¿KEN UELIS AYAKMO TITEKOKOLISKEJ?

2 | Amo ximomakopa

Biblia kijtoua:

“Tla aka nomechtoktia itla amokuali [...]. Asta kan weletis, nomejwah xiktemolikah kenijki nonmoyekwikaskeh ika yolsewílistli iwan nochteh. Notlasojikniwah [...], amo san nomejwah ximomakopakah [...]. Porke n tiotlajkuíloli kijtoa: ‘Sanwel Ne nitetlaijyowiltis; Ne nitetlaxtlawis, kijtoa n Toteko’” (ROMANOS 12:17-19).

¿Tlen kijtosneki?

Amo tlajtlakoli tla tikualanij porque ikaj otechchiuili itlaj tlen amo kuali, pero toTajtsin Dios amo kineki ma timomakopakan. Ye techiluia ma timochiakan porque satepan tlayektlalis uan ayakmo ikaj techchiuilis tlen amo kuali (Salmo 37:7, 10).

Nin uelis tikchiuas:

Tla timomakopaj, san tikchiuaskej oksekimej noijki ma momakopakan. Ik non, tla ikaj omitsyolkoko, amo ximomakopa. Amo san niman xikualani uan xiktlakaita. Ualeua okachi kuali ma tikilkauakan tlen otechchiuilijkej (Proverbios 19:11). Pero tla omitstlajyouiltijkej, kema monekis tikijtos tlen omitstoktijkej. Tla itlaj amo kuali omitstoktijkej, uelis tikinmiluis tekiuajkej.

Titlajyouiskej tla timomakopaj

¿Tla amo uelis timotlapouis iuan akin omitsyolkoko porque sapanoua kualantok? Noso ¿tla yotiknek iuan timotlapouis uan ye amo kineki? Amo ximomakopa, tlamo titlajyouis. Amo xikkokoli para oksekimej amo mitskokoliskej. Xikneltoka satepan toTajtsin Dios kichiuas ayakmo ika ma kichiua tlen amo kuali. Salmo 37:3-5 kijtoua: “Xitlaneltoka uan ye mitspaleuis”.

Ma tikitakan tlen okipanok: ADRIÁN

Ayakmo okinek momakopas

Ijkuak Adrián okatka telpochtli, omouikaya iuan akinmej okichiuayaj tlen amo kuali, sapanoua otekokoliaya uan omomakopaya. Ye okijto: “Nochipa otimotlatoponiliayaj iuan oksekimej, ik non, miak uelta oniuetsiaya itech ojtli porque onieskisaya uan oksekimej omokuayejyekouayaj yonechmiktijkaj”.

Ijkuak Adrián okipiaya 16 xiuitl, opejki momachtia Biblia. Ye okijto: “Ijkuak onimomachtijtia Biblia onikajsikamatki omonekiaya nikpatlas nonemilis”. Adrián ayakmo omonekiaya kinkokolis nion kinteuis oksekimej. Sapanoua okiyolini Romanos 12:17-19, ompa kijtoua amo ma timoteuikan. Ye okijto: “Onikajsikamatki satepan Jehová kichiuas ayakmo ikaj ma techkokoli. Satepan ayakmo onikualaniaya nion onitlateuiaya”.

Se youak telpochmej tlen okikokoliayaj okiteuitoj. Akin otlayekanaya okitsajtsili: “¡Techteui!”. Adrián okijto kema okinekiaya kinteuis. Pero okitlatlaujti Jehová ma kipaleui uan ocholo.

Adrián noijki okijto: “Mostlatika oniknamik tlen okinyekanaya nonmej telpochmej, san iselti oyaya. Sapanoua onikualantoka iuan oniknekiaya nimomakopas. Oksepa oniktlatlaujti Jehová ma nechpaleui para amo nikualanis. Onechtlajtlachialti ijkuak telpochtli onechilui: ‘Techtlapojpolui tlen youak onimitstokti, nikneki nikchiuas ken te. Nikneki nimomachtis Bibliaʼ. ¡Niyolpaki porque ayakmo onikualanki! Ik non, ye opejki momachtia”.