Ijkuak tlaxixini

Se tlakatl itoka Andrew uan chanti Sierra Leona, okijto: “Ayakmo otikmatiayaj tlen tikchiuaskej ijkuak ijkon otechpanok. Otikpolojkej nochi tlen otikpiayaj porque otlatenki uan okatka miak sokitl”.

David akin chanti islas Vírgenes, okijto: “Ayakmo itlaj okatka tokalijtik ijkuak otimokopatoj. Ayakmo otikmatiayaj tlen tikchiuaskej. Notakotsin omotlankuaketski uan opejki choka”.

¿IJKON yomitspanok? Tla ijkon yomitspanok xamo tikmati tlen kimachiliaj akinmej ijkon tlajyouiaj. Yejuan amo kimatij tlen kichiuaskej, mosotlauaj, moyolkokoaj, tlapoloaj uan san kitemikij tlen okinpanok. Miakej ijkuak ijkon kinpanoa ayakmo kinekij yoltoskej porque moyolkokoaj uan mosotlauaj.

Tla otikpolo nochi ijkuak otlaxixinki, xamo ayakmo itlaj tikneki tikchiuas. Xamo timokuayejyekoa ayakmo itlaj ipati tiyoltos. Pero Biblia kijtoa ma timochijchikauakan ma tiyoltokan uan ma tikneltokakan satepan kuali tiyetoskej.

BIBLIA KIJTOA TLEKA MA TIMOCHIJCHIKAUAKAN MA TIYOLTOKAN

Santiago 5:11 kijtoa: “Matikinmitakah kateh ika pakílistli akimeh okixikojkeh n tlaijyowílistli”. Xamo timokuayejyekoa amitlaj ipati oksepa tikchijchiuas mokalijtik. Pero uelis ijkon tikchiuas tla timochijchikauas uan amo san niman tiknekis nochi tikchiuas.

Biblia kijtoa: “Ayakmó yetos [...] chokílistli, nion neyolkókoli” (Apocalipsis 21:4). Ninmej tlajtolmej melauak mochiuaskej ijkuak iTekiuajkayo toTajtsin Dios kikopas tlaltikpak se xochitlali (Salmo 37:11, 29). Ayakmo keman tlaxixinis. Nochi tlen otechtlajyouilti ayakmo yetos. ToTajtsin Dios kijtoa kichiuas nin tlamantli: “Nochi tlamantli tlen achto opanok ayakmo moilnamikis, nion ayakmo yetos itech toyolo” (Isaías 65:17).

Ximokuayejyeko itech nin tlamantli. ToTajtsin Dios akin otechchijchi yokichi miak tlamantli para okachi kuali tiyetoskej satepan. Kineki techyekanas ika iTekiuajkayo tlen kichiuas ma tikpiakan yolseuilistli (Jeremías 29:11). ¿Techpaleuis nin tlamantli ma tiknekikan ma tiyoltokan? Sally tlen itech yotimotlapouijkej, okijto: “Tla timokuayejyekos ken tiyetoskej ijkuak tlanauatis iTekiuajkayo toTajtsin Dios, mitspaleuis xikilkaua tlen omitspanok uan tiyolpakis maski ok tikixnamikis ouijkayotl”.

¿Tikneki tikmatis tlen okachi kichiuas iTekiuajkayo toTajtsin Dios? Timitsyoleuaj okachi xitlatemo. Nin mitspaleuis xikneki tiyoltos maski yotitlajyoui. Pero satepan ayakmo ijkon techpanos. Axkan xikkaki tlen kijtoa Biblia uan mitspaleuis xikixnamiki ouijkayotl. Ma tikitakan seki textos tlen mitspaleuiskej.

Ninmej textos mitspaleuiskej

Kuali ximoseui

“Matimosewitih” (Marcos 6:31).

Ixtlamatkej kijtoaj ijkuak itlaj techpanoa, “ayakmo kuali tikochij. Non kichiua amo ma tikilkauakan tlen otechpanok uan noijki san timoyolkokojtokej”. Ik non, moneki kuali ma timoseuikan.

Xiktlapoui se moyolikni tlen tikmachilia

“Tlen kitekipachoa se tlakatl non tlen kiyolkokoa pero moyolchikaua ijkuak kiluiaj se kuali tlajtoli” (Proverbios 12:25).

Ximotlapoui iuan se mokalchanejka noso iuan se moyolikni. Mitskakiskej, mitsyolchikauaskej uan mitsiluiskej tlen uelis tikchiuas.a

Ximokuayejyeko satepan kuali tiyetoskej

“Pero tejwah tikchiah tlan Dios yokijto techmakas, se yankuik ilwikak iwa se yankuik tlali, iwa ompa yetos milajkachiwálistli” (2 Pedro 3:13).

a Moneki ma mopajti tla ikaj nochipa motekipachoa uan moyolkokoa.