¿Tlen techpaleuis ma tiyolpakikan ika tlen tikpiaj?

Kuali xitekipano

“Matekiti ika imawah para makipia tlan ika kimpalewis akimeh kimpoloa” (EFESIOS 4:28).

Jehová kineki ma tikpatioitakan titekipanoskej. ¿Tleka? Porque ijkon tikpiaskej tlen ika timopanoltiskej uan tikmakaskej tlen moneki kipias tofamilia uan ijkon yolpakis. Noijki hasta uelis tikpaleuiskej akin itlaj kipoloua. Akinmej kinpaktia tekipanoskej, kinkauiliaj nochipa ma tekipanokan kanin okintlakejkej. Melauak tlen kijtoua Biblia: ijkuak kuali titekipanouaj nochi kuali kisa uan non se tetliokolil tlen toTajtsin Dios techmaka (Eclesiastés 3:13).

Amo xitlachteki nion xitlakajkayaua

“Tejwah kuali tikmatokeh amitla tlajtlákoli tikpiah, porke tiknekih tikchiwaskeh nochi tlan kuali” (HEBREOS 13:18).

Tla amo titlakajkayauaj uan amo titlachtekij, kuali timomachiliskej, amitlaj techtekipachojtos uan uelis tikochiskej. Oksekimej techtlakaitaskej uan kinekiskej ma tikinpaleuikan. Pero akinmej tlakajkayauaj uan tlachtekij amo yolpakij. San mokuatlamijtokej uan san momojtijtokej porque uelis se tonal kinmajsiskej.

Amo okachi xikpatioita tomin

“Amo xikapisnekikah tomi, xipakikah ika tlan ya nonkipiah” (HEBREOS 13:5).

Moneki tikpiaskej tomin para tikmokouiskej tlen ika timotlakualtiskej noso okseki tlamantli tlen moneki pero amo kuali tla okachi tikpatioitaj tikpiaskej tomin. Tla tiktemouaj tikpiaskej miak tomin non uelis kichiuas ayakmo kuali ma timouikakan iuan tonamik noso tosiua, ayakmo okachi tiyetoskej uan tokoneuan uan hasta uelis timokokoskej (1 Timoteo 6:9, 10). Noijki tla san tiktemojtokej tikpiaskej miak tomin non uelis kichiuas ma tikchiuakan itlaj tlen amo kuali. Se tlakatl tlen okatka ixtlamatki okijto: “Tlakatl tlen nochipa kichiua tlen kuali kiteochiuaskej, pero akin san niman kineki kipias miak tomin, uelis tlajtlakolchiuas” (Proverbios 28:20).

Ximomachti tlen moneki

“Xikmalui ixtlamatilistli tlen mitspaleuia uan mokuayejyekolis” (PROVERBIOS 3:21).

Tlen techmachtiaj itech escuela techpaleuia ma tikchiuakan tlen moneki uan noijki techpaleuia kuali ma tikinmachtikan tokoneuan. Pero non amo techpaleuis nochipa ma tikpiakan tlen moneki uan ma tiyolpakikan. Tla tiknekij kuali ma kisa nochi tlen tikchiuaj, moneki timomachtiskej tlen toTajtsin Dios techiluia. ITlajtol kijtoua akinmej kikakij, kuali kisas nochi tlen kichiuaskej (Salmo 1:1-3).