Pablo okiuikakej Roma

Pablo saiktlami otetlapoui itech Jerusalén. Ompa okikitskijkej uan okitsakej. Se yoak, ijkuak otsaktoka, Jesús okilui Pablo: “Tias Roma uan ompa titetlapouis”. Pablo okatka Jerusalén uan okiuikakej altepetl Cesarea. Ompa otsaktoka ome xiuitl. Se tonal, ijkuak okatka ixpan tekiua Festo, Pablo okijto: “Nikneki ma nechuikakan Roma ixpan César”. Tekiua Festo okinankili: “Tla tikneki César ma mitsixkomaka, nimitstitlanis ixpan César”. Okitlejkoltijkej Pablo itech se barco tlen yaskia Roma. Ome tokniuan oyajkej iuan Pablo, se omotokayotiaya Lucas uan okse Aristarco.

Ijkuak okatkaj itech ueyi atl, opejki se chikauak ejekakiauitl tlen ouejka miak tonalmej. Nochtin omokuayejyekojkej mikiskiaj. Pero Pablo okinmilui: “Xinechkakikan, se ángel onechilui itech se kochtemikilistli: ‘Amo ximomojti. Tiajsiti Roma uan momakixtiskej nochtin akinmej yauij itech barco’. ¡Ximoyolchikauakan! Amo timikiskej”.

Ejekakiauitl ouejka 14 tonalmej. Satepan, oajsitoj itech se isla tlen itoka Malta. Barco omotsiko uan oxixinki, pero 276 tlen oyayaj itech barco omomakixtijkej. Sekimej omajkuijkej uan oksekimej omopaleuijkej ika tlen omoka ijkuak barco oxixinki uan ijkon oajsitoj itempa atl. Akinmej ochantiayaj Malta okinpaleuijkej akinmej omomakixtijkej uan otlatlatijkej para mototoniskiaj.

Eyi metstli satepan, soldados okiuikakej Pablo ueyi altepetl Roma itech okse barco. Ijkuak Pablo oajsito Roma, tokniuan okiselitoj. Pablo omoyolchika ijkuak okinmitak tokniuan uan okitlasojkamatili toTajtsin Dios. Maski Pablo otsaktoka, okikauilijkej ma mokaua ijtik se kali kanin otlamaluijtoka se soldado. Ompa omoka ome xiuitl. Miakej okitlajpaloayaj Pablo uan ye okintlapouiaya itech iTekiuajkayo toTajtsin Dios uan itech Jesús. Pablo noijki okintitlanili cartas tlanechikolmej tlen okatkaj Asia Menor uan Judea. Jehová okitekitilti Pablo para ma tetlapoui kuali tlajtolmej itech miakej altepemej.