Ken uelis tiktekitiltis amochtli Tlamachtia Biblia ika tlajtoli amo oui

Amochtli What Can the Bible Teach Us? (amo kajki ika náhuatl) mota ken amochtli ¿Tlen melauak tlamachtia Biblia?, noijki kipia tlamachtilmej ken nin amochtli. Nin amochtli yankuik, kipia tlamachtilmej okachi amo oui. Omochijchi pampa akinmej kitaj oui amochtli Tlamachtia Biblia. Kanin tlamij tlamachtilmej, kipia notas kanin kiyekijtoa seki tlajtolmej tlen miak ipati. Amo kipiaj tlajtlanilmej ijkuak peua se tlamachtil nion kipia se recuadro pampa tikojpauiskej tlamachtil. Kanin tlami tlamachtil kipia seki tlajtolmej tlen yotimomachtijkej tlen techiluia tlen tlamachtia Biblia. Ijkon ken amochtli Tlamachtia Biblia, uelis tiktemakaskej maski motemakas okse amatlajkuilol itech metstli. ¿Ken uelis tiktekitiltiskej nin amochtli tlen amo oui pampa titlamachtiskej ika Biblia?

TLEN OKACHI IPATI. Uelis ok tikinmachtiskej tlaltikpaktlakamej ika amochtli Tlamachtia Biblia ijkon ken tikchiuaj, tikintlajtoltiskej párrafos uan tikinchiuaskej tlajtlanilmej. Pero ¿tla akin tikmachtiaj amo okachi kixmati tlajtoli noso kita oui kitlajtoltis amochtli? Tla ijkon panoa uelis tiktekitiltiskej amochtli Tlamachtia Biblia ika tlajtoli tlen amo oui. Uelis tiktekitiltiskej tlen okachi ipati itech sejse tlamachtil, uan uelis tikyoleuaskej akin tikmachtiaj iselti ma kitlajtolti nochi tlamachtil. Se tlamachtil tlen kipia Biblia uelis timomachtiskej san itech kanaj 15 minutos. Itech tlen okachi ipati amo kipia miak tlamantli ken tlamachtilmej. Nin kijtosneki moneki kuali timoyektlaliskej uan ma tikitakan kox kichiuilia oui kajsikamatis akin tikmachtiaj. Uan tla timomachtiaj párrafos tlen kiualika tlamachtil, uelis tiktekitiltiskej tlen okachi ipati pampa tikojpauiskej.

NOTAS TLEN KIYEKIJTOAJ TLAMACHTILMEJ. Tlajtolmej uan tlen tlamachtiaj ninmej notas katej ijkon ken tlamachtilmej tlen kipia amochtli. Akin tlamachtia uelis kipejpenas tla momachtiskej notas ijkuak momachtijtoskej se tlamachtil.