¿Tlen mitspaleuis kuali xiyeto satepan?
Miakej kineltokaj yikajki tlen kinpanos satepan. Ik non, kichiuaj seki tlamantli para kuali yetoskej.
MIAKEJ NIN KINELTOKAJ
KITAJ SITLALIMEJ: Miakej kitaj ken okatkaj sitlalimej ijkuak oneskej, kineltokaj ijkon uelis kimatiskej tlen kinpanos satepan. Ik non, kintlajtoltiaj horóscopos uan kichiuaj seki tlamantli para amo mouijtiliskej noso para yolpakiskej.
TLACHIXKEJ: Oksekimej kineltokaj tla kinmitatiuij tlachixkej kimatiskej tleka kinpanoua seki tlamantli uan tlen moneki kichiuaskej. Satepan uelis momaluiskej uan ijkon amitlaj kinpanos uan kuali yetoskej.
KINUEYICHIUAJ AKINMEJ OIXPOLIKEJ: Sekimej kijtouaj moneki kinueyichiuaskej akinmej oixpolikej noso miakej teotsitsintin para ma kinmaluikan uan ma kinteochiuakan. Se siuatl tlen itoka Van uan chanti Vietnam, okijto: “Onikneltokaya tla nikinyolseuia akinmej yoixpolikej satepan okachi kuali niyetoskia uan noijki nokoneuan”.
IKAJ ITECH OKSE TLAMANTLI MOYOLITIA: Miakej kineltokaj ijkuak ikaj ixpoliui oksepa moyolitia itech se yolkatl noso itech okse tlamantli uan ijkon nochipa kipanotok. Kineltokaj tla amo kuali kinpanoua, xamo porque okichijkej tlen amo kuali itech achto innemilis.
Maski miakej kineltokaj amo melauak, kitlajtoltiaj horóscopos, tabla ouija®, cartas del tarot uan ikaj kitatiuij ma kita inmauan para kimatiskej tlen kinpanos.
¿TLEN KINPANOUA SATEPAN?
¿Okachi kuali katej akinmej kineltokaj uan okachi yolpakij akinmej kineltokaj non tlamantli?
Ma tikitakan tlen okipanok Hào, ye chanti Vietnam. Okineltokaya tlen kitaj itech sitlalimej uelis kipaleuiskia uan okinueyichiuaya akinmej oixpolikej porque okineltokaya uelis kipaleuiskia kuali ma yeto. ¿Melauak okipaleui? Ye okijto: “Maski onitlanemakaya, onimouijtili porque onikteuikiliaya miak tomin, onimokualaniaya iuan nofamilia uan sapanoua onimotekipachouaya”.
Qiuming ialtepe Taiwan, okineltokaya tlen kitaj itech sitlalimej uelis kipaleuiskia, noijki okineltokaya ijkuak ikaj ixpoliui moyolitia itech okse tlamantli, okineltokaya yikajki tlen kipanoskia uan okinueyichiuaya akinmej yoixpolikej. Satepan ijkuak kuali omokuayejyeko itech non tlamantli okijto: “Onikajsikamatki nochi tlen onikneltokaya uan tlen onikchiuaya san motlajtolnamiki. Amo melauak panoua tlen kijtouaj akinmej kitaj sitlalimej. Uan tla amo tikilnamikij tlen achto otikchijkej, ¿ken uelis tikpatlaskej tonemilis tla timoyolitiaj itech okse tlamantli?”.
“Onikajsikamatki nochi tlen onikneltokaya uan tlen onikchiuaya san motlajtolnamiki” QIUMING, TAIWAN
Hào, Qiuming uan oksekimej okajsikamatkej amo melauak techpaleuiaj ma tikmatikan tlen techpanos satepan tla titlaneltokaj itech sitlalimej, tlachixkej tla tikinueyichiuaj akinmej oixpolikej uan tla tikneltokaj ikaj itech okse tlamantli moyolitia. ¿Kijtosneki amitlaj uelis tikchiuaskej para kuali tiyetoskej satepan?
Miakej kijtouaj para kuali tiyetoskej satepan moneki ma timomachtikan noso ma tikpiakan miak tomin. Pero ¿ken momachiliaj akinmej ijkon kichiuaj?
a Non ijkuilitok itech Gálatas 6:7. Noijki se proverbio oriental kijtoua: “Xiktoka melones uan tikololos melones; xiktoka habas uan tikololos habas”.