¿San niman peuas se guerra itech nochi tlaltikpak? | ¿Tlen kijtoua Biblia?

Sekimej kijtouaj yikanaj 30 xiuitl hasta axkan amo okachi miakej mokualaniaj uan mota okachi kuali tikatej. Pero amo melauak ijkon panotok, xikita tlen kijtouaj periódicos:

• 6 de enero 2024, periódico tlen itoka Reuters okijto: “Guerra tlen mochijtok Gaza mota okachi moueyitilis porque Israel uan Hizbulá mokualanijtokej kanin tlami itlal Líbano”.

• 7 de enero 2024, periódico tlen itoka The New York Times okijto: “Irán kineki mokualanis inuan akinmej chantij Occidente uan axkan inuan mopaleuia Rusia uan China. Soldados tlen pouij Irán oyajkej itech miakej altepemej para kinmoaxkatiskej, noijki oksepa yopejkej kitaj ken kinchiuaskej bombas”.

• 11 de enero 2024, periódico tlen itoka UN News okijto: “Rusia ok kintlajyouiltijtok akinmej chantij Ucrania”.

• 9 de enero 2024, periódico tlen itoka The Japan Times okijto: “Axkan okachi tlapatio ompa China uan kinpiaj miakej soldados, akinmej chantij Taiwán kinekij makinmixmatikan, Pekín uan Washington ualeua mokualaniaj, ikinon mota ompa uelis peuas se guerra”.

Axkan mota amo nochtin kuali mouikaj, ¿san niman peuas se guerra? ¿Tlen kijtoua Biblia?

Biblia yokijtojka tlen axkan panotok

Biblia amo okijto kanin mochiuaskiaj guerras tlen axkan mochiuaj. Pero kijtoua axkan miakej mokualaniskiaj uan yetoskiaj guerras (Apocalipsis 6:4).

Amochtli Daniel, tlen kajki itech Biblia, kijtoua “itlamian tonalmej” tekiuajkej tlen okachi ueyititokej mokualaniskej para kitaskej akin okachi chikauak. Itech non guerra kiteititiskej akin okachi kinpia teposmej uan soldados ikinon kinejnekiskej miak tomin (Daniel 11:40, 42, 43).

San niman peuas se guerra

Biblia kijtoua itlamian tonalmej miakej kichiuaskej tlen amo kuali. Jesús okijto: “Ijkuakon peuas ueyi tlajyouilistli. Non amo keman ijkon panoua desde ijkuak okichijchijkej tlaltikpak” (Mateo 24:21). Non “ueyi tlajyouilistli” kipeualtis se guerra tlen Biblia kitokayotia Armagedón, nin guerra ye “iueyi tonal toTajtsin Dios tlen kipia nochi chikaualistli” (Apocalipsis 16:14, 16).

Guerra tlen itoka Armagedón amo temiktis, nin guerra temakixtis. Ika nin guerra, toTajtsin Dios kinpojpolos tekiuajkej tlen tlanauatiaj tlaltikpak porque yejuan kinchiuaj guerras uan miakej yokinmiktijkej. Tla tikneki tikmatis ken Armagedón kichiuas matimoyolseuijtokan nochipa, xikintlajtolti ninmej tlamachtilmej:

• “¿Tlen kijtosneki Armagedón?”

• “Tiyolpakiskej ijkuak ajsiki Armagedón”