TLAJTLANILMEJ ITECH BIBLIA
¿Se tonal nochtin tlaltikpaktlakamej tikpiaskej san se tekiuajkayotl?
¿Ken uelis se tekiuajkayotl kinsetilis nochtin tlaltikpaktlakamej? (Isaías 32:1, 17; 54:13.)
Ximokuayejyeko ken tiyetoskiaj tla tikpiaskiaj san se tekiuajkayotl. Axkan miakej tlaltikpaktlakamej tlajyouiaj pampa amo itlaj kipiaj, uan san sekimej kipiaj miak tlamantli. Se tekiuajkayotl tlen kajsikamatis tlen kinpanoa uelis kinpaleuis uan kinmakas tlen kinpoloa. ¿Tikneltoka tlaltikpaktlakamej uelis ijkon tlanauatiskej? (Xiktlajtolti Jeremías 10:23.)
Yiuejkika tekiuajkej san kinyolkokoaj miakej tlaltikpaktlakamej, uan okachi akinmej amo itlaj kipiaj. Uan sekimej tekiuajkej sapanoa amo yolkualmej (Eclesiastés 4:1; 8:9). Pero toTajtsin Dios akin kipiaj miak chikaualistli yokijto kitlalis se tekiuajkayotl tlen kinpatlas oksekimej tekiuajkej, uan noijki yokitlali se tekiua tlen kinmaluis tlaltikpaktlakamej. (Xiktlajtolti Isaías 11:4 uan Daniel 2:44.)
¿Tlen kichiuas iTekiuajkayo toTajtsin Dios?
Jehová yokipejpenki Jesús ken ueyi Tekiua. Ye akin uelis kuali tlanauatis (Lucas 1:31-33). Ijkuak okatka itech Tlaltikpak okiteititi omotekipachoaya itech tlaltikpaktlakamej. Axkan ken ueyi Tekiua kichiuas nochtin tlaltikpaktlakamej san sekan ma yetokan uan ayakmo tlajyouiskej. (Xiktlajtolti Salmo 72:8, 12-14.)
¿Nochtin kiseliaj Jesús ken inueyi Tekiua? Amo. Pero Jehová mochixtok (2 Pedro 3:9). Ik non, kinchixtok pampa uelis kiseliskej Jesús ken inueyi Tekiua. Ayakmo miak poliui uan Jesús kinmixpolos nochtin akinmej amo yolkualmej uan kichiuas itech nochi Tlaltikpak ma yeto yolseuilistli uan noijki ayakmo itlaj techmomojtis. (Xiktlajtolti Miqueas 4:3, 4.)