Okseki tlamantli

ITlaixpantijkauan Jehová moapolaktiaj itech uejueyij nechikolmej. Ijkuak tlamis tlapoualistli tlen kinmaka, tokni tlen kintlapouis kinmiluis ma moketsakan uan chikauak ma kinnankilikan ninmej ome tlajtlanilmej:

1. ¿Yotimoyolkopki, yotimotemakak ixpan Jehová uan tikneltoka toTajtsin Dios techmakixtia san ika Jesucristo?

2. ¿Tikajsikamati ijkuak timoapolaktis tikteititis inmixpan nochtin yitiiTlaixpantijka Jehová uan axkan tipouis itech ialtepe?

Ijkuak tlanankiliskej “kema”, akinmej moapolaktiskej ‘ika inkamak kitematiltiaj’ tlaneltokaj itech imikilis Jesús uan ika nochi inyolo yomotemakakej ixpan Jehová (Rom. 10:9, 10). Ik non, moneki motlatlaujtiskej ijkuak mokuayejyekoskej itech ninmej tlajtlanilmej, ijkon uelis tlanankiliskej tlen yejuan kineltokaj.

¿Yotimotemakak ixpan Jehová uan yotikilui san ye tikueyichiuas uan nochipa tikpatioitas tikchiuas tlen ye kineki?

¿Mitspaktiskia san niman timoapolaktis?

¿Ken moneki se motlakentis ijkuak se moapolaktis? (1 Tim. 2:9, 10, TNM; Juan 15:19; Filip. 1:10).

Moneki timotlakentiskej ‘ken moneki uan ika kuali tokuayejyekolisʼ porque ijkon ‘tikueyichiuaj toTajtsin Diosʼ. Ik non, akinmej moapolaktiskej amo ma kiuikakan intlaken tlen tepinati nion ma kiuikakan intlaken tlen itech tlatlajkuilitok noso tlen kinpiaj dibujos. Intlaken moneki yetos chipauak uan tlen kinamiki non tonal miak ipati.

¿Ken moneki se kichiuas ijkuak se moapolaktis? (Luc. 3:21, 22).

Ijkuak Jesús omoapolakti kiteititia ken moneki se moapolaktis axkan. Ye okimatiaya miak ipati moapolaktis uan ijkon okiteititi ika tlen okichi. Ik non, ijkuak moapolaktiaj tokniuan amo ompa mokamanaluiskej, amo ajkuiskej nion kichiuaskej okse tlamantli tlen kiteititis amo kitlakaitaj non tonal. Noijki akin yikin omoapolakti, amo ma kichiua ken itlaj okitlanki. Maski miak ipati non tonal uan se yolpaki, moneki se kiteititis san kuali.

¿Tleka mitspaleuis xiktekichiuili Jehová nochipa timonechikos uan titlapaleuis itech tlanechikol?

¿Tleka miak ipati ijkuak yotimoapolakti nochipa ximomachti uan nochipa xitetlapoui?

TLEN MONEKI KICHIUASKEJ TLAYEKANKEJ

Ijkuak ikaj tlen tetlapouia namechiluis kineki moapolaktis, xikiluikan ma momachti tlajtlanilmej tlen katej páginas 12 hasta 49 kanin kijtoua “Tlen moneki kimatiskej akinmej ayamo moapolaktiaj” (página 7). Ompa moyekijtoua ken moneki moyektlalis para ijkuak motlapouis iuan tlayekankej. Noijki moijtoua ijkuakon uelis kitlapos nin amatlajkuilol uan kitas tlen okijkuilo. Amo moneki ikaj achto iuan ma momachti tlajtlanilmej.

Akin kineki moapolaktis san niman moneki kiluis akin kinyekana tlayekankej. Ijkuak yomomachti kanin kijtoua “Tlen kintlajtlaniskej akinmej kinekij moapolaktiskej”, tokni tlen kinyekana tlayekankej kitlajtlanis kox yokitlatlaujti Jehová uan kox yokilui kitekichiuilis. Tla kijtos ijkon yokichi, tlayekanki kinmiluis ome tlayekankej, ma momachtikan tlajtlanilmej iuan akin kineki moapolaktis. Tlayekankej moneki mopapatlatiaskej. Amo moneki ma moijto yimochiuas se ueyi nechikol para iuan ma motlapouikan.

Sejse nechikol uelis uejkauas kanaj se hora noso okachi tla ijkon monekis. Ijkuak peuas uan tlamis nanmomachtiskej, moneki nanmotlatlaujtiskej. Amo san totoka xikchiuakan para totoka nantlamiskej. Tlayekankej tlen kintlaliskej san niman ma monechikokan iuan akin kineki moapolaktis.

Okachi kuali nankinchiuiliskej tlajtlanilmej sejse akinmej kinekij moapolaktiskej uan amo san sekan. Ijkon uelis nankinkakiskej sejse ken tlanankilis uan nankitaskej kox kuali kajsikamati tlen kijtoua Biblia melauak uan kox yiuelis moapolaktis. Noijki ijkon, akin kineki moapolaktis amo pinauas uan kijtos tlen mokuayejyekoua. Akinmej yomonamiktijkej uelis san sekan nankinchiuiliskej tlajtlanilmej.

Tla kineki moapolaktis se tokni siuatl, tlayekankej iuan monechikoskej kanin oksekimej uelis kinmitaskej pero amo ma kikakikan tlen motlapouiskej. Ijkuak monekis, akin kinchiuilis tlajtlanilmej uelis yas iuan okse tlayekanki noso se siervo ministerial tla ijkon monekis.

Itech tlanechikolmej kanin amo katej miakej tlayekankej, uelis kintekitiltiskej siervos ministeriales tlen ixtlamatkej para yejuan ma kinchiuilikan tlajtlanilmej tlen katej kanin kijtoua “Tlen tikneltokaj akinmej tikchiuaj ken Cristo” (tlamachtil se). Ijkuak momachtiskej tlamachtil ome tlen itoka “Tlen moneki kichiuaskej akinmej kichiuaj ken Cristo” nochipa kiyekanaskej tlayekankej. Tla itech se tlanechikol amo katej tokniuan tlen uelis kichiuaskej nin tekitl, uelis kiluiskej tlayekanki itech circuito uan ye kinmiluis tlayekankej itech okseki tlanechikolmej ma kinpaleuikan.

Tla akin kineki moapolaktis ayamo kipia 18 xiuitl uan itatajuan iTlaixpantijkauan Jehová, moneki yetoskej ijkuak kichiuiliskej tlajtlanilmej. Tla amo uelis yetoskej itatajuan, moneki yetoskej ome tlayekankej, noso se tlayekanki uan se siervo ministerial, uelis iuan momachtiskej.

Tlayekankej moneki kitaskej akin kineki moapolaktis kox yikajsikamati tlen moneki itech tlen tlamachtia Biblia. Noijki moneki ma kitakan kox kipatioita tlen melauak uan kox kitlakaita ialtepe Jehová. Tla akin moapolaktis amo kuali kajsikamati tlamachtilmej tlen okachi moneki se kimatis itech Biblia, tlayekankej kitaskej ken kipaleuiskej para uelis moapolaktis satepan. Ualeua monekis okachi ma kiteititi kipatioita tetlapouis uan kitlakamatis tlen tlanauatia ialtepe Jehová. Tlayekankej kijtoskej kox uejkauaskej itech sejse tlajtlanilistli para kimatiskej kox yiuelis moapolaktis. Pero amo ma kilkauakan moneki momachtiskej nochi tlajtlanilmej.

Ijkuak tlamis momachtiskej tlamachtil ome, tlayekankej tlen omomachtijkej iuan akin kineki moapolaktis oksepa iuan monechikoskej uan kijtoskej kox yiuelis moapolaktis. Moneki kitaskej kox oyajki escuela, tlen kimati kichiuas uan okseki tlamantli. Tiknekij nochtin ma kajsikamatikan tlamachtilmej tlen okachi moneki se kimatis itech Biblia uan ma kitlasojtlakan Jehová ika nochi inyolo. Tla kuali nankinpaleuiskej, akinmej moapolaktiskej okachi kuali tetlapouiskej kuali tlajtolmej.

Satepan, se noso ome tlayekankej tlen kiojpauiskej tlajtlanilmej iuan akin kineki moapolaktis, kiluiskej kox kema noso amo moapolaktis. Tla moapolaktis, iuan momachtiskej kanin kijtoua “Okseki tlamantli” (páginas 51 hasta 53). Tla ayamo tlami momachtia amochtli Tiyoltos uan tiyolpakis kiyolchikauaskej mamomachti non amochtli ijkuak yomoapolakti. Kiluiskej yejuan kijkuiloskej keman moapolaktis itech Amatl tlen moneki kinchiuiliskej akinmej tetlapouiaj. Kilnamiktiskej tlayekankej kitlajtlaniaj seki tlamantli porque ialtepe Jehová uelis kitas tlen kichiuaj iTlaixpantijkauan Jehová itech nochi tlaltikpak uan noijki para uelis tlapaleuis uan noijki para ma kipaleuikan. Noijki kinmiluiskej akinmej yikin peuaj tetlapouiaj, ijkuak kitemakaj innúmero noso intoka kimaluiskej ken kijtoua “TiiTlaixpantijkauan Jehová tikmaluiaj nochi tlen techiluiaj oksekimej” tlen kajki ompa jw.org. Amo moneki uejkika iuan motlapouiskej, san kanaj majtlaktli minutos.

Ijkuak panos se xiuitl ijkuak omoapolakti, ome tlayekankej iuan monechikoskej para kiyolchikauaskej uan kiluiskej tlen uelis kipaleuis. Se tlayekanki moneki yetos akin kiyekana nechikol para akinmej tetlapouiaj kanin kajki akin omoapolakti. Tla akin omoapolakti ayamo kipia 18 xiuitl, ijkuak iuan motlapouiskej moneki yetoskej itatajuan tla iTlaixpantijkauan Jehová. Tlayekankej mochijchikauaskej kualtsin kitlapouiskej uan kiyolchikauaskej. Kitlapouiskej ken kitekichiuilijtok Jehová uan kiyolchikauaskej para iselti ma momachti uan noijki iuan ifamilia, mojmostla ma kitlajtolti Biblia, noijki nochipa ma monechiko uan ma tetlapoui (Efes. 5:15, 16). Tla ayamo tlami momachtia amochtli Tiyoltos uan tiyolpakis, tlayekankej kiluiskej se tokni iuan ma momachti. San ma kiluikan san seki tlamantli tlen moneki kichiuas uan okachi moneki ma kiyolchikauakan.