¿Melauak uelis san sekan yetoskej akinmej yauij kanin mauiltiaj? | ¿Tlen kijtoua Biblia?

Sekimej kijtouaj kanaj 5,000 millones kitaskej la Copa Mundial de la FIFA tlen opejki desde 20 de noviembre hasta 18 de diciembre 2022. Miakej mokuayejyekouaj sapanoua kinpaleuia ijkuak mauiltiaj uan noijki kinpaleuia san sekan mayetokan.

• Nelson Mandela expresidente de Sudáfrica okijto: “Akinmej mauiltiaj kinpaleuia makipatlakan seki tlamantli tlen kichiuaj, kinpaleuia kuali mamokuayejyekokan uan kinpaleuia san sekan mayetokan inmiuan oksekimej”.

• Gianni Infantino presidente de la FIFAa okijto: “Fútbol kinpaleuia miakej makichiakan itlaj, kinpaleuia san sekan mayolpakikan, kinpaleuia mamotlasojtlakan uan kinpaleuia miakej mamoixmatikan maski tlatlamantli inmialtepe”.

¿Melauak uelis kipiaskej nochi non tlamantli akinmej yauij kanin mauiltiaj fútbol? ¿Uelis san sekan yetoskej uan ika yolseuilistli?

¿Melauak san sekan katej akinmej yauij kanin mauiltiaj?

Itech nin xiuitl akinmej kitaj fútbol kichijtokej okseki tlamantli. Sekimej motlapouiaj tlen kichiuaskej, tekiuajkej kitaj tlen kichiuaskej para ayakmo mamochikoitakan uan tlen kichiuaskej para kinpaleuiskej akinmej kinpoloua seki tlamantli.

Miakej mokuayejyekouaj moyolpaktiaj ijkuak san sekan katej kanin mauiltiaj fútbol akinmej chantij itech tlatlamantli altepemej. Pero non amo kinpaleuia nochipa san sekan mayetokan. Porque ijkuak ompa yauij peua kichiuaj noso kijtouaj seki tlamantli tlen kinxexeloua. Biblia kijtoua miakej ijkon kichiuaskiaj uan non kiteititiskia tikatej itlamian tonalmej (2 Timoteo 3:1-5).

¿Tlen kinpaleuis nochtin san sekan mayetokan?

Biblia kijtoua tlen melauak kinpaleuis nochtin san sekan mayetokan. Ompa kijtoua nochtin kinnauatis se tekiua tlen kajki iluikak uan non tekiuajkayotl kiluiaj “iTekiuajkayo toTajtsin Dios” (Lucas 4:43; Mateo 6:10).

Itech iTekiuajkayo toTajtsin Dios tlanauatis Jesucristo uan ye kichiuas nochtin kuali mayetokan ipan tlaltikpak:

• “Yetos akin yolmelauak uan nochipa yetos miak yolseuilistli” (Salmo 72:7).

• “Ye kimakixtis akin amitlaj kipia uan kitlajtlanilia makipaleui […]. Kinpaleuis amo makintlajyouiltikan nion makinteuikan” (Salmo 72:12, 14).

Tlen otlamachti Jesús axkan miakej kinpaleuijtok itech 239 altepemej uan kinpaleuia ayakmo mamokokolikan. Para okachi tikmatis xiktlajtolti kanin kijtoua “¿Ken uelis ayakmo titekokoliskej?”.