Jonatán okatka yolchikauak uan nochipa okipaleui David

Itlayekankone Saúl omotokayotiaya Jonatán uan okatka se soldado yolchikauak. David okijto Jonatán okachi totoka itlaj okichiuaya amo ken se águila uan okachi chikauak amo ken se león. Se tonal, Jonatán okinmitak sekimej filisteos tlen okatkaj ipan se tepetsintli. Ik non, okilui tlakatl tlen okinuikiliaya iteposuan: “Tikinteuiskej tla Jehová ijkon techmatiltis. Tla filisteos techiluiaj ma titlejkokan, tikmatiskej moneki inmiuan timoteuiskej”. Filisteos okinmiluijkej: “¡Xitlejkokan uan ma timoteuikan!”. Ijkuakon, Jonatán uan tlakatl tlen okinuikiliaya iteposuan otlejkokej ipan tepetsintli uan okintlanilijkej 20 soldados.

Jonatán omonekiaya yetos ueyi tekiua ijkuak Saúl mikiskia porque okatka itlayekankone. Pero Jonatán okimatiaya Jehová okipejpenki David para yetoskia ueyi tekiua itech Israel uan amo okinexikolitak. Jonatán uan David kuali omouikayaj. Okijtojkej nochipa mopaleuiskiaj. Jonatán okimakak David itlaken, iespada, iarco uan icinturón ijkon okititi okatka iyolikni.

Ijkuak David okicholiliaya Saúl, Jonatán okitato uan okilui: “Ximoyolchikaua. Jehová yomitspejpenki ken ueyi tekiua. Uan notajtsin kuali kimati”. ¿Mitspaktiskia tikpias se moyolikni yolkuali ken Jonatán?

Jonatán okipaleui David miak uelta maski uelis mikiskia. Jonatán okimatiaya Saúl okinekiaya kimiktis David, ik non, okilui: “Titlajtlakolchiuas tla tikmiktis David. Ye amo okichi itlaj tlen amo kuali”. Saúl sapanoa okualanki iuan Jonatán. Seki xiuitl satepan, Saúl uan Jonatán omikej itech se guerra.

Ijkuak Jonatán omikik, David okitemo ikone Jonatán tlen omotokayotiaya Mefibóset. Ijkuak okajsik, okilui: “Nochipa nimitsmaluis porque kuali onimouikaya iuan motajtsin. Tichantis nokalijtik uan nouan titlakuas”. David amo keman okilka Jonatán.