¿Tlen mitspaleuis nochipa ximomachti?

¿TIKITA oui timomachtis sejse semana? ¿Amo mitspaktia timomachtis? Tinochtin ualeua ijkon techpanoua. Porque moneki timajxiliskej uan timochijchikauaskej para tikchiuaskej miak tlamantli. Ijkon techpanoua ijkuak moneki timaltiskej pero satepan kuali timomachiliaj. Ijkuak timomachtis “iTlajtol toTajtsin Dios” noijki mitspaleuis kuali ximomachili ijkon ken ijkuak timaltiaj (Efes. 5:26). Matikitakan seki tlamantli tlen mitspaleuis:

• Xikijkuilo keman timomachtis. Tinochtin akinmej tikchiuaj ken Cristo moneki timomachtiskej porque non tlen “okachi ipati” (Filip. 1:10). Uelis tiktlalis tlen otikijkuilo kanin mamota noso xikpepecho itech refrigerador uan ijkon amo tikilkauas keman timomachtis. Xamo uelis tiktlalis matsilini moteléfono uan ijkon mitsilnamiktis tlen hora timomachtis.

• Xikita tlen mitspaleuis ximomachti. Sekimej uejkauaj momachtiaj pero oksekimej amo kinpaktia uejkauaskej. Ikinon xikita tlen okachi mitspaleuis. ¿Tlen uelis tikchiuas tla yoajsik hora timomachtis pero amo tikneki ijkon tikchiuas? Uelis timomachtis maski san 10 minutos. Xamo timokuayejyekos amo miak timomachtis pero mitspaleuis tla ijkon tikchiuas. Uelis mitspaktis tlen timomachtis uan tiknekis okachi tikmatis (Filip. 2:13).

• Achto xikita tlen timomachtis. Uelis timotonalpolos tla amo tikmati tlen timomachtis ijkuak yoajsik hora ijkon tikchiuas (Efes. 5:16). Uelis tikijkuilos tlen mitspaktiskia timomachtis. Tla itlaj amo tikajsikamati, xikijkuilo uan satepan xiktemo. Noijki tla ijkuak timomachtis tikita okseki tlamantli tlen mitspaktiskia timomachtis, uelis tikijkuilos.

• Uelis tikpatlas ken timomachtia. Okachi ipati nochipa ximomachti. Para ijkon tikchiuas uelis tikpatlas tlen tonal timomachtia, tlen hora, kox tiuejkauas noso amo uan tlen timomachtis.

Tla nochipa timomachtis, mitspaleuis kuali ximouika iuan Jehová, kuali tikpejpenas tlen tikchiuas uan okachi tipakis (Jos. 1:8).