Nin amo kimatij ixtlamatkej

Maski ixtlamatkej yiuejkika yomomachtijkej ken chijchitok tlen onka itech iluikak, ok motlajtlaniaj miak tlamantli.

¿Akinmej momachtiaj ciencia yikimatij ken opejki tlen onka itech iluikak uan ken opejki tiyoltokej? Amo. Miakej kineltokaj ixtlamatkej akinmej momachtiaj tlen onka itech iluikak techpaleuis ma tikmatikan ken opejki nochi tlen ompa onka. Se agnóstico tlen itoka Marcelo Gleiser, tlamachtia Astronomía itech Universidad Dartmouth, ye okijto: “Ayamo tikyekijtouaj ken opejki tlen onka itech iluikak”.

¿Uan ken opejki tiyoltokej? Revista Science News okijto: “Xamo amo keman tikajsikamatiskej ken opejki yoli nochi tlamantli nikan tlaltikpak. Miak tlamantli tlen uelis techpaleuiskia ma tikmatikan yopoliuik”. Ik non, ixtlamatkej ayamo kijtouaj ken opejki tlen onka iluikak uan ken opejki nochi tlen yoltok.

Xamo timotlajtlania: “Tla ikaj okichijchi nochi tlen yoltok itech tlaltikpak, ¿akin okichijchi? Tla akin otlachijchi sapanoua ixtlamatki uan yolkuali, ¿tleka kikaua ma titlajyouikan? ¿Tleka kikaua ma yeto miak religiones? ¿Tleka akinmej kijtouaj kiueyichiuaj toTajtsin Dios kichiuaj tlen amo kuali?”.

Ixtlamatkej amo kimatij tleka ijkon panoua pero tejuan kema uelis tikmatiskej seki tlamantli tlen uelis techpaleuis. Miakej yokajsikej itech Biblia tlen kinekij kimatiskej.

Miakej ixtlamatkej momachtiaj tlen kijtoua Biblia. ¿Mitspaktiskia tikmatis tleka kineltokaj ikaj otlachijchi? Xikalaki itech jw.org uan xikintemo videos kanin kijtoua ¿Kineltokaj sekimej ikaj otlachijchi?

Okineltokakej tlen kijtoua ciencia uan Biblia

Químico, Gueorgui Koidán

Nikinsetilia moléculas, yetoskia ken nimauiltia ajedrez: moneki nikmatis kanin nikintlalijtias. Tla amo nikchiuas ken moneki, uelis ijtlakauis se molécula. Tlen nikchiua mota oui pero okachi oui ken tekipanoua célula para kinchiuas moléculas. Non kichiua ma nikneltoka onka se químico akin otechchijchi uan okachi ixtlamatki.

Ijkuak onimomachti Biblia onikajsikamatki miak ipati tlen ompa kijtoua. Ok techpaleuia maski yikipia 2,000 xiuitl otlanki okijkuilojkej. Techpaleuia kuali ma timouikakan iuan tofamilia, kuali ma titekipanokan uan kuali ma timouikakan iuan oksekimej. Onikajsikamatki akin ijkon techiluia sapanoua ixtlamatki.

Embriólogo, Yan-Der Hsuuw

Ijkuak mochiua se embrión nochi células mopaleuiaj, seki mochiuaj nervios, músculos, omitl, estli uan okseki tlamantli uan ijkon mochijchiua se konetl. Ayamo tikajsikamatij nochi tlen panoua ijkuak mochijchiua se konetl. Ne nikneltoka kajki ikaj akin otechchijchi uan okachi ixtlamatki.

Biblia kijtoua itech Salmo 139:15, 16 ken mochijchiua se konetl ijtik inantsin. Akinmej momachtiaj ciencia yikin okimatkej ken mochijchiua se konetl. Pero yiuejkika yokatka ijkuilitok ken mochijchiua. Nikneltoka akin nochi otlachijchi okilui salmista tlen ma kijkuilo.

Itech jw.org xikita video Rocío Picado Herrero: Se siuatl tlen tlamachtia química kijtoua tleka kineltoka toTajtsin Dios.