¿Kichiua tomin ma titlajyouikan?

Biblia kijtoua

Biblia amo kijtoua tomin kichiua ma titlajyouikan noso techtlajyouiltia. Pero miakej kijtouaj: “Tomin amo kuali porque kichiua ma titlajyouikan” uan mokuayejyekouaj Biblia ijkon tlamachtia. Pero iTlajtol toTajtsin Dios okse tlamantli tlamachtia, ompa kijtoua: “Akin kitlasojtla tomin tlajyouia”a (1 Timoteo 6:10, Reina Valera, 2009, negritas nuestras).

• ¿Tlen kijtoua Biblia itech tomin?

• ¿Tlen techpanos tla tikixnekij tomin?

• Kuali tiyetoskej tla tiktlakamatij tlen kijtoua Biblia

• Biblia techiluia ken moneki tikitaskej tomin

¿Tlen kijtoua Biblia itech tomin?

Biblia kijtoua tla kuali tiktekitiltiaj tomin uelis techpaleuis (Eclesiastés 7:12). Noijki kijtoua kuali kichiuaj akinmej kitemakaj intomin ika inyolo para kinpaleuiskej oksekimej (Proverbios 11:25).

Pero Biblia noijki tlamachtia amo moneki sapanoua tikpatioitaskej tomin. Hebreos 13:5 kijtoua: “Amo xikapisnekikah tomi, xipakikah ika tlan ya nonkipiah”. ¿Tlen techmachtia nin texto? Maski tomin techpaleuia, amo moneki sapanoua tikpatioitaskej. Tla tikpiaj tlakuali, tlen tikmokentiskej uan kanin tichantiskej uelis tiyolpakiskej (1 Timoteo 6:8).

¿Tlen techpanos tla tikixnekij tomin?

Akinmej tlaixnekij amo uelis chantiskej itech xochitlali (Efesios 5:5). Achto porque akinmej ijkon kichiuaj yetoskia ken kinueyichiuaj teotsitsintin (Colosenses 3:5). Noijki porque akinmej tlaixnekij kichiuaj miak tlamantli tlen toTajtsin Dios amo kipaktia, ik non, Proverbios 28:20 kijtoua: “Akin san niman kineki kipias miak tomin, uelis tlajtlakolchiuas”. Akin tlaixneki, xamo kinekis tlachtekis, tlakajkayauas, temiktis noso kinchiuilis tlen amo kuali oksekimej.

Maski amo tikchiuaskej tlamantli tlen amo kuali, tla titlaixnekij titlajyouiskej. Biblia kijtoua: “Pero akimeh kinekih motomintiskeh, wetsih imak n tlajtlákoli porke san tlan kajsih pewa kichiwah para okachi kitlaniskeh tomi” (1 Timoteo 6:9).

Kuali tiyetoskej tla tiktlakamatij tlen kijtoua Biblia

Tla tiktlakamatij tlen technauatia toTajtsin Dios uan tikitaj tomin ken moneki, kuali timomachiliskej uan tikyolpaktiskej. Tla timochijchikauaj uan tikchiuaj tlen toTajtsin Dios kineki, ye techiluia: “Ayik nimitskajtewas moselti, nion nimitsilkawas” (Hebreos 13:5, 6). Ma tikneltokakan tla tikchiuaj tlen kuali ye techteochiuas (Proverbios 28:20).