¿Tlen kineki Jehová matikchiuakan ijkuak ikaj tlajtlakolchiua?

1. ¿Tlen kineki Jehová nochtin makichiuakan?

JEHOVÁ techkauilia matikpejpenakan tlen tikchiuaskej uan mojmostla tikpejpenaj miak tlamantli. Okachi miak ipati ijkuak ikaj kipejpena motemakas ixpan Jehová uan kitekichiuilis inuan tokniuan. ToTajtsin Dios kineki nochtin ijkon makichiuakan. ¿Tleka ijkon kineki makichiuakan? Porque techtlasojtla uan kineki kuali matiyetokan. Kineki iuan matimouikakan uan satepan nochipa matiyoltokan (Deut. 30:​19, 20; Gál. 6:​7, 8).

2. ¿Tlen kineki Jehová makichiuakan akinmej tlajtlakolchiuaj? (1 Juan 2:1).

² Jehová techkauilia matikpejpenakan kox tiktekichiuiliskej uan amo techiluia moneki ijkon tikchiuaskej porque ijkon technauatia. Pero ¿tlen panos tla se tokni tlajtlakolchiua? Tla amo moyolkopa kiluiskej ayakmo pouis itech tlanechikol (1 Cor. 5:13). Pero Jehová kineki mamoyolkopa uan oksepa iuan mamouika. Ikinon okitemakak iKone para kintlapojpoluis akinmej moyolkopaj (xiktlajtolti 1 Juan 2:1). ToTajtsin Dios sapanoua techtlasojtla ikinon kinpaleuia akinmej tlajtlakolchiuaj uan kinmiluia mamoyolkopakan (Zac. 1:3; Rom. 2:4; Sant. 4:8).

3. ¿Tlen timomachtiskej?

³ Jehová techiluia ken kita tlajtlakoli uan techiluia ken momachilia ijkuak ikaj tlajtlakolchiua. Ikinon kineki matikitakan ijkon ken ye kita. Axkan timomachtiskej non tlamantli. Achto tikitaskej tlen okinmilui Pablo makichiuakan tokniuan tlen okatkaj Corinto ijkuak se tokni otlajtlakolchijtoka. Satepan tikitaskej tlen okinmilui Pablo makichiuakan tokniuan ijkuak moyolkopaskia tlakatl tlen otlajtlakolchi. Saiktlami tikitaskej ken momachilia Jehová ijkuak ikaj tlajtlakolchiua.

¿TLEN OKINMILUI PABLO MAKICHIUAKAN TOKNIUAN TLEN OKATKAJ CORINTO IJKUAK SE TOKNI OTLAJTLAKOLCHIJTOKA?

4. ¿Tlen opanotoka itech tlanechikol tlen okatka Corinto? (1 Corintios 5:​1, 2).

⁴ (Xiktlajtolti 1 Corintios 5:​1, 2). Pablo okimatki tlen opanotoka itech se tlanechikol tlen okatka Corinto ijkuak eyi uelta uejka otetlapouito. Se tokni oauilnemiaya iuan itlakpamama. Pablo okijto non tokni okichijtoka se ueyi tlajtlakoli porque nion akinmej amo otlaneltokayaj ijkon okichiuayaj. Tokniuan okitayaj kuali tlen okichiuaya non tokni. Xamo sekimej tokniuan okitayaj kuali tlen okichijtoka non tokni porque omokuayejyekouayaj ijkon okiteititiayaj okiknomatiayaj ijkon ken Jehová teiknomati. Pero toTajtsin Dios amo kipaktia matitlajtlakolchiuakan itech ialtepe. Xamo ijkuakon okualankej akinmej amo okitekichiuiliayaj Jehová porque okitakej tlen okichijtoka. Oksekimej tokniuan noijki ijkon kichiuaskiaj tla amitlaj kiluiskiaj non tlakatl. Ikinon ¿tlen okinmilui Pablo makichiuakan tokniuan tlen okatkaj Corinto?

5. ¿Tlen okinekiaya kinmiluis Pablo makichiuakan tokniuan tlen okatkaj Corinto ijkuak okintlajkuilili? (1 Corintios 5:13; noijki xikita dibujo).

⁵ (Xiktlajtolti 1 Corintios 5:13). Jehová okiyolini Pablo makintlajkuilili tokniuan uan okinmilui ayakmo mapoui itech tlanechikol akin amo omoyolkopaya. ¿Tlen kichiuaskiaj tokniuan tlen opouiayaj itech non tlanechikol? Pablo okinmilui ayakmo mamouikakan iuan non tlakatl nion amo iuan matlakuakan (1 Cor. 5:11). Ijkon okinmilui porque ijkuak ikaj iuan titlakuaj moneki iuan timotlapouiskej uan tipakij iuan tiyetoskej. Ikinon okinmilui amo mamouikakan iuan non tlakatl. Non kinpaleuiskia tokniuan amo makichiuakan ijkon ken ye (1 Cor. 5:​5-7). Non tlamantli kipaleuiskia tlakatl makita sapanoua otlajtlakolchi, okiyolkoko Jehová uan noijki mapinaua uan mamoyolkopa.

6. ¿Tlen okichijkej tokniuan ijkuak Pablo okintlajkuilili uan tlen okichi tlakatl tlen otlajtlakolchi?

⁶ Pablo opejki motlajtlania tlen kichiuaskiaj tokniuan ijkuak okintitlanili carta tlen okinmijkuilili. Satepan Tito okilui Pablo tokniuan okiselijkej tlen okinmijkuilili uan okichijkej tlen okinnauati (2 Cor. 7:​6, 7). Ijkuak tokniuan okichijkej tlen okinmilui Pablo, noijki omoyolkopki tlakatl tlen otlajtlakolchi. Non tlakatl okika tlen okichijtoka, okipatlak inemilis uan opejki kintlakamatij itlanauatiluan toTajtsin Dios (2 Cor. 7:​8-11). ¿Tlen okseki tlamantli kinmiluiskia Pablo makichiuakan tokniuan?

¿TLEN OKICHIJKEJ TOKNIUAN IJKUAK OMOYOLKOPKI TLAKATL TLEN OTLAJTLAKOLCHI?

7. ¿Tlen okichi tlakatl tlen otlajtlakolchi? (2 Corintios 2:​5-8).

⁷ (Xiktlajtolti 2 Corintios 2:​5-8). Pablo okinmilui: “Xikselikan tlakatl tlen otlajtlakolchi porque yonankiyektlalijkej”. Non kijtosneki tlakatl omoyolkopki uan tokniuan omonekiaya oksepa kiseliskej (Heb. 12:11).

8. ¿Tlen okinmilui Pablo makichiuakan tokniuan?

⁸ Pablo okinmilui tlayekankej oksepa makiselikan itech tlanechikol tlakatl tlen otlajtlakolchi. Okinmilui: “Axkan moneki nankitlapojpoluiskej ika nochi namoyolo. Noijki xikyolseuikan” uan “namechnauatia xikpaleuikan makita nankitlasojtlaj”. Non okijtosnekiaya tokniuan omonekiaya kiteititiskej okitlasojtlayaj non tlakatl uan amo kitlauelitaskiaj. Ijkon non tlakatl kitaskia tokniuan oyolpakiayaj porque omoyolkopki.

9. ¿Tleka sekimej tokniuan okitakej oui kitlapojpoluiskej tlakatl tlen omoyolkopki?

⁹ Sekimej tokniuan xamo amo okinpakti ijkuak okimatkej non tlakatl oksepa pouiskia itech tlanechikol. Xamo sekimej ok okualantokaj porque non tlakatl okinmouijtili tokniuan uan okinyolkoko oksekimej. Tokniuan tlen ompa omonechikouayaj omochijchikauayaj kitlakamatiskej Jehová. Ikinon xamo okijtouayaj tleka non tlakatl oksepa pouiskia itech tlanechikol tla sapanoua otlajtlakolchi (noijki xikita Lucas 15:​28-30.) Pero ¿tleka omonekiaya kitlasojtlaskej non tlakatl?

10, 11. ¿Tlen panoskia tla tlayekankej amo kiseliskiaj tlakatl tlen omoyolkopki?

¹⁰ Matimokuayejyekokan ken momachiliskia tlakatl tla tlayekankej amo kikauiliskiaj oksepa mapoui itech tlanechikol. Noijki matimokuayejyekokan ken momachiliskia tla tokniuan amo kiteititiskiaj okitlasojtlayaj. Non tlakatl sapanoua moyolkokoskia uan mosotlauaskia. Noijki mokuayejyekoskia ayakmo uelis kipatlas inemilis uan amitlaj ipati oksepa mouikaskia iuan Jehová.

¹¹ ¿Tlen kinpanoskia tokniuan tla amo oksepa kiseliskiaj non tlakatl? Ayakmo kuali mouikaskiaj iuan Jehová. ¿Tleka ijkon kinpanoskia? Porque amo kichijtoskiaj ijkon ken Jehová tlen kintlapojpoluia akinmej moyolkopaj. Kichijtoskiaj ijkon ken Satanás tlen amo yolkuali uan amo teiknomati. Tla ijkon kichiuaskiaj tokniuan, kipaleuiskiaj Satanás makichiua mamosotlaua non tlakatl uan ayakmo mamouika iuan Jehová (2 Cor. 2:​10, 11; Efes. 4:27).

12. ¿Ken uelis kichiuaskiaj tokniuan ijkon ken Jehová kichiua?

¹² ¿Ken uelis kichiuaskiaj tokniuan ijkon ken Jehová kichiua uan amo kichiuaskiaj tlen Satanás kineki? Omonekiaya kintlapojpoluiskej akinmej omoyolkopayaj ijkon ken Jehová tetlapojpoluia. Yiuejkika sekimej okijtojkej ken iyelis toTajtsin Dios ijkuak okijkuilojkej iTlajtol. David okijto Jehová ‘yolkuali uan kineki tetlapojpoluis’ (Sal. 86:5). Miqueas okijkuilo: “¿Kox onka okse Dios ken te tlen tetlapojpoluia uan kilkaua tlen amo kuali?” (Miq. 7:18). Noijki Isaías okijto: “Akin amo yolkuali makikaua iojui uan akin kichiua tlen amo kuali ayakmo ijkon mamokuayejyeko. Uan mamokopa iuan Jehová, akin melauak kiknomatis uan toTajtsin Dios melauak kitlapojpoluis” (Is. 55:7).

13. ¿Tleka tokniuan omonekiaya oksepa kiseliskej tlakatl tlen otlajtlakolchi? (Xikita recuadro “¿Keman oksepa okiselijkej tlakatl tlen otlajtlakolchi?”).

¹³ Tokniuan tlen omonechikouayaj ompa Corinto omonekiaya kiteititiskej okitlasojtlayaj non tlakatl tlen otlajtlakolchi. Noijki omonekiaya yolpakiskej porque oksepa yopouiaya itech tlanechikol. Pablo okinmilui kiteititiskiaj ‘nochipa tetlakamatiskiaj’ tla kitlapojpoluiskiaj non tlakatl (2 Cor. 2:9). Amo miak metstli opanok uan non tlakatl omoyolkopki porque okiyekiluijkej otlajtlakolchijtoka. Ikinon tlayekankej omonekiaya san niman kiseliskej itech tlanechikol.

¿KEN TIKTEITITISKEJ JEHOVÁ TEIKNOMATI UAN KICHIUA TLEN KUALI?

14, 15. ¿Tlen techmachtia tlen opanok ompa Corinto? (2 Pedro 3:9; noijki xikita foto).

¹⁴ Jehová otlanauati makijkuilokan itech iTlajtol tlen opanok itech tlanechikol tlen okatka Corinto. Ijkon otlanauati makijkuilokan porque okinekiaya matikmatikan tlen opanok (Rom. 15:4). Non techmachtia Jehová amo kipaktia ikaj matlajtlakolchijto itech tlanechikol. Sekimej mokuayejyekouaj Jehová teiknomati ikinon kinkauiliaj mayetokan itech tlanechikol akinmej amo moyolkopaj. Amo kuali tlen kichiuaj akinmej ijkon mokuayejyekouaj. Jehová teiknomati pero amo keman uelis tikchiuaskej san tlen tiknekij porque ye amo kinpatla itlanauatiluan (Jud. 4). Jehová amo kiteititiskia teiknomati tla kitekauiliskia mayetokan itech tlanechikol akinmej tlajtlakolchiuaj porque tlajyouiskej nochtin tokniuan (Prov. 13:20; 1 Cor. 15:33).

¹⁵ Nochi tlen opanok techititia Jehová kineki nochtin mamomakixtikan uan amo kineki ikaj maixpoliui. Ye kinmiknomati akinmej kipatlaj innemilis uan mochijchikauaj oksepa iuan mouikaskej (Ezeq. 33:11; xiktlajtolti 2 Pedro 3:9). Ikinon Jehová okinauati Pablo makinmilui tokniuan tlen okatkaj Corinto makitlapojpoluikan non tlakatl uan oksepa makiselikan porque okipatlak inemilis uan omoyolkopki.

16. ¿Tlen timokuayejyekoua ijkuak otikmatki tlen opanok ompa Corinto uan ken tikita tlen okipanok tlakatl tlen omoyolkopki?

¹⁶ Tlen opanok ompa Corinto techititia Jehová sapanoua yolkuali, techtlasojtla uan kichiua tlen kuali (Sal. 33:5). Ikinon tikueyichiuaj Jehová porque kualtsin iyelis. Tejuan titlajtlakolejkej uan tiknekij matechtlapojpolui ikinon tiktlasojkamatiliaj porque techiknomati. Noijki tiktlasojkamatiliaj porque okitemakak iKone para techtlapojpoluis. Techyolseuia tikmatiskej Jehová sapanoua kintlasojtla akinmej kitekichiuiliaj uan kineki kuali mayetokan.

17. ¿Tlen timomachtiskej itech okseki tlamachtilmej?

¹⁷ ¿Ken uelis kichiuaskej tlayekankej ijkon ken Jehová kichiua ijkuak kipaleuiskej mamoyolkopa akin otlajtlakolchi? ¿Tlen tikchiuaskej tla tlayekankej kijtoskej ikaj ayakmo pouis itech tlanechikol noso ijkuak ikaj oksepa pouis itech tlanechikol? Non tlamantli tikitaskej itech okseki tlamachtilmej.