¿Tlen kijtosneki ijkuak Jesús okijto “xikintlasojtlakah akimeh nomechkokoliah”?
Tlen kijtoua Biblia
Ijkuak Jesús otlamachti itech tepetl, okijto: “Xikintlasojtlakah akimeh nomechkokoliah” (Mateo 5:44; Lucas 6:27, 35). Nin kijtosneki moneki tikteititiskej tikintlasojtlaj akinmej techkokoliaj uan techchiuiliaj tlen amo kuali.
Jesús ijkon okiteititi ijkuak okintlapojpolui akinmej okitlajyouiltijkej (Lucas 23:33, 34). Tlen okijto Jesús mouika ika tlen kijtoua Escrituras Hebreas tlen noijki kixmatij ken Antiguo Testamento (Éxodo 23:4, 5; Proverbios 24:17; 25:21).
“Xikintlasojtlakah akimeh nomechkokoliah, iwa xiktlajtlanilikah Dios makintiochiwa akimeh nomechtotojtokah [namechixnamikij]” (Mateo 5:43, 44).
Itech nin tlamachtil tikitaskej:
Tlen miakej kineltokaj kijtosneki tikintlasojtlaskej akinmej techkokoliaj
Principios bíblicos tlen techiluiaj moneki tikintlasojtlaskej akinmej techkokoliaj
¿Tleka moneki tikintlasojtlaskej akinmej techkokoliaj?
Dios techmachtia ken moneki tikchiuaskej. “Ye kinmiknomati akimeh amo motlasojkamatih innawak iwa akimeh tlajtlakolchiwah” (Lucas 6:35). Noijki “kichiwa makisa n tonati impa non kichiwah tlan amo kuali” (Mateo 5:45).
Tla tikintlasojtlaj akinmej techkokoliaj uelis kipatlaskej inyelis. Biblia kijtoua moneki matikinchiuilikan tlen kuali akinmej techkokoliaj uan ijkon ‘tikintlatlaliliskej tlixochtli ipan intsonteko’ (Proverbios 25:22). Tlen nikan kijtoua yetoskia ken ijkuak itlaj kipatiltiaj para kipiaskej tepostli tlen kualtsin. Ijkon panoua ijkuak ikaj kualani, tla tikititiaj tiktlasojtlaj xamo satepan ayakmo kualanis.
¿Ken tikteititiskej tikintlasojtlaj akinmej techkokoliaj?
“Xikintlasojtlakah akimeh amo nomechtlasojtlah” (Lucas 6:27). Biblia kijtoua: “Tla mokokolikni apismiki, xikmaka tlan kikuas; iwa tla amiki, xikmaka maatli” (Romanos 12:20). Noijki uelis tikinchiuiliskej tlen kuali akinmej amo techtlasojtlaj tla tikinchiuiliaj tlen tiknekij matechchiuilikan oksekimej: “Xikchiwakah tlan kuali, ijkó kemi nomejwah nonkinekih makichiwakah tlan kuali nomowah” (Lucas 6:31).
“Xiktlajtlanilikah Dios makintiochiwa akimeh nomechwijwikaltiah” (Lucas 6:28). ‘Tikintiochiwa’ akinmej techkokoliaj ijkuak kuali tikintlapouiaj maski yejuan techuijuikaltiaj. Biblia kijtoua: “Tla nomechtoktiah itla amokuali, amo xikmokopilikah, [...] yej xikintiochiwakah” (1 Pedro 3:9). Tla ijkon tikchiuaj, ayakmo timokokoliskej.
“Ximotiosajtsilikah por akimeh fiero nomechtenewah” (Lucas 6:28). Biblia kijtoua: “Tla aka nomechtoktia itla amokuali, nomejwah amo xikmokopilikah” (Romanos 12:17). Moneki tiktlatlaujtiskej toTajtsin Dios makintlapojpolui (Lucas 23:34; Hechos 7:59, 60). Amo matimomakopakan, Jehová nochipa kichiua tlen kuali ikinon matikauakan makijto tlen kichiuilis akin techteneua (Levítico 19:18; Romanos 12:19).
“Xikintlasojtlakah akimeh amo nomechtlasojtlah, iwa xikinchiwilikah tlan kuali akimeh nomechkokoliah. Noiwa xiktlajtlanilikah Dios makintiochiwa akimeh nomechwijwikaltiah iwa ximotiosajtsilikah por akimeh fiero nomechtenewah” (Lucas 6:27, 28).
Matimochiakan uan matiktemakakan tlen tikpiaj (1 Corintios 13:4). Ijkuak apóstol Pablo okijto matitetlasojtlakan okitekitilti tlajtoli ika griego agápe uan nin tlajtoli noijki tikajsi itech Mateo 5:44 uan Lucas 6:27, 35. Tikteititiaj ijkon titetlasojtlaj ijkuak timochiaj uan tikinmakaj tlen tikpiaj akinmej techkokoliaj, noijki ijkuak tikinchiuiliaj tlen kuali uan tikintlakaitaj.
“Akin tetlasojtla, kimati texikoa; semi yolyámanki iwa amo xikojmiki; amo xankuatl nion moweyilia. Amo tlawijwikaltia nion kitemoa san tlan ye kipaktia; amo kimati kualani nion tekokolia. Amo paki ijkuak kinmita oksikimeh tlaijyowiah por intlajtlakol, yej paki ijkuak pankisa tlan milák. Akin tetlasojtla nochi kijyowia, nochi kineltoka, kimati moyekchia iwa nochi kixikoa. N tlasojtlálistli ayik tlamis” (1 Corintios 13:4-8).
¿Uelis titlapaleuiskej itech Guerras?
Amo, porque Jesús okinmilui imachtijkauan amo omonekiaya moteuiskej iuan akinmej okinkokoliayaj. Ijkon opanok ijkuak kipojpoloskiaj Jerusalén, amo okinmilui ompa mamokauakan para moteuiskiaj, ye okinmilui macholokan (Lucas 21:20, 21). Jesús noijki okilui apóstol Pedro: “Xiktlaati moespada, porke akimeh kiwikah iespada, noiwa ika espada kinmiktiskeh” (Mateo 26:52). Biblia iuan tlen yiuejkika opanok kiteititiaj imachtijkauan Jesús tlen ochantiayaj itech achto siglo, amo oyayaj guerra (2 Timoteo 2:24).a
Tlen miakej kineltokaj kijtosneki tikintlasojtlaskej akinmej techkokoliaj
Sekimej kineltokaj: Tlanauatil tlen okinmakakej israelitas okijtouaya omonekiaya kinkokoliskej akinmej okinkokoliayaj.
Tlen melauak: Tlanauatil amo ijkon okijtouaya. Ompa okijtouaya moneki titetlasojtlaskej (Levítico 19:18). Ijkuak kijtoua titetlasojtlas, kijtosneki “nochtin” moneki tikintlasojtlaskej, pero sekimej judíos omokuayejyekouayaj san akinmej okatkaj judíos omonekiaya kintlasojtlaskej uan akinmej amo, kinkokoliskej (Mateo 5:43, 44). Jesús okinmilui amo kuali tlen omokuayejyekouayaj ijkuak okintlapoui tlen okichi se samaritano (Lucas 10:29-37).
Sekimej kineltokaj: Tla tiktlasojtlaj akin techkokolia kijtosneki tikseliaj tlen amo kuali kichiua.
Tlen melauak: Biblia kiteititia uelis tiktlasojtlaskej akin kichiua tlen amo kuali maski amo techpaktia tlen kichiua. Ijkon okichi Jesús, ye amo okipaktiaya ijkuak okintlajyouiltiayaj oksekimej pero omotlatlaujti inpatka akinmej okixpolojkej (Lucas 23:34). Noijki okikokoliaya tlen amo kuali uan tlajtlakoli pero okitemakak inemilis para mamomakixtikan akinmej tlajtlakolejkej (Juan 3:16; Romanos 6:23).
a Se tlakatl tlen itoka Ernest Barnes okijkuilo amochtli The Rise of Christianity (La aparición del cristianismo), uan ompa okijto: “Tla timomachtiaj tlen yiuejkika opanok, tikitaskej itech xiuitl 161 hasta 180, ijkuak otlanauatiaya Marco Aurelio itech altepetl Roma, akinmej okichiuayaj ken Cristo amo omochijkej soldados uan nion se soldado tlen opejki kichiua ken Cristo ok otlapaleui ijkuak omoteuiayaj”.