¿Tleka política kichiua miakej mamoxexelokan? | ¿Tlen kijtoua Biblia?

Ipan nochi tlaltikpak miakej altepemej xexelitokej porque tlatlamanti mokuayejyekouaj políticos. Centro de investigación tlen itoka Pew Research Center okintlajtlanij sekimej tlakamej uan siuamej itech xiutl 2022 uan okijto “kanaj 65% tlakamej uan siuamej tlen okintlajtlanijkej itech 19 altepemej okijtojkej amo kuali moajsikamatij porque kipaleuiaj tlatlamantli partidos políticos”.

Kanin tichanti, ¿miakej moxexelouaj porque kinpaleuiaj tlatlamantli partidos políticos? ¿Tleka ijkon panoua? ¿Itlaj uelis techpaleuis? Xikita tlen kijtoua Biblia.

Miakej moxexelouaj ika tlen kichiuaj oksekimej

Biblia kijtoua axkan tikatej itlamian tonalmej noso “itech iksemi tonatijmeh”, ikinon miakej amo kuali mouikaj.

• “Itech iksemi tonatijmeh yetos miak tlaijyowílistli. N tlakah yetoskeh xíkojteh; […] Mach kimatiskeh tetlasojtlaskeh nion tetlapojpolwiskeh” (2 Timoteo 3:1-3).

Tekiuajkej kitaj oui kichiuaskej tlen kuali maski akinmej kinpaleuiaj noijki mochijchikauaj. Sekimej mokuayejyekouaj tlatlamantli, ikinon kitaj sapanoua oui tekipanoskej inmiuan oksekimej para kiyektlaliskej tlen amo kuali. Nochi non techititia mochijtok tlen Biblia okijto yiuejkika.

• “Nochtin san nochipa motlajyouiltiaj ijkuak san yejuan monauatiaj” (Eclesiastés 8:9).

Biblia kijtoua satepan yetos se tekiua tlen uelis kipojpolos nochi tlen amo kuali tlen axkan techtlajyouiltia.

Se tekiua tlen motekipachoua totech

Biblia tlamachtia kajki se tekiua tlen uelis tlayektlalis. Nin tekiua ye Jesucristo. Ye kipia chikaualistli uan toTajtsin Dios okitlali matlanauati, ye kichiuas mayeto yolseuilistli ipan nochi tlaltikpak uan nochtin kuali mouikaskej.

• “Ijkuakon, yetos akin yolmelauak uan nochipa yetos miak yolseuilistli” (Salmo 72:7).

• “Nochi altepemej kitekichiuiliskej” (Salmo 72:11).

Jesús kuali tlanauatis porque kitekipachoua tlen techpanoua, kineki techpaleuis uan okachi akinmej tlajyouiaj.

• “Porque ye kimakixtis akin amitlaj kipia uan kitlajtlanilia makipaleui, noijki akin moyolkokoua uan akin amo kipia akin kipaleuis. Kiknomatis akin tlajyouia uan akin amitlaj kipia uan kinmakixtis inyolilis akinmej amitlaj kipiaj. Kinpaleuis amo makintlajyouiltikan nion makinteuikan” (Salmo 72:12-14).

Okachi ximomachti ken Jesús tlanauatijtok itech iTekiuajkayo toTajtsin Dios uan xikita ken nin tekiuajkayotl uelis mitspaleuis noijki tlen monekitikchiuas para tikteititis tikpaleuia.

• Xikita video ¿Tlen iTekiuajkayo toTajtsin Dios?

• Xijtlajtolti tlamachtil “ITekiuajkayo toTajtsin Dios: se tekiuajkayotl tlen amo kichiuas tlen amo kuali”.