Jehová kipatioita ma tikijtokan “amén”

JEHOVÁ kipatioita ma tikueyichiuakan. Techkaki uan kita nochi tlen tikchiuaj para tikueyichiuaskej maski mota amitlaj ipati (Mal. 3:16). ¿Keski uelta yotikijtojkej amén? Xamo yimiak uelta ijkon otikijtojkej. ¿Kipatioita Jehová ijkuak ijkon tikijtoaj? Kema. Tla tiknekij tikajsikamatiskej kox kipatioita ijkuak tikijtoaj “amén”, moneki tikitaskej tlen kijtosneki uan ken kitekitiltia Biblia nin tlajtoli.

“NOCHTIN OKIJTOJKEJ: ‘¡AMÉN!’”

Ika náhuatl tikijtoaj “amén” nin kijtosneki “ijkon ma mochiua” noso “melauak mochiuas”. Nin tlajtoli kajki ika hebreo uan kijtosneki “uelis tikneltokaskej”. Ualeua nin tlajtoli okitekitiltiayaj tekiuajkej. Ma tikitakan ken okichiuayaj. Akinmej itlaj okijtoayaj inmixpan tekiuajkej, okijtoayaj “amén” nin okiteititiaya kichiuaskej ken okijtojkej (Núm. 5:22). Tla okijtoayaj itlaj kichiuaskej, omonekiaya kijtoskej “amén” inmixpan oksekimej uan ijkon okachi kichiuaskiaj tlen okijtojkej (Neh. 5:13).

Itech amochtli Deuteronomio itech capítulo 27 tikajsij itlaj miak ipati ijkuak omoijto “amén”. Ijkuak israelitas okalakej itech tlali tlen okinmakak Jehová, omonechikotoj kanin okatka tepetl Ebal uan Guerizim. Ompa okintlajtoltilijkej tlanauatil tlen okijkuilo Moisés uan yejuan okijtojkej kichiuaskiaj tlen okinmiluijkej. Okijtoayaj “amén” ijkuak okinmiluiayaj tlen kinpanoskia tla amo kintlakamatiskiaj itlanauatiluan Jehová (Deut. 27:15-26). ¿Timokuayejyekoaj ken omokak ijkuak okijtojkej amén miakej tlakamej, siuamej uan konemej? (Jos. 8:30-35). Amo keman okilkajkej tlen okijtojkej kichiuaskej. Biblia kijtoa melauak ijkon okichijkej. Kijtoa: “Ijkuak ok okatka Josué, israelitas nochipa okitekichiuiliayaj Jehová uan noijki ijkuak ok okatkaj tlayekankej tlen omokajkej ijkuak Josué oixpoliuik, yejuan okitakej ijkuak Jehová okinpaleui israelitas” (Jos. 24:31).

Jesús noijki okijto “amén” para kijtoskia melauak mochiuas. Pero ye okse tlamantli okitekitilti. Ayakmo okitekitilti ijkuak otlamiaya itlaj okijtoaya. Ye okitekitilti ijkuak opeuaya itlaj okijtoaya. Non okiteititiaya melauak tlen omoijtoaya. Motlajtolkopa “milajka”. Ualeua Jesús okijtoaya ome uelta “de milajka nomechilia” (Mat. 5:18; Juan 1:51). Ijkon okijtoaya porque melauak mochiuaskia tlen okijto. Noijki ijkon okijtoaya porque san ye okinamikiaya kijtos mochiuas nochi tlen kijtoa toTajtsin Dios (2 Cor. 1:20; Apoc. 3:14).

“NOCHTIN OKIJTOJKEJ: ‘¡AMÉN!’ UAN OKIUEYICHIJKEJ JEHOVÁ”

Israelitas noijki okijtoayaj “amén” ijkuak okitlakuikiliayaj uan okitlatlaujtiayaj Jehová (Neh. 8:6; Sal. 41:13). Akinmej okikakiayaj okijtoayaj amén. Non okinpaleuiaya ma yolpakikan uan san sekan okiueyichiuayaj Jehová. Ijkon opanok ijkuak David okiuikak iarca Jehová. Ijkuak ijkon okichijkej, okitlakuikilijkej Jehová ken yetoskia okitlatlaujtijkej (1 Crón. 16:8-36). Tlen okijto David sapanoa okinyolchika oksekimej uan “nochtin okijtojkej: ‘¡Amén!’ uan okiueyichijkej Jehová”. Tlen omoijto sapanoa okinyolpakti.

Tokniuan tlen okatkaj itech achto siglo noijki okijtoayaj “amén” ijkuak okitlakuikiliayaj Jehová. Noijki akinmej okijkuilojkej Biblia noijki okitlaliayaj nin tlajtoli itech cartas (Rom. 1:25; 16:27; 1 Ped. 4:11). Itech amochtli Apocalipsis kijtoa sekimej ángeles kiueyichiuaj Jehová ompa iluikak. Kijtoa: “¡Timitsweyijkachiwah Tejwatsi Todios Non Timoitstika itech moyayan! ¡Ijkó mamochiwa!” (Apoc. 19:1, 4). Tokniuan tlen okatkaj itech achto siglo okijtoayaj “amén” ijkuak otlamiaya innechikol (1 Cor. 14:16). Pero amo san omonekiaya kijtoskej amén.

¿TLEKA MIAK IPATI MA TIKIJTOKAN “AMÉN”?

Nochi tlen yotikitakej techpaleuia ma tikajsikamatikan tleka miak ipati ma tikijtokan “amén” ijkuak tlami timotlatlaujtiaj. Ijkuak tikijtoaj “amén” kijtosneki okiski itech toyolo tlen otikijtojkej. Noijki ijkuak tikijtoaj “amén” inmixpan oksekimej, san ichtaka noso ijkuak mokaki, tikteititiaj otechpakti tlen omoijto. Ma tikitakan okseki tlamantli tleka moneki tikijtoskej “amén”.

Porque tikteititiaj kuali tikkakij akin motlatlaujtia uan ijkon tikueyichiuaj Jehová. Tikueyichiuaj Jehová tla kuali tikkakiskej tokni tlen motlatlaujtia uan amo ma timokuayejyekojtokan okse tlamantli. Tla itech toyolo kisa tikijtoaj “amén”, kuali titlakakiskej uan amo san tikajauilmatiskej.

Techpaleuia san sekan ma tiyetokan. Ijkuak timonechikoaj, tinochtin ma tikkakikan tlen moijtoa ijkuak se tokni motlatlaujtia (Hech. 1:14; 12:5). Ijkuak tinochtin tikijtoaj “amén”, okachi san sekan tikatej iuan tokniuan. Ijkuak tikijtoaj “amén”, san ichtaka noso ijkuak mokaki, Jehová okachi techmakas tlen tiktlajtlaniliaj.

Se tokni motoloa para motlatlaujtis uan kikakis inechikol — Tikueyichiuaj Jehová ijkuak tikijtoaj “amén”.

Tikueyichiuaj Jehová. Ye kita timochijchikauaj tikueyichiuaskej maski mota amitlaj ipati (Luc. 21:2, 3). Jehová kita kox kuali tikueyichiuaj uan kimati tlen tikpiaj itech toyolo. Noijki ijkuak tikkakiskej tonechikol itech teléfono, Jehová techkaki ijkuak tikijtoaj “amén”.

Yotikitakej miak ipati tikijtoskej “amén”. Enciclopedia Perspicacia tlen tlajtoa itech Biblia kijtoa tlajtoli “amén” kijtosneki “ika nochi toyolo tikneltokaj itlaj mochiuas”. Ik non, tikyolpaktiaj Jehová ijkuak tikijtoaj “amén” (Sal. 19:14).

¿MONEKI NOCHIPA TIKIJTOSKEJ “AMÉN”?

Amo san ma tikajauilmatikan ijkuak tikijtoaj “amén”. Pero ¿tlen panos tla ikaj motlapololtia ijkuak motlatlaujtia? ¿Tlajtlakoli tikijtoskej “amén”? Amo. Porque Jehová kimati tinochtin timotlapololtiaj ijkuak titlajtoaj uan ye amo san kita ijkuak timotlapololtiaj. Ik non, amo san ma tikkakikan tlen amo kuali kijtoaj tokniuan ijkuak motlatlaujtiaj. Ma tikkakikan tlen kuali kijtoaj uan ijkuak tlamis motlatlaujtiskej, ma tikijtokan “amén”.

Pero ijkuak motlatlaujtis se tlen amo iTlaixpantijka Jehová, amo ma tikijtokan “amén” nion ichtaka nion ma mokaki. Xamo ijkon techpanos ijkuak techiluiskej ma tiakan se iluitl uan ompa motlatlaujtiskej. Noijki ijkuak se tokalchanejka amo kitekichiuilia Jehová kijtos motlatlaujtis. ¿Tlen tikchiuaskej ijkuak ijkon techpanos?

San ma tikkakikan uan amo san tlen amo ma tikchijtokan. Amo tikijtoskej “amén” nion timomakitskiskej tlamo kijtosneki inmiuan timosetiliaj. Uelis timotlatlaujtiskej pero amo ma mokaki ijkuak tikijtoskej “amén” tlamo kijtoskej otechpakti tlen oksekimej okijtojkej. Tla nochtin moketsaj motlatlaujtiskej, tejuan tikijtoskej kox timoketsaskej noso tieuatoskej. Amo tlajtlakoli tla timoketsaskej noso timotoloskej porque non amo kijtosneki ikaj tikueyichiuaj. Akinmej tikchiuaj ken Cristo, moneki tikpejpenaskej tlen tikchiuaskej uan amo ma tikinteneuakan tokniuan.

Nochi nin tlamantli techpaleuia ma tikajsikamatikan Jehová kipatioita ma tikijtokan “amén”.