Tlamachtilmej para Toteki akinmej tikchiuaj ken Cristo
1-7 DE OCTUBRE
KEN TECHPALEUIA BIBLIA | JUAN 9, 10
“Jesús kinmaluia ichkauan”
(Juan 10:1-3) ’De milajka, de milajka nomechilia, akin amo kalaki kan ik ikalte n ichkakorral iwa san tsekuini, noni se ichtek. 2 Pero akin kalaki kan ik inkalte n ichkameh, ye intlájpixki iwa ye kinmokuitlawia. 3 N kaltentlamokuitlawi kitlatlapolia n tlájpixki, iwa iichkawah kitenkakih. Ye kinnotsa iichkawah ika intoka, iwa kinkixtia.
(Juan 10:11) Ne nikuali tlájpixki. Se kuali tlájpixki kinmokuitlawia iichkawah, mayamakimiktikah.
(Juan 10:14) ’Ne kuali ni tlájpixki, iwa nikinmixmati akimeh noichkawah, iwa yejwah nechixmatih.
nwtsty multimedia
ichkakorral
Ichkakorral okatka kanin tlajpixkej okintsakuayaj ichkamej nochi yoak uan ijkon amo ikaj okinmichtekiaya nion tekuanimej amo ueli okinkuayaj. Yiuejkika ichkakorraltin tlatlamantli okinchijchiuayaj, sekimej uejueyij uan sekimej amo uejueyij uan amo okuatsaktokaj. Okinchijchiuayaj ika tetl uan san se puerta okipiayaj (Núm. 32:16; 1 Sam. 24:3; Sof. 2:6). Juan okijto okalakiayaj itech ichkakorral kanin okatka akin otlamaluijtoka (Juan 10:1, 3). Tla itech ichkakorral miakej tlajpixkej ompa okintsakuayaj inmichkauan, akin okimaluiaya puerta omonekiaya kinmaluis ichkamej uan mostlatika okintlatlapoliaya tlajpixkej. Tlajpixkej okintsajtsiliayaj inmichkauan, yejuan okintenkakiayaj uan okintokayaj (Juan 10:3-5). Jesús ijkon okijto para kiteititiskia ken kinmaluia imachtijkauan (Juan 10:7-14).
w11-S 15/5 pág. 7 párr. 5
Kalchanejkej tlen nankichiuaj ken Cristo, xiijsatokan
5 Tlajpixki kuali mouika iuan ichkauan, moixmatij uan ichkamej kimatij amo kinkauas. Akin tlajpia kuali kinmixmati ichkauan uan yejuan noijki kuali kixmatij. Kimatij kuali kinmaluis, ik non, kitenkakij uan kitlakamatij. Jesús ijkon okijto: “Nikinmixmati akimeh noichkawah, iwa yejwah nechixmatih”. Ye kuali kixmati tlanechikol. Ika tlajtoli griego “nechixmatih” kijtosneki “melauak kuali kixmatij”. Kuali Tlajpixki kimati ken katej ichkauan: tlen kinpoloa, ken inyelis uan keman motlapololtiaj. Amo keman kinmilkaua, yejuan kuali kixmatij uan kimatij kuali kinyekanas.
(Juan 10:4, 5) Iwa ijkuak yokinkixti nochteh iichkawah, kinyakana. Iwa iichkawah yawih ikuitlapa porke kitenkakih. 5 Pero se non amo kixmati mach iwan yawi, yej kicholiliskeh porke amo kitenkakih se akin amo kixmatih.
cf-S pág. 124 párr. 17
“Okintlapouiaya ika neskayomej”
17 George A. Smith okijkuilo itech amochtli Geografía histórica de la Tierra Santa: “Ualeua tlajko tonal otimoseuiayaj kanin katej pozos tlen katej judea uan ompa oyayaj kanaj eyi noso naui tlajpixkej iuan ichkauan. Nochtin ichkamej san sekan okatkaj uan tejuan otimotlajtlaniayaj ken uelis kinmixmatiskiaj inmichkauan tlajpixkej. Pero ijkuak ichkamej yoatlikej uan yomotlalojtinenkej, tlajpixkej omoxexeloayaj uan okinnotsayaj inmichkauan, ichkamej okitenkakiayaj uan san sekan oyayaj kanin okatka inteko”. Jesús okitekitilti se kuali neskayotl uan ijkon okiteititi tla tejuan tikkakij, tiktlakamatij uan timoyekanaj ika tlen otlamachti, techmaluis “kuali Tlajpixki”.
(Juan 10:16) Noiwa nikimpia oksikimeh ichkameh, non amo kateh ijtik nin korral. Iwa moneki nikualinwikas noiwa. Yejwah nechtenkakiskeh, iwa nochteh yetoskeh sansikah, iwa yetos san se tlájpixki.
nwtsty nota, Juan 10:16
nikualinwikas: Noso “kinyekanas”. Tlajtoli ágo tlen ijkulitok ika griego, kijtosneki “kinualikas”, “kinkalakis” noso “kinyekanas”. Se manuscrito griego tlen yikipia kanaj 200 xiuitl, okitekitilti se tlajtoli griego (synágo) tlen motlajtolkuepa “kinnechikoa”. Jesús, akin Kuali Tlajpixki, kinnechikoa, kinyekana, kinmaluia uan kintlamaka ichkamej tlen katej ijtik nin korral (noso ichkamej tlen amo miakej, ijkon ken kijtoa Luc. 12:32) uan noijki oksekimej ichkamej. Uan nochtin sansekan yetoskej uan kipiaskej san se tlajpixki. Nin kuali kiteititia imachtijkauan Jesús san sekan yetoskej.
Ma tiktemokan ken techpaleuia Biblia
(Juan 9:38) Ijkuakó n tlakatl omotlankuáketski inawak Jesús iwa okili: —Nimitsneltoka, Tejwatsi Noteko.
nwtsty nota, Juan 9:38
omotlankuáketski inawak: Noso “okiueyichi”. Nin tajtoli griego proskynéo kitekitiltiaj ijkuak kiueyichiuaj se teotsin uan motlajtolkuepa “kiueyichiuaj” (Mat. 4:10; Luc. 4:8). Tlakatl tlen amo otlachiaya, okineltokak Jesús otlajtoaya ipatka toTajtsin Dios, ik non, inauak omotlankuaketski. Nin tlakatl amo omokuayejyeko Jesús okatka toTajtsin Dios, ye okimatiaya okatka “Ikone toTajtsin Dios”, Mesías tlen ualaskia (Juan 9:35). Ijkuak omotlankuaketski ixpan Jesús, okichi ken oksekimej okichijkej ixpan profetas, tekiuajkej uan oksekimej tlen otlajtoayaj ipatka toTajtsin Dios, ijkon ken ijkuilitok itech Biblia (1 Sam. 25:23, 24; 2 Sam. 14:4-7; 1 Rey. 1:16; 2 Rey. 4:36, 37). Miak uelta akinmej omotlankuaketsayaj ixpan Jesús, ijkon okichiuayaj para itlaj kitlasojkamatiliskiaj noso porque okitayaj toTajtsin Dios iuan okatka.
(Juan 10:22) Itech sewaya n judíojteh okichiwayah ilwitl porke okilnamikiah nochi xiwitl n tonati ijkuak okiyankuilijkeh n Weyi Tiopa de Jerusalén.
nwtsty nota, Juan 10:22
okichiwayah ilwitl: Ika tlajtoli hebreo nin iluitl omotokayotiaya Janucá (janukkáh) tlen kijtosneki “okiyankuilijkej”. Itech nin iluitl okilnamikiayaj ijkuak okiyankuilijkej teokali ompa Jerusalén, tlen omochi itech xiuitl 165 achto itech xiuitl se. Opeuaya itech tonal 25 metstli kislev, ijkuak yitlamiskia metstli diciembre (sgd, tlaxelol 19) uan ouejkauaya chikueyi tonal. Ueyi tekiua sirio Antíoco IV Epífanes okiteititi sapanoa okikualaniaya Jehová tlen okatka inDios judíos, ik non, amo okitlakaitak teokali. Okichijchi se tepamitl ipan altar kanin nochipa okiuikayaj tlamanali. Itech tonal 25 metstli kislev xiuitl 168 achto itech xiuitl se, okichi ma kinmiktikan pitsomej ipan altar uan otlanauati ma kichiuakan se caldo ika non nakatl. Satepan okajtsolui iteokal Jehová ika non caldo uan ijkon okiteititi sapanoa okikokoliaya. Okintlati ipuertas teokali, otlaxixini kanin omokauayaj teopixkej, okiuikak altar tlen ochijchitoka ika oro, okiuikak mesa kanin okitlaliayaj pan uan noijki candelabro tlen ochijchitoka ika oro. Noijki okichi ma kiueyichiuakan itech iteokal Jehová inteotsin griegos tlen omotokayotiaya Zeus. Ome xiuitl satepan, Judas Macabeo okimoaxkati altepetl uan otlanauati ma kichipauakan teokali. Uan itech tonal 25 metstli kislev, xiuitl 165 achto itech xiuitl se, teokali oksepa okimakakej Jehová uan oksepa nochipa ompa okitlamaniliayaj. Nin opanok eyi xiuitl satepan ijkuak Antíoco okitlamanili Zeus ipan altar. Itech Biblia amo kanaj tikajsij itlaj tlen kiteititia Jehová okipaleui Judas Macabeo ma tlatlani nion amo kijtoa okilui ma kiyektlali teokali. Pero Jehová yokintekitiltijka oksekimej tlakamej ken Ciro tlen oualaya Persia, para oksepa ma kiueyichiuakan (Is. 45:1). Uelis timokuayejyekoskej Jehová okitekitilti se itekipanojka para kichiuas tlen kineki. Itech iTlajtol toTajtsin Dios kijtoa teokali omonekiaya kuali yetos para uelis mochiuaskia tlen omoijto itech Mesías, tlen kichiuaskia uan ken topatka kimiktiskiaj. Noijki levitas omonekiaya kitlamanilijtoskiaj hasta ijkuak Mesías kichiuaskia se ueyi tlamanali: kitemakaskia topatka iyolilis (Dan. 9:27; Juan 2:17; Heb. 9:11-14). Cristo amo okinnauati imachtijkauan ma kichiuakan iluitl tlen itoka fiesta de la Dedicación (Col. 2:16, 17). Amo kanaj kijtoa Jesús noso imachtijkauan okijtojkej amo kuali non iluitl.
8-14 DE OCTUBRE
KEN TECHPALEUIA BIBLIA | JUAN 11, 12
“Ma titeiknomatikan ken Jesús”
(Juan 11:23-26) Jesús okili: —Mokni moyolitis. 24 Marta okili: —Milák, ne nikmati moyolitis ijkuak non yomikeh moyolitiskeh itech n iksemi tonati. 25 Ijkuakó Jesús okili: —Ne niktemaka nemílistli iwa yolílistli. Akin nechneltokas maya mamiki, yolitos nochipa. 26 Iwa nochteh akimeh yolitokeh iwa nechneltokah ayik mikiskeh. ¿Tikneltoka?
nwtsty notas, Juan 11:24, 25
ne nikmati moyolitis: Marta omokuayejyeko Jesús otlajtojtoka itlamian tonal ijkuak kinyolitiskej (Juan 6:39). Ye melauak otlaneltokaya oksepa kinyolitiskej akinmej yomikej. Maski iTlajtol toTajtsin Dios okijtoaya kinyolitiskej akinmej yomikej, sekimej tlen okinmixmatiayaj ken saduceos amo okineltokayaj (Dan. 12:13; Mar. 12:18). Noijki oksekimej tlen okinmixmatiayaj ken fariseos okineltokayaj ijkuak ikaj miki ok yoltok. Marta kuali okimatiaya Jesús okijtoaya kinyolitiskej akinmej yomikej uan noijki okimatiaya Jesús sekimej okinyoliti, maski amo keman ikaj yokiyolitiaya tlen miak tonal yomika ken Lázaro.
Ne niktemaka nemílistli iwa yolílistli: Jesús omikik uan oksepa okiyolitijkej, non kichiua ma tikneltokakan oksepa kinyolitiskej akinmej yomikej. Ijkuak Jesús okiyolitijkej Jehová okimakak chikaualistli para ma kinyoliti akinmej yomikej uan ma kinmaka yolilistli tlen amo keman tlamis (Juan 5:26). Itech Apocalipsis 1:18, Jesús motokayotia “Akin niyolitok” uan kijtoa “Ne nitlanawatia ipan mikílistli iwa ipan miktla”. Jesús kinmaka chialistli akinmej yoltokej uan akinmej yomikej. Ye yokijto kinyolitis akinmej tlanauatiskej iuan itech iluikak uan noijki akinmej yetoskej nikan tlaltikpak tlen kinnauatis (Juan 5:28, 29; 2 Ped. 3:13).
(Juan 11:33-35) Ijkuak Jesús okitak n María chokatok, iwa n judíojteh non okikuitlapantokayah noiwa, Jesús oyoltélinki asta oyolpatsiwik. 34 Iwa okintlajtlani: —¿Kani ononkitookakeh? Yejwah okilijkeh: —Tejwatsi, nika xiwalmuika iwa xikitaki. 35 Iwa Jesús ochokak.
nwtsty notas, Juan 11:33-35
chokatok: Noso “elsijsiui”. Tlajtoli griego tlen motlajtolkuepa “chokatok” kijtosneki mokaki ken tsajtsi. Jesús noijki okitekitilti nin tlajtoli ijkuak okijto kipojpoloskiaj Jerusalén (Luc. 19:41).
oyoltélinki asta oyolpatsiwik: Itech nin tlajtoli katej ome tlajtolmej tlen kuali kiteititiaj tlen okimachili Jesús itech non tonal. Tlajtoli griego tlen motlajtolkuepa “oyoltélinki” (embrimáomai) motekitiltia para kijtoskej tlen melauak ikaj kimachilia tlaijtik, pero nikan moijtoa Jesús melauak omoyolkoko, ik non, oyoltélinki. Tlajtoli griego tlen motlajtolkuepa “oyolpatsiwik” (tarásso) kijtosneki “motekipachoa”. Se tlakatl kijtoa nin kijtosneki “otlajyoui noso omoyolkoko”. Itech Juan 13:21 noijki motekitiltia nin tlajtoli ijkuak moijtoa tlen okimachili Jesús ijkuak omokuayejyekoaya Judas kitemaktiskia (xikita nota, Juan 11:35).
Iwa Jesús ochokak: Tlajtoli tlen motlajtolkuepa (dakrýo) uits itech griego tlen kijtosneki “toixayo” uan kajki itech Lucas 7:38; Hechos 20:19, 31; Hebreos 5:7 uan Apocalipsis 7:17; 21:4. Itech ninmej textos okachi ipati tlajtoli “ixayo” uan amo tlen mokaki ijkuak ikaj choka. Nin tlajtoli motekitiltia san itech Escrituras Griegas Cristianas uan tlen ijkuilitok itech Juan 11:33 okse tlajtoli. Nin motekitiltia para kijtoskej María uan noijki oksekimej judíos ochokakej (xikita nota). Maski Jesús kuali okimatiaya kiyolitiskia Lázaro, omoyolkoko ijkuak okinmitak iyolikniuan otlajyouijtokaj. Okinmiknomatki, ik non, ochokak teixpan. Nin techititia Jesús kinmiknomati akinmej moyolkokoaj ijkuak miki ikaj akin kitlasojtlaj.
(Juan 11:43, 44) Ijkuak ijkí otlanki okijto, chikawak okitsajtsili: —¡Lázaro, xiwalkisa! 44 Ijkuakó n miketl owálkiski kikekemelitiwits ika tsótsoli itech ikxiwah iwa itech imawah, iwa oixtsaktiwalaya ika se tsótsoli. Iwa Jesús okinmili: —Xiktojtomakah iwa xikkawilikah mawia.
Ma tiktemokan ken techpaleuia Biblia
(Juan 11:49) Ijkuakó seme de yejwah non itoka Caifás, non itech non xiwitl okinnawatiaya n tiopixkeh, okinmili: —Nomejwah amitla nonkimatih,
nwtsty nota, Juan 11:49
okinnawatiaya n tiopixkeh: Ijkuak altepetl Israel iselti omonauatiaya, akin okatka ueyi teopixki yetoskia ueyi teopixki hasta ijkuak mikiskia (Núm. 35:25). Pero ijkuak Roma okinauatiaya Israel, tekiuajkej tlen okintlaliayaj romanos uelis kikixtiskiaj noso kitlaliskiaj okse ueyi teopixki. Caifás okachi ouejka okatka ken ueyi teopixki uan amo ken oksekimej tlen satepan yetoskiaj. Okitlalijkej ken ueyi teopixki kanaj itech xiuitl 18 uan okichi non tekitl hasta itech xiuitl 36. Ijkuak moijtoa Caifás okatka ueyi teopixki itech xiuitl 33, uelis Juan okinekiaya kijtos Caifás otlanauati itech non xiuitl ijkuak okimiktijkej Jesús (xikita kanin uelis ochantik Caifás, sgd, tlaxelol 16).
(Juan 12:42) Maski ijkó, miakeh judiojteh okineltokakeh n Jesús, iwa asta sikimeh tlayakankeh itech Weyi Tiopa. Pero amo okitenextiayah teixpa porke okinmawiliayah n fariseos, para amo makinkixtikah itech sinagogas.
nwtsty notas, Juan 12:42
sikimeh tlayakankeh: Tlajtoli griego tlen motlajtolkuepa “tlayakankeh” kijtosneki akinmej okatkaj itech Sanedrín noso tlayekankej judíos tlen okichiuayaj se tlanechikol. Nin tlajtoli noijki motekitiltia itech Juan 3:1 ompa kijtoa Nicodemo noijki okatka tlayekanki uan opouiaya itech intlanechikol judíos.
makinkixtikah itech sinagogas: Noso “ma kinxelokan itech sinagoga”. Tlajtoli griego aposynágogos san motekitiltia itech Juan 9:22; 12:42 uan 16:2. Akinmej okinkixtiayaj itech sinagoga okinkokoliayaj uan ayakmo okinnotsayaj. Yejuan ayakmo ueli omouikayaj iuan oksekimej judÍos, inkalchanejkauan ayakmo okipiayaj tlen ika mopanoltiskej. Itech sinagogas ompa otlamachtiayaj pero ualeua noijki ompa okintlajyouiltiayaj uan okinkixtiayaj (Mat. 10:17).
15-21 DE OCTUBRE
KEN TECHPALEUIA BIBLIA | JUAN 13, 14
“Ijkó kemi Ne onikchi moneki no ijkó xikchiwakah”
(Juan 13:5) Ijkuakó okitekak atl itech se xíkali iwa opé kinmikxipajpaka itlamachtijkawah iwa okinmaxotomaya ika n tsótsoli non ika omotlajkoilpijka.
nwtsty nota, Juan 13:5
kinmikxipajpaka itlamachtijkawah: Yiuejkika itech Israel okintekitiltiayaj kakmej. Okipiayaj inmekayo uan okilpiayaj hasta inmikxitlajko, ik non, omoikxitlaltemiayaj ijkuak onejnemiayaj kanin okatka miak tlalpinoli. Ik non, ijkuak okalakiayaj itech se kali omonekiaya kinkixtiskej inkakuan uan okinmikxipajpakayaj ijkon okiteititiayaj kuali okinseliayaj. Biblia kipia miakej neskayomej kanin kijtoa ijkon okichiuayaj (Gén. 18:4, 5; 24:32; 1 Sam. 25:41; Luc. 7:37, 38, 44). Ijkuak Jesús okinmikxipajpakak imachtijkauan, okinmachti omonekiaya yetoskej yolyamankej uan omonekiaya kinpaleuiskej oksekimej.
(Juan 13:12-14) Ijkuak yotlanki okimikxipajpak itlamachtijkawah, oksepa okimokentili ikapa iwa omotlalito kan mesa, iwa okinmili: —¿Nonkajsikamatih tlan onikchi nomowah? 13 Nomejwah nonnechnotsah Tlamachti iwa Noteko, iwa kuali tlan nonkijtoah, porke milák, Ne Nomotlamachti iwa Nomoteko. 14 Iwa tla Ne Nomoteko iwa Nomotlamachti onomechinpakili nomokxiwah, ijkó noiwa moneki ximosepanikxipajpakakah.
nwtsty nota, Juan 13:12-14
moneki: Noso “moneki kichiuaskej inteki”. Tlajtoli griego tlen nikan motekitiltia, kitekitiltiaj para tlajtoskej itech tomin uan kijtosneki “ikaj tlateuikilia” (Mat. 18:28, 30, 34; Luc. 16:5, 7). “Moneki kichiuaskej inteki” noso “moneki itlaj tikchiuaskej” kijtosneki miak tlamantli (1 Juan 3:16; 4:11; 3 Juan 8).
(Juan 13:15) Porke ijkó kemi Ne onikchi moneki no ijkó xikchiwakah.
w99-S 1/3 pág. 31 párr. 1
Se tlakatl tlen okachi ueyititok, okichi se tekitl tlen amo miakej okichiuayaj
Ijkuak Jesús okinmikxipajpakak imachtijkauan okinmachti omonekiaya yetoskej yolyamankej. Akinmej kichiuaj ken Cristo amo moneki mokuayejyekoskej okachi inpati uan amo mokuayejyekoskej oksekimej moneki nochi ma kinchiuilikan. Amo moneki ma moueyinekikan porque kipiaj miak tlamantli. Okachi kuali, moneki kichiuaskej ken Jesús, ye okijto: “Amo oniwala manechtekitilikah, yej oniwala onitekitiko iwa nimotemakas manechmiktikah iwa ijkó miakeh mamomakixtikah” (Mat. 20:28). Akinmej kichiuaj ken Jesús moneki kinpaleuiskej oksekimej uan kichiuaskej tlen oksekimej amo kinekij kichiuaskej.
Ma tiktemokan ken techpaleuia Biblia
(Juan 14:6) Jesús okinankili: —Ne Ni ojtli nontewika inawak Dios, Ne nomechnonotsa ika milák tlájtoli, iwa Ne Akin kichiwa xiyolitokah. Sanwel akin nechtlakita weletis kalakiti inawak Notajtsi.
nwtsty nota, Juan 14:6
Ne Ni ojtli [...] Ne nomechnonotsa ika milák tlájtoli, iwa Ne Akin kichiwa xiyolitokah: Jesús ye ojtli, ik non, tejuan ueli timouikaj iuan toTajtsin Dios uan tiktlatlaujtiaj (Juan 16:23; Rom. 5:8). Jesús ye tlen melauak porque amo keman otlakajkaya uan okichi tlen melauak. Noijki itech omochijkej miakej profecías tlen kiteititiaj tlen tekitl kineki toTajtsin Dios ma mochiua (Juan 1:14; Apoc. 19:10). Nochi ninmen profecias omochijkej “itech Cristo Jesús” (2 Cor. 1:20). Jesús ye yolilistli, ye omikik topatka, ik non, uelis “kipiaskeh n nemílistli non ayik tlami” (1 Tim. 6:12, 19; Efes. 1:7; 1 Juan 1:7). Noijki ye miakej kinyolitis uan yoltoskej nochipa itech xochitlali (Juan 5:28, 29).
(Juan 14:12) De milajka, de milajka nomechilia: Akin nechneltoka, noiwa weletis kichiwas tlan Ne nikchiwa. Iwa okachi weyi weletis kinchiwas, porke Ne nio inawak Notajtsi.
nwtsty nota, Juan 14:12
Iwa okachi weyi weletis kinchiwas: Jesús amo okijtojtoka milagros tlen kinchiuaskiaj imachtijkauan okachi ipati uan amo tlen ye okinchi. Ye okatka yolyamanki uan okijto imachtijkauan okachi tetlapouiskiaj uan tlamachtiskiaj, tetlapouiskiaj okachi uejkika uan uejka yaskiaj. Tlen okijto Jesús okiteititi okinekiaya imachtijkauan ma kichijtokan tekitl tlen ye okipeualti.
22-28 DE OCTUBRE
KEN TECHPALEUIA BIBLIA | JUAN 15-17
“Ayakmó nonkichiwah tlan yejwah kichiwah”
(Juan 15:19) Tla nomejwah ok nontlajtlakolchijtinemiskiah kemi kichiwah n tlaltikpaktlakah, yejwah nomechtlasojtlaskiah kemi yejwah motlasojtlah. Pero kemi Ne onomechpéjpenki de intlajko n tlajtlakolchijkeh, yika yejwah nomechtlawelitah porke ayakmó nonkichiwah tlan yejwah kichiwah.
nwtsty nota, Juan 15:19
tlaltikpaktlakah: Tlajtoli griego kósmos kijtosneki tlaltikpaktlakamej tlen amo kitlakamatij toTajtsin Dios. San ye Juan okijto Jesús okinmilui imachtijkauan ayakmó nonkichiwah tlan yejwah kichiwah noso amo pouij itech nin tlaltikpak. Ijkuak Jesús saiktlami omotlatlaujti iuan imachtijkauan noijki okijto ome uelta ninmej tlajtolmej (Juan 17:14, 16).
Juan 15:21) Nochi ni nomechtoktiskeh por nonnechtlakitah. Porke yejwah amo kixmatih Akin onechaltítlanki.
nwtsty nota, Juan 15:21
Nochi ni nomechtoktiskeh por nonnechtlakitah: Noso “ipampa notoka”. Itech Biblia tlajtoli “tokayotl” motekitiltia para kijtoskej ikaj ijkon itoka uan tlen kichiua (Mat. 6:9). Ijkuak moijtoa itoka Jesús, noijki kijtosneki tekitl tlen kipia uan tlen okinauati itajtsin ma kichiua (Mat. 28:18; Filip. 2:9, 10; Heb. 1:3, 4). Nika Jesús okiyekijto tleka miakej kinmixnamikiskiaj imachtijkauan: “Porke yejwah amo kixmatih Akin onechaltítlanki”. Tla yejuan kixmatiskiaj, kajsikamatiskiaj tlen kijtosneki itoka Jesús (Hech. 4:12). Kineltokaskiaj okitlali toTajtsin ma tlanauati, “Ye n tlanawati non kinnawatia nochteh n tlanawatijkeh” uan nochtin tlaltikpaktlakamej moneki kitlakamatiskej tla amo kinekij mikiskej (Juan 17:3; Apoc. 19:11-16; noijki xikita Sal. 2:7-12).
(Juan 16:33) Nochi ni nomechilia, para xikpiakah yolsewílistli. Nomejwah nontlaijyowiskeh itech nin tlaltíkpaktli, pero amo ximosotlawakah porke Ne yoníktlanki akin kinawatia nin tlaltíkpaktli.
it-1-S pág. 143
amo ximosotlawakah
Akin kichiua ken Cristo moneki yetos yolchikauak para amo kichiuas tlen amo kuali kichiuaj oksekimej, ijkon yetos yolmelajki ixpan Jehová maski oksekimej kikokoliskej. Jesús okinmilui imachtijkauan: “Nomejwah nontlaijyowiskeh itech nin tlaltíkpaktli, pero amo ximosotlawakah porke Ne yoníktlanki akin kinawatia nin tlaltíkpaktli” (Juan 16:33). IKone toTajtsin Dios amo keman okichi tlen okichiuayaj oksekimej. Jesús otechmakak se kuali neskayotl ijkuak amo keman okichi tlen amo kuali, tejuan noijki uelis timoyolchikauaskej uan amo tikchiuaskej tlen amo kuali kichiuaj oksekimej (Juan 17:16).
Ma tiktemokan ken techpaleuia Biblia
(Juan 17:21-23) para maseititokah nochteh, ijkó kemi Tejwatsi iwa Ne tiseititokeh. Iwa yejwah noiwa maseititokah towah, para makitakah n tlaltikpaktlakah Tejwatsi otechaltítlanki. 22 Ne yonikinmák n weyílistli non Tejwatsi otechmák, para ijkó yejwah maseititokah, ijkó kemi tejwah tiseititokeh. 23 Ne niyetos intech, iwa Tejwatsi tiyetos notech, para ijkó yejwah de milajka maseititokah. Iwa ijkó n tlaltikpaktlakah makimatikah Tejwatsi otechaltítlanki, iwa milák tikintlasojtla ijkó kemi Tejwatsi techtlasojtla.
nwtsty notas, Juan 17:21-23
para maseititokah: Noso “san sekan ma yetokan”. Ijkuak Jesús omotlatlaujti okijto akinmej melauak imachtijkauan moneki “seititoskej” kijtosneki tekitiskej san sekan ijkon ken ye uan iTajtsin “seititokej” porque san sekan tekitij uan mokuayejyekoaj san se tlamantli (Juan 17:22). Itech 1 Corintios 3:6-9, tlatitlanil Pablo okijto akinmej kichiuaj ken Cristo noijki san sekan katej ijkuak kitekichiuiliaj toTajtsin Dios (xikita 1 Cor. 3:8; Juan 10:30; 17:11).
de milajka maseititokah: Noso “melauak san sekan ma yetokan”. Itech nin versículo Jesús okijto akinmej san sekan katej kiteititiaj itlasojtlalis toTajtsin Dios. Uan nin mouika iuan Colosenses 3:14 kanin kijtoa “tlasojtlálistli, ye tlan techyekseitilia”. Nin amo kijtosneki san se tlamantli inyelis kipiaskej, san se tlamantli mokuayejyekoskej noso kichiuaskej san se tlamantli. Nin kijtosneki imachtijkauan Jesús, san se tlamantli tlaneltokaj uan san se tlamantli tlamachtiaj (Rom. 15:5, 6; 1 Cor. 1:10; Efes. 4:3; Filip. 1:27).
(Juan 17:24) Notajtsi, akimeh Tejwatsi otechinmaktili, nikneki mayetokah nowa kan Ne niyetos, para makitakah momawistilis non otechmák, porke techtlasojtla desde ijkuak ayamó okatka n tlaltíkpaktli.
nwtsty nota, Juan 17:24
okatka n tlaltíkpaktli: Tlajtoli griego tlen motlajtolkuepa “okatka” noijki motekitiltia itech Hebreos 11:11, kanin motlajtolkuepa “okipixki” uan kajki iuan tlajtoli ikoneuan. Pero nikan ijkuak motekitiltia tlajtoli “okatka n tlaltíkpaktli” kijtosneki ijkuak Adán uan Eva okinpixkej inkoneuan. Ijkuak Jesús okijto “okatka n tlaltíkpaktli” okineskayoti iuan Abel, uelis nin achto tlakatl tlen uelis ijkuilitos “itech iamatlajkuilol Dios, desde ijkuak opejki n tlaltíkpaktli” (Luc. 11:50, 51; Apoc. 17:8). Ninmej tlajtolmej tlen okinmijto Jesús ijkuak omotlatlaujti, noijki techmachtia Jehová yokitlasojtlaya ikone desde ijkuak Adán uan Eva ayamo okinpiayaj inkoneuan.
29 DE OCTUBRE-4 DE NOVIEMBRE
KEN TECHPALEUIA BIBLIA | JUAN 18, 19
“Jesús okitematilti tlen melauak”
(Juan 18:36) Ijkuakó Jesús okinankili: —Notekiwajyo amo kajki itech nin tlaltíkpaktli. Porke tla ijkó yetoskia, notlakawah motekilmakaskiah para amo manechtemaktikah inmak n judíojteh. Pero Ne amo nitlanawatia nika.
(Juan 18:37) Ijkuakó Pilato okili: —Tla ijkó, ¿te tirey? Jesús okinankili: —Ne Ni Rey ijkó kemi te yotikijto. Ne onitlákatki para nietos Ni Rey iwa oniwala itech nin tlaltíkpaktli para niktematiltis tlan milák. Nochteh akimeh kixmatih iwa kijtoah tlan milák, weleti kikakih notlajtol.
nwtsty notas, Juan 18:37
niktematiltis: Itech Escrituras Griegas Cristianas tlajtoli tlen motlajtolkuepa “niktematiltis” (martyréo), “tlaixpanti” (mártys) “tetlapouis” (martyría) miak tlamantli kijtosneki. Ninmej tlajtolmej kijtosneki, tikijtoskej itlaj tlen melauak tikmatij, pero noijki uelis tikajsikamatiskej ken “itlaj tikijtoskej”, “tikijtoskej tlen melauak” noso “titlajtoskej kuali itech”. Jesús amo san okitematilti tlen okineltokaya, noijki okiteititi ka tlen okichiuaya, okiteititi tlen omoijto melauak panoskia uan melauak tlen okijto kichiuas iTajtsin (2 Cor. 1:20). Kuali omoijto tlen okinekiaya kichiuas toTajtsin Dios ika iTekiuajkayo uan akin tlanauatiskia. Profecías tlen otlajtoayaj itech Mesías omochijkej itech Jesús ijkuak oneski uan hasta ijkuak omikik. Noijki tlen satepan panoskia itech tlajtolsenkaualistli itech Tlanauatil (Col. 2:16, 17; Heb. 10:1). Ik non, uelis tikijtoskej ken otlajtoaya uan tlen okichiuaya Jesús okitematilti tlen melauak.
tlan milák: Ijkuak Jesús okijto tlen melauak, otlajtojtoka itech tlen toTajtsin Dios okinekiaya kichiuas. Itlaj tlen miak ipati tlen kineki kichiuas toTajtsin Dios ika Jesús, “ikone David”, yetos ueyi Teopixki uan ueyi tekiua itech iTekiuajkayo toTajtsin Dios (Mat. 1:1). Jesús okiyekijto tleka ouala tlaltikpak, tleka omochi se tlakatl uan tleka otetlapoui, ouala okitematiltiko tlen melauak itech Tekiuajkayotl. Ángeles noijki okitematiltijkej non tlamantli ijkuak ayamo onesiaya Jesús uan satepan ijkuak oneski ompa Belén itech Judea, kanin oneski David (Luc. 1:32, 33; 2:10-14).
(Juan 18:38a) Pilato okitlajtlani: —¿Tlan kijtosneki milák?
nwtsty nota, Juan 18:38a
¿Tlan kijtosneki milák?: Xamo Pilato okinekiaya Jesús ma kilui tlen melauak pero amo itech tlen ye okijto (Juan 18:37). Tla Pilato melauak okinekiaya kimatis tlen okitlajtlani Jesús, Jesús kinankiliskia. Pero tlen okitlajtlani okiteititi amo melauak okineltokaya, ken kijtoskia: “¿Kox melauak? ¿Tlen kijtosneki non? Non amo melauak”. Uan Pilato oyajki kiauak kanin okatkaj judíos uan amo omochixki ma kinankili Jesús.
Ma tiktemokan ken techpaleuia Biblia
(Juan 19:30) Ijkuak Jesús okiyeko n vinagre okijto: —¡Nochi yomochi! Omokuatolo iwa omikki.
nwtsty nota, Juan 19:30
omikki: Noso “ayakmo omijyoti”. Sekimej ixtlamatkej kijtoaj tlajtoli griego tlen motlajtolkuepa “omikki” kijtosneki Jesús ayakmo omochijchika yoltos porque okitlami nochi tlen okichiuako. Ye amo ikaj okichiualti ma kimiktikan (Is. 53:12; Juan 10:11).
(Juan 19:31) Se tonati achto de n ilwitl de Paskua, n judíojteh amo okinekiah mamokawakah n kuerpojteh itech krus itech sábado, porke okatka weyi tonati. Yika okitlatlautijkeh n Pilato makinmetspostekikah akimeh okinkrusifikarojkah, iwa makinmachiwakah.
nwtsty nota, Juan 19:31
sábado [...] okatka weyi tonati: Tonal 15 de nisán okixmatiayaj ken sábado, maski san tlen tonal okatka (Lev. 23:5-7). Ijkuak nin sábado tlen miak ipati ouetsiaya itech tonal sábado itech non semana (tonal chikome tlen okitekitiltiayaj judíos, opeuaya viernes ijkuak okalakiaya tonaltsin uan hasta sábado ijkuak okalakiaya tonaltsin), okixmatiayaj ken se “weyi” sábado. Tikmatij Jesús omikik se viernes porque ijkuak omikik, mostlatika okatka se “weyi” sábado. Itech xiuitl 31 hasta 33, san itech xiuitl 33, 14 de nisán ouetski se viernes. Ijkon tikajsikamatij Jesús omikik itech 14 de nisán xiuitl 33.