1921: Yopanok cien xiuitl

REVISTA Akin Tetlapouijtok tlen okiski ika inglés itech 1 de enero 1921 okijto: “¿Tlen tekitl miak ipati moneki tikchiuaskej nin xiuitl?”. Non omonankili itech Isaías 61:1, 2: “Jehová onechpejpenki ma nikinmatilti kuali tlajtoli akinmej yolkualmej; [...] para niktematiltis itech kuali xiuitl itlanekilis Jehová uan tonal ijkuak momakopas toTajtsin Dios”, non okinmilnamikti tokniuan omonekiaya tetlapouiskej.

OTETLAPOUIJKEJ UAN OKATKAJ YOLCHIKAUAKEJ

Tokniuan omonekiaya kiteititiskej yolchikauakej uan tetlapouiskiaj; kinmatiltiskiaj “Kuali tlajtoli akinmej yolkualmej” uan akinmej amo yolkualmej “ijkuak momakopas toTajtsin Dios”.

Se tokni tlen ochantiaya Canadá tlen omotokayotiaya John Hoskin okiteititi yolchikauak porque otetlapoui maski okixnamikiayaj. Itech 1921 omotlapoui iuan se ministro metodista uan okilui: “Nikneki ma timotlapouikan tlen tlamachtia Biblia pero amo ma timokualanikan. Maski amo san se tlamantli timokuayejyekouaj uelis kuali timotlapouiskej”. Pero amo ijkon opanok. Tokni Hoskin okijto: “Ijkuak ayamo otiuejkauayaj otimotlapouijtokaj, non tlakatl chikauak okitsak ipuerta uan onikijto xamo tlapanaskia ividrio”.

Tlakatl okilui tokni: “¿Tleka amo tikintlapouia akinmej kichiua tlen amo kuali?”. Tokni Hoskin amitlaj okijto pero ijkuak oyajki omokuayejyeko: “¡Ijkon nikchijtok!”.

Mostlatika tlakatl tlen okatka metodista ok okixnamik tokni ijkuak okinmachijtoka oksekimej. Tokni Hoskin okijto: “Okinmilui akinmej opouiayaj itech ireligión ne san onitlakajkayajtoka itech non altepetl uan omonekiaya nechmiktiskej”. Pero tokni amo omoyolkoko nion omotekipacho. Maski ijkon okipanok ok miakej okintlapoui. Tokni okijto: “Sapanoua oniyolpakik ijkuak miakej onikintlapoui inkalijtik. Sekimej tlen onikintlapoui onechiluijkej: ‘Tikmatij tejuatsin tikchiua tlen toTajtsin Dios kineki’ uan onechtlajtlanijkej kox nechpaleuiskiaj ma nikpia tlen moneki”.

OMOMACHTIAYAJ IUAN INFAMILIA UAN NOIJKI ISELTI

Tokniuan okitlalijkej seki tlamachtilmej itech revista The Golden Age para kinpaleuiskiaj akinmej omomachtiayaj Biblia ma mouikakan iuan Jehová.a Se tlamachtil omotokayotiaya “Juvenile Bible Study” (Tlamachtil para telpokamej uan ichpokamej), okipiayaj tlajtlanilmej. Tetajmej “omonekiaya kinmiluiskej nonmej tlajtlanilmej [inkoneuan] uan kinpaleuiskiaj ika Biblia ma kajsikan intlanankilis”. Sekimej tlajtlanilmej otlamachtiayaj tlen amo oui, ken: “¿Keski amochmej kipia Biblia?”. Oksekimej tlajtlanilmej okinpaleuiaya telpokamej ma yetokan yolchikauakej uan ma tetlapouikan, ken: “¿Akinmej melauak kichiuaj ken Cristo kineltokaj se tonal kintlajyouiltiskej?”.

Programa “Advanced Studies in the Divine Plan of the Ages” (Estudios avanzados sobre el Plan Divino de las Edades) okipiaya tlajtlanilmej tlen okinkixtijkej itech achto tomo de Estudios de las Escrituras, ijkon tokniuan tlen okipiayaj chikauak intlaneltokilis uelis mokuayejyekoskiaj itech nonmej tlajtlanilmej. Nonmej ome programas miakej okinpaleui. Pero itech revista The Golden Age tlen okiski itech 21 de diciembre 1921, okijto ayakmo kinkixtiskiaj nonmej programas. ¿Tleka ijkon okijtojkej tokniuan?

SE YANKUIK AMOCHTLI

Amochtli *El Arpa de Dios* ika inglés.

Nin amatsintli okijtouaya tlen omonekiaya kitlajtoltiskej.

Tarjetas tlen okinpiayaj tlajtlanilmej.

Tokniuan tlen okiyekanayaj tetlapouilistli okitakej omonekiaya kinpaleuiskej akinmej yikin omomachtiayaj Biblia para ijkon momachtiskiaj Biblia ken moneki. Ik non, itech noviembre 1921 okijtojkej okatka se yankuik amochtli tlen itoka The Harp of God (ika español okiski itech 1925 uan okitokayotijkej El Arpa de Dios). Akinmej okiseliayaj non amochtli okinmijkuilouayaj para kiseliskiaj se tlamachtil ika Biblia tlen omotokayotiaya The Harp Bible Study Course. Akin okiseliaya tlamachtil uelis san iselti momachtiskia, non kipaleuiskia ma kajsikamati “tlen mokuayejyekoua kichiuas toTajtsin Dios para akinmej nochipa yoltoskej nikan tlaltikpak”. ¿Ken otlamachtiayaj?

Ijkuak ikaj okiseliaya non amochtli, noijki okimakayaj se tarjeta kanin okijtouaya keski páginas omonekiaya kitlajtoltis. Ijkuak opanouaya se semana tokniuan okititlaniliayaj okse tarjeta tlen okinpiaya tlajtlanilmej tlen omonankiliaya ika tlen yokitlajtoltika uan noijki okijtouayaj tlen omonekiaya kitlajtoltis okse semana.

Kanaj eyi metstli tokniuan okititlaniayaj tlatlamantli tarjetas itech correo akinmej omomachtiayaj Biblia. Ijkon okichiuayaj tokniuan tlen yokipiayaj miak xiuitl noso akinmej amo ueli otetlapouiayaj tekalijtik. Se tokni tlen itoka Anna Gardner, tlen ochantiaya Millvale Pensilvania, Estados Unidos okijto: “Ijkuak okiski non amochtli, okipaleui nokni Thayle okachi ma tetlapoui porque amo ueli onejnemiaya, ye okinchiuaya tarjetas sejse semanas uan ompa okijnmijkuilouaya tlajtlanilmej uan okintitlaniaya”. Ijkuak ikaj otlamiaya omomachtiaya, tokniuan oyayaj ikalijtik uan okseki okimachtiayaj tlen kijtoua Biblia.

Tokni Thayle Gardner kajki ipan isilla de ruedas.

OMONEKIAYA OKACHI MA TETLAPOUIKAN TOKNIUAN

Itlamian sejse xiuitl, tokni Joseph Rutherford okintitlanili se carta tokniuan. Ompa okinmilui: “Axkan okachi otiktematiltijkej tlen kichiuas iTekiuajkayo toTajtsin Dios amo ken okseki xiuitl”. Tokni noijki okinmilui: “Ok tikpiaj miak tekitl. Ik non, xikinyoleuakan oksekimej noijki ma tetlapouikan”. Tokniuan okichijkej tlen tokni Joseph Rutherford okinmilui. Ik non, itech 1922 okiteititijkej yolchikauakej porque okachi okitematiltijkej tlen kichiuas iTekiuajkayo toTajtsin Dios.

Okiteititi kuali omouikaya iuan tokniuan uan amo omomojti

Yiuejkika tokniuan tlen omotokayotiayaj akinmej omomachtiayaj Biblia, sapanoua omotlasojtlayaj porque omopaleuiayaj. Yejuan kuali omouikayaj uan omopaleuijkej ijkuak otlajyouijkej (Prov. 17:17).

Itech 31 de mayo 1921 ompa Tulsa Oklahoma tlen kajki itech altepetl Estados Unidos, okinmiktijkej akinmej amo ixchipajkej. Non opejki porque okijtojkej se tlakatl okiuitek se siuatl ixchipauak uan okitsakuatoj. Kanaj 1,000 tlakamej ixchipajkej okinteuitoj akinmej amo ixchipajkej. Itech altepetl Greenwood ochantiayaj akinmej amo okatkaj ixchipajkej, okalakej kanaj itech 1,400 inkalijtik uan kanin otlanemakayaj uan okintlachtekilijkej. Tekiuajkej okijtojkej okinmixpolojkej 36 pero xamo okachi miakej okinmixpolojkej.

Se tokni tlen itoka Richard Hill uan ochantiaya ompa Greenwood, okijto: “Non youak ne uan nofamilia otimomachtijkej Biblia ken nochipa otikchiuayaj, maski miakej omoteuijtokaj. Ijkuak otitlankej otimomachtijkej otikakej itlajkotia altepetl otlatoponiayaj hasta ijkuak otikochitoj”. Mostlatika 1 de junio okachi opanok tlen amo kuali, tokni okijto: “Sekimej otechiluikoj omonekiaya tiaskej itech se kali kanin okatkaj tekiuajkej”. Ik non, tokni Hill, isiua uan ikoneuan oyajkej itech non kali tlen okatka Tulsa. Ompa kanaj 3,000 soldados okinmaluijkej tlakamej uan siuamej tlen amo ixchipajkej”.

Ijkuakon itlaj okichi se tokni tlen motokayotia Arthur Claus. Ye okijto: “Ijkuak onikkak okintlachtekilijkej ompa Greenwood uan okintlatilijkej inkalijtik, onikijto ma nikitati tokni Hill”.

Tokni Arthur Claus okinmachti 14 konemej ika amochtli El Arpa de Dios.

Ijkuak oajsito ikalijtik tokni Hill ompa okatka se tlakatl tlen okipiaya se rifle. Ye omouikaya iuan tokni Hill uan omokuayejyeko Arthur okintlachtekiliskia uan okitsajtsili: “¿Tleka nikan otiuala?”.

Tokni Arthur kijto: “Tla amo kipaktiskia tlen onikilui, nechmiktiskia, onikilui onimouikaya iuan tokni Hill uan miak uelta onia ikalijtik”. Arthur uan non tlakatl okimaluijkej ikal tokni Hill para amikaj ma tlachteki.

Tokni Arthur san niman okimatki kanin okintitlankej tokni Hill uan ifamilia. Ijkuak okiluijkej Arthur akinmej amo ixchipajkej san uelis ompa kisaskiaj tla se tlakatl tlen omotokayotiaya Barrett tlen okinyekanaya soldados kitlaliskia ifirma itech se amatl. Arthur okijto: “Okatka oui nimotlapouiskia iuan akin otlayekanaya, ijkuak onikilui tlen oniknekiaya nikchiuas, ye onechtlajtlani: ‘¿Tikpaleuis nin familia uan tikmakas tlen ika mopanoltis?’. Ika pakilistli onikilui kema”.

Ijkuak tokni Artur okimakakej amatl, san niman oyajki kanin okatka tokni Hill uan ifamilia. Ijkuak ompa oajsito okimakak amatl se policía tlen ompa okatka, ye okijto: “¡Nin kipia ifirma akin kinyekana soldados! ¿Otikmatiaya nikan ayamo ikaj okikixtijtokaj?”. Artur uan policía tlen otlamaluijtoka san niman okintemotoj tokni Hill uan ifamilia. Ijkuak okinmajsikej otlejkokej itech icarro Artur uan oyajki ikalijtik tokni Hill.

Tokni Arthur okinpaleui tokni Hill uan ifamilia para amitlaj ma kinpano. Tlen tokni okichi okintlajtlachialti miakej porque ye okiteititi okatka yolchikauak uan otetlasojtlaya. Arthur okijto: “Tlakatl tlen okimalui ikal Hill okintlakaitak tokniuan. Miakej opejkej kikakij tlen kichiuas iTekiuajkayo toTajtsin Dios porque okitakej nochtin akinmej tipouij itech ialtepe toTajtsin Dios amo titechikoitaj uan kuali timouikaj”.

a Revista The Golden Age (ika español okiski itech 1932 uan okitokayotijkej Luz y Verdad) pero satepan itech 1937 okitokayotijkej Consolation (ika español okiski itech 1938 uan okitokayotijkej Consolación), 1946 okitokayotijkej ¡Awake! (ika español okiski itech 1947 okitokayotijkej ¡Despertad!).