Moisés okipejpenki kitekichiuilis Jehová

Itech altepetl Egipto, ikalchanejkauan Jacob okinmiluiayaj israelitas. Satepan ijkuak Jacob uan José omikej, opejki tlanauatia okse ueyi tekiua faraón. Nin ueyi tekiua omomojti ijkuak okitak israelitas okatkaj okachi chikauakej uan amo egipcios. Ik non, okichi ma yetokan tlakeualmej. Okinchiualti ma kinchijchiuakan ladrillos uan chikauak ma tekitikan itech tlalan. Maski egipcios okintlajyouiltiayaj israelitas, yejuan okachi omomiaktiliayaj. Non amo okipakti faraón, ik non, otlanauati san ma kinmiktikan nochtin chokotsitsintin israelitas tlen yikin oneskej. ¡Israelitas sapanoa omomojtijkej!

Se siuatl israelita tlen omotokayotiaya Jokébed okipixki se kuajkualtsin konetsintli. Para amo ma kimiktikan, okitlali ikone ijtik se chikiuitl uan chikiuitl okikauato kanin tlaxijyo itempa aueyatl Nilo. Míriam, ikni konetsintli, ompa omoka para kitas tlen panoskia.

Ichpoch faraón omaltito itech aueyatl uan okitak chikiuitl. Ijkuak okitlapo okitak se konetsintli ochokatoka uan okiknomatki. Míriam okitlajtlani: “¿Tikneki ma niktemoti se siuatl para ma kichichiti konetsintli?”. Ye okijto kema uan Míriam okinotsato inantsin. Ichpoch Faraón okilui Jokébed: “Xikuika nin konetsintli, nopatka xikmalui uan nimitstlaxtlauis”.

Ijkuak konetsintli omoskalti, Jokébed okiuikili ichpoch faraón. Ye okitokayoti Moisés uan okiskalti ken yetoskia ikone. Moisés omoskalti ken se príncipe uan uelis kipiaskia san tlen ye kinekiskia. Pero ye amo keman okilka Jehová. Moisés okimatiaya ye okatka israelita uan amo egipcio uan okipejpenki kitekichiuilis Jehová.

Ijkuak Moisés okipiaya 40 xiuitl, okinekiaya kinpaleuis israelitas. Se tonal, okitak se egipcio okiuitekiaya se tlakeuali israelita. Moisés chikauak okiuitek egipcio uan okimikti. Satepan, okitlalpacho. Faraón okimatki tlen okichi Moisés uan okinekiaya kimiktis, pero Moisés ocholo uan oyajki altepetl Madián. Ompa Jehová okimalui.