Amo omotlankuaketskej ixpan se imagen

Satepan ijkuak ueyi tekiua Nabucodonosor okochtemik se estatua, otlanauati ma kichijchiuakan se ueyi imagen ika oro. Okitlali itech ixtlauak Dura uan ompa okinnechiko akinmej okachi oueyititokaj, noijki ompa okatkaj Sadrac, Mesac uan Abednego. Ueyi tekiua otlanauati: “Ijkuak nankikakiskej kintsotsonaskej trompetas, arpas uan gaitas, ximotlankuaketsakan ixpan imagen. Akin amo kichiuas, kikajkauaskej ijtik horno tlen melauak totonik”. ¿Tikneltoka Sadrac, Mesac uan Abednego motlankuaketsaskiaj ixpan non imagen? ¿Noso san Jehová kiueyichiuaskiaj?

Ueyi tekiua otlanauati ma tlatsotsonakan uan nochtin omotlankuaketskej ixpan imagen uan okiueyichijkej. Pero Sadrac, Mesac uan Abednego amo ijkon okichijkej. Sekimej tlakamej okinmitakej uan okiluitoj ueyi tekiua: “Ninmej eyi tlakamej hebreos amo kiueyichiuaj imagen tlen otitlanauati ma kichijchiuakan”. Nabucodonosor otlanauati ma kinnotsatij uan okinmilui: “Oksepa namechkauilis xikueyichiuakan imagen. Tla amo nankichiuaj, namechtlamotlaskej ijtik horno tlen melauak totonik. Nion se dios uelis namechmakixtis”. Yejuan okinankilijkej: “Oh ueyi tekiua, amo timotlankuaketsaskej ixpan imagen. ToTajtsin Dios techmakixtis. Uan maski amo techmakixtis, amo tikueyichiuaskej imagen”.

Nabucodonosor sapanoa okualanki uan okinmilui itlakeualuan: “¡Chikome uelta okachi xiktotonikan horno!”. Satepan okinmilui isoldados: “Xikinmilpikan ninmej tlakamej uan ijtik xikintlamotlakan”. Horno sapanoa oxotlatoka, ik non, soldados san niman omikej ijkuak ompa omotokijkej. Eyi telpokamej hebreos ouetskej ijtik tlitl. Satepan, Nabucodonosor otlachixki ijtik horno uan okinmitak naui tlakamej uan amo san eyi. Ye sapanoa omomojti uan okintlajtlani itlakeualuan: “¿Amo san eyi tlakamej otikintlamotlakej ijtik horno? Nikinmita naui, ¡uan se mota ken se ángel!”.

Nabucodonosor okachi omotoki kanin okatka horno uan chikauak okijto: “¡Xikisakan itekipanojkauan Dios tlen Ueyititok!”. Nochtin omotlajtlachialtijkej ijkuak okinmitakej Sadrac, Mesac uan Abednego okiskej itech tlitl uan amo itlaj okinpanok. Amo otlatlak innakayo, intsonkal nion intlaken, noijki amo omijnekuiayaj ken poktli.

Nabucodonosor okijto: “¡Tetlajtlachialtia inDios Sadrac, Mesac uan Abednego! Okititlanki iángel para ma kinmakixti. Amo onka okse dios ken ye”.

Sadrac, Mesac uan Abednego amo keman okikajkej Jehová maski san tlen okinpanok. ¿Tikneki tikchiuas ken yejuan?