¿Ayakmo motlapouiaj iTlaixpantijkauan Jehová iuan akinmej ayakmo monechikouaj?
Amo tikinkauaj iTlaixpantijkauan Jehová tlen ayakmo tetlapouiaj noso ayakmo touan monechikouaj. Timochijchikauaj tikinpaleuiskej oksepa makipiakan chikauak intlaneltokilis uan oksepa touan mamonechikokan.
Tla se iTlaixpantijka Jehová tlen yomoapolakti tlajtlakolchiua uelis kikixtiskej itech tlanechikol. Pero nin amo kijtosneki san niman kikixtiskej. Tla ayakmo kineki kitlakamatis tlen kijtoua Biblia uan amo moyolkopa, moneki kikixtiskej uan ayakmo iuan mouikaskej. Porque Biblia kijtoua: “Moneki xikkixtikah non tlajtlakole nomonawak” (1 Corintios 5:13).
¿Tlen panoa tla se tlakatl kikixtiaj itech tlanechikol pero isiua uan ikoneuan ok iTlaixpantijkauan Jehová? Maski ayakmo san sekan kitekichiuiliskej Jehová, ok poui iuan ifamilia. Ok chanti iuan isiua uan kintlasojtla ikoneuan.
Akinmej kinkixtiaj itech tlanechikol uelis touan monechikoskej uan noijki tla kinekij, tlayekankej uelis kinpaleuiskej oksepa mamouikakan iuan Jehová uan makipiakan chikauak intlaneltokilis. Kinpaleuiskej oksepa mayetokan iTlaixpantijkauan Jehová. Tla akinmej okinkixtijkej kiteititiaj ayakmo kichiuaj tlen amo kuali uan kinekij kitlakamatiskej tlen kijtoua Biblia, uelis oksepa yetoskej iTlaixpantijkauan Jehová.