¿Timoyektlalijtok para tichantis itech xochitlali?

TINOCHTIN tiknekij mamochiua tlen Jesús okijto: “Mapakikah non moikneliah [noso amo san niman kualanij], porke Dios kinmaxkatilis n tlaltíkpaktli” (Mat. 5:5). Tlapejpenalmej kimoaxkatiskej tlaltikpak ijkuak tlanauatiskej iuan Jesús ompa iluikak (Apoc. 5:10; 20:6). Miakej itekipanojkauan toTajtsin Dios kinekij maajsi non tonal para nochipa chantiskej nikan tlaltikpak. Ayakmo yetoskej tlajtlakolejkej, yolpakiskej uan moyolseuijtoskej. Tla tiknekij ompa tiyetoskej, moneki tikchiuaskej seki tlamantli. Itech nin tlamachtil tikitaskej eyi tlamantli: titlapaleuiskej para mamokopa tlaltikpak se xochitlali, tikinpaleuiskej uan tikinmachtiskej akinmej kinyolitiskej. Noijki tikitaskej tlen uelis tikchiuas axkan para tikteititis tikneki titlapaleuis itech xochitlali.

MATIMOYEKTLALIKAN PARA TITLAPALEUISKEJ ITECH XOCHITLALI

Ijkuak Jehová okinmilui Adán uan Eva ‘makitemitikan tlaltikpak uan makimaluikan’, okiteititi nochi tlaltikpak yetos se xochitlali (Gén. 1:28). Noijki moneki kitlakamatiskej nin tlanauatil akinmej chantiskej itech xochitlali. Ken xochitlali Edén yimiak xiuitl opoliuik, ijkuak tlamis Armagedón, monekis tikkopaskej tlaltikpak se xochitlali. Itech non tonal peuas tikyektlaliskej tlaltikpak. ¡Sapanoua titekipanoskej!

Israelitas okatkaj Babilonia 70 xiuitl ikinon ijkuak omokopkej Jerusalén omonekiaya tlayektlaliskej. Pero Jehová okinpaleui ijkon ken okijto profeta Isaías. Ye okijto: “Kichiuas kanin tlauaki itech non altepetl mayeto ken Edén, kanin tlali sapanoua uaki yetos ken ixochitlali Jehová” (Is. 51:3). Israelitas okiyektlalijkej altepetl Jerusalén. Jehová noijki kinpaleuis akinmej chantiskej tlaltikpak para makikopakan se xochitlali. Axkan tejuatsin uelis tikteititis tikneki ompa titlapaleuis.

Uelis titlachipauas uan titlayektlalis mokalijtik. Tejuatsin uelis ijkon tikchiuas maski akinmej ik ompa chantij amo tlachipauaj. Noijki uelis titlapaleuis ijkuak tlachipauaj itech kali kanin timonechikouaj noso kanin mochiuaj uejueyij nechikolmej. Tla tiueli noijki xikinpaleui tokniuan tlen tlapaleuiaj kanin tlaxixini. Ijkon tikteititis tikneki tikinpaleuis oksekimej. Ximotlajtlani: “¿Uelis nimomachtis seki tlamantli uan ijkon nitlapaleuis itech xochitlali?”.

Sekimej tokniuan tlachipauaj uan kiyektlaliaj kali kanin monechikouaj.

MATIMOYEKTLALIKAN PARA TIKINPALEUISKEJ AKINMEJ KINYOLITISKEJ

Ijkuak Jesús okiyoliti itakotsin Jairo, okinmilui akinmej ompa okatkaj makitlamakakan takotsin (Mar. 5:42, 43). Amo oui kitlamakaskiaj takotsin tlen okipiaya 12 xiuitl. Pero tejuan sapanoua titekipanoskej ijkuak Jesús kichiuas tlen okijto: “Nochteh non yomikkeh iwa tooktokeh kikakiskeh itlajtol. Iwa kisaskeh de inmiketekochwah” (Juan 5:28, 29). Biblia amo kijtoua ken kinyolitiskej akinmej yoixpolikej pero kema tikmatij moneki kipiaskej tlen kimotlaliskej, tlen kikuaskej uan kanin chantiskej. ¿Ken uelis tikteititiskej axkan tiknekij titlapaleuiskej?

¿Ken uelis tikteititis melauak tikneki tichantis tlaltikpak?

Sekimej tokniuan yolpakij ijkuak kinseliaj tokniuan tlen chantij itech oksekimej altepemej para kipiaskej ueyi nechikol ompa París.

Ijkuak namechiluia namechtlajpaloti tokni tlayekanki itech circuito, ¿tikinyoleua mouan matlakuatij? Xamo se tokni tlen otlapaleuiaya Betel kititlanij matetlapouiti itech okse altepetl noso se tlayekanki itech circuito kiluiaj ayakmo tlapaleuis itech circuito. ¿Uelis tikinpaleuis makajsikan kanin chantiskej? Tla kanin tichanti mochiuas se ueyi nechikol regional noso internacional, ¿uelis titlapaleuis achto uan satepan ijkuak tlamis ueyi nechikol? ¿Uelis tikinkalotis sekimej tokniuan?

MATIMOYEKTLALIKAN PARA TIKINMACHTISKEJ AKINMEJ KINYOLITISKEJ

Hechos 24:15 techiluia sapanoua miakej kinyolitiskej. Sekimej amo okixmatkej Jehová ijkuak oixpolikej pero itech xochitlali uelis kixmatiskej.a Itekipanojkauan toTajtsin Dios kinpaleuiskej akinmej kinyolitiskej makixmatikan Jehová (Is. 11:9). Tokni Charlotte otetlapoui Europa, Sudamérica uan África. Ye kineki maajsi tonal ijkuak kinyolitiskej akinmej yoixpolikej. Ika miak pakilistli kijtoua: “Nikneki nikinmachtis akinmej kinyolitiskej. Ijkuak niktlajtoltia tlen okipanok akin yoixpoliuik nikijtoua: ‘Sapanoua yolpakiskia tla kixmatiskia Jehová’. Nikneki maajsi non tonal para nikinmiluis akinmej kinyolitiskej yolpakiskiaj tla kixmatiskiaj Jehová”.

Itekipanojkauan Jehová tlen ochantiayaj ijkuak ayamo oualaya Jesús moneki momachtiskej miak tlamantli. Tiyolpakiskej ijkuak tikiluiskej profeta Daniel ken omochi nochi tlen ye okijkuilo uan amo okajsikamatki (Dan. 12:8). ¿Ken timomachilis ijkuak tikinmiluis Rut uan Noemí itech infamilia ouala Mesías? Sapanoua tiyolpakiskej ijkuak tikintlapouiskej akinmej kinyolitiskej porque ayakmo ikaj techixnamikis uan ayakmo yetos nochi tlen kiyekana Satanás.

Kanin tlapakaj, se tokni kimaka se amatsintli se siuatl.

¿Ken uelis axkan tikteititis tikneki tikinmachtis akinmej kinyolitiskej? Moneki timochijchikauas para okachi kuali titlamachtis uan nochipa titetlapouis (Mat. 24:14, TNM). Maski yitikpia miak xiuitl noso timokokoua uelis titetlapouis. Tla timochijchikaua ijkon tikchiuas, tikteititis tikneki tikinmachtis akinmej kinyolitiskej.

Ximotlajtlani: ¿Melauak nikneki nichantis tlaltikpak? ¿Niyolpaki nitlapaleuis mamokopa tlaltikpak se xochitlali? ¿Nikinpaleuis uan nikinmachtis akinmej kinyolitiskej? Tikteititis yotimoyektlali para titlapaleuis ijkuak tichantis tlaltikpak tla axkan timochijchikaua tikinpaleuis oksekimej.

a Xikita revista Akin Tetlapouijtok septiembre 2022, tlamachtil “Miakej kinualikaskej itech melajkayotl”.