Tlamachtilmej para Toteki akinmej tikchiuaj ken Cristo
1-7 DE JULIO
KEN TECHPALEUIA BIBLIA | COLOSENSES 1-4
“Ma tikpatlakan toyelis”
(Colosenses 3:5-9) Yika, xikpojpolokah tlan amo kuali kelewia nomokuerpo. Amaka mamokalakijtinemi iwan se non amo isiwa, nion manemi itech tlan pitsotik, nion mamotemaka imak tlan amokuali kelewia ikuerpo, nion makitlawelneki tomi, porke tla ijkó nonkichiwah, noni yaskia kemi nonkinweyilijtoskiah diostsitsinteh. 6 Por nochi ni, walmuikas ikualanilis Dios impah akimeh amo kitlakitah. 7 Iwa nomejwah, achto ijkó ononnentinemiah itech ninteh tlajtlákolteh. 8 Pero axa xikinkawakah nochteh ninteh tlajtlákolteh: Ayakmó xikualankamikikah, ayakmó xikualanikah, ayakmó xitewikaltikah, ayakmó fiero xitlajtokah de oksikimeh, nion ayakmó ximokamanalwikah. 9 Ayakmó ximokajkayawakah, porke nomejwah yononkikajkeh tlan achto onomechyolijtlakoaya iwa yononmoyankuilijkeh.
w11-S 15/3 págs. 9, 10 párrs. 12, 13
Ma tikchiuakan tlen Jehová kineki uan amo ma tikchiuakan tlen oksekimej kichiuaj
12 ¿Tlen nikchiua kiteititia nechyekana iespíritu Jehová noso nikchiua ken akinmej amo kitekichiuiliaj? (Xiktlajtolti Colosenses 3:8-10, 13). Moneki ma tikitakan tlen tikchiuaj ijkuak techpanoa tlen amo kuali. ¿Tikchiuaj ken akinmej amo kitekichiuiliaj Jehová? (Gál. 5:19-21). ¿Tlen tikchiuaj ijkuak se tokni amo techpaleuia, techyolkokoa noso techchiuilia tlen amo kuali? Noijki moneki tikitaskej tlen tikchiuaj ijkuak tikatej tokalijtik, ompa okachi tikteititiaj kox techyekana iespíritu Jehová noso tikchiuaj ken akinmej amo kitekichiuiliaj. Moneki ma timokuayejyekokan kox itech tlajko xiuitl tlen yopanok okachi otikteititijkej tikchiuaj ken Cristo noso oksepa opejki titlajtoaj uan tikchiuaj tlen amo kuali.
13 Espíritu santo techpaleuia ma tikchiuakan tlen toTajtsin Dios technauatia, ‘ayakmó ma timoyolijtlakokah iwa ixmostla ma timoyolpatlatiwiahʼ. Tla ijkon tikchiuaskej, okachi titetlasojtlaskej, tikchiuaskej tlen kuali uan noijki ijkuak oksekimej kichiuaskej itlaj tlen techkualanis, tikintlapojpoluiskej. Tla timokuayejyekoskej ikaj otechyolkoko, amo ‘techkuejsos’ nion ‘tiktlawelitaskej uan amo timotsatsajtsiliskeh’, noijki amo ‘timowijwikaltiskeh’. Timochijchikauaskej ‘titeiknomatiskeh’ (Efes. 4:31, 32).
(Colosenses 3:10-14) Pero axa Dios yonomechyankuili. Yika, ximoixtlamachtikah itech Cristo iwa ixmostla ximoyolpatlatiwiah para nonyetoskeh kemi n Totajtsi Akin otechchijchi. 11 Inawak Dios ayakmitla ipati tla se judío noso amó, tla se kajki sirkunsidado noso amó. Amitla ipati tla se de wejka, tla se amo tlaixmati, tla se tlanémaktli noso amó. Porke Cristo okachi miak ipati ke nochi tlan onka, iwa Ye kajki intech nochteh akimeh kineltokah. 12 Dios nomechtlasojtla iwa yonomechpéjpenki para xikmajmanakah ialtépeu yolchipawak, yika ximokemelokah ika nochi tlan nomechpalewis iwa xiteiknomatikah, xiktechiwilikah tlan kuali, ximotsikitsintilikah, xiyetokah nonyolyamankeh iwa xitexikokah. 13 Xitexikokah iwa ximotlapojpolwikah. Iwa tla se nomokni onomechchiwili itla amo kuali, xiktlapojpolwikah, ijkó kemi Cristo onomechtlapojpolwi. 14 Iwa tlan okachi ipati, iwa weyi kijtosneki: ximotlasojtlakah iwan oksikimeh, porke n tlasojtlálistli, ye tlan techyekseitilia.
w13-S 15/9 pág. 21 párrs. 18, 19
¿Yotikpatlakej tonemilis?
18 Para tikpatlaskej tonemilis amo san moneki tiktlajtoltiskej uan timomachtiskej Biblia. Ijkuak titetlapouiaj xamo yotikinmajsikej sekimej tlen ualeua kitlajtoltiaj Biblia uan kuali kimatij tlen ompa kijtoa. Sekimej kilnamiktokej tlen momachtiaj pero amo kipatlaj tlen mokuayejyekoaj nion kichiuaj tlen ompa kijtoa. ¿Tleka ijkon panoa? Tla tiknekij iTlajtol toTajtsin Dios ma kipatla tonemilis, moneki ma ajsi itech toyolo. Ik non, moneki ma timokuayejyekokan tlen timomachtiaj uan ma timotlajtlanikan: “¿Tlen yonimomachti ye tlen melauak noso san nikneltoka tlen tlamachtiaj itech se religión? ¿Nikita ken nikchiuas tlen kijtoaj principios bíblicos noso san nikita ken nikinmachtis oksekimej? ¿Nikita ken ne nechtlapouia Jehová?”. Tla timokuayejyekoaj itech nonmej tlajtlanilmej okachi tiktlasojtlaskej Jehová uan non techpaleuis ma tikpatlakan tonemilis (Prov. 4:23; Luc. 6:45).
19 Tla nochipa tiktlajtoltiaj Biblia uan timokuayejyekoaj tlen ompa kijtoa, tikchiuaskej tlen okijto Pablo ‘ayakmó ma timoyolijtlakokah iwa ixmostla ma timoyolpatlatiwiah para tiyetoskeh kemi n Totajtsiʼ (Col. 3:9, 10). Tla tikajsikamatij uan tikchiuaj tlen kijtoa Biblia, tikpiaskej toyelis ken Cristo uan amo techkajkayauas Satanás.
Ma tiktemokan ken techpaleuia Biblia
(Colosenses 1:13, 14) Dios otechmakixti imak iweletilis n tleyuálistli, iwa otechtlali kan tlanawatia Ikone non saikpanoa kitlasojtla, 14 Akin otechmakixti, iwa otechtlapojpolwi de totlajtlakolwah.
it-2-S pág. 819 párrs. 4-6
ITekiuajkayo toTajtsin Dios
“Tlanawatia Ikone non saikpanoa kitlasojtla”. Itech Pentecostés xiuitl 33, majtlaktli tonalmej satepan ijkuak Jesús oyajki iluikak, okinmakak espíritu santo imachtijkauan uan ijkon okimatkej “ik iyekma Totajtsi Dios okiweyijkatlali n Jesús” (Hech. 1:8, 9; 2:1-4, 29-33). Ijkon opejki “yankuik tlajtolsenkaualistli” uan omochijkej ‘yolchipawakeh’, yejuan akinmej pouij itech Israel espiritual (Heb. 12:22-24; 1 Ped. 2:9, 10; Gál. 6:16).
Jesucristo omotlali iyekma iTajtsin uan opejki kinyekana tokniuan (Efes. 5:23; Heb. 1:3; Filip. 2:9-11). ITlajtol toTajtsin Dios kiteititia itech Pentecostés xiuitl 33 Jesús opejki kinnauatia imachtijkauan. Ijkuak tlatitlanil Pablo okintlajkuilili tokniuan tlen ochantiayaj Colosas, okinmilui Jesucristo yotlanauatiaya uan ijkin okijto: “Dios otechmakixti imak iweletilis n tleyuálistli, iwa otechtlali kan tlanawatia Ikone non saikpanoa kitlasojtla” (Col. 1:13; noijki xikita Hech. 17:6, 7).
Itekiuajkayo Jesús opejki itech Pentecostés xiuitl 33 ompa iluikak uan opejki kinualnauatia tokniuan tlen toTajtsin Dios okinpejpenki ika iespíritu para yetoskiaj ikoneuan (Juan 3:3, 5, 6). Ijkuak nonmej tokniuan tlapejpenalmej toTajtsin Dios kinmaka intetliokolil, ayakmo kinualnauatia itekiuajkayo Jesús porque peuaj iuan tlanauatiaj ompa iluikak (Apoc. 5:9, 10).
(Colosenses 2:8) Ximotlachilikah; amo kichiwa nomechkuatlapololtiskeh iwa nomechkajkayawaskeh nekateh tlamachtijkeh ika tlamachtílisteh non amitla impati, porke yejwah amo kitemachtiah itlajtol Cristo, yej san tlan kiyejyekoliah n tlaltikpaktlakah.
w08-S 15/8 pág. 28 párr. 9
Tlen okachi ipati omotlajtolti itech cartas a los Gálatas, a los Efesios, a los Filipenses uan a los Colosenses
2:8. ¿Tlen kijtosneki ijkuak Pablo okijto tlen “kiyejyekoliah n tlaltikpaktlakah”? Nochi tlen Satanás kiyekana uan nochi tlen mokuayejyekoaj uan kinekij kichiuaskej tlaltikpaktlakamej. Ompa noijki poui tlen tlamachtiaj, ijkuak kinekij kipiaskej miak tlamantli, religiones tlen amo melauak uan okseki tlamantli (1 Juan 2:16).
8-14 DE JULIO
KEN TECHPALEUIA BIBLIA | 1 TESALONICENSES 1-5
“Ximosepanyolchikawakah iwa ximochikawakah”
(1 Tesalonicenses 5:11-13) Yika, ximosepanyolchikawakah iwa ximochikawakah ijkó kemi ya nonkichijtiwitseh. 12 Tokniwah, tomechtlatlaujtiah xikintlakitakah akimeh tekititokeh nomowah. Yejwah nomechyakanah iwa nomechnonotsah kemi Toteko kineki xinemikah. 13 Xikintlakitakah iwa xikintlasojtlakah por n tekitl non kichijtokeh. Iwa kuali ximoyekwikakah nochteh nomejwah.
w11-S 15/6 pág. 26 párr. 12
“Xikintlakitakah akimeh tekititokeh nomowah”
12 Ijkuak ikaj tlayekana itech tlanechikol amo san kijtosneki tlamachtis. Tlatitlanil Pablo noijki okijto non tlajtoli itech 1 Timoteo 3:4, ompa okijto akin tlayekana “makimati kenijki tlanawatis [tlayekanas] itech icha, iwa makinmititi ipilwah mateneltokakah iwa matetlakitakah”. Tlajtoli “tlanauatis” [tlayekanas] amo san kijtosneki ikaj kinmachtis ikoneuan, noijki kijtosneki kinpaleuis ma tetlakamatikan uan kiyekanas isiua. Noijki ijkon, tlayekankej moneki kinyekanaskej nochtin tokniuan tlen katej itech tlanechikol uan moneki kinpaleuiskej ma kitlakamatikan Jehová (1 Tim. 3:5).
“Nochipa ma timoyolchikauakan”
13 Noijki moneki ma tikinyolchikauakan tokniuan tlen yimiak xiuitl kitekichiuilijtokej Jehová. Ma timokuayejyekokan itech Josué. Jehová okipejpenki pampa kinyekanaskia israelitas ijkuak yikalakiskiaj itech Tlali tlen Jehová okijto Kinmakaskia. Maski yimiak xiuitl Josué okitekichiuilijtoka Jehová, Jehová okilui Moisés: “Xikpejpena Josué uan xikyolchikaua, pampa ye kinuikas nochtin tlaltikpaktlakamej uan ye kichiuas ma kiselikan tlali tlen te tikitas” (Deuteronomio 3:27, 28). Omonekiaya ma kiyolchikauakan Josué pampa satepan altepetl Israel moteuiskia miak uelta uan se uelta amo tlatlaniskia (Josué 7:1-9). Axkan, noijki moneki ma tikinyolchikauakan tlayekankej uan tlayekankej itech circuito. ¿Tleka? Yejuan sapanoa mochijchikauaj kimaluiaj ialtepe toTajtsin Dios (xiktlajtolti 1 Tesalonicenses 5:12, 13). Se tlayekanki itech circuito okijto: “Ualeua tokniuan techmakaj se carta kanin kijtoaj techtlasojkamatiliaj uan techiluiaj okinpakti otikintlajpalotoj. Tikintlatiaj nonmej cartas uan tikintlajtoltiaj ijkuak timoyolkokoaj. Melauak techyolchikauaj”.
(1 Tesalonicenses 5:14) Noiwa tomechtlatlaujtiah xikinnonotsakah chikawak akimeh amo kinekih tekitiskeh. Xikinyolchikawakah akimeh mosotlawah. Xikimpalewikah akimeh amo chikawak intlaneltokalis, iwa xikinmajsikamatiltikah nochteh n oksikimeh.
Ma tikteititikan melauak titetlasojtlaj
13 Ma tikinpaleuikan akinmej amo kipiaj chikauak intlaneltokilis. Tikteititiskej titetlasojtlaj tla tiktlakamatij nin tlanauatil: “Xikimpalewikah akimeh amo chikawak intlaneltokalis, iwa xikinmajsikamatiltikah nochteh n oksikimeh” (1 Tes. 5:14). Sekimej tokniuan amo kipiaj chikauak intlaneltokilis pero satepan mochikajtiuij. Oksekimej moneki yolik tikinpaleuiskej. ¿Ken tikchiuaskej? Ma tikinyolchikauakan ika Biblia, ma tikinmiluikan touan ma tetlapouitij noso ijkuak techtlapouiaj kuali ma tikinkakikan. Noijki amo ma tikinpejpenakan akinmej okachi kipiaj chikauak intlaneltokilis uan akinmej amo, okachi kuali, ma tikilnamiktokan tlatlamantli toyelis. Hasta Pablo okijto tleka amo okatka chikauak (2 Cor. 12:9, 10). Tinochtin moneki ma techpaleuikan uan ma techyolchikauakan.
Ma titeiknomatikan uan ma tiyetokan tiyolyamankej ken Jesús
16 Noijki tikteititiaj titeiknomatij ika tlen tikijtoaj. Biblia techiluia ma tikinyolseuikan akinmej moyolkokoaj noso itlaj kintekipachoa (1 Tesalonicenses 5:14). ¿Tlen uelis tikinmiluiskej? Uelis tikinmiluiskej intech timotekipachoaj. Noijki uelis tikinpaleuiskej ma kitakan kuali inyelis tlen kipiaj uan uelis tikinmiluiskej kuali tlen kichiuaj. Uelis tikinmiluiskej katej itech tlanechikol pampa Jehová kinpatioita (Juan 6:44). Uelis tikinmiluiskej Jehová melauak motekipachoa itech itekipanojkauan “akimeh mosotlawah” uan moyolkokoaj (2 Corintios 7:6). Tlen tikijtoaj uelis kinyolseuis akinmej sapanoa moyolkokoaj (Proverbios 16:24).
Ma tiktemokan ken techpaleuia Biblia
(1 Tesalonicenses 4:3-6) Dios kineki ximoyolchipawakah inawak, iwa amaka mamomekatijtinemi. 4 Yika, nochi tlakatl makimati kenomi kiyeknawatis ikuerpo ika chipawálistli iwa tlakitálistli. 5 Iwa amo xikkawilikah makelewi itla nomokuerpo kemi kichiwah akimeh amo kixmatih n Totajtsi Dios. 6 Amaka mamixewi makikajkayawa ikni itech itla tekitl, porke Toteko Dios kitlaijyowiltis chikawak akin ijkó kichiwas, tejwah achto yotomechilijkeh.
it-1-S pág. 963 párr. 7
Auilnemilistli
Akin auilnemi kichiua se ueyi tlajtlakoli uan uelis kikixtiskej itech tlanechikol (1 Cor. 5:9-13; Heb. 12:15, 16). Tlatitlanil Pablo okijto akin auilnemi tlajtlakolchiua porque amo kuali kitekitiltia itlalnakayo. Akin ijkon kichiua Jehová ayakmo kiselia, noijki kisokiotia tlanechikol uan uelis sapanoa mokokos uan mikis (1 Cor. 6:18, 19). Akin auilnemi kinkajkayaua tokniuan (1 Tes. 4:3-7), porque 1) ika tlen kichiua kinsokiotia tokniuan tlen pouij itech tlanechikol uan kichiua amo kuali intech ma tlajtokan (Heb. 12:15, 16), 2) noijki akin iuan oauilnenki kisokiotilia inemililis uan ayakmo yetos chipauak ijkuak monamiktis, 3) noijki kichiua ma kinpinauikan ikalchanejkauan uan 4) noijki kintlajyouiltia itatajuan akin iuan oauilnenki, inamik noso akin iuan omonamiktiskia. Akin ijkon kichiua amo kixnamiki intlanauatiluan tlaltikpaktlakamej tlen uelis kixkomakaskej, kixnamiki toTajtsin Dios uan ye kitlajyouiltis (1 Tes. 4:8).
(1 Tesalonicenses 4:15-17) Yika, tomechmatiltiah nin itlajtol Toteko Jesús: Ijkuak Ye wits, tejwah akimeh axa tiyolitokeh, amo tikinmoyakanaltiskeh non yomikkeh. 16 Porke inewia n Toteko waltemos de ilwikak ika chikawak tlájtoli kemi se tekiwa. Tlajtos kemi se non kinyakana n ángelteh, iwa tikkakiskeh ijkuak kipitsas itlapitsal Dios, ijkuakó akimeh omikkeh iwa okineltokakeh n Cristo achto moyolitiskeh. 17 Tlamis akimeh ok tiyolitoskeh, techwikaskeh inwah ipan mextli para timonamikiskeh iwan Toteko Jesús nepa tlakpak. Iwa ijkó nochipa tiyetoskeh iwan Toteko.
w15 15/7 págs. 13, 14 párrs. 14, 15
“San nima nomechmakixtikih”
14 ¿Tlen panos satepan ijkuak Gog de Magog peuas kinekis kipojpolos ialtepe Jehová? Biblia kijtoa itech Jesús: “Nikwalintitlanis noangelwah makinmoololokih non Ne onikinpéjpenki de n nawi ejekameh itech nin tlaltíkpaktli asta n ilwikak” (Marcos 13:27; Mateo 24:31). ¿Kijtosneki ijkuakon kijtoskej akinmej tlapejpenalmej? Amo. ¿Noso kijtosneki tlapejpenalmej tlen ok katej itech Tlaltikpak ijkuakon sepa kinpejpenaskej? Amo, Pampa achto ajsis ueyi tlajyouilistli sepa kinpejpenaskej (Mateo 13:37, 38; Apocalipsis 7:1-4). Ik non, ¿tlen kijtosneki ijkuak Jesús okijto “makinmoololokih non Ne onikinpéjpenki”? Kijtosneki Jesús kinteochiuas tlapejpenalmej tlen ok katej nikan Tlaltikpak uan kinuikas iluikak (1 Tesalonicenses 4:15-17; Apocalipsis 14:1). Nin panos satepan ijkuak Gog de Magog peuas kinekis kipojpolos ialtepe Jehová (Ezequiel 38:11). Ijkuakon mochiuas tlen okijto Jesús: “Ijkuakó non yolchipawakeh, tsotlaniskeh kemi n tonati ompa kan tlanawatia Totajtsi” (Mateo 13:43).
15 Miakej tlaltikpaktlakamej kineltokaj tikitaskej Jesús ijkuak uits pampa tlanauatis nikan itech Tlaltikpak uan ye kinuikas tlapejpenalmej iluikak ika intlalnakayo. ¿Melauak ijkon kinpanos tlapejpenalmej tlen ok katej itech Tlaltikpak? Amo, pampa Biblia tlamachtia ijkuak mokuepas Jesús amo tikitaskej. Kijtoa: “Niwits ipan mextli de ilwikak” uan noijki “motas itech ilwikak noneskayo Ne Non onimochi nitlakatl” (Mateo 24:30). Uan Biblia noijki kijtoa ‘nakayo iwan esso mach weletis kitlaxkatiliskeh kan ilwikak’. Ik non, ¿ken kinuikaskej iluikak tlapejpenalmej tlen ok katej Tlaltikpak? Biblia kijtoa ‘Dios kinpatilis inkuerpo. Totokatijkak, kemi ijkuak se ixkuejkueyoni, ijkuak mokakis n saiksemi tlapítsali” (xiktlajtolti 1 Corintios 15:50-53). (Xikita tlajtoli tlen kiualika tlakxitlan.) Tlapejpenalmej yolmelajkej tlen ok yetoskej Tlaltikpak san niman kinuikaskej iluikak ken espíritus.
15-21 DE JULIO
KEN TECHPALEUIA BIBLIA | 2 TESALONICENSES 1-3
“‘Walmonextia amokualitlakatl tetlajtlakolchiwaltiʼ”
(2 Tesalonicenses 2:6-8) Iwa axa nomejwah ya nonkimatih tlan kitsakuilijtok non tlakatl tetlajtlakolchiwalti, para mamotenexti asta ijkuak kalakiki non tonati. 7 Porke n amokualitlakatl tetlajtlakolchiwalti ya ichtakatekititok; iwa sa kichixtok makachiwakah akin kitsakuilijtok. 8 Ijkuakó walmonextis neká tetlajtlakolchiwalti, akin Toteko Jesús kimiktis ika itlajtol weletini, iwa kipojpolos ika itlawilnextilis ijkuak wits.
it-1-S pág. 676 párr. 1
Ma tinemikan ken Jehová kineki
“Non amaka okimatia” tlen Jehová okijto amo ken “amokualitlakatl tetlajtlakolchiwalti” tlen “ichtakatekititok”. Akinmej opejki kichiuaj ken Cristo amo okimatiayaj akinmej kineskayotiaj “amokualitlakatl tetlajtlakolchiwalti”. Ayamo omonechikoayaj uan amo omotaya akinmej. Maski yiyetoskiaj, miakej amo kimatiskiaj akinmej porque san ichtaka kichiuaskiaj tlen amo kuali. Kijtoskiaj kiueyichiuaj Jehová pero amo kichiuaskiaj ken ye kineki. Ijkuak okatka Pablo, okinnejmachtijkej tokniuan porque sekimej okichiuayaj tlen amo kuali uan satepan kikauaskiaj Jehová, ik non, ye okijto “amokualitlakatl tetlajtlakolchiwalti” ‘ya ichtakatekititokaʼ. Jesucristo kixpoloskia ijkuak tlanauatiskia. Satanás kiyekanaskia “amokualitlakatl tetlajtlakolchiwalti”, ik non, ‘kixnamikiskia iwa majkokuiskia ixpa nochi tlan motenewa de diosʼ (gr. sé·ba·sma). Ken Satanás kintekitiltiskia kixnamikiskiaj toTajtsin Dios, ik non, sapanoa kichiuaskiaj tlen amo kuali uan kinmixpoloskiaj nochtin tlen kichiuaskiaj ken yejuan. Ken yetoskiaj ixtlamatkej amo motaskia kichiuaj tlen amo kuali uan kijtoskiaj kichiuaj ken toTajtsin Dios kineki (2 Tim. 2:3-12; noijki xikita Mat. 7:15, 21-23).
(2 Tesalonicenses 2:9-12) N satanás kualtitlanis n tetlajtlakolchiwalti, iwa kimakas iweletilis para makinchiwa wejweyi milagros iwa neskáyolteh non san ika teixkajkayawas. 10 Kitekitiltis nochi tlan amokuali para kinkajkayawas akimeh moyakantokeh kan amo tlakualka porke amo okinekeh okikakeh tlan milák para momakixtiskeh. 11 Yika, Dios kinkawilia mamokajkayawakah iwa makineltokakah tlan amo milák, 12 para kintlaijyowiltis nochteh akimeh amo okinekeh kineltokaskeh tlan milák, yej okachi kimpaktia kichiwaskeh tlan amokuali.
it-2-S pág. 368 párr. 7
Ijkuak ikaj tlakajkayaua
Jehová kitekauilia “mamokajkayawakah” akinmej ijkon kinekij para “makineltokakah tlan amo milák” uan amo ma kineltokakan tlen otlamachti Jesucristo (2 Tes. 2:9-12). Yiuejkika ijkon okipanok se ueyi tekiua israelita tlen omotokayotiaya Acab. Sekimej profetas okikajkayajkej porque okiluijkej ye uan ialtepe tlatlaniskiaj ijkuak moteuiskiaj iuan tlen ochantiayaj ompa Ramot-galaad pero se iprofeta Jehová tlen omotokayotiaya Micaya okilui kintlajyouiltiskiaj. Jehová okititi Micaya se ángel kichiuaskia amo ma kijtokan tlen melauak nonmej profetas, san ma kijtokan tlen yejuan okinekiayaj uan tlen okinekiaya kikakis Acab. Maski okinejmachtijkej ye okinek ma kikajkayauakan, ik non, omikik (1 Rey. 22:1-38; 2 Crón. 18).
Ma tiktemokan ken techpaleuia Biblia
(2 Tesalonicenses 1:7, 8) iwa nomejwah akimeh nontlaijyowiah, Ye kichiwas ximosewikah ijkó kemi tejwah noiwa timosewiskeh, itech neká tonati ijkuak Toteko Jesús waltemos ijtik tletl de ilwikak iwa iangelwah weletinih, 8 para kintlaijyowiltis akimeh amo kineltokah Dios nion kitlakitah n kualitlájtoli de Toteko Cristo Jesús.
it-1-S pág. 972 párr. 4
Tlitl
Pedro okijto “ilwikak iwa n tlaltíkpaktli, Dios kinkajtok para kimpojpolos ika tletl”. Versículos tlen katej achto uan satepan itech nin texto, kiteititia amo tlajtoa itech tlitl tlen tejuan tikixmatij, non kijtosneki ikaj sepa kixpoloskej. Ijkon ken ijkuak okatka Noé uan otlatemik, toTajtsin Dios amo okipojpolo iluikak nion tlaltikpak, okinmixpolo tlen amo yolkualmej. Noijki ijkon kichiuas Jesús uan ángeles, kinmixpoloskej akinmej amo yolkualmej uan kipojpoloskej nochi tlen inmiuan poui (2 Ped. 3:5-7, 10-13; 2 Tes. 1:6-10; noijki xikita Is. 66:15, 16, 22, 24).
(2 Tesalonicenses 2:2) amo xikmokawilikah manomechixtlapolotikah nion manomechmomojtikah, tla nomechiliskeh okinmatilti se espíritu, noso tla nomechiliah okikakeh noso okiselijkeh se amatlajkuíloli kan nestok tejwah otikijtojkeh yoajsiko itonati n Toteko.
it-1-S pág. 1238 párr. 4
“Kitematiltia ika se espíritu”
“Kitematiltia ika se espíritu” tlen melauak uan tlen amo melauak. Ika griego tlajtoli pnéu·ma (espíritu) okse tlamantli motekitiltia itech sekimej amatlajkuilolmej tlen tlatitlanilmej okinmijkuilojkej. Itech 2 Tesalonicenses 2:2, tlatitlanil Pablo okinmilui tokniuan tlen ochantiayaj Tesalónica: “Tla nomechiliskeh okinmatilti se espíritu, noso tla nomechiliah okikakeh noso okiselijkeh se amatlajkuíloli kan nestok tejwah otikijtojkeh yoajsiko itonati n Toteko”. Nikan Pablo okijto tlajtoli pnéu·ma (espíritu) uan non kijtosneki itlaj tlen ‘okinmiluiayaj okikakejʼ noso se “amatlajkuíloli”. Ik non, seki Biblias kipiaj notas itech non versículo. Se kijtoa: “Tlajtoli espíritu kijtosneki se profecía” (CJ). “ToTajtsin Dios kiteititia sekimej kijtoskiaj Espíritu Santo okinmatilti tlen tlamachtiskiaj pero amo melauak porque kijtoskia san tlen yejuan mokuayejyekoskiaj” (UN). Itech nonmej Biblias uan itech okseki, tlajtoli pnéu·ma, kitlajtolkopaj “espíritu” uan okseki Biblias kitlajtolkopaj “tlen kitenextia espíritu” (BJ), “kitematiltiskiaj itlaj tlen oksekimej kinpaktiskia” (FF, Vi), “kijtoskiaj Dios okinmatilti” (NBE, TA), “kijtoskiaj tlen panoskia” (LT), “profecía” (NVI), “kitematiltia ika se espíritu” (CI, GR, SA) noso “kitematiltia toTajtsin Dios” (NM).
22-28 DE JULIO
KEN TECHPALEUIA BIBLIA | 1 TIMOTEO 1-3
“Ximochijchikaua para okachi tiktekichiuilis Jehová”
(1 Timoteo 3:1) Nin tlájtoli non axa nomechilis, milák: tla aka kineki kinyakanas n tokniwah non kineltokah Cristo Jesús, kuali tekitl kineki kichiwas.
Okachi ma tiktekichiuilikan Jehová
3 (Xiktlajtolti 1 Timoteo 3:1). Tlatitlanil Pablo okinyolchika tokniuan tlen ‘okinekiah kinyakanaskeh n tokniwah’ itech tlanechikol. Tlen okijto Pablo kijtosneki ijkuak ikaj mochijchikaua noso kimelaua ima pampa uelis kikitskis itlaj tlen uejka kajki. Se neskayotl, ma timokuayejyekokan se tokni kineki yetos siervo ministerial. Pero moneki okachi kipias iyelis ken Cristo. Ijkuak ijkon kichiuas uan yetos siervo ministerial, ok mochijchikauas pampa uelis yetos tlayekanki.
(1 Timoteo 3:13) Porke n tlapalewijkeh non kiyekchiwah inteki, kimotlaniliah tlakitálistli iwa ijkó okachi moyolchikawah kintlalwiskeh oksikimeh noiwa makineltokakah Cristo Jesús.
km-S 11/78 pág. 4 párr. 7
Akinmej “kimotlaniliah tlakitálistli”
7 Pablo okijto nonmej tlakamej “kimotlaniliah tlakitálistli”. Nin amo ken kichiuaj itech teopan, ompa sekimej kipiaj seki tekitl tlen mokuayejyekoaj okachi ueyititok. Siervos ministeriales tlen “kiyekchiwah inteki”, kimatij Jehová uan Jesús kinteochiuas uan tokniuan kintlakaitaj uan kinpaleuiaj. Yejuan “moyolchikawah kintlalwiskeh oksikimeh noiwa makineltokakah Cristo Jesús”. Mochijchikauaj kuali tlapaleuiskej itech tlanechikol, ik non, kintlasojtlaj porque kipiaj chikauak intlaneltokilis uan amo momojtiaj ijkuak tetlapouiaj.
Ma tiktemokan ken techpaleuia Biblia
(1 Timoteo 1:4) nion makinkakikah tlájtolteh tekamanalwijkeh noso kenijki okichiwayah intatawah [inkalchanejkauan] ijkuak onemiah. Noni san kichiwa mamokualanikah iwa amo techpalewiah matikchiwakah n tekitl non Dios otechnawati matikchiwakah ika tlaneltokálistli.
it-1-S pág. 1007 párr. 3
Kalchanejkej
Amo omonekiaya kimatiskia okachi itech non tlamantli porque Pablo okitlajkuili Timoteo. Ijkuakon judíos ayakmo omonekiaya kitemoskiaj akinmej yiuejkika okatkaj inkalchanejkauan porque itech tlanechikol toTajtsin Dios amo okitaya akinmej okatkaj judíos uan akinmej amo (Gál. 3:28). Noijki yomomatiaya akinmej okatkaj ikalchanejkauan Jesús tlen oualayaj itech ikalchanejkauan David. Noijki yikipojpoloskiaj Jerusalén uan nochi amamej kanin okijtoayaj akinmej okatkaj inkalchanejkauan judíos. ToTajtsin Dios okitekauili ijkon ma pano, ik non, Pablo amo okinekiaya Timoteo uan oksekimej tokniuan ma kitemokan akinmej okatkaj inkalchanejkauan yiuejkika porque ijkon motonalpoloskiaj uan non amo kinpaleuiskia okachi ma tlaneltokakan itech Jehová. Biblia yokijtoaya akinmej okatkaj ikalchanejkauan Cristo, ijkon omomatki ye Mesías uan non tlen okachi omonekiaya kimatiskej tokniuan. Itech iTlajtol toTajtsin Dios noijki ijkuilitok akinmej okatkaj inkalchanejkauan oksekimej, non kiteititia melauak opanok tlen ompa ijkuilitok.
(1 Timoteo 1:17) ¡Yika, matiktlakitakah iwa matikweyilikah Torey non nochipa yolitok, iwa ayik miki, non amaka kitika, non sanwel Ye Dios! ¡Ijkó mamochiwa!
cl-S pág. 11 párr. 15
Ye toDios
15 Noijki san Jehová kiluiaj “Torey non nochipa yolitok” (1 Timoteo 1:17; Apocalipsis 15:3). ¿Non tlen kijtosneki? Maski amo nochi tikajsikamatiskej, Jehová yiuejkika yokatka uan nochipa yetos. Salmo 90:2 kijtoa: “Te yotikatka tiDios uan nochipa tiyetos”. Ye amo keman oneski; Jehová yiuejkika kajki. Ik non, Biblia kijtoa “Akin nochipa kajki”, porque desde ijkuak ayamo itlaj okichijchiuaya ye yokatka (Daniel 7:9, 13, 22). Ik non, ¿akin uelis kijtos toTeko Jehová akin Ueyititok amo kinamiki tlanauatis?
29 DE JULIO-4 DE AGOSTO
KEN TECHPALEUIA BIBLIA | 1 TIMOTEO 4-6
“¿Tinemiskej ken Jehová kineki noso tiktemoskej miak tlamantli?”
(1 Timoteo 6:6-8) Milák, miak ipati iwa techpalewia [tinemiskej ken Jehová kineki], pero sanwel akin yolpaki ika tlan kipia. 7 Tejwah amitla otikwalikakeh itech nin tlaltíkpaktli iwa amitla weletis tikwikaskeh. 8 Yika, tla tikpiah tlan tikkuaskeh iwa tlan tikmokentiskeh, san ika ye matipakikah.
w03-S 1/6 pág. 9 párrs. 1, 2
Ma tiyolpakikan san ika tlen tikpiaj
Pablo noijki oyolpakiaya porque kuali omomachiliaya san ika tlen okipiaya. Pero, ¿ken uelis tikchiuaskej non? Tla amo tiktemoaj miak tlamantli. Timoteo akin iuan otetlapouito okilui: “Milák, miak ipati iwa techpalewia [tinemiskej ken Jehová kineki], pero sanwel akin yolpaki ika tlan kipia. Tejwah amitla otikwalikakeh itech nin tlaltíkpaktli iwa amitla weletis tikwikaskeh. Yika, tla tikpiah tlan tikkuaskeh iwa tlan tikmokentiskeh, san ika ye matipakikah” (1 Timoteo 6:6-8).
Pablo okijto tla tinemiskej ken Jehová kineki, ijkon uelis tiyolpakiskej san ika tlen tikpiaj. Ye okajsikamatki tla okachi tikpatioitaj tiktekichiuiliskej Jehová uan amo tiknekiskej tikpiaskej miak tlamantli, melauak tiyolpakiskej. Pablo ‘okipiaya tlan kikuaskia iwa tlan kimokentiskiaʼ uan non okipaleui para nemis ken Jehová kineki. Ik non, para uelis yolpakiskia san ika tlen okipiaya, omonekiaya tlaneltokas itech Jehová maski san tlen kipanoskia.
(1 Timoteo 6:9) Pero akimeh kinekih motomintiskeh, wetsih imak n tlajtlákoli porke san tlan kajsih pewa kichiwah para okachi kitlaniskeh tomi. Yika nochi no kinkuatlapololtia, iwa mixpojpoloah.
g-S 6/07 pág. 6 párr. 3
¿Techpaleuis tla tiknekij tikpiaskej miak tlamantli?
Akinmej kinekij kipiaskej miak tlamantli xamo sekimej amo mikiskej pero amo melauak yolpakiskej. Ken sapanoa motekipachoaj kanin tekitij uan kintekipachoa tlen ika mopanoltiskej uelis mokokoskej; sapanoa momojtiskej, ayakmo uelis kochiskej, sapanoa kinkokos intsonteko uan noijki uelis kipiaskej úlceras uan non uelis kichiuas ayakmo miak xiuitl ma yoltokan. Sekimej tlen ijkon kinpanoa kajsikamatij omonekiaya kipatlaskej tlen okichijtokaj. Porque chikauak mokokoaj, insiua noso innamik ayakmo intech tlaneltokaj uan inkoneuan ayakmo yolpakij. Maski ok uelis kiyektlaliskej seki tlamantli, moneki mochijchikauaskej. Yejuan san “kimotetemiliah intlaijyowilis” (1 Timoteo 6:10).
(1 Timoteo 6:10) Yika keman se kitlalia iyolo itech tomi, pewa kichiwa nochi tlan amokuali. Miakeh kikawah Dios, iwa san yejwah innewiah kimotetemiliah intlaijyowilis.
g-S 11/08 pág. 6 párrs. 4-6
Onka chikuase tlamantli tlen techpaleuis kuali ma tiyetokan
Yotimomachtijkej amo melauak tla ikaj mokuayejyekoa okachi yolpakis tla kipia miak tomin. Kitas amo melauak tlen omokuayejyekoaya porque kipias miak ouijkayotl. Sekimej kinekij kipiaskej miak tlamantli, ik non, ayakmo okachi mouikaj iuan inkalchanejkauan uan inyolikniuan. Oksekimej ayakmo kuali kochij porque sapanoa tekipanoaj, oksekimej motekipachoaj porque okachi kinekij kipiaskej tomin. Biblia tlen itoka Nueva Versión Internacional itech Eclesiastés 5:12 kijtoa: “Akin tekiti ueli kochi uan amitlaj kitekipachoa, maski miak noso amo miak tlakuas. Pero akin kipia miak tomin amo ueli kochi”.
Akinmej kinekij kipiaskej miak tomin mokajkayauaj uan tlajyouiaj. Jesucristo okijto “kinmixkajkayava in tomi, iva kinekih kipiaskeh miek tlamantli” (Mar. 4:19, Itlajtol Totajtzin Dios). Non kijtosneki uelis timokuayejyekoskej tiyolpakiskej tla tikpiaj miak tomin pero non amo melauak porque san nochipa tiknekiskej okachi miak tikpiaskej. Biblia Nueva Versión Internacional itech Eclesiastés 5:10 kijtoa: “Akinmej kinekij kipiaskej miak tomin nochipa kinekij okachi”.
Tla tiknekij tikpiaskej miak tomin san timotekipachoskej, timoyolkokoskej, timotlajyouiltiskej uan hasta tikchiuaskej tlen amo kuali (Proverbios 28:20). Pero tla tiktemakaj tlen tikpiaj, titetlapojpoluiaj, tikpiaj chipauak tonemilis, titetlasojtlaj uan kuali timouikaj iuan Jehová, non kichiuas kuali ma tiyetokan uan tiyolpakiskej.
Ma tiktemokan ken techpaleuia Biblia
(1 Timoteo 4:2) Kinkakiskeh n íxkopteh iwa tekajkayajkeh, nonteh ayakmó pinawah ijkuak kichiwah tlan amokuali, ken sepowi intlalnamikilis kemi ijkuak sepowi se toma noso se tokxi.
Moneki nochipa ma tikpiakan kuali totlalnamikilis
17 Tlatitlanil Pedro okinmilui akinmej okichiuayaj ken Cristo: “Xikpiakan kuali namotlalnamikilis” (1 Pedro 3:16, TNM). Se ueyi tlateochiualistli tikpiaj tla chipauak totlalnamikilis iixpan Jehová. Axkan, sapanoa miakej tlaltikpaktlakamej amo chipauak intlalnamikilis. Ken okijto Pablo: “Ayakmó pinawah ijkuak kichiwah tlan amokuali” (1 Timoteo 4:2). Itech nin tlaxelol moajsikamati miakej tlaltikpaktlakamej miktok intlalnamikilis. Ik non, ayakmo itlaj kimachiliaj ijkuak kichiuaj tlen amo kuali. Intlalnamikilis ayakmo itlaj kinmiluia, ayakmo kinkuejsoa nion pinaua. Ninmej tlaltikpaktlakamej ayakmo motlajtlakoltiaj, uan nin nion kintekipachoa.
(1 Timoteo 4:13) Asta keman maniajsiti ompa, te nochipa [kuali ximomachtijto uan] xikimpoilijto n kualitlájtoli nochteh n tokniwah xikinyolchikawa iwa xikinmachti.
it-2-S pág. 198
Teixpan okitlajtoltiayaj iTlajtol toTajtsin Dios
Tlanechikol. Itech achto siglo miakej amo okipiayaj copias tlen omokixtijkej itech Biblia, ik non, teixpan okitlajtoltiayaj. Tlatitlanil Pablo okijto cartas tlen okintitlanili tlanechikolmej teixpan ma kintlajtoltikan. Noijki okinnauati tokniuan ma kinmotlanetikan para uelis kintlajtoltiliskiaj tokniuan tlen opouiayaj itech okseki tlanechikolmej (Col. 4:16; 1 Tes. 5:27). Timoteo okatka telpochtli uan yokintlajpaloaya tokniuan, ik non, Pablo okilui ma momachtijto ken kuali itlaj kitlajtoltis uan ‘nochipa ma kimpoilijto n kualitlájtoli nochteh n tokniwah, ma kinyolchikawa iwa ma kinmachti’ (1 Tim. 4:13).
Ijkuak ikaj kitlajtoltis iTlajtol toTajtsin Dios teixpan, moneki kuali kichiuas (Hab. 2:2). Oksekimej uelis kinpaleuis tlen kikakij. Ik non, akin kitlajtoltia moneki kuali kajsikamatis, noijki moneki kimatis tleka omoijkuilo, ijkon kimatis ken kitlajtoltis uan akinmej kikakiskej amo kajsikamatiskej okse tlamantli. Apocalipsis 1:3 kijtoa ‘yolpakih akimeh kiamapoah iwa akimeh kikakih iwa kichiwah tlan Dios kitematiltiaʼ.
© 2019 Watch Tower Bible and Tract Society of Pennsylvania