TLAMACHTIL 37
Biblia kijtoua ken moneki tikitaskej tekitl uan tomin
Ijkuak amo tikpiaj tomin nion tekitl sapanoua timotekipachouaj, oui tiktemoskej tlen ika timopanoltiskej uan tiktekichiuiliskej Jehová. Pero Biblia techiluia tlen uelis techpaleuis.
1. ¿Ken kijtoua Biblia moneki tikitaskej tekitl?
ToTajtsin Dios kineki matiyolpakikan ijkuak titekipanouaj. Biblia kijtoua “amo onka okse tlamantli kuali tlen uelis kichiuas tlakatl ken [...] moyolpaktis porque chikauak tekiti” (Eclesiastés 2:24). Jehová chikauak tekipanoua. Ijkuak chikauak titekipanouaj ken toTajtsin Dios, tikyolpaktiaj uan noijki kuali timomachiliaj.
Moneki titekipanoskej, pero amo kuali tla okachi tikpatioitaj tekitl uan ayakmo tikueyichiuaj Jehová (Juan 6:27). ToTajtsin Dios techiluia tla okachi tikpatioitaj tiktekichiuiliskej, techmakas tlen techpolos.
2. ¿Ken moneki tikitaskej tomin?
Biblia kijtoua tomin techpaleuia pero noijki kijtoua amo uelis kichiuas matiyolpakikan (Eclesiastés 7:12). Ikinon Biblia techiluia amo sapanoua matikpatioitakan tomin, kijtoua: “xipakikan san ika tlen nankipiaj” (xiktlajtolti Hebreos 13:5). Tla tiyolpakij san ika tlen tikpiaj, amo tiknekiskej tikpiaskej miak tlamantli uan amo tikteuikiliskej tomin (Proverbios 22:7). Noijki amo timauiltiaj para tiktlaniskej tomin nion tikchiuaj seki tlamantli para san niman tikpiaskej.
3. ¿Ken uelis titlapaleuiskej ika totomin?
Jehová kipaktia kitemakas tlen kipia, tejuan noijki uelis tiktemakaskej tlen tikpiaj uan ijkon tikchiuaskej ken ye (1 Timoteo 6:18). Uelis tiktemakaskej totomin itech totlanechikol uan noijki para tikinpaleuiskej tokniuan uan akinmej amitlaj kipiaj. Jehová kipatioita ijkuak tiktemakaj totomin ika nochi toyolo. Tla ijkon tikchiuaj, tikyolpaktiskej uan tejuan noijki tiyolpakiskej (xiktlajtolti Hechos 20:35).
MATIMOMACHTIKAN
Matikitakan ken techpaleuis tla tikitaj tekitl ken moneki uan tiyolpakij ika tlen tikpiaj.
4. Tla kuali titekipanos, tikueyichiuas Jehová
Tla tiknekij timouikaskej iuan Jehová, matikitakan tekitl ken moneki. Xikitakan VIDEO uan satepan xikitakan tlen namechmachtia.
¿Tleka omitspakti tlen okichi Jason?
¿Tlen okichi para amo nochipa tekipanos?
Xiktlajtoltikan Colosenses 3:23, 24 uan satepan xikitakan tlen namechmachtia.
¿Tleka moneki kuali matitekipanokan?
Maski moneki titekipanoskej, okachi moneki matikpatioitakan tiktekichiuiliskej Jehová.
5. Techpaleuis tla tiyolpakij ika tlen tikpiaj
Miakej san kinekij kipiaskej tomin, pero Biblia techiluia okse tlamantli matikchiuakan. Xiktlajtoltikan 1 Timoteo 6:6-8 uan satepan xikitakan tlen namechmachtia.
¿Tlen techiluia Biblia matikchiuakan?
Uelis tiyolpakiskej maski amo tikpiaj miak tlamantli. Xikitakan VIDEO uan satepan xikitakan tlen namechmachtia.
¿Tleka yolpakij familias tlen otikinmitakej maski amo kipiaj miak tlamantli?
¿Tlen techpanos tla yitikpiaj tomin pero tiknekij okachi tikpiaskej? Jesús okijto uelis titlajyouiskej tla ijkon timokuayejyekouaj. Xiktlajtoltikan Lucas 12:15-21 uan satepan xikitakan tlen namechmachtia.
¿Tlen mitsmachtia tlen okijto Jesús? (Xikitakan versículo 15).
Xiktlajtoltikan Proverbios 10:22 uan 1 Timoteo 6:10 uan satepan xikitakan tlen namechmachtia.
Tlen okachi ipati, ¿timouikaskej iuan toTajtsin Dios noso tikpiaskej miak tomin? ¿Tleka ijkon tikijtoua?
¿Tlen techpanos tla san tiknekiskej tikpiaskej miak tomin?
6. Jehová techmakas tlen ika timopanoltiskej
Uelis tikteititiskej tikneltokaj Jehová techmakas tlen moneki ijkuak amo tikpiaj tekitl. Xikita tlen uelis mitspaleuis tla ijkon mitspanos. Xikitakan VIDEO uan satepan xikitakan tlen namechmachtia.
¿Tlen ouijkayotl okipixki tokni?
¿Tlen okichi?
Xiktlajtoltikan Mateo 6:25-34 uan satepan xikitakan tlen namechmachtia.
¿Tlen kichiuas Jehová tla okachi tikpatioitaj tiktekichiuiliskej?
SEKIMEJ KIJTOUAJ: “Moneki nikmakas nofamilia tlen ika mopanoltis, ikinon amo nimajxilia nochipa nimonechikos”.
¿Tlen texto mitspaleuia xikilnamiki okachi kuali tiktekichiuilis Jehová?
XIKILNAMIKTO
Moneki titekipanoskej, pero amo matikilkauakan okachi ipati tiktekichiuiliskej Jehová.
Matikojpauikan
¿Tlen mitspaleuis xikita tekitl ken moneki?
¿Tleka uelis tiyolpakis san ika tlen tikpia?
Jehová techiluia techmakas tlen moneki, ¿ken uelis tikteititiskej tikneltokaj tlen techiluia?
NIN NOIJKI MITSPAKTIS
Xikita kox Biblia kijtoua amo kuali matikpiakan tomin.
“¿Kichiua tomin ma titlajyouikan?” (Nin tlamachtil kajki itech jw.org/ncx)
Xikita ken kiyolpaktis toTajtsin Dios ijkuak itlaj tiktemakaj.
¿Kuali matimauiltikan uan matimotlatlanikan ika tomin?
“Tlen techmachtia Biblia: ¿Kuali ma timotlatlanikan ika tomin?” (¡Ma titlachixtokan!, marzo 2015)
Xikita tlen okipaleui se tlakatl ayakmo matlachteki uan mamotlatlani ika tomin.
“Onechpaktiaya niktlanis tomin ika caballos” (Akin Tetlapouijtok, 1 de noviembre 2011)