¿Ken kiteititiaj tlayekankej kintlasojtlaj uan kinmiknomatij akinmej tlajtlakolchiuaj?

1. ¿Tlen uelis kichiuas akin otlajtlakolchi?

ITECH okse tlamachtil otimomachtijkej apóstol Pablo okinmilui tokniuan tlen okatkaj Corinto tlen omonekiaya kichiuaskej ijkuak se tlakatl otlajtlakolchiuaya. Non tlakatl okiluijkej ayakmo pouiskia itech tlanechikol porque amo omoyolkopaya. Pero texto tlen kipia kanin peua nin tlamachtil kijtoua akin tlajtlakolchiua uelis moyolkopas (Rom. 2:4). ¿Tlen tekitl okinmakak Jehová tlayekankej para makipaleuikan mamoyolkopa akin otlajtlakolchi?

2, 3. ¿Tlen tikchiuaskej tla tikmatij se tokni otlajtlakolchi uan tleka?

² ¿Tlen tikchiuaskej tla tikmatij se tokni otlajtlakolchi uan uelis kiluiskej ayakmo pouis itech tlanechikol? Tlayekankej uelis kipaleuiskej pero moneki achto kimatiskej tlen opanok. Ikinon matikiluikan akin otlajtlakolchi makinmilui tlayekankej tlen opanok uan makipaleuikan (Is. 1:18; Hech. 20:28; 1 Ped. 5:2).

³ ¿Tlen moneki tikchiuaskej tla akin otlajtlakolchi amo kineki motlapouis inuan tlayekankej? Tejuan tiknekij makipaleuikan non tokni ikinon tejuan timotlapouiskej inuan tlayekankej. Tikteititiskej tiktlasojtlaj non tokni porque amo tiknekij makikaua Jehová. Porque tla amo moyolkopas, ayakmo mouikas iuan Jehová uan akinmej amo tlaneltokaj uelis kinteneuaskej tokniuan ijkuak kimatiskej tlen okichi. Ikinon timoyolchikauaskej uan timotlapouiskej inuan tlayekankej porque tiktlasojtlaj Jehová uan noijki tokni (Sal. 27:14).

¿TLEN KICHIUAJ TLAYEKANKEJ PARA KIPALEUISKEJ AKIN OTLAJTLAKOLCHI?

4. ¿Tlen kinekij kichiuaskej tlayekankej ijkuak motlapouiskej iuan akin otlajtlakolchi?

⁴ Tlayekankej kinpejpenaj eyi tlayekankej para mamochiua se comitéa uan ijkon mamotlapouikan iuan akin otlajtlakolchi. Yejuan moneki yetoskej yolyamankej porque maski kipaleuiskej amo uelis kinauatiskej mamoyolkopa (Deut. 30:19). Tlayekankej kajsikamatij amo nochtin moyolkopaj ijkon ken David omoyolkopki (2 Sam. 12:13). Porque sekimej amo kikauiliaj Jehová makinyektlali (Gén. 4:​6-8). Pero tlayekankej mochijchikauaj kipaleuiskej mamoyolkopa akin otlajtlakolchi. ¿Tlen kichiuaj tlayekankej tlen pouij itech comité para motlapouiskej iuan akin otlajtlakolchi?

5. ¿Tlen moneki kilnamiktoskej tlayekankej ijkuak monechikoskej iuan akin otlajtlakolchi? (2 Timoteo 2:​24-26; noijki xikita dibujo).

⁵ Tlayekankej kitaj tokni tlen otlajtlakolchi ken se ichkatsin tlen opoliuik (Luc. 15:​4, 6). Yejuan ijkon kichiuaj ijkuak monechikouaj iuan akin otlajtlakolchi porque amo kajuaj nion kiyolkokouaj. Noijki amo san kitlajtlaniaj tlen okichi para kimatiskej tlen opanok. Yejuan mochijchikauaj kichiuaskej tlen kijtoua 2 Timoteo 2:​24-26 (xiktlajtolti). Ikinon kiyeknotsaj akin otlajtlakolchi, kiteititiaj kitlasojtlaj uan kiteititiaj yolyamankej para maajsi itech iyolo tlen kiluiaj.

6. ¿Tlen kichiuaj tlayekankej ijkuak ayamo monechikouaj iuan akin otlajtlakolchi? (Romanos 2:4).

⁶ Tlayekankej kichiuaj seki tlamantli para mokuayejyekoskej ijkon ken Jehová mokuayejyekoua. Yejuan kilnamiktokej tlen okijto Pablo: “ToTajtsin Dios yolkuali uan kineki mitspaleuis ximoyolkopa” (xiktlajtolti Romanos 2:4). Yejuan kintlasojtlaj akinmej otlajtlakolchijkej ikinon mochijchikauaj kinpaleuiskej ijkon ken Jehová kichiua. Tlayekankej moneki makilnamiktokan yejuan tlajpixkej ikinon kichiuaj ken Cristo ijkuak kinmaluiaj tokniuan (Is. 11:​3, 4; Mat. 18:​18-20). Ijkuak ayamo monechikouaj iuan akin otlajtlakolchi, tokniuan tlen pouij itech comité kitlatlaujtiaj Jehová makinpaleui makitakan ken kipaleuiskej mamoyolkopa. Tlatemouaj itech Biblia, itech amatlajkuilolmej, kiluiaj Jehová makinmaka ixtlamatilistli para kajsikamatiskej akin otlajtlakolchi uan tlen okichi. Motlapouiaj tlen okiyolini matlajtlakolchiua uan tleka ijkon okichi (Prov. 20:5).

7, 8. ¿Ken kichiuaj tlayekankej ijkon ken Jehová kichiua ijkuak kipaleuiaj akin otlajtlakolchi?

⁷ Tlayekankej kimatij mochiaskej ijkon ken Jehová mochia. Yejuan kilnamikij tlen okichi Jehová ijkuak okinpaleui akinmej yiuejkika otlajtlakolchijkej. Ijkon okichi ijkuak omotlapoui iuan Caín. Ye amo okajuak uan okiyekilui ye kiseliskia tla moyolkopaskia pero noijki okilui tlen panoskia tla amo ijkon kichiuaskia (Gén. 4:​6, 7). Satepan ijkuak okiyektlali tekiua David, okititlanili profeta Natán makilui se neskayotl para ajsiskia itech iyolo tlen kiluiskia (2 Sam. 12:​1-7). Noijki Jehová miak uelta okintitlaniaya profetas makinpaleuitij israelitas tlen amo otetlakamatiayaj (Jer. 7:​24, 25). Ye okinekiaya kinpaleuis itekipanojkauan ijkuak otlajtlakolchijtokaj uan amo omochixki hasta mamoyolkopakan para kinpaleuis.

⁸ ¿Ken kichiuaj tlayekankej ijkon ken Jehová kichiua ijkuak kipaleuiaj akin otlajtlakolchi? Yejuan moneki kichiuaskej tlen kijtoua 2 Timoteo 4:2 uan amo ‘mosotlauaskej’ ijkuak ikaj kipaleuiskej. Moneki mochijchikauaskej amo kajuaskej akin otlajtlakolchi uan kiyektlapouiskej para makipatla inemilis. Pero tla tlayekankej mosotlauaskej uan kualaniskej, akin otlajtlakolchi xamo amo kinekis kinkakis uan amo kinekis moyolkopas.

9, 10. ¿Ken uelis kipaleuiskej tlayekankej mamoyolkopa akin otlajtlakolchi?

⁹ Tlayekankej kitaj tleka otlajtlakolchi non tokni. ¿Ayakmo omouikaya iuan Jehová porque ayakmo omomachtiaya uan ayakmo otetlapouiaya? ¿Ayakmo omotlatlaujtiaya? ¿Yolik okikajtia makiyoltilana tlen amo kuali? ¿Opejki kiyoltilana tlen amo kuali porque opejki mouika inuan akinmej amo yolkualmej uan omoyolpaktiaya ika tlen amo kuali? ¿Kajsikamati okiyolkoko Jehová ijkuak otlajtlakolchi?

¹⁰ Tlayekankej moneki kuali kimatiskej tlen kitlajtlaniskej akin otlajtlakolchi. Tla yejuan kiyektlapouiskej, kuali momachilis inuan motlapouis uan kajsikamatis tleka otlajtlakolchi. Pero amo kitlajtlaniskej tlen amo moneki kimatiskej (Prov. 20:5). Noijki uelis kichiuaskej ijkon ken Natán okiyektlapoui David. Yejuan noijki uelis kiluiskej se neskayotl para makajsikamati amo kuali tlen okichi. Xamo ijkuak tlayekankej monechikoskej iuan akin otlajtlakolchi moyolkokos porque okichi tlen amo kuali uan moyolkopas.

11. ¿Ken okinmitaya Jesús akinmej otlajtlakolchiuayaj?

¹¹ Tlayekankej mochijchikauaj kichiuaskej ijkon ken Jesús okichi. Jesús okitlajtlani Saulo tlen oualaya Tarso: “Saulo, Saulo, ¿tleka techtemojtinemi?”. Ye ijkon okitlajtlani porque okinekiaya makajsikamati amo kuali tlen okichijtoka (Hech. 9:​3-6). Noijki itech Apocalipsis 2:​20, 21 Jesús okijto okichixki “mamoyolkopa” se siuatl tlen omotokayotiaya “Jezabel”.

12, 13. ¿Tlen uelis kichiuaskej tlayekankej para kipaleuiskej mamoyolkopa akin otlajtlakolchi? (Noijki xikinmita fotos).

¹² Tlayekankej kichiuaj ijkon ken Jesús okichi ikinon amo san niman kijtouaj amo kineki moyolkopas akin otlajtlakolchi. Sekimej san niman moyolkopaj ijkuak tokniuan tlen pouij itech comité iuan motlapouiaj pero oksekimej amo san niman ijkon kichiuaj. Ikinon tlayekankej uelis miak uelta iuan motlapouiskej. Xamo ijkuak yikin iuan motlapouiskej, mokuayejyekos tlen okiluijkej uan kitlatlaujtis Jehová makitlapojpolui (Sal. 32:5; 38:18). Ikinon ijkuak oksepa iuan motlapouiskej xamo kipatlas ken mokuayejyekoua.

¹³ Tlayekankej moneki kiteititiskej kajsikamatij uan kitlasojtlaj akin otlajtlakolchi uan kinekij kipaleuiskej mamoyolkopa. Kitlatlaujtiaj Jehová makinteochiua porque kinekij kipaleuiskej kuali mamokuayejyeko akin otlajtlakolchi uan mamoyolkopa (2 Tim. 2:​25, 26).

14. ¿Akin moneki tikueyichiuaskej ijkuak ikaj moyolkopa?

¹⁴ Sapanoua tipakij ijkuak moyolkopa akin otlajtlakolchi (Luc. 15:​7, 10). Tlayekankej mochijchikauaj kipaleuiskej akin otlajtlakolchi. Pero ¿akin okipaleui mamoyolkopa? Matikilnamikikan Pablo okijto: “Xamo toTajtsin Dios kinkauilis mamoyolkopakan” akinmej otlajtlakolchijkej (2 Tim. 2:25). Ikinon san toTajtsin Dios moneki tikueyichiuaskej ijkuak ikaj kipatla ken omokuayejyekouaya uan ayakmo kichiua tlen amo kuali. Pablo okijto ijkuak ikaj moyolkopa okachi kajsikamati tlen kijtoua Biblia, moilnamiki uan oksepa kuali mokuayejyekoua uan kisa imak Satanás (2 Tim. 2:26).

15. ¿Tlen moneki kichiuaskej tlayekankej para ok kipaleuiskej akin omoyolkopki?

¹⁵ Ijkuak ikaj moyolkopa, tlayekankej moneki kitlajpalotiuij para kipaleuiskej okachi matlaneltoka. Noijki kipaleuiskej ayakmo makichiua tlen kiyoltilana uan makichiua tlen kuali (Heb. 12:​12, 13). Tlayekankej amo moneki kiluiskej nion se tokni tlen okichi akin omoyolkopki. Pero ¿tlen moneki makimatikan tokniuan?

“TEIXPAN XIKINMAJUA [NOSO XIKINYEKTLALI] AKINMEJ TLAJTLAKOLCHIJTINEMIJ”

16. ¿Akinmej moneki kimatiskej ijkuak ikaj kiyektlaliaj ijkon ken kijtoua 1 Timoteo 5:20?

¹⁶ (Xiktlajtolti 1 Timoteo 5:20). Pablo okilui Timoteo makijto “teixpan” okiyektlalijkej akin otlajtlakolchi. Pero ¿akinmej moneki kimatiskej? Amo moneki kinmiluiskej nochtin tokniuan tlen pouij itech tlanechikol. San moneki kinmiluiskej akinmej okitakej tlen okichi akin otlajtlakolchi noso ye okinmilui tlen okichi. Tlayekankej kinmiluiskej yomotlapouijkej iuan non tokni uan yokiyektlalijkej.

17. ¿Tlen moneki kichiuaskej tlayekankej tla tokniuan kimatij ikaj otlajtlakolchi noso satepan kimatiskej uan tleka?

¹⁷ Ualeua nochtin tokniuan kimatij ijkuak ikaj otlajtlakolchi noso satepan uelis kimatiskej. Ikinon se tlayekanki kinmiluis tokniuan okiyektlalijkej non tokni. ¿Tleka moneki kijtoskej akin okiyektlalijkej? Pablo okijto: “Ijkon oksekimej mamomojtikan” uan ijkon amo matlajtlakolchiuakan.

18. ¿Tlen kichiuaskej tlayekankej tla akin otlajtlakolchi yomoapolakti uan ayamo kajxitia 18 xiuitl? (Noijki xikita foto).

¹⁸ ¿Tlen kichiuaskej tlayekankej tla akin otlajtlakolchi yomoapolakti uan ayamo kajxitia 18 xiuitl? Tlayekankej kinpejpenaskej ome tlayekankej mamonechikokan iuan akin otlajtlakolchi uan noijki iuan ipapanuan tlen kitekichiuiliaj Jehová.b Tlayekankej kintlajtlaniskej ipapanuan ken yokipaleuijkej makipatla inemilis uan mamoyolkopa. Tla telpochtli noso ichpochtli kinkaki inpapanuan uan kinkauilia makipaleuikan, nonmej ome tlayekankej uelis kijtoskej amo makichiuilikan se comité. Tetajmej moneki kinpaleuiskej inkoneuan porque toTajtsin Dios ijkon kinnauatia makichiuakan (Deut. 6:​6, 7; Prov. 6:20; 22:6; Efes. 6:​2-4). Satepan tlayekankej kintlajtlaniskej tetajmej kox kipaleuijtokej inkone ken moneki. ¿Tlen kichiuaskej tlayekankej tla telpochtli noso ichpochtli amo kipatla inemilis uan amo moyolkopa? Eyi tlayekankej iuan monechikoskej uan noijki ipapanuan tlen kitekichiuiliaj Jehová.

“JEHOVÁ SAPANOUA TETLASOJTLA UAN TEIKNOMATI”

19. ¿Ken kiteititiaj tlayekankej kichiuaj ken Jehová ijkuak ikaj tlajtlakolchiua?

¹⁹ Jehová kinmiluia tlayekankej makinmaluikan tokniuan tlen pouij itech tlanechikol. Ikinon mochijchikauaj kinmaluiskej tokniuan amo matlajtlakolchiuakan (1 Cor. 5:7). Pero mochijchikauaj kinpaleuiskej mamoyolkopakan akinmej tlajtlakolchiuaj. Noijki kineltokaj moyolkopas akin kipaleuiaj uan ijkon kiteititiaj kichiuaj ken Jehová porque ye “sapanoua tetlasojtla uan teiknomati” (Sant. 5:11). Apóstol Juan okintlasojtlaya tokniuan ikinon ijkuak yokipiaya miak xiuitl okijkuilo: “Nokonetsitsiuan, namechijkuililia nin tlamantli para amo xitlajtlakolchiuakan. Pero onka akin techpaleuis tla ikaj tlajtlakolchiuas. Techpaleuis Jesucristo porque ye yolkuali uan kajki inauak toTajtsin” (1 Juan 2:1).

20. ¿Tlen timomachtiskej chikome?

²⁰ Techyolkokoua ijkuak ikaj tlajtlakolchiua uan amo kineki moyolkopas. Ikinon moneki kiluiskej ayakmo pouis itech tlanechikol. ¿Tlen kichiuaj tlayekankej ijkuak ijkon panoua? Non tlamantli timomachtiskej chikome.