¿Techpaleuis Juegos Olímpicos tinochtin kuali matimouikakan? | ¿Tlen kijtoua Biblia?

Nin xiuitl 2024 kanaj cinco mil millones kitaskej Juegos Olímpicos. Tlen ompa mauiltiskej uitsej itech 206 altepemej uan okseki altepetsitsintin. Se tlakatl itoka Thomas Bach tlen kiyekana Juegos Olímpicos, okijto: “Tlen tikchiuaj kinpaleuia nochtin kuali mayetokan”. Noijki okijto: “Matipakikan porque Juegos Olímpicos techpaleuia san sekan matiyetokan uan timoyolseuiaj maski tlatlamantli toaltepe”.

¿Techpaleuis Juegos Olímpicos tinochtin kuali matimouikakan? ¿Melauak uelis san sekan tiyetoskej uan kuali timouikaskej?

¿Techpaleuis Juegos Olímpicos san sekan matiyetokan uan kuali matimouikakan?

Kitaj okachi miak ipati Juegos Olímpicos tlen mochijtok nin xiuitl. Pero ijkuak kichiuaj Juegos Olímpicos, miakej moxexelouaj porque mokajkalakiaj itech política uan amo san se tlamantli mokuayejyekouaj. Amo tetlakaitaj, kinchikoitaj oksekimej porque uitsej itech okse altepetl, techikoitaj porque oksekimej kipiaj okse religión uan amo nochtin kintlasojtlaj.

Miakej pakij ijkuak kichiuaj Juegos Olímpicos. Pero noijki miakej moxexelouaj porque tlatlamantli mokuayejyekouaj. Noijki kichiuaj okseki tlamantli uan non kichiua oksekimej noijki ijkon makichiuakan.

ITlajtol toTajtsin Dios yokijtojka axkan miakej kitaskiaj oui mouikaskej inuan oksekimej (2 Timoteo 3:1-5). Tla tikneki tikmatis ken mochijtok nin profecía, xiktlajtolti tlamachtil “¿Predijo la Biblia cómo sería la gente en nuestros días?”.

¿Tlen melauak techpaleuis sekan matiyetokan uan kuali matimouikakan?

ITlajtol toTajtsin Dios techiluia tlen techpaleuis san sekan matiyetokan uan tinochtin kuali matimouikakan. Kijtoua iTekiuajkayo toTajtsin Dios tlapaleuis tinochtin kuali matimouikakan (Lucas 4:43; Mateo 6:10).

Jesucristo kiyekanas non Tekiuajkayotl uan non techpaleuis tinochtin kuali matimouikakan. Biblia kijtoua:

• “Ijkuakon, yetos akin yolmelauak uan nochipa yetos miak yolseuilistli” (Salmo 72:7).

• “Ye kimakixtis akin amitlaj kipia uan kitlajtlanilia makipaleui [...]. Kinpaleuis amo makintlajyouiltikan nion makinteuikan” (Salmo 72:12, 14).

Tlen otlamachti Jesús sapanoua miakej kinpaleuia san sekan mayetokan. Ijkon panotok itech 239 altepemej uan okseki altepetsitsintin. ITlaixpantijkauan Jehová kichiuaj ken Cristo ikinon mochijchikauaj nochtin kuali mouikaskej. Tla tikneki tikmatis tlen kinpaleuia kuali mamouikakan, xiktlajtolti revista Akin Tetlapouijtok tlen itoka “¿Ken uelis ayakmo titekokoliskej?”.