Moneki tikneltokaskej Jehová techpaleuis maski ualeua oui kanin techtitlaniskej

OPEJKI NIMOMACHTIA TLEN KIJTOUA BIBLIA UAN OPEJKI NIKNELTOKA JEHOVÁ

Onineski 1948 itech se altepetsintli tlen kajki suroeste ompa Nigeria. Ijkuakon nopapa okipiaya se ikni itoka Moustapha uan ye okatka okachi tsikitsin. Yejuan uan nokni tlen itoka Wahabi tlen tlayekana omochijkej iTlaixpantijkauan Jehová. Nopapa oixpoliuik ijkuak ne onikpiaya chiknaui xiuitl. Sapanoua onitlajyoui ijkuak ye oixpoliuik. Nokni Wahabi onechilui uelis oksepa tikitaskiaj topapa. Non onechyolchika uan opejki nimomachtia tlen kijtoua Biblia. Ne onimoapolakti 1963 uan ok eyi nokniuan noijki omochijkej iTlaixpantijkauan Jehová.

1965 onichantito itech se altepetl itoka Lagos. Ompa yochantiaya nokni tlen itoka Wilson tlen noijki okatka okachi ueyi. Ompa otimotlapouiayaj inuan precursores tlen otlapaleuiayaj Igbobi. Onikitak opakiayaj tlapaleuiskej ken precursores ikinon onimochi precursor enero 1968.

Se tokni itoka Albert Olugbebi tlen otlapaleuiaya Betel, otechnechiko akinmej otikatkaj titelpochmej uan otechilui omonekiayaj precursores especiales ik norte ompa Nigeria. Ok nikilnamiki tlen otechilui tokni Albert Olugbebi: “Namejuan nantepolchmej uan uelis okachi nankitekichiuiliskej Jehová. Ompa sapanoua moneki xitlapaleuikan”. Ne oniknekiaya nias san kanin nechtitlaniskiaj ijkon ken profeta Isaías okichi. Oniktemiti se amatl kanin okijtouaya oniknekiaya nitlapaleuiti (Is. 6:8).

Mayo 1968 onechtitlankej ken precursor especial itech altepetl Kano tlen omokauaya ik norte ompa Nigeria. Ijkuakon okatka se guerra ompa Biafra. Non guerra opejki 1967 uan otlanki 1970. Nochi opojpoliuik porque okatka guerra uan satepan okipeualtitoj guerra itech non altepetl ik kanin kisa tonaltsin. Se tokni tlen onechtlasojtlaya onechilui amo maniuia altepetl Kano. Pero ne onikilui: “Tlasojkamati miak ijkon otechilui. Mitstekipachoua miak tlen nechpanos. Pero tla Jehová kineki ompa maniuia, nikneltoka ye nouan yetos”.

ONIKNELTOKAK JEHOVÁ MASKI OPANOTOKA GUERRA

Temomojti tlen otikitakej ompa altepetl Kano. Guerra sapanoua otlaijtlako. Ijkuak otiayaj titetlapouitiuij, otikinmitayaj miakej mikamej. Okatkaj miakej tokniuan itech altepetl Kano pero miakej ocholojkej uan omokajkej san kanaj 15 tokniuan. Nonmej tokniuan omomojtiayaj uan omoyolkokouayaj. Sapanoua opakej ijkuak okitakej oajsitoj chikuase precursores especiales. Kuali omomachilijkej ijkuak otikinyolchikajkej. Otikinpaleuijkej oksepa mamonechikokan, matetlapouikan, makititlanikan Betel keski horas otetlapouiayaj uan makintlajtlanikan amatlajkuilolmej.

Tinochtin tlen otikatkaj precursores especiales opejki timomachtiaj tlajtoli hausa. Miakej otechkakiayaj porque otikintlapouiayaj ika intlajtol. Sekimej tlen opouiayaj itech se religión amo okinekiayaj matitetlapouikan. Ikinon omonekiaya timomaluiskej ijkuak otitetlapouiayaj. Se tonal, se tlakatl otechmomojti ika se cuchillo ijkuak otitetlapouitoj. Pero tejuan otikchololijkej porque otimotlalojkej. Pero Jehová nochipa otechmalui maski okatka temomojti. Noijki opejki okachi momiaktiliaj tokniuan (Sal. 4:8). Axkan ompa altepetl Kano katej 11 tlanechikolmej uan tetlapouiaj kanaj 500 tokniuan.

OTECHTLAJYOUILTIJKEJ OMPA NÍGER

Agosto 1968 oniajsito altepetl Kano uan seki metstli satepan oksekan otechtitlankej. Ne iuan ok ome precursores especiales otechtitlankej Niamey tlen poui República de Níger ompa África Occidental. San niman otikitakej sapanoua tlatotonia ompa Níger. Amo san omonekiaya timomatiskej. Noijki omonekiaya timomachtiskej francés tlen ompa tlajtouaj. Okatka oui pero otikneltokakej Jehová techpaleuiskia uan opejki titetlapouiaj inuan tokniuan maski amo miakej okatkaj. Miakej tlen chantij Niamey okimatiayaj kitlajtoltiskej se amatl ikinon okipiayaj amochtli La verdad que lleva a vida eterna. Ika non amochtli otitlamachtiayaj tlen kijtoua Biblia. Miakej otechtemouayaj para matikinmakakan se amochtli.

Pero san niman otikitakej tekiuajkej amo okinpaktiaya matitetlapouikan. Julio 1969 otikpixkej achto ueyi nechikol itech circuito uan omonechikojkej kanaj 20. Otipakiayaj porque moapolaktiskiaj ome tlen otikinmachtijkej. Achto tonal oajsitoj policías uan ayakmo otikpixkej toueyi nechikol. Okiuikakej tlayekanki itech circuito uan noijki akinmej otikatkaj tiprecursores especiales. Ompa otechtlajtlanijkej miak tlamantli uan mostlatika otechiluijkej oksepa matimokopatij. Yotikmatiayaj amo techkauiliskiaj matimonechikokan ikinon otikijtojkej timonechikoskiaj itech se kali. Ompa kintlapouiskiaj akinmej moapolaktiskiaj uan okinapolaktijkej ijtik se aueyatl kanin amikaj kinmitaskia.

Opanok seki semanas uan tekiuajkej otechkixtijkej itech altepetl ne uan ok makuili precursores especiales. Otechiluijkej san otikpiayaj ome tonal toneuian tikisaskiaj itech non altepetl. Otikintlakamatkej tekiuajkej uan otiajkej Betel tlen kajki Nigeria. Tokniuan tlen ompa tlapaleuiaj otechtitlankej itech okseki altepemej.

Ne onechtitlankej itech se altepetl itoka Orisunbare tlen kajki ompa Nigeria. Ompa onipakiaya nitetlapouis inuan tokniuan tlen amo miakej okatkaj. Noijki opejki nikinmachtia sekimej. Opanok tlajko xiuitl uan tokniuan tlen tlapaleuiaj Betel onechiluijkej kox uelis oksepa nitlapaleuiti Níger pero san noselti niaskia. Amo onikmatiaya tlen nikchiuas ijkuak ijkon onechiluijkej uan onimotekipacho. Pero noijki oniknekiaya nikinmitas tokniuan tlen okatkaj Níger.

Onimokopki altepetl Niamey. Mostlatika ijkuak oniajsito altepetl Niamey, se tlakatl tlasemanki okitak ne niTlaixpantijka Jehová uan opejki nechtlajtlania miak tlamantli tlen kajki itech Biblia. Opejki nikmachtia uan ye ayakmo otlachichinki, ayakmo otlauanki uan omoapolakti. Onitetlapoui itech tlatlamantli altepetsitsintin ompa altepetl Niamey uan onikitak miakej opejki momachtiaj. Ijkuak oniajsito altepetl Níger okatkaj 31 tokniuan uan ijkuak onia yokatkaj 69.

“AMO TIKMATIJ KEN TETLAPOUIAJ TOKNIUAN TLEN KATEJ ALTEPETL GUINEA”

Diciembre 1977 onimokopki Nigeria porque onechmachtijkej eyi semanas. Tokni Malcolm Vigo tlen okinpaleuiaya tokniuan tlen kiyekanaj Betel, onechmakak se carta ijkuak otlanki onechmachtijkej. Non carta okititlankej tokniuan tlen tlapaleuiaj Betel tlen kajki Sierra Leona. Tokniuan okitemouayaj se precursor iselti, tlen amo mokokoua, matlajto inglés uan francés para yetos tlayekanki itech circuito ompa Guinea-Conakri. Tokni Malcolm Vigo onechyekilui ikinon onechmachtijkej. Okijto oui nikchiuaskia non tekitl uan onechilui achto kuali manimokuayejyeko kox nikchiuaskia non tekitl. Pero ne san niman onikilui: “Nikselis non tekitl porque Jehová nechtitlani ijkon manikchiua”.

Onia itech avión ompa altepetl Sierra Leona uan onimonechiko inuan tokniuan tlen kiyekanaj Betel. Se tokni tlen kiyekana Betel onechilui: “Amo tikmatij ken tetlapouiaj tokniuan tlen katej altepetl Guinea”. Tokniuan okitayaj tekitl ompa Guinea pero amo ueli omotlapouiayaj inuan tokniuan porque tekiuajkej omokualaniayaj itech non altepetl. Miak uelta okititlaniayaj se tokni pero amo okikauiliayaj makalaki itech non altepetl. Ikinon onechtitlankej ik Conakri tlen poui Guinea uan onechiluijkej manechmakakan se amatl tlen kijtoua ompa nichantiskia.

Ijkuak oniajsito Conakri, onimotlapoui iuan se tlakatl de Nigeria tlen kinpaleuia tekiuajkej. Onikyekilui oniknekiaya nitetlapouis ompa Guinea pero ye onechilui amo ijkon manikchiua porque nechtsakuaskiaj uan uelis itlaj temomojti nechpanoskia. Onechilui manimokopa Nigeria uan ompa manitetlapoui. Pero ne onikilui nikneki nikan nitetlapouis. Non tlakatl okijkuilili se carta tekiua tlen kajki Guinea uan okilui manechpaleui uan ye okijto nechpaleuiskia.

Satepan onimokopki Betel tlen kajki Sierra Leona uan onikinmilui tokniuan tlen onechilui non tekiua. Tokniuan sapanoua opakej ijkuak okimatkej tekiuajkej nechkauiliskiaj ompa manichanti. Oniktlasojkamatili Jehová porque otechpaleuijtoka.   

1978 uan 1989 onechtlalijkej maniyeto tlayekanki itech circuito ompa Guinea uan Sierra Leona. Noijki onikpaleuiaya tlayekanki itech circuito ompa Liberia. Opejki nimokokoua uan okachi ijkuak uejka oniaya. Tokniuan nochipa omochijchikauayaj nechuikaskej kanin uelis nechpajtiskiaj.   

Se tonal sapanoua onimokoko porque onikinpiaya okuilimej uan se kokolistli itoka malaria. Ijkuak yonipajtitoka, onikmatki tokniuan omotlapouijtokaj kanin nechtokaskiaj. Onikijto niktekichiuiliskia Jehová maski nechpanoskia miak tlamantli. Nikneltoka san Jehová techpaleuia matiyoltokan uan tla timikiskej ye uelis techyolitis.   

TEJUAN NOCHIPA TIKNELTOKAJ JEHOVÁ

1988 onikixmatki Dorcas. Ye se precursora yolyamanki uan kuali mouika iuan Jehová. Otimonamiktijkej uan titlapaleuiaj itech circuito. Dorcas nechpaleuia, nechtlasojtla uan kipaktia kitekichiuilis Jehová. Ualeua otinejnemiayaj kanaj 25 kilómetros para tikintlajpalotiuij tokniuan kanin monechikouaj uan otikuikayaj totlamamal. Uejka otiayaj uan san tlen itech otiayaj para tikinmitatiuij tokniuan. Otinejnemiayaj kanin okatka miak sokitl uan miak tekochtli.

Dorcas sapanoua yolchikauak. Ualeua omonekiaya tipanoskej kanin okatkaj miakej cocodrilos. Se tonal, otinejnenkej makuili tonal uan omonekiaya tipanoskej ika canoa porque puentes oijtlakauikej uan amo uelis ompa tipanoskiaj. Ijkuak Dorcas omoketski para kisas ijtik canoa, ouetsito uan oapolaki. Amo otikmatiayaj tiajkuiskej uan ompa okatkaj cocodrilos. Pero ompa okatkaj sekimej telpochmej tlen omokajkajkej ijtik atl uan okikixtijkej. Miak uelta otiktemikej tlen otechpanok pero timochijchikauaj tiktekichiuiliskej Jehová.

Kanaj 1992 onikmatki Dorcas kipiaskia se konetl. Otimotlajtlanijkej kox ayakmo okachi tiktekichiuiliskiaj Jehová. Pero otikijtojkej nin konetl otechtliokoli Jehová. Ikinon otikijtojkej tiktokayotiskiaj totakotsin Jahgift. Non kijtosneki “otechtliokoli Jah”. Opanok naui xiuitl uan oneski okse tokone uan otiktokayotijkej Eric. Tokoneuan otechintliokoli Jehová. Jahgift otlapaleui kanin tlajtolkopaj ika tlajtoli Conakri uan Eric tlapaleuia ken siervo ministerial.

Dorcas ayakmo okatka precursora especial pero okatka precursora regular ijkuak omoskaltijkej tokoneuan. Pero ne ok oniktekichiuili Jehová ken precursor especial. Omoskaltijkej tokoneuan uan Dorcas oksepa omochi precursora especial. Axkan titlapaleuiaj ken misioneros ompa Conakri.   

SAN JEHOVÁ UELIS TECHMAKIXTIS

Nochipa nio kanin Jehová nechtitlani. Nosiua uan ne yotikitakej Jehová nochipa techmaluia uan techteochiua. Amo tiktemouaj tikpiaskej miak tlamantli uan tikneltokaj Jehová techpaleuia. Non techpaleuia amo matimotekipachokan nion matitlajyouikan. Dorcas uan ne yotikitakej san Jehová uelis techmakixtis uan uelis kichiuas matiyoltokan (1 Crón. 16:35). Nikmati Jehová kinmaluia akinmej kineltokaj uan inyolilis tlatitok “ijtik bolsa kanin kitlatia yolilistli” (1 Sam. 25:29).