¿Ken opejki kichiuaj iluitl Halloween?

¿Tlen kijtoua Biblia?

ITlajtol toTajtsin Dios amo kanaj kijtouaj matikchiuakan iluitl Halloween. Non iluitl kixmatij ken noche de brujas uan kichiuaj sejse xiuitl ipan 31 de octubre. Non iluitl amo ijkuilitok itech iTlajtol toTajtsin Dios nion kijtoua keman opejki kichiuaj.

Itech nin tlamachtil tikitaskej eyi tlamantli:

• ¿Keman okipeualtijkej Halloween uan tlen kichiuaj?

• ¿Moneki matikmatikan ken opejki kichiuaj nin iluitl Halloween?

• ¿Tlen okichiuayaj ijkuak ayamo okitokayotiayaj Halloween?

¿Keman okipeualtijkej Halloween uan tlen kichiuaj?

• Samhain. Itech amochtli Mitos celtas kijtoua non iluitl Samhain yikipia 2,000 xiuitl okichiuayaj. Kineltokaj “ejekamej nemij ipan tlaltikpak uan personas uelis kintlajpalotiuij mikamej”. Amochtli noijki kijtoua: “Axkan ok kichiuaj iluitl Samhain ijkuak kichiuaj Halloween uan mikailuitl”a (xikita recuadro “¿Tlen okichiuayaj ijkuak ayamo okitokayotiayaj Halloween?”).

• Okse tlamantli omotlakentiayaj uan oyayaj kajkalpan kitlajtlantiuij tsopelik. Se amochtli kijtoua “akinmej okinmixmatiayaj ken celtas […] omotlakentiayaj ken monstruos para amo makinmixmatikan ejekamej” tlen okajkatokaj ipan tlaltikpak.b Nonmej ejekamej noijki okinmakayaj tsopelik para kinyolseuiskej.

  

  Itech xiuitl 500 hasta 1500, ompa Europa opejki kichiuaj non iluitl. Teopixkej tlen katej teopan opejki kichiuaj miak costumbres. Okinmiluijkej akinmej ompa monechikouaj makichiuakan non iluitl uan mamotlakentikan okse tlamantli. Noijki okinmiluiayaj mayakan kajkalpan makitlajtlanitij itlaj makintliokolikan para uelis motlatlaujtiskej inpatka akinmej yoixpolikej.

• Fantasmas, vampiros, brujas uan zombis. Yimiak xiuitl ijkon kintokayotiaj ninmej ejekamej. Amochtli Halloween Trivia kintokayotia “monstruos tlen amo keman tikinmitaj” uan noijki kijtoua non “mouika iuan mikilistli, inuan mikamej uan akinmej momojtiaj mikiskej”.

• Ayojtin tlen kinnejnekij ijkuak kichiuaj iluitl Halloween. Itech xiuitl 500 hasta 1500, akinmej chantij Gran Bretaña “oyayaj kajkalpan kitlajtlantiuij tlakuali para uelis motlatlaujtiskiaj inpatka akinmej yoixpolikej”. Okiuikayaj se “kamojtli itoka nabo. Non kamojtli okijtikoyoniayaj uan ijtik okixotlaltiayaj se cera tlen okineskayotiaya ompa otlajyouijtoka se alma” (Halloween—From Pagan Ritual to Party Night). Sekimej ixtlamatkej okijtojkej non kamojtli okinejnekiayaj para ika kinmomojtiskej ejekamej. Itech siglo diecinueve ompa América del norte ayakmo okinejnekiayaj kamojtli uan opejki kinejnekij ayojtli. Opejki kinejnekij ayojtli porque okachi otlakiayaj uan amo oui okikixtiliayaj tlen kipia tlaijtik.

¿Moneki matikmatikan ken opejki kichiuaj nin iluitl Halloween?

Kema. Miakej kijtouaj amo tlajtlakoli kichiuaskej iluitl Halloween porque san ika moyolpaktiaj. Pero costumbres tlen kichiuaj amo kajki itech Biblia. Non iluitl kiteititia okiski itech tlen amo melauak kichiuaj mikamej uan ejekamej.

Ninmej versículos kiteititiaj ken kita toTajtsin Dios iluitl Halloween:

• “Namouan amo moneki yetos [...] akin motlapouia inuan akinmej yomikej noso se tlachixki” (Deuteronomio 18:10-12).

  Kijtosneki: ToTajtsin Dios amo kipaktia matimotlapouikan inuan mikamej. Noijki amo kipaktia san ichtaka matiktemokan ken uelis inuan timotlapouiskej.

• “Akinmej yoixpolikej ayakmo itlaj kimatij” (Eclesiastés 9:5).

  Kijtosneki: Akinmej yoixpolikej ayakmo itlaj kimatij uan ayakmo ueli motlapouiaj inuan akinmej yoltokej.

• “Amo [...] ximouikakan inuan ejekamej. Amo uelis nankoniskej icopa Jehová uan nankoniskej incopa ejekamej” (1 Corintios 10:20, 21).

  Kijtosneki: Amo matimouikakan inuan ejekamej tla tiknekij timouikaskej iuan toTajtsin Dios.

• Moneki “nanmoyekketoskej ijkuak Diablo namechtlalilis trampas. Porque [...] tikmomakaj inuan [...] ejekamej tlen katej iluikak” (Efesios 6:11, 12).

  Kijtosneki: Akinmej kichiuaj ken Cristo momakaj inuan ejekamej uan amo san inuan mauiltiaj.