Imachtijkauan Jesús okiselijkej espíritu santo

Jesús omokuepki iluikak uan majtlaktli tonal satepan imachtijkauan okiselijkej espíritu santo. Itech xiuitl 33, omochi iluitl Pentecostés uan miakej tlen oualayaj itech okseki altepemej oiluichijkej Jerusalén. Kanaj 120 imachtijkauan Jesús omonechikojkej ijtik se cuarto tlen okatka ikuapak se kali uan ompa opanok itlaj tetlajtlachialti. Itlaj tlen omotaya ken tlitl omonexti inkuapak imachtijkauan Jesús uan nochtin opejkej tlajtoaj tlatlamantli tlajtolmej. Noijki, omokak se chikauak ejekatl ijtik kali.

Akinmej oualayaj itech okseki altepemej okikakej uan totoka oyajkej itech non kali para kitaskiaj tlen opanotoka. Omotlajtlachialtijkej ijkuak okinkakej imachtijkauan Jesús otlajtojtokaj tlatlamantli tlajtolmej. Okijtojkej: “Yejuan uitsej itech Galilea, ¿tleka kimatij tlajtoskej totlajtol?”.

Pedro uan oksekimej itlatitlaniluan Jesús omoketskej inmixpan miakej uan Pedro okinmilui: “Namejuan onankimiktijkej Jesús, pero Jehová okiyoliti. Axkan Jesús kajki iluikak iyekma toTajtsin Dios. Uan ye otechmakak espíritu santo ijkon ken otechilui kichiuaskia. Ik non, onankikakej uan onankitakej ninmej milagros”.

Nochtin omotlajtlachialtijkej. Oajsik itech inyolo tlen okijto Pedro uan omotlajtlanijkej: “¿Tlen moneki tikchiuaskej?”. Ye okinnankili: “Ximoyolkuepakan uan ximoapolaktikan itech itoka Jesús. Satepan noijki nankiseliskej espíritu santo”. Non tonal kanaj 3,000 omoapolaktijkej. Ijkuakon, miakej opejkej kichiuaj ken Cristo itech Jerusalén. Espíritu santo okinpaleui tlatitlanilmej uan ijkon okinpeualtijkej okachi tlanechikolmej. Noijki okinmachtijkej nochtin imachtijkauan Jesús nochi tlen ye otlanauati.