TLAMACHTIL 22
TLAKUIKALI 15 ¡Cristo ueyititok!
Jesús okachi kipatioita itoka toTajtsin Dios
“Ne onikinmatilti motoka uan ok niktematiltis” (JUAN 17:26).
NIN TLEN TIMOMACHTISKEJ
Jesús okitematilti itoka toTajtsin Dios uan okichipa. ¿Tlen kijtosneki nochi tlen okichi?
1, 2. (1) ¿Tlen okichi Jesús se youak ijkuak yikimiktiskiaj? (2) ¿Tlen timomachtiskej?
JESÚS okichi iCena inuan iapóstoles jueves youak 14 de nisán xiuitl 33. Ye okimatiaya Judas Iscariote kitemaktiskia, kitlajyouiltiskiaj akinmej okikokoliayaj uan kimiktiskiaj. Satepan okinyolchika iapóstoles ijkuak otlanki otlakuajkej uan noijki omotlatlaujti ijkuak nochtin yiyaskiaj. Sapanoua miak ipati tlen okijto non youak uan apóstol Juan okijkuilo itech iEvangelio capítulo 17.
2 Axkan tikitaskej tlen techmachtia tlen ijkuakon okijto Jesús. Tikitaskej tlen okitekipachouaya uan tlen okachi okipatioitaya ijkuak okatka nikan tlaltikpak.
“YONIKINMATILTI MOTOKA”
3. ¿Tlen okinekiaya kijtos Jesús ijkuak okijto “yonikinmatilti motoka”? (Juan 17:6, 26).
3 Jesús okitlatlaujti Jehová uan okilui: “Yonikinmatilti motoka”. Ye sapanoua okipatioitaya itoka toTajtsin Dios ijkuak okatka nikan tlaltikpak porque hasta ome uelta ijkon okijto (xiktlajtolti Juan 17:6, 26). Pero non amo kijtosneki okinmatilti itoka toTajtsin Dios porque amo okimatiayaj. Discípulos yokimatiayaj itoka toTajtsin Dios porque okatkaj judíos uan itoka kajki miak uelta itech Escrituras Hebreas. Ijkuak Jesús okijto okinmatilti itoka kijtosneki okinpaleui makixmatikan Jehová, okinmachti tlen kichiuas nikan tlaltikpak, okinmachti tlen yokichi uan ken kipia iyelis. Nin techititia san Jesús kuali kixmati toTajtsin Dios.
4, 5. (1) Xikyekijto ken uelis ikaj okachi kipatioitaskej itoka. (2) ¿Tlen okinpaleui apóstoles okachi makipatioitakan itoka toTajtsin Dios?
4 Matikijtokan itech motlanechikol monechikoua se tlayekanki tlen itoka David uan tepajtia. Xamo yikipia miak xiuitl tikixmati. Pero matikijtokan se tonal otiualmokoko uan san niman omitsuikakej hospital kanin ye tekipanoua. Ye san niman okitak ken mitspajtis. Satepan okachi tiktlasojtlas non tokni uan tikilnamiktos itoka porque san niman omitspaleui. Axkan okachi tikilnamiktos itoka non tlayekanki porque omitspaleui amo xiixpoliui.
5 Noijki ijkon okinpanok idiscípulos Jesús. Yejuan yokimatiayaj itoka toTajtsin Dios pero omochijchikajkej okachi kixmatiskej. Ikinon okachi okipatioitakej itoka. Pero ¿tlen okinpaleui makipatioitakan? Jesús okiteititi ken iyelis iTajtsin ijkuak itlaj okijtouaya uan ijkuak itlaj okichiuaya. Non okinpaleui apóstoles okachi makixmatikan Jehová porque okitayaj ken otlamachtiaya uan ken okinmitaya oksekimej (Juan 14:9; 17:3).
“MOTOKA TLEN TEJUATSIN OTECHMAKAK”
6. ¿Tlen kijtosneki ijkuak Jesús okijto “motoka tlen tejuatsin otechmakak”? (Juan 17:11, 12).
6 Jesús omotlatlaujti inpatka idiscípulos uan okilui Jehová: “Xikinmalui porque yejuan kipiaj motoka tlen tejuatsin otechmakak” (xiktlajtolti Juan 17:11, 12). ¿Kijtosneki Jesús noijki motokayotiskia Jehová? Amo. Porque ijkuak Jesús omotlatlaujti okijto: “Motoka tlen tejuatsin otechmakak”. Non amo kijtosneki Jesús axkan motokayotiskia Jehová. Ikinon ¿tlen kijtosneki ijkuak Jesús okijto “motoka tlen tejuatsin otechmakak”? Kijtosneki Jesús tlajtoua ipatka Jehová. Ye ouala tlaltikpak porque iTajtsin okiualtitlanki uan ika itoka okichi miak tlamantli (Juan 5:43; 10:25). Noijki itoka Jesús kijtosneki Jehová temakixtia. Ikinon itoka Jesús mouika iuan itoka Jehová.
7. Xikyekijto tleka Jesús tlajtoua ipatka Jehová.
7 Matikijtokan se tekiua kititlani se tlakatl ipatka matlajtoti itech okse altepetl. Nochi tlen kijtos non tlakatl yetoskia ken kijtojtok tekiua. Jehová noijki ijkon okichi ijkuak okiualtitlanki Jesús nikan tlaltikpak ipatka matlajtoki (Mat. 21:9; Luc. 13:35).
8. ¿Tleka Jehová okijto Jesús ‘kiuika itoka’ ijkuak ayamo oualaya tlaltikpak? (Éxodo 23:20, 21).
8 Biblia kijtoua Jesús ye “Tlajtoli” porque Jehová okitlali ipatka matlajto ijkuak omotlapouiaya inuan ángeles uan personas (Juan 1:1-3). Xamo ye Jesús okatka ángel tlen Jehová okititlanki makinyekana israelitas uan makinmalui ijkuak okatkaj kanin tlauaki. ¿Tleka omonekiaya kitlakamatiskej non ángel? Porque Jehová okijto ‘ye kiuika itoka’ (xiktlajtolti Éxodo 23:20, 21).a ¿Tleka Jehová okijto Jesús ‘kiuika itoka’? Porque Jehová okitlali ipatka matlajto, makipaleui uan makichipaua itoka.
“NOTAJTSIN, XIKUEYICHIUA MOTOKA”
9. ¿Ken tikmatij Jesús sapanoua okipatioitaya itoka toTajtsin Dios ijkuak okatka nikan tlaltikpak?
9 Nochi tlen yotikitakej kiteititia Jesús yokipatioitaya itoka toTajtsin Dios desde ijkuak ayamo oualaya tlaltikpak. Noijki nochi tlen okichi nikan tlaltikpak okiteititi okipatioitak itoka toTajtsin Dios. Ijkuak yiyaskia iluikak okilui Jehová: “NoTajtsin, xikueyichiua motoka”. ITajtsin san niman oualtlajto iluikak uan okijto: “Yonikueyichi uan oksepa nikueyichiuas” (Juan 12:28).
10, 11. (1) ¿Ken okiueyichi Jesús itoka toTajtsin Dios? (Noijki xikita dibujo). (2) ¿Tleka moneki matitlapaleuikan mamochipaua itoka toTajtsin Dios?
10 Jesús noijki okiueyichi itoka toTajtsin Dios ijkuak okintlapoui oksekimej ken kipia iyelis uan tlen kichiua. Pero okichi okseki tlamantli para kiueyichiuas itoka iTajtsin. Ye okimatiaya itoka toTajtsin Dios moneki mochipauas. Ijkon okiteititi ijkuak okinmachti idiscípulos ken motlatlaujtiskiaj. Ye okijto: “ToTajtsin Dios tlen tika iluikak, nochtin makitlakaitakan motoka” (Mat. 6:9).
11 ¿Tleka moneki matitlapaleuikan mamochipaua itoka toTajtsin Dios? Porque Satanás okijto itech xochitlali Jehová tlakajkayaua uan amo okinkauili Adán uan Eva makipejpenakan tlen kuali uan tlen amo kuali (Gén. 3:1-5). Satanás okisokioti itoka toTajtsin Dios ijkuak okijto amo kuali tlen kichiua. Noijki ijkuak okatka Job okijto tejuan tiktekichiuiliaj Jehová porque techmaka miak tlamantli. Satanás amo yolkuali porque okijto tikkauaskej Jehová ijkuak titlajyouiskej porque amo tiktlasojtlaj (Job 1:9-11; 2:4). Pero omonekiaya motas akin otlakajkayajtoka.
Jesús okinmachti idiscípulos tleka miak ipati makichipauakan itoka toTajtsin Dios. (Xikita párrafo 10).
“NIKTEMAKA NOYOLILIS”
12. ¿Tlen okichi Jesús porque okipatioitaya itoka iTajtsin?
12 Jesús sapanoua kitlasojtla iTajtsin uan okichi miak tlamantli para mamochipaua itoka. Ikinon okijto: “Niktemaka noyolilis” (Juan 10:17, 18). Jesús omotekauili makimiktikan porque okinekiaya kiteititis Jehová kajki santo uan kuali tlen kichiua.b Adán uan Eva okipaleuijkej Satanás uan okikajkej Jehová. Pero Jesús ouala tlaltikpak uan okiteititiko kitlasojtla iTajtsin uan nochipa okitlakamatki (Heb. 4:15; 5:7-10). Ye nochipa okipaleui toTajtsin Dios uan okitlakamatki hasta ijkuak okimiktijkej itech kouitl (Heb. 12:2). Ijkon okiteititi sapanoua kitlasojtla Jehová uan kipatioita itoka.
13. ¿Tleka san Jesús uelis kiteititiskia Satanás tlakajkayaua? (Noijki xikita dibujo).
13 Jesús okiteititi Satanás tlakajkayaua (Juan 8:44). San Jesús okachi kuali kixmati toTajtsin Dios. Ikinon ye kimatiskia tla melauak tlen okijtojtoka Satanás ijkuak okixnamik Jehová. Pero Jesús okijto nochipa kipaleuis itoka iTajtsin. Ye amo keman okika iTajtsin maski omokuayejyeko okika iselti ijkuak yiixpoliuiskia (Mat. 27:46).c
Nochi tlen okichi Jesús okiteititi Satanás tlakajkayaua. (Xikita párrafo 13).
“YONIKCHI NOCHI TLEN OTECHNAUATI”
14. ¿Tlen okiseli Jesús porque otetlakamatki?
14 Jesús omotlatlaujti ijkuak yikimiktiskiaj uan okilui iTajtsin: “Yonikchi nochi tlen otechnauati”. Ye okimatiaya Jehová kiteochiuaskia porque nochipa okitlakamatki (Juan 17:4, 5). Jehová ijkon okiteititi porque amo okika ompa kanin kintokaj akinmej ixpoliuij (Hech. 2:23, 24). Okiyoliti uan okimakak se tekitl miak ipati ompa iluikak (Filip. 2:8, 9). Opanok seki xiuitl uan Jesús opejki kiyekana iTekiuajkayo toTajtsin Dios. ¿Tlen kichiuas non Tekiuajkayotl? Jesús okiyekijto ijkuak otechmachti matiktlajtlanilikan Jehová ‘mauiki iTekiuajkayo. Mamochiua tlen kineki ompa iluikak uan noijki nikan tlaltikpak’ (Mat. 6:10).
15. ¿Tlen okseki tlamantli kichiuas Jesús?
15 Ayakmo miak poliui uan Jesús momakas inuan akinmej kikokoliaj toTajtsin Dios uan kinmixpolos itech Armagedón akinmej kichiuaj tlen amo kuali (Apoc. 16:14, 16; 19:11-16). Satepan ye kitlamotlas Satanás kanin tlauejkatlan. Ompa tsaktos uan amitlaj uelis kichiuas (Apoc. 20:1-3). Jesús kiyekanas mil xiuitl iTekiuajkayo toTajtsin Dios. Ijkuakon techpaleuis kuali matiyetokan uan ayakmo tiyetoskej titlajtlakolejkej. Kinyolitis akinmej yoixpolikej uan tlaltikpak yetos se kualtsin xochitlali. Ijkuakon mochiuas tlen kineki toTajtsin Dios (Apoc. 21:1-4).
16. ¿Tlen panos ijkuak Jesús tlamis tlanauatis mil xiuitl?
16 ¿Tlen panos ijkuak Jesús tlamis tlanauatis mil xiuitl? Ijkuakon ayakmo tiyetoskej titlajtlakolejkej. Ayakmo monekis techtlapojpoluiskej ika imikilis Jesús. Noijki Jesús ayakmo monekis topatka matlajto ixpan toTajtsin Dios. Noijki 144,000 ayakmo monekis matechpaleuikan ken teopixkej. Ayakmo yetos mikilistli uan ijkuakon yiyolitoskej akinmej oixpolikaj. Noijki nochtin akinmej chantiskej tlaltikpak ayakmo yetoskej tlajtlakolejkej (1 Cor. 15:25, 26).
17, 18. (1) ¿Tlen panos ijkuak tlamis mil xiuitl? (2) ¿Tlen kichiuas Jesús ijkuak tlamis tlanauatis mil xiuitl? (1 Corintios 15:24, 28; noijki xikita dibujo).
17 ¿Tlen okseki tlamantli panos ijkuak Jesús tlamis tlanauatis mil xiuitl? Ijkuakon moteititis itlaj miak ipati porque mochipauas itoka toTajtsin Dios. Satanás okijto itech xochitlali Edén Jehová tlakajkayaua uan amo kinamiki tlanauatis porque amo techtlasojtla. Desde ijkuakon miakej yomochijchikajkej kichipauaskej itoka toTajtsin Dios. Ijkuak tlamis mil xiuitl sepa mochipauas itoka toTajtsin Dios. Ijkon kiteititis sapanoua techtlasojtla.
18 Nochtin kimatiskej Satanás otlakajkaya ijkuak okijto amo kuali tlen kichiua Jehová. ¿Tlen kichiuas Jesús ijkuak tlamis tlanauatis mil xiuitl? ¿Kixnamikis Jehová ijkon ken okichi Satanás? Ye amo ijkon kichiuas (xiktlajtolti 1 Corintios 15:24, 28). Jesús kimaktilis Tekiuajkayotl iTajtsin uan kikauilis makinauati. Ye ijkon kichiuas porque sapanoua kitlasojtla iTajtsin.
Jesús kimaktilis Tekiuajkayotl iTajtsin ijkuak tlamis tlanauatis mil xiuitl. (Xikita párrafo 18).
19. ¿Ken yokiteititi Jesús sapanoua kipatioita itoka iTajtsin?
19 Nochi tlen yotikitakej kiteititia tleka Jehová okitlali iKone ipatka matlajto uan makipia itoka. Jesús kualtsin yokichi tekitl tlen okimakak Jehová uan yokiteititi sapanoua kipatioita itoka. Ye ijkon okiteititi ijkuak okitekauili makimiktikan para kipaleuis itoka toTajtsin Dios uan ijkuak tlamis mil xiuitl kimaktilis Tekiuajkayotl. ¿Ken uelis tikchiuaskej ijkon ken Jesús okichi? Chikome timomachtiskej non tlamantli.
TLAKUIKALI 16 Jehová okitlali Jesús ma tlanauati
a Sekimej ángeles otlajtojkej ipatka Jehová. Ikinon ualeua Biblia kijtoua Jehová otlajto pero ipatka otlajto se ángel (Gén. 18:1-33). Biblia kijtoua Jehová okinmakak tlanauatilmej Moisés pero okseki versículos kiteititiaj ángeles okinmijtojkej tlanauatilmej ipatka Jehová (Lev. 27:34; Hech. 7:38, 53; Gál. 3:19; Heb. 2:2-4).
b Imikilis Jesús noijki kinpaleuia oksekimej makipiakan yolilistli tlen amo keman tlamis.
c Xikita revista Akin Tetlapouijtok abril 2021 página 30 uan 31 kanin kijtoua “Sekimej techtlajtlaniaj”.