Ijkuak tikilnamikiskej iCena toTeko, ¡ma tikchiuakan ken Jehová uan Jesús!
1. ¿Tlen kichiuaj miakej tokniuan ijkuak moilnamiki imikilis Jesús?
1 Jehová kichiua itlanekilis ika nochi iyolo. Itech seki tlateochiualismej tlen kiualikas iTekiuajkayo toTajtsin Dios, Isaías 9:7 kijtoa Jehová sapanoa kineki kichiuas tlen kijtoa. Ijkuak iKone toTajtsin Dios, Jesús, otetlapoui itech Tlaltikpak, okiteititi sapanoa okipatioitaya tlaneltokalistli tlen melauak (Juan 2:13-17; 4:34). Sejse xiuitl ijkuak tikilnamikij imikilis Jesús, itech nochi Tlaltikpak sapanoa miakej akinmej tetlapouiaj mochijchikauaj pampa kichiuaskej ken Jehová uan Jesús uan okachi tetlapouiaj. ¿Tejuatsin ijkon tikchiuas?
2. ¿Tlen peuas tikchiuaskej itech sábado 7, metstli marzo?
2 Tikinyoleuaskej itech iCena toTeko. Nin xiuitl tipeuaskej tikinyoleuaskej itech iCena toTeko itech sábado 7, metstli marzo. Ximoyektlali pampa titetlapouis ika nochi moyolo. Nochi tlanechikolmej mochijchikauaskej ijkon kichiuaskej uan kintlapouiskej nochtin tlaltikpaktlakamej. Ximochijchikaua pampa tikinyoleuas akinmej tikinmachtia ika Biblia, akinmej kinekij okachi kimatiskej, akinmej iuan titekiti, mokalchanejkauan uan akinmej iuan timomachtia, uelis tikinmakas se amatsintli noso tiktekitiltis jw.org.
3. ¿Ken uelis okachi titetlapouiskej itech marzo uan abril?
3 Precursor auxiliar. Timochijchikauaskej ika nochi toyolo kichiuas okachi ma titetlapouikan. Tikmatij sapanoa miakej mochiuaskej precursores auxiliares itech marzo uan abril, uan uelis kipejpenaskej tetlapouiskej 30 horas. Ijkuak nankiueyichiuaskej Jehová ken kalchanejkej, noso ijkuak toselti timomachtiskej ma timotlatlaujtikan ken uelis tikchiuaskej (Prov. 15:22). Tla timochijchikauaj ika nochi toyolo, non kinpaleuis oksekimej noijki ijkon ma kichiuakan. Pampa tikchiuaskej ken Jesús, kuali ma timoyektlalikan pampa okachi titetlapouiskej (Mar. 6:31-34).
4. ¿Tlen tikseliskej tla tikchiuaskej ken Jehová uan Jesús?
4 Tla tikchiuaj ken Jehová uan Jesús ijkuak tikilnamikiskej imikilis Jesús tikseliskej miakej tlateochiualismej. Tikintlapouiskej miakej tlaltikpaktlakamej. Tiyolpakiskej okachi pampa tiktekichiuiliaj Jehová uan tikinpaleuiaj oksekimej (Hech. 20:35). Uan tlen okachi ipati, tikyolpaktiskej toTajtsin Dios uan iKone.