Carta tlen techmaka Cuerpo Gobernante

Biblia kijtoa: “Nomejwah ya nonyetoskiah nontlamachtijkeh” (Heb. 5:12). ¡Ximokuayejyeko! Jehová kuali tlamachtia uan techiluia ma tikinmachtikan oksekimej ma kixmatikan. Kineki ma tikinmachtikan akinmej iuan tichantij, tokniuan uan akinmej tikintlapouiaj. ¡Melauak miak ipati nin tekitl! Pero ¿ken uelis okachi kuali titlamachtiskej?

Techpaleuis tlen tlatitlanil Pablo okijkuilili Timoteo: “Nochipa xikimpoilijto n kualitlájtoli nochteh n tokniwah xikinyolchikawa iwa xikinmachti”. Noijki okilui: “Tla ijkó tikchiwas, amo san te timomakixtis, yej noiwa momakixtiskeh akimeh mitskakiskeh” (1 Tim. 4:13, 16). Tlen tikintlapouiaj oksekimej uelis kinmakixtis. Ik non, ma timochijchikauakan kuali ma timoyektlalikan uan kuali ma titlamachtikan. Nin amatlajkuilol techpaleuis kuali ma titlamachtikan. Ma tikitakan tlen kipia:

Nochi tlamachtilmej kipiaj se texto, se principio bíblico noso se neskayotl.

Jehová “Kuali Tlamachtia” (Is. 30:20). Tlen kijtoa nin amatlajkuilol techpaleuis kuali ma tiktlajtoltikan se amatl uan okachi kuali ma titlamachtikan. Pero xikilnamikto ye Jehová kinyoltilana oksekimej ma kixmatikan (Juan 6:44). Nochipa ma tiktlajtlanilikan iespíritu santo Jehová uan nochipa ma titlamachtikan ika Biblia. Noijki nochipa ma titetlapouikan itech Jehová. Ximochijchikauakan ma ajsi itech inyolo akinmej nankinmachtiaj uan ijkon okachi kitlasojtlaskej Jehová.

Jehová otechmakak nin tekitl miak ipati tlen amo keman omotetlapouiaya itech nochi tlaltikpak. Tikneltokaj ika “ichikawalis” toTajtsin Dios uelis ijkon nankichiuaskej (1 Ped. 4:11).

Namokniuan tlen noijki namouan tekitij,

Cuerpo Gobernante tlen kipiaj iTlaixpantijkauan Jehová