¿Tlen kichiuaj tlayekankej ijkuak ikaj kiluiaj ayakmo pouis itech tlanechikol?

1, 2. (1) ¿Ken kinmita Jehová akinmej tlajtlakolchiuaj uan amo moyolkopaj? (2) ¿Tlen kineki Jehová makichiuakan nochtin?

JEHOVÁ amo kipaktia matikchijtinemikan tlen amo kuali uan amo kipaktia matitlajtlakolchiuakan (Sal. 5:​4-6). Ye kineki matikintlakamatikan itlanauatiluan. Pero amo kichia nochi kuali matikchiuakan porque kimati titlajtlakolejkej (Sal. 130:​3, 4). Sekimej tlajtlakolchiuaj uan “amo kitlakaitaj toTajtsin Dios, kinejnekij itetliokolil toTajtsin Dios tlen kuali para mopaleuiskej ijkuak tlajtlakolchiuaj uan ayakmo pinauaj”. Ikinon Jehová kinmixtopeua (Jud. 4). Biblia kijtoua Jehová kinmixpolos itech Armagedón akinmej ijkon kichiuaj (2 Ped. 3:7; Apoc. 16:16).

² Pero Jehová kineki nochtin mamomakixtikan. Ye kineki nochtin ‘mamoyolkopakan’ ijkon ken otimomachtijkej itech okseki tlamachtilmej (2 Ped. 3:9). Tlayekankej kichiuaj ijkon ken Jehová kichiua ijkuak yolik kinpaleuiaj akinmej tlajtlakolchiuaj. Yejuan kinpaleuiaj mamoyolkopakan uan oksepa mamouikakan iuan Jehová. Pero amo nochtin kiseliaj makinpaleuikan (Is. 6:9). Miakej amo kinekij moyolkopaskej maski tlayekankej miak uelta kinekij kinpaleuiskej. ¿Tlen kichiuaj tlayekankej ijkuak ijkon panoua?

“XIKKIXTIKAN AKIN AMO YOLKUALI”

3. (1) ¿Tlen kijtoua Biblia makichiuakan tlayekankej ijkuak ikaj tlajtlakolchiua uan amo kineki moyolkopas? (2) ¿Tleka tikijtouaj akin amo moyolkopa ineuian kipejpena ayakmo pouis itech tlanechikol?

³ Tla ikaj tlajtlakolchiua uan amo kineki moyolkopas, tlayekankej moneki kichiuaskej tlen kijtoua 1 Corintios 5:13. Ompa kijtoua: “Xikkixtikan akin amo yolkuali tlen namouan kajki”. Akin tlajtlakolchiua kimati tla amo moyolkopas ayakmo pouis itech tlanechikol. Ikinon uelis tikijtoskej ineuian kipejpena ayakmo pouis itech tlanechikol porque yetoskia ken ‘kololoua tlen kitoka’ (Gál. 6:7). ¿Tleka? Porque amo okiseli makipaleuikan tlayekankej maski yejuan miak uelta okinekiayaj kipaleuiskej (2 Rey. 17:​12-15). Kiteititia amo kineki kitlakamatis Jehová porque ayakmo kineki kichiuas tlen ye kipaktia (Deut. 30:​19, 20).

4. ¿Tleka tlayekankej kinmiluiaj tokniuan ijkuak ikaj ayakmo pouis itech tlanechikol?

⁴ Ijkuak ikaj kiluiaj ayakmo pouis itech tlanechikol porque amo kineki moyolkopas, kinmiluiaj tokniuan ye ayakmo yetos iTlaixpantijka Jehová.a Pero amo ijkon kichiuaj porque kinekij kipinauiskej. Ijkon kichiuaj tlayekankej porque kinekij tokniuan makitlakamatikan itlanauatil Jehová kanin kijtoua ayakmo iuan mamouikakan nion iuan matlakuakan (1 Cor. 5:​9-11). Jehová ijkon otlanauati matikchiuakan porque kimati techpaleuis. Apostól Pablo okijkuilo: “¿Amo nankimatij tepitsin levadura kisamaua nochi tixtli?” (1 Cor. 5:6). Tla amo kiluiskej ayakmo pouis itech tlanechikol akin amo kineki moyolkopas, tokniuan kijtoskej amitlaj ipati mochijchikauaskej kintlakamatiskej itlanauatiluan Jehová (Prov. 13:20; 1 Cor. 15:33).

5. ¿Ken moneki tikitaskej akin ayakmo poui itech tlanechikol uan tleka?

⁵ ¿Ken moneki tikitaskej akin ayakmo poui itech tlanechikol? Ayakmo iuan timouikaskej pero amo kijtosneki ayakmo uelis oksepa kitekichiuilis Jehová. Ye yetoskia ken se ichka opoliuik pero uelis oksepa mokopati. Amo keman matikilkauakan ye noijki omotemakak ixpan Jehová. Pero axkan amo kipia inemilis ijkon ken okilui Jehová kichiuaskia ikinon moouijtilijtok (Ezeq. 18:31). Jehová ok mochixtok porque teiknomati ikinon tejuan tikchiaj oksepa makitekichiuili akin otlajtlakolchi. ¿Ken uelis kipaleuiskej tlayekankej akin ayakmo poui itech tlanechikol?

¿TLEN KICHIUAJ TLAYEKANKEJ IJKUAK IKAJ KILUIAJ AYAKMO POUIS ITECH TLANECHIKOL?

6. ¿Tlen kichiuaj tlayekankej para kipaleuiskej akin ayakmo poui itech tlanechikol?

⁶ ¿Tlen kichiuaj tlayekankej ijkuak ikaj kiluiaj ayakmo pouis itech tlanechikol? ¿Ayakmo kipaleuiaj oksepa mamouika iuan Jehová? Amo ijkon kichiuaj. Ijkuak tlayekankej tlen pouij itech comité kiluiskej ayakmo pouis itech tlanechikol, noijki kiluiskej tlen moneki kichiuas tla kineki oksepa mouikas iuan Jehová. Pero noijki kiluiskej mapano kanaj keski metstli uan oksepa iuan monechikoskej para kitaskej kox yomoyolkopki. Tla kinmiluis tlayekankej uelis iuan monechikoskej, yejuan kiyekiluiskej mamoyolkopa uan oksepa mamouika iuan Jehová. ¿Tlen kichiuaskej tlayekankej tla ayamo kineki moyolkopas? Tlayekankej mochijchikauaskej oksepa iuan monechikoskej uan ijkon kipaleuiskej.

7. ¿Ken mochijchikauaj tlayekankej teiknomatiskej ijkon ken Jehová teiknomati ijkuak kipaleuiskej akin ayakmo poui itech tlanechikol? (Jeremías 3:12).

⁷ Tlayekankej moneki mochijchikauaskej teiknomatiskej ijkon ken Jehová teiknomati ijkuak kipaleuiskej akin ayakmo poui itech tlanechikol. Jehová ijkon okinpaleui israelitas ijkuak amo okitlakamatiayaj. Ye okitemouaya ken kinpaleuis maski amo okiteititiayaj okinekiayaj moyolkopaskej. Itech tlamachtil ome otikitakej Jehová okinauati profeta Oseas makichiua seki tlamantli para kiteititis ye teiknomati. Okilui Oseas makitlapojpolui isiua maski otlajtlakolchijtoka (Os. 3:1; Mal. 3:7). Tlayekankej kichiuaj ijkon ken Jehová porque kinekij mamoyolkopa akin otlajtlakolchi uan oksepa mapoui itech ialtepe. Ikinon kipaleuiaj para amo oui makita ijkon kichiuas (xiktlajtolti Jeremías 3:12).

8. ¿Tlen techpaleuia matikajsikamatikan Jehová teiknomati? (Lucas 15:7).

⁸ Matikilnamiktokan tlen okipanok telpochtli tlen opolika tlen otikitakej itech tlamachtil ome. Ijkuak ipapa okitak uejka oualaya, san niman “omotlalo okinamikito, okinapalo uan okipijpitso” (Luc. 15:20). Tepapa amo okichixki ikone achto makilui makitlapojpolui. Ye kuali okiseli ikone porque okitlasojtlaya. Tlayekankej noijki ijkon kichiuaj ijkuak kinpaleuiaj akinmej okikajkej Jehová para oksepa makitekichiuilikan (Luc. 15:​22-24, 32). “Ompa iluikak okachi pakij ijkuak moyolkopa ikaj tlen otlajtlakolchiuaya” uan tejuan noijki tipakij (xiktlajtolti Lucas 15:7).

9. ¿Tlen kinmiluia Jehová akinmej otlajtlakolchijkej?

⁹ Nochi tlen yotikitakej kiteititia Jehová amo kineki mayeto itech tlanechikol akin tlajtlakolchiua uan amo kineki moyolkopas. Pero Jehová amo kikaua iselti akin tlajtlakolchiua porque ye kineki oksepa iuan mamouika. Oseas 14:4 kijtoua ken kinmita Jehová akinmej moyolkopaj. Ompa kijtoua: “Ne nikinpajtis porque onechkajkej. Noneuian nikintlasojtlas porque ayakmo nechkualaniaj”. Ikinon miak ipati tlayekankej makitakan kox yikipatlatok inemilis akin otlajtlakolchi uan kiteititia yimoyolkoptok. Nin kiteititia Jehová kintlasojtla akinmej okikajkej uan kineki oksepa inauak mamokopakan.

10, 11. ¿Ken kinpaleuiskej tlayekankej akinmej yiuejkika ayakmo pouij itech tlanechikol?

¹⁰ ¿Ken kinpaleuiskej tlayekankej akinmej yiuejkika ayakmo pouij itech tlanechikol? Xamo ayakmo kichijtokej tlajtlakoli tlen okichijtokaj ijkuak okinkixtijkej noso ayakmo kilnamikij tleka okinkixtijkej. Pero tlayekankej moneki mochijchikauaskej kintemoskej uan kintlajpalotiuij. Ijkuak kintlajpalotiuij, kinmiluiskej kox kinekij inuan mamotlatlaujtikan uan kinyolchikauaskej oksepa mamonechikokan. Akinmej yikipiaj miak xiuitl ayakmo pouij itech tlanechikol, moneki oksepa momachtiskej tlen kijtoua Biblia porque ayakmo kipiaj chikauak intlaneltokilis. Ikinon tla kinekij oksepa mouikaskej iuan Jehová, tlayekankej moneki kitaskej kox oksepa kinmachtiskej. Uelis kinmachtiskej maski ayamo oksepa yipouij itech tlanechikol. Pero yejuan tlayekankej kijtoskej akin kinmachtis.

¹¹ Tlayekankej kinekij teiknomatiskej ijkon ken Jehová teiknomati. Ikinon mochijchikauaj kintemoskej nochtin akinmej kinekij oksepa kitekichiuiliskej Jehová. Moneki san niman makinpaleuikan oksepa mapouikan itech tlanechikol akinmej ayakmo tlajtlakolchiuaj uan yomoyolkopkej (2 Cor. 2:​6-8).

12. (1) ¿Tleka tlayekankej moneki kuali kitaskej ijkuak ikaj oksepa kiseliskej mapoui itech tlanechikol? (2) ¿Tleka amo keman matikijtokan Jehová amo kinmiknomatis nion kintlapojpoluis akinmej okichijkej miak tlamantli amo kuali? (Noijki xikita nota).

¹² Tlayekankej moneki kuali kitaskej ijkuak ikaj oksepa kiseliskej mapoui itech tlanechikol. Moneki ijkon kichiuaskej tla akin otlajtlakolchi okitlajyouilti se konetl, tla okika Jehová uan okixnamik noso okitemo ken kikauas isiua noso inamik. Tlayekankej moneki kuali kitaskej kox melauak yomoyolkopki (Mal. 2:14; 2 Tim. 3:6). Yejuan moneki kinmaluiskej tokniuan. Pero matikilnamiktokan Jehová oksepa kiselis akin melauak moyolkopa uan ayakmo tlajtlakolchiua. Tlayekankej moneki kuali kitaskej ijkuak kinpaleuiskej akinmej okichijkej miak tlamantli amo kuali pero amo keman makijtokan Jehová amo kinmiknomatis nion kintlapojpoluis (1 Ped. 2:10).b

¿TLEN UELIS TIKCHIUASKEJ AKINMEJ TIPOUIJ ITECH TLANECHIKOL?

13. ¿Tlen tikchiuaj ijkuak ikaj kiyektlaliaj uan ijkuak ikaj kiluiaj ayakmo pouis itech tlanechikol?

¹³ Itech okse tlamachtil otikitakej tlayekankej kinmiluiaj tokniuan ijkuak ikaj kiyektlaliaj. Ikinon ok uelis timouikaskej iuan non tokni porque yomoyolkopki uan ayakmo tlajtlakolchijtok (1 Tim. 5:20). Ye ok poui itech tlanechikol uan moneki makiyolchikauakan tokniuan makichiua tlen kuali (Heb. 10:​24, 25). Pero amo ijkon panoua ijkuak ikaj kiluiaj ayakmo pouis itech tlanechikol porque non kijtosneki ayakmo iuan timouikaskej nion iuan titlakuaskej (1 Cor. 5:11).

14. ¿Tlen tikchiuaskej tla akin ayakmo poui itech tlanechikol ajsiti kanin timonechikouaj? (Noijki xikinmita fotos).

¹⁴ ¿Kijtosneki ayakmo tiknotsaskej akin ayakmo poui itech tlanechikol? Amo. Kuali tikmatokej amo iuan timouikaskej. Tejuan akinmej tiktekichiuiliaj toTajtsin Dios yotikmachtijkej totlalnamikilis ika tlen kijtoua Biblia ikinon tisejse tikpejpenaskej kox tikiluiskej touan mamonechikoti tofamiliar noso akin iuan otimouikayaj. ¿Tlen tikchiuaskej tla ajsiti kanin timonechikouaj? Achto amo otikintlajpalouayaj. Pero sejse tokniuan moneki kipejpenaskej tlen kichiuaskej. Xamo sekimej kijtoskej kitlajpaloskej noso kuali kiseliskej. Pero non amo kijtosneki san iuan timotlapouijtoskej nion kijtosneki iuan timouikaskej.

15. ¿Tlen kijtosneki tlen kijtoua 2 Juan 9-11? (Noijki xikita recuadro “Apóstol Juan uan Pablo okijtojkej tlatlamantli tlajtlakoli tlen okichijtokaj sekimej”).

¹⁵ Pero xamo timotlajtlaniaj: “¿Amo kijtoua iTlajtol toTajtsin Dios ‘akin kitlajpaloua kijtosneki kipaleuia makichiua tlen amo kuali’?” (xiktlajtolti 2 Juan 9-11). Nonmej textos kiteititiaj akinmej okikajkej toTajtsin Dios uan kixnamikij uan kinekij matikchiuakan tlen amo kuali (Apoc. 2:20). Tlayekankej amo kitlajpalotiuij akin okika Jehová uan kixnamiki uan kinmiluia oksekimej matlajtlakolchiuakan. Non amo kijtosneki amo keman kipatlas inemilis. Pero tla amo kipatla inemilis, amo uelis tiktlajpaloskej nion tikiluiskej touan mamonechikoti.

MATITEIKNOMATIKAN IJKON KEN JEHOVÁ TEIKNOMATI

16, 17. (1) ¿Tlen kineki Jehová makichiuakan akinmej tlajtlakolchiuaj? (Ezequiel 18:32). (2) ¿Ken kipaleuiaj Jehová tlayekankej?

¹⁶ ¿Tlen yotimomachtijkej itech nin makuili tlamachtilmej? Jehová kineki nochtin mamomakixtikan uan amo kineki ikaj maixpoliui (xiktlajtolti Ezequiel 18:32). ToTajtsin Dios kineki oksepa iuan mamouikakan akinmej otlajtlakolchijkej (2 Cor. 5:20). Ikinon Jehová nochipa kinmiluia mamoyolkopakan akinmej okikajkej uan oksepa iuan mamouikakan. Tlayekankej kipiaj se tlateochiuali kinpaleuiskej mamoyolkopakan akinmej otlajtlakolchijkej (Rom. 2:4; 1 Cor. 3:9).

¹⁷ Sapanoua pakij akinmej katej iluikak ijkuak moyolkopa akin otlajtlakolchi. ToTajtsin Dios sapanoua paki ijkuak oksepa mokopa inauak akin otlajtlakolchi. Nochipa matimokuayejyekokan Jehová teiknomati uan techtlasojtla uan non techpaleuis okachi matiktlasojtlakan (Luc. 1:78).