¿Uelis ikaj ayakmo yetos iTlaixpantijka Jehová?

Kema. Ika ome tlamantli ikaj uelis kiteititis ayakmo kineki yetos iTlaixpantijka Jehová:

• Uelis kijtos noso kijkuilos. Ikaj uelis kijtos noso kijkuilos tla ayakmo kineki yetos iTlaixpantijka Jehová.

• Ika tlen kichiua. Ikaj uelis kichiuas itlaj tlen kiteititis ayakmo kineki pouis inmiuan iTlaixpantijkauan Jehová (1 Pedro 5:9). Se neskayotl, uelis peuas yas itech okse religión uan kiteititis kineki ompa pouis (1 Juan 2:​19).

¿Uan tla ikaj ayakmo tetlapouia noso ayakmo monechikoua namouan? ¿Nankitaj ken ayakmo iTlaixpantijka Jehová?

Amo. Se tlamantli ijkuak ikaj kijtoua ayakmo kineki yetos iTlaixpantijka Jehová uan okse tlamantli ijkuak ayakmo kipia chikauak itlaneltokilis. Ualeua akinmej ayakmo kitekichiuiliaj Jehová amo kijtosneki ayakmo tlaneltokaj, ijkon panoua porque moyolkokouaj uan moneki makinyolchikauakan. Ikinon tikinyolseuiaj, tikinpaleuiaj uan amo tikinmixtopeuaj (1 Tesalonicenses 5:​14; Judas 22). Tla ikaj kineki makipaleuikan, akinmej tlayekanaj itech tlanechikol kipaleuiaj (Gálatas 6:1; 1 Pedro 5:​1-3).

Pero tlayekankej amo ikaj kichiualtiaj ok mayeto iTlaixpantijka Jehová. Iselti moneki kipejpenas uan kijtos itech tlen religión kineki yetos (Josué 24:15). Akinmej kinekij kitekichiuiliskej Jehová, moneki kichiuaskej ika nochi inyolo uan amikaj moneki makinchiualti (Salmo 110:3; Mateo 22:37).