas? Ma tikitakan.