¿Moneki nimochiuas niiTlaixpantijka Jehová tla nimomachtis Biblia?

Amo. Amo moneki timochiuas tiiTlaixpantijka Jehová. Miakej touan momachtiaj pero amo mochiuaj iTlaixpantijkauan Jehová.a Tejuan titlamachtiaj porque tiknekij xikmati tlen tlamachtia Biblia. Tejuatsin tikpejpenas tlen tikchiuas ijkuak okachi timomachtijtias. Tejuatsin tikmati tlen religión tikpias (Josué 24:15).

¿Uelis niknejnekis noBiblia ijkuak nimomachtis?

Kema. Pero tejuan okachi techpaktia timomachtiskej ika Traducción del Nuevo Mundo. Tla tejuatsin tikneki, uelis timitsmakaskej se Biblia uan amitlaj tiktlaxtlauas. Pero noijki uelis timomachtis ika moBiblia. Uelis tikmatis tlen kichiuas toTajtsin Dios uan ken uelis timomakixtis maski san tlen Biblia tikpias.

¿Tleka nankinmachtiaj oksekimej maski amo mochiuaj iTlaixpantijkauan Jehová?

• Porque tiktlasojtlaj Jehová uan ye kineki matikinmachtikan oksekimej (Mateo 22:37, 38; 28:19, 20, TNM). Tejuan sapanoua tikpatioitaj tiyetoskej “titlapalewijkeh itech iteki Dios” uan noijki tikpatioitaj tikinmachtiskej oksekimej (1 Corintios 3:​6-9).

• Noijki titlamachtiaj porque tikintlasojtlaj oksekimej (Mateo 22:39). Techpaktia tikintlapouiskej oksekimej tlen yotimomachtijkej (Hechos 20:35, TNM).