U-EKSODUSI
1 Nanka amadodana ka-Israyeli ahamba loyise uJakhobe eGibhithe, indoda ngayinye yayihamba labendlu+ yayo, amabizo awo yila: 2 URubheni, loSimiyoni, loLevi, loJuda,+ 3 lo-Isakhari, loZebhuloni, loBhenjamini, 4 loDani, loNafithali, loGadi kanye lo-Asheri.+ 5 Sebebonke abantu ababezalwa emulini kaJakhobe babengu-70 kodwa uJosefa wayevele eseseGibhithe.+ 6 Ngokuhamba kwesikhathi uJosefa wafa,+ labafowabo bonke bafa kanye laso sonke isizukulwane leso. 7 Abantu bako-Israyeli bazalana baba banengi njalo baqhubeka besanda kakhulu futhi besiba lamandla amangalisayo baze bagcwala elizweni.+
8 Ngokuhamba kwesikhathi kwaba lenkosi entsha eGibhithe eyayingamazi uJosefa. 9 Ngakho yatshela abantu bayo yathi: “Khangelani, abantu bako-Israyeli sebebanengi kakhulu njalo sebelamandla ukwedlula thina.+ 10 Asibahlakanipheleni abantu laba ngoba bazaqhubeka besiba banengi, besekusithi kungavuka impi babambane lezitha zethu balwe lathi, besebesuka elizweni.”
11 Yikho babeka izinduna ezazizabasebenzisa ngenkani, zibacindezele ngokubapha umsebenzi onzima+ njalo abako-Israyeli bakhela uFaro amadolobho okugcinela ukudla lenye impahla yakhe. Amadolobho la kwakuyiPhithomi leRamesesi.+ 12 Kodwa babesithi nxa bebacindezela kube angathi sebebabasela ukuthi bande kakhulu futhi bagcwale indawo yonke. Ngakho amaGibhithe ayesedlela evalweni ngenxa yokwesaba ama-Israyeli.+ 13 Lokhu kwenza amaGibhithe abathwalisa nzima abako-Israyeli ebenza izigqili.+ 14 Enza impilo yabo yaba buhlungu ngokubanika imisebenzi enzima. Babevoxa udaka betshaya izitina njalo babesetshenziswa njengezigqili emasimini. AmaGibhithe ayebathwalise amagabha avuzayo ebenzisa yonke imisebenzi yobugqili.+
15 Ngemva kwesikhathi inkosi yaseGibhithe yakhuluma lababelethisi abangamaHebheru okwakuthiwa nguShifira loPhuwa, 16 yathi kubo: “Nxa selibelethisa+ abesifazana abangamaHebheru,* kumele likhangele ukuthi umntwana ngoyini. Nxa engumfana kumele limbulale, nxa kungoyinkazana limtshiye ephila.” 17 Kodwa ababelethisi laba babemesaba uNkulunkulu weqiniso njalo abakwenzanga ababekutshelwe yinkosi yaseGibhithe, babebayekela bephila+ abantwana abangabafana. 18 Ngokuhamba kwesikhathi inkosi yaseGibhithe yabiza ababelethisi laba yathi kubo: “Kanti yindaba lingababulalanga abantwana abangabafana?” 19 Ababelethisi baphendula uFaro bathi: “Abesifazana abangamaHebheru abafanani labesifazana abangamaGibhithe. Baqinile njalo umbelethisi uthi efika athole sebebelethile kudala.”
20 Ngakho uNkulunkulu waba lomusa kubabelethisi laba, abantu bako-Israyeli baqhubeka besanda futhi besiba lamandla amakhulukazi. 21 Ngemva kwesikhathi uNkulunkulu weqiniso wababusisa ababelethisi laba baba lezimuli zabo ngoba babetshengise ukuthi bayamesaba. 22 Ekucineni uFaro watshela bonke abantu bakhe wathi: “Bonke abantwana abangabafana abazazalwa ngamaHebheru kumele libaphosele emfuleni uNayili, kodwa amankazana wonke liwayekele ephila.”+
2 Ngalesosikhathi enye indoda eyayizalwa endlini kaLevi yathatha indodakazi yesizwana sikaLevi.+ 2 Owesifazana lo wazithwala wabeletha umntwana ongumfana. Wathi ebona ukuthi umntwana muhle kakhulu, wamfihla okwenyanga ezintathu.+ 3 Kwathi sekumehlula ukuthi aqhubeke emfihlile,+ wathatha ibhasikiti eyenziwe* ngemizi wayihuqa ngethara lengcino wasefaka umntwana phakathi kwayo wayayibeka phakathi kwemihlanga ekhunjini lomfula uNayili. 4 Udadewabo+ womntwana wama bucwadlana ukuze abone ukuthi kwakuzakwenzakalani kuye.
5 Indodakazi kaFaro yehlela kuNayili isiyageza njalo izincekukazi zayo zazihamba eceleni komfula uNayili. Yasibona ibhasikiti phakathi kwemihlanga, yahle yathuma isigqilikazi sayo ukuthi siyeyithatha.+ 6 Yathi iyivula yabona umntwana ongumfana phakathi njalo wayekhala. Yamzwela yasisithi: “Lo ngomunye wabantwana bamaHebheru.” 7 Udadewabo womntwana wasekhuluma lendodakazi kaFaro wathi: “Ngingayakubizela yini owesifazana omunyisayo ongumHebheru ukuthi akondlele umntwana lo?” 8 Indodakazi kaFaro yathi kuye: “Hamba!” Masinyane nje intombazana yahamba yafika yabiza unina+ womntwana. 9 Indodakazi kaFaro yasisithi kuye: “Thatha umntwana lo ungondlele yena, ngizakubhadala.” Ngakho owesifazana wamthatha umntwana wamondla. 10 Umntwana wathi esekhulile wasemhambisa endodakazini kaFaro, waba yindodana yayo.+ Yamnika ibizo elithi Mosi* yathi: “Kungenxa yokuthi ngamkhipha emanzini.”+
11 Kwathi ngalezonsuku uMosi esekhulile,* waya kubafowabo ukuze abone umsebenzi onzima+ ababewenza, wasebona omunye umGibhithe etshaya umHebheru, omunye wabafowabo. 12 Ngakho wathalaza ngapha langapha, wathi ebona ukuthi akulamuntu wambulala umGibhithe wamfihla etshebetshebeni.+
13 Ngelanga elilandelayo waphuma futhi, wabona amadoda amabili angamaHebheru esilwa. Wasesithi kulowo owayephambanisile: “Umtshayelani omunye wakho?”+ 14 Yena wamphendula wathi: “Ngubani okubeke ukuthi ube ngumbusi lomahluleli wethu? Usufuna ukungibulala njengomGibhithe+ lowana ombuleleyo?” UMosi waqalisa ukwesaba wathi: “Kanti indaba le isisaziwa kangaka?”
15 UFaro wayizwa indaba leyo, wazama ukubulala uMosi, kodwa uMosi wambalekela uFaro waya elizweni lakoMidiyani+ wafika waphumula eduze komthombo. 16 Kwakulomphristi wakoMidiyani+ owayelamadodakazi ayisikhombisa. Amadodakazi la afika emthonjeni ezokukha amanzi njalo ayefuna lokugcwalisa imikolo yamanzi ukuze anathise izifuyo zikayise. 17 Kodwa abelusi bafika bawaxotsha njengenjayelo. UMosi wathi ekubona lokhu wabancedisa* abesifazana laba, wanathisa lezifuyo zabo. 18 Bathi befika ngekhaya kuyise uRehuweli,*+ wamangala wathi kubo: “Kuyini okwenze laphangisa kangaka lamuhla?” 19 Baphendula bathi: “KulomGibhithe+ osilamuleleyo kubelusi njalo uze wasikhela amanzi wanathisa lezifuyo.” 20 Yena wasesithi kumadodakazi akhe: “Manje ungaphi? Limtshiyeleni? Mbizeni azokudla lathi.” 21 Ngemva kwalokho uMosi wavuma ukuhlala laleyondoda, njalo yamnika indodakazi yayo uZiphora+ ukuthi ibe ngumkakhe. 22 Ngokuya kwesikhathi uZiphora waba lomntwana ongumfana njalo uMosi wamnika ibizo wathi nguGeshomu*+ ngoba wathi, “Sengingowezizweni elizweni elingayisilo lakithi.”+
23 Kwathi sekudlule isikhathi eside,* inkosi yaseGibhithe yafa,+ kodwa abako-Israyeli baqhubeka bebubula ngenxa yokuba yizigqili njalo babekhala kabuhlungu. Ukukhala kwabo becela usizo ngenxa yobugqili ababephakathi kwabo kwakulokhu kusenyuka kusiya kuNkulunkulu+ weqiniso. 24 Ngokuhamba kwesikhathi uNkulunkulu wezwa ukububula+ kwabo, wasekhumbula isivumelwano sakhe asenza lo-Abrahama lo-Isaka kanye loJakhobe.+ 25 Ngakho uNkulunkulu wabakhangela abako-Israyeli wabona ukuhlupheka kwabo.
3 UMosi waba ngumelusi wezimvu zikayisezala uJethro,+ umphristi wakoMidiyani. Wathi eqhuba izimvu ezisa ngasentshonalanga kwenkangala wafika eHorebhi+ entabeni kaNkulunkulu weqiniso. 2 Ingilosi kaJehova yasibonakala kuye iselangabini lomlilo phakathi kwesihlahla* sameva.+ Wathi elokhu esakhangele wabona isihlahla leso sibhebha kodwa singatshi. 3 UMosi wasesithi: “Kahle ngisondele ngiyehlola isimanga lesi ukuze ngibone ukuthi kungani isihlahla sameva singatshi.” 4 UJehova wathi ebona ukuthi uMosi usesondele ukuze abone, uNkulunkulu wambiza ephakathi kwesihlahla sameva wathi: “Mosi! Mosi!” yena wathi: “Ngilapha.” 5 UNkulunkulu wasesithi: “Ungasondeli eduze. Khipha amanyathela akho ngoba indawo omi kuyo ingcwele.”
6 Waqhubeka wathi: “NginguNkulunkulu kayihlo, uNkulunkulu ka-Abrahama+ loNkulunkulu ka-Isaka+ loNkulunkulu kaJakhobe.”+ UMosi wasezivala ubuso ngoba wayesesaba ukukhangela uNkulunkulu weqiniso. 7 UJehova waphinda wathi: “Sengikubonile sibili ukuhlupheka kwabantu bami eGibhithe njalo sengikuzwile ukukhala kwabo ngenxa yalabo ababasebenzisa ngenkani. Ngibazi mhlophe ubuhlungu ababuzwayo.+ 8 Ngizakwehla ngiyebakhulula esandleni samaGibhithe,+ ngibasuse elizweni lelo ngibase elizweni elihle futhi elibanzi; ilizwe eligeleza uchago loluju,+ indawo yamaKhenani, lamaHithi, lama-Amori, lamaPherizi, lamaHivi kanye lamaJebusi.+ 9 Ukukhala kwabantu bako-Israyeli sekufikile kimi, futhi sengisibonile isihluku esenziwa ngamaGibhithe ebacindezela.+ 10 Ngakho ngizakuthuma kuFaro uyekhipha abantu bami bako-Israyeli eGibhithe.”+
11 Kodwa uMosi wathi kuNkulunkulu weqiniso: “Kambe mina ngingubani ukuthi sengingaya kuFaro ngiyekhipha abako-Israyeli eGibhithe?” 12 Yena wathi kuye: “Ngizakuba lawe,+ futhi nansi isibonakaliso esizakutshengisa ukuthi yimi engikuthumileyo: Nxa usubakhiphile abantu eGibhithe, lizakhonza uNkulunkulu weqiniso entabeni+ yonale.”
13 Lanxa kunjalo uMosi wathi kuNkulunkulu weqiniso: “Manje nxa ngingahamba ebantwini bako-Israyeli ngithi kubo, ‘UNkulunkulu wabokhokho benu ungithumile kini,’ besebesithi kimi, ‘Ngubani ibizo+ lakhe?’ Kumele ngithini kubo?” 14 UNkulunkulu wasesithi kuMosi: “Ngizakuba Yilokho Engikhetha Ukuba Yikho.”+ Waphinda wathi: “Nanku ozakutsho kwabako-Israyeli, ‘UNgizakuba ungithumile kini.’”+ 15 UNkulunkulu waqhubeka wathi kuMosi:
“Nanku okumele ukutsho kwabako-Israyeli, ‘UJehova uNkulunkulu wabokhokho benu, uNkulunkulu ka-Abrahama+ loNkulunkulu ka-Isaka+ loNkulunkulu kaJakhobe+ ungithumile kini.’ Leli yilo ibizo lami kuze kube nini lanini+ njalo yilo okumele ngikhunjulwe ngalo kusukela kwesinye isizukulwane kusiya kwesinye. 16 Ngakho hamba uyebuthanisa abadala bako-Israyeli uthi kubo, ‘UJehova uNkulunkulu wabokhokho benu ubonakale kimi, uNkulunkulu ka-Abrahama lo-Isaka loJakhobe njalo uthe: “Sengikhangelise amehlo ami kini,+ ngabona lalokho okwenzakala kini eGibhithe. 17 Ngakho ngithi mina, ngizalikhipha ebunzimeni+ elikubo ezandleni zamaGibhithe ngilise elizweni lamaKhenani, lamaHithi, lama-Amori,+ lamaPherizi, lamaHivi, lamaJebusi,+ elizweni eligeleza uchago loluju.”’+
18 “Bazalilalela sibili ilizwi+ lakho, njalo wena labadala bako-Israyeli lizakuya enkosini yaseGibhithe lifike lithi kuyo: ‘UJehova uNkulunkulu wamaHebheru+ ukhulume lathi. Yikho sicela usivumele sithathe uhambo lwamalanga amathathu siye enkangala, siyenikela imihlatshelo kuJehova uNkulunkulu wethu.’+ 19 Kodwa ngikwazi mhlophe ukuthi inkosi yaseGibhithe ayisoze ivume ukuthi lihambe ngaphandle kokuthi ifuqwe+ yisandla esilamandla. 20 Ngakho ngizakwelula isandla sami ngitshaye iGibhithe ngazo zonke izenzo zami ezimangalisayo engizazenza kuyo; ngemva kwalokho izaliyekela lihambe.+ 21 Kanti njalo ngizakwenza ukuthi amaGibhithe abe lomusa ebantwini laba. Nxa seliphuma alisoze liphume lilengise izandla+ loba sekutheni. 22 Owesifazana ngamunye kumele acele izinto ezenziwe ngesiliva lezenziwe ngegolide kanye lezigqoko kumakhelwane wakhe lakowesifazana ohlala endlini yakhe. Izinto lezi lizazigqokisa amadodana enu lamadodakazi enu njalo lizayibutha inotho yamaGibhithe.”+
4 Kodwa uMosi waphendula wathi: “Manje ngizathini nxa bangayekela ukungikholwa, bale lokulalela ilizwi lami?+ Phela bazakuthi, ‘UJehova kazange abonakale kuwe.’” 2 UJehova wasesithi kuye: “Kuyini lokho okusesandleni sakho?” Yena waphendula wathi: “Yintonga.” 3 UNkulunkulu wathi: “Yiphosele phansi.” Yikho wayiphosela phansi yatshintsha yaba yinyoka,+ uMosi wayibalekela. 4 UJehova wathi kuMosi: “Yelula isandla sakho uyibambe ngomsila.” Ngakho welula isandla sakhe wayibamba, yasitshintsha yaba yintonga esandleni sakhe. 5 UNkulunkulu wasesithi: “Lokhu kuzakwenza bakholwe ukuthi uJehova uNkulunkulu wabokhokho babo, uNkulunkulu ka-Abrahama loNkulunkulu ka-Isaka loNkulunkulu kaJakhobe+ ubonakele kuwe.”+
6 UJehova waphinda wathi kuye: “Ngicela ufake isandla esigqokweni sakho ngaphezulu esifubeni.” Ngakho wafaka isandla esigqokweni sakhe. Wathi esikhupha sasesigcwele ubulephero sesimhlophe njengongqwaqwane.+ 7 Wasesithi: “Buyisela isandla sakho esigqokweni sakho ngaphezulu esifubeni.” Ngakho wasibuyisela isandla esigqokweni sakhe. Wathi esikhipha sasesingaselabulephero sesifanana lawo wonke umzimba wakhe. 8 Wathi kuye: “Nxa bengasoze bakukholwe futhi bengasinaki isibonakaliso sokuqala loba sekutheni bazalalela nxa usuwenze esesibili.+ 9 Kodwa nxa bangayekela ukuzikholwa izibonakaliso lezi ezimbili, bale lokulalela ilizwi lakho, uzakukha amanzi emfuleni uNayili uwathele phansi emhlabathini owomileyo njalo lawomanzi owathethe kuNayili azatshintsha abe ligazi emhlabathini owomileyo.”+
10 UMosi wasesithi kuJehova: “Uxolo Jehova, kusukela kudala kuze kube yilesisikhathi ukhuluma lenceku yakho, angikaze ngibe ligabazi ekukhulumeni. Vele ngikhuluma nzima njalo angenelisi ukubeka kuhle amabala.”+ 11 UJehova wathi kuye: “Ngubani owanika abantu umlomo kumbe obenza babe yizimungulu loba izacuthe? Ngubani obenza babone kuhle kumbe babe yiziphofu? Ayisimi yini uJehova? 12 Ngakho hamba, ngizakuba lawe nxa usukhuluma* njalo ngizakutshela* lokho okumele ukukhulume.”+ 13 Kodwa yena wathi: “Uxolo Jehova, ngicela uthume loba ngubani ofuna ukumthuma.” 14 UJehova wamzondela kakhulu uMosi, wathi: “Kanti umnewenu u-Aroni+ umLevi kakho yini? Ngiyakwazi ukuthi uyenelisa ukukhuluma kuhle kakhulu njalo usendleleni khathesi, uzokuhlangabeza. Uzathi ekubona inhliziyo yakhe ithokoze.+ 15 Ngakho kufanele ukhulume laye, umtshele okumele akukhulume.+ Ngizakuba lawe kanye laye ngesikhathi likhuluma+ futhi ngizalitshela okumele likwenze. 16 Nguye ozakukhulumela ebantwini, abe ngumkhulumeli wakho futhi wena uzakuba nguNkulunkulu kuye.*+ 17 Kumele uphathe lentonga le esesandleni sakho ukuze wenze ngayo+ izibonakaliso.”
18 Ngakho uMosi wabuyela kuyisezala+ uJethro wathi kuye: “Ngicela ungivumele ngibuyele kubafowethu eGibhithe ngiyebona ukuthi basaphila yini.” UJethro wathi kuMosi: “Hamba ngokuthula.” 19 UJehova wasekhuluma loMosi koMidiyani wathi: “Buyela eGibhithe ngoba bonke abantu ababefuna ukukubulala sebafa.”+
20 Ngemva kwalokho uMosi wathatha amadodana akhe lenkosikazi yakhe wabagadisa ubabhemi, basebengena indlela baya elizweni laseGibhithe. UMosi wathatha lentonga kaNkulunkulu weqiniso wayiphatha ngesandla sakhe. 21 UJehova wasesithi kuMosi: “Nxa usufikile eGibhithe woba leqiniso lokuthi uyazenza zonke izimangaliso engikunike amandla okuthi uzenze+ phambi kukaFaro. Kodwa ngizavumela ukuthi inhliziyo yakhe ibe lukhuni,+ kasoze avume ukuthi abantu bahambe.+ 22 Kumele utshele uFaro uthi, ‘Nanku uJehova akutshoyo: “U-Israyeli yindodana yami, izibulo lami.+ 23 Yikho ngithi kuwe vumela indodana yami ihambe ukuze iyengikhonza. Kodwa nxa ungayala ukuthi ihambe ngizabulala indodana yakho, izibulo lakho.”’”+
24 Bathi besemangweni sebefike endaweni yokuphumula uJehova+ wahlangana laye njalo wayefuna ukumbulala.+ 25 UZiphora+ wasethatha ilitshe elibukhali* wasoka indodana yakhe futhi wenza ukuthi ijwabu layo lithinte inyawo zakhe,* wathi: “Kungenxa yokuthi ungumyeni wegazi kimi.” 26 Ngakho uNkulunkulu wamyekela wahamba. Ngalesosikhathi uZiphora wathi, “ungumyeni wegazi,” ngenxa yokusokwa.
27 UJehova wasesithi ku-Aroni: “Hamba enkangala uyehlangana loMosi.”+ Yikho wahamba wayahlangana laye entabeni kaNkulunkulu weqiniso,+ wafika wambingelela ngokumqabuza. 28 UMosi wasetshela u-Aroni wonke amazwi uJehova ayemtshele wona ngesikhathi emthuma,+ wamlandisela lazo zonke izibonakaliso ayemtshele ukuthi azenze.+ 29 Ngemva kwalokho uMosi lo-Aroni bahamba bayabuthanisa bonke abadala bako-Israyeli.+ 30 U-Aroni wasebatshela wonke amazwi uJehova ayewatshele uMosi njalo wenza izibonakaliso+ phambi kwabantu. 31 Ngakho abantu bakholwa.+ Bathi besizwa ukuthi uJehova usebakhumbulile abako-Israyeli+ lokuthi usekubonile ukuhlupheka+ kwabo, baguqa phansi bakhothamisa amakhanda.
5 Ngemva kwalokho uMosi lo-Aroni baya kuFaro bathi kuye: “UJehova uNkulunkulu ka-Israyeli uthi, ‘Vumela abantu bami bahambe ukuze bayengenzela umkhosi enkangala.’” 2 Kodwa uFaro wathi: “Ungubani uJehova+ ukuthi sengingaze ngilalele ilizwi lakhe ngivumele u-Israyeli ahambe?+ Angimazi ngitsho uJehova njalo angisoze ngivumele u-Israyeli ahambe.”+ 3 Bona bamphendula bathi: “UNkulunkulu wamaHebheru ukhulume lathi, sicela usivumele sithathe uhambo lwamalanga amathathu siye enkangala siyenikela imihlatshelo kuJehova uNkulunkulu+ wethu, ngoba singayekela ukwenza njalo uzasitshaya ngomkhuhlane kumbe ngenkemba.” 4 Inkosi yaseGibhithe yabaphendula yathi: “Kanti wena Mosi lo-Aroni yindaba lisusa abantu emsebenzini wabo? Buyelani emsebenzini wenu!”*+ 5 UFaro waqhubeka wathi: “Khangelani ukuthi abantu abasebenzayo banengi njani elizweni, kodwa lina lifuna ukubamisa umsebenzi.”
6 Ngalelolanga uFaro watshela abaphathi bomsebenzi labofolomane wathi: 7 “Lingasabaniki abantu utshani bokwenza izitina.+ Bayekeleni bayezidingela. 8 Kodwa kumele libatshele ukuthi batshaye inani lezitina akade bevele bezitshaya. Lingabaphunguleli inani lazo ngoba bangamavila.* Yikho belokhu bekhala besithi, ‘Sifuna ukuhamba, sifuna ukuyanikela imihlatshelo kuNkulunkulu wethu!’ 9 Basebenziseni nzima, bangahlali phansi ukuze bengalaleli amanga.”
10 Ngakho abaphathi+ bomsebenzi labofolomane baya ebantwini bafika bathi kubo: “UFaro uthi, ‘Angisaliniki futhi utshani. 11 Hambani liyezidingela utshani loba ngaphi elingabuthola khona, kodwa umsebenzi wenu awusoze uphungulwe ngitsho.’” 12 Abantu basebegcwala yonke indawo elizweni laseGibhithe besiyadinga amahlanga esikhundleni sotshani. 13 Abaphathi bomsebenzi babelokhu besithi kubo: “Nsuku zonke umuntu ngamunye kumele aqede umsebenzi wakhe njengalokhu elalikwenza lisanikwa utshani.” 14 Kanti njalo ofolomane abangama-Israyeli ababekhethwe ngabaphathi bomsebenzi kaFaro ukuthi bawakhangele batshaywa.+ Babuza ofolomane bathi: “Kungani lingafikisanga inani lezitina elalivele lizitshaya kuqala? Izolo lenze njalo lalamuhla seliphindile.”
15 Ngakho ofolomane bama-Israyeli bahamba bayakhalaza kuFaro bathi: “Kungani uziphatha kanje izinceku zakho? 16 Izinceku zakho kazisabuphiwa utshani kodwa bathi kithi, ‘Tshayani izitina!’ Izinceku zakho ziyatshaywa kodwa abantu bakho yibo abaphambanisayo.” 17 Yena wathi kubo: “Lingamavila,* lingamavila*+ sibili! Yikho lisithi, ‘Sifuna ukuhamba, sifuna ukuyanikela imihlatshelo kuJehova.’+ 18 Sukani lapha, buyelani emsebenzini khathesi! Akulatshani elizabuphiwa futhi kumele liqhubeke litshaya inani lezitina elifunekayo.”
19 Ofolomane bama-Israyeli babona ukuthi basebephakathi kwelitshe lembokodo ngenxa yomlayo lo othi: “Lingaqali ukwehlisa inani lezitina okumele lizitshaye nsuku zonke.” 20 Ngemva kwalokho bahlangana loMosi lo-Aroni. Phela babebamelele khonapho ukuze babahlangabeze nxa sebephuma kuFaro. 21 Ofolomane bahle bathi kubo: “UJehova kakhangele elikwenzileyo ahlulele, ngoba selenze ukuthi uFaro lezinceku zakhe basenyanye* njalo selifake inkemba esandleni sabo ukuze basibulale.”+ 22 UMosi wasesithi kuJehova: “Jehova kanti ubahluphelani abantu laba? Ungithumeleni vele? 23 Ukuhamba kwami kuFaro ngisiyakhuluma ebizweni+ lakho kuhle kwenza ukuthi abaphathe kubi kakhulu abantu+ laba njalo wena awuzange ubakhulule ngitsho abantu bakho.”+
6 Ngakho uJehova wathi kuMosi: “Khathesi uzabona engizakwenza kuFaro.+ Isandla sami esilamandla sizamenza avumele abantu bahambe efuna engafuni njalo isandla sami esilamandla sizamfuqa ukuthi abasuse elizweni+ lakhe.”
2 UNkulunkulu wasesithi kuMosi: “NginguJehova 3 njalo ngangijayele ukubonakala ku-Abrahama lo-Isaka loJakhobe nginguNkulunkulu uSomandla,+ kodwa ibizo lami elithi Jehova+ angizange ngiliveze ngokugcweleyo kubo.+ 4 Ngaphinda ngenza isivumelwano sami labo esokuthi ngibanike ilizwe leKhenani ababehlezi kulo njengabezizweni.+ 5 Mina ngokwami sengikuzwile ukububula kwabantu bako-Israyeli abenziwa izigqili ngamaGibhithe futhi ngiyasikhumbula isivumelwano+ sami.
6 “Yikho-ke tshela abako-Israyeli uthi: ‘NginguJehova, ngizalikhipha ngaphansi kwemithwalo enzima yamaGibhithe, ngilikhulule elizweni lobugqili.+ Ngizalihlenga ngengalo yami eyeluliweyo* langezahlulelo+ ezinkulu. 7 Ngizalithatha libe ngabantu bami futhi ngizakuba nguNkulunkulu wenu.+ Lizakwazi sibili ukuthi nginguJehova uNkulunkulu wenu olikhipha ngaphansi kwemithwalo enzima yamaGibhithe. 8 Kanti njalo ngizalisa elizweni engafunga* ukuthi ngizalipha u-Abrahama lo-Isaka loJakhobe, ngiliphe lona libe ngelenu.+ NginguJehova.’”+
9 Ngemva kwesikhathi uMosi wethula amazwi la kwabako-Israyeli kodwa abazange bamlalele ngenxa yokuthi babengasela themba langenxa yokuthi babehlukuluzwa kabuhlungu besenziwa izigqili.+
10 UJehova wasekhuluma loMosi wathi: 11 “Hamba kuFaro, inkosi yaseGibhithe uyemtshela ukuthi avumele abako-Israyeli basuke elizweni lakhe.” 12 Kodwa uMosi waphendula uJehova wathi: “Njengoba ubona ukuthi abako-Israyeli abangilalelanga,+ pho uFaro yena angangilalela yini njengoba ngivele ngikhuluma nzima?”*+ 13 Lanxa kunjalo, uJehova waphinda wanika uMosi lo-Aroni imilayo okwakumele bayitshele abako-Israyeli kanye loFaro inkosi yaseGibhithe ukuze abako-Israyeli bakhitshwe elizweni laseGibhithe.
14 Nanka amabizo abakhokheli bezindlu zaboyise: Amadodana kaRubheni izibulo+ lika-Israyeli kwakunguHanokhi, loPhalu, loHezironi kanye loKhami.+ Laba yibo-ke abemuli kaRubheni.
15 Amadodana kaSimiyoni kwakunguJemuweli, loJamini, lo-Ohadi, loJakhini, loZohari kanye loShawuli indodana yowesifazana ongumKhenani.+ Laba yibo-ke abemuli kaSimiyoni.
16 La ngamabizo amadodana kaLevi+ kusiya ngosendo lwezimuli zawo: UGeshoni loKhohathi loMerari.+ ULevi waphila iminyaka engu-137.
17 Amadodana kaGeshoni kwakunguLibhini loShimeyi kusiya ngezimuli zawo.+
18 Amadodana kaKhohathi kwakungu-Amramu, lo-Izihari, loHebroni kanye lo-Uziyeli.+ UKhohathi waphila iminyaka engu-133.
19 Amadodana kaMerari kwakunguMahili loMushi.
Lezi yizo okwakuzimuli zamaLevi kusiya ngosendo+ lwezimuli zawo.
20 U-Amramu wathatha+ uJokhebhedi udadewabo kayise njalo wamzalela u-Aroni loMosi.+ U-Amramu waphila iminyaka engu-137.
21 Amadodana ka-Izihari kwakunguKhora+ loNefegi kanye loZikhiri.
22 Amadodana ka-Uziyeli kwakunguMishayeli lo-Elizafani+ kanye loSithiri.
23 U-Aroni wathatha u-Elishebha indodakazi ka-Aminadabi eyayingudadewabo kaNashoni.+ U-Elishebha wamzalela uNadabi, lo-Abhihu, lo-Eliyazari kanye lo-Ithamari.+
24 Amadodana kaKhora kwakungu-Asiri lo-Elikhana kanye lo-Abhiyasafi.+ Lezi yizo okwakuzimuli zabakoKhora.+
25 U-Eliyazari+ indodana ka-Aroni wathatha enye yamadodakazi kaPhuthiyeli njalo yamzalela uFiniyasi.+
Laba yibo abakhokheli bezindlu zamaLevi kusiya ngezimuli zawo.+
26 Lo nguye u-Aroni loMosi labo uJehova abatshela wathi: “Khiphani abantu bako-Israyeli elizweni laseGibhithe, iqembu ngeqembu.”*+ 27 Yibo abakhuluma loFaro inkosi yaseGibhithe ukuthi abavumele bakhiphe abantu bako-Israyeli eGibhithe. Nguye kanye uMosi lo-Aroni.+
28 Ngelanga uJehova akhuluma ngalo loMosi elizweni laseGibhithe, 29 uJehova wathi kuMosi: “NginguJehova. Khuluma loFaro inkosi yaseGibhithe umtshele konke engikutshela khona.” 30 UMosi wasesithi phambi kukaJehova: “UFaro angangilalela+ yini njengoba ngivele ngikhuluma nzima?”*
7 UJehova wasesithi kuMosi: “Khangela, sengikwenze waba njengoNkulunkulu* kuFaro njalo umfowenu u-Aroni uzakuba ngumphrofethi+ wakho. 2 Kumele utshele umfowenu u-Aroni konke engizakutshela khona, yena abesekhuluma loFaro njalo uFaro uzavumela abako-Israyeli baphume elizweni lakhe. 3 Ngizavumela ukuthi inhliziyo kaFaro ibe lukhuni+ njalo ngizakwandisa izibonakaliso zami lezimangaliso zami elizweni laseGibhithe.+ 4 Kodwa uFaro kasoze alilalele. Ngizabeka isandla sami phezu kweGibhithe ngikhiphe amaxuku* ami, abantu bami bako-Israyeli, elizweni laseGibhithe ngezahlulelo+ ezinkulu. 5 Abantu baseGibhithe bazakwazi sibili ukuthi nginguJehova+ nxa sengiselula isandla sami ngimelana leGibhithe njalo ngikhipha ama-Israyeli phakathi kwabo.” 6 UMosi lo-Aroni benza lokho uJehova ayebatshele khona; benza khona kanye ayekutshilo. 7 UMosi wayeleminyaka engu-80, u-Aroni eleminyaka engu-83 ngesikhathi bekhuluma loFaro.+
8 UJehova wasesithi kuMosi lo-Aroni: 9 “Nxa uFaro angathi kini, ‘Yenzani isimangaliso,’ tshela u-Aroni uthi: ‘Thatha intonga yakho uyiphosele phansi phambi kukaFaro.’ Intonga leyo izatshintsha ibe yinkalakatha yenyoka.”+ 10 Ngakho uMosi lo-Aroni baya kuFaro bafika benza khona kanye uJehova ayebatshele khona. U-Aroni waphosela intonga yakhe phansi phambi kukaFaro lezinceku zakhe, yatshintsha yaba yinkalakatha yenyoka. 11 Kodwa uFaro wabiza amadoda ahlakaniphileyo lezanuse kanye labaphristi baseGibhithe+ abenza amasalamusi njalo bafika benza okufananayo ngamasalamusi+ abo. 12 Ngamunye wabo waphosela intonga yakhe phansi njalo zatshintsha zaba zinkalakatha zenyoka kodwa intonga ka-Aroni yaziginya intonga zabo. 13 Lanxa kunjalo inhliziyo kaFaro yaba lukhuni,+ kazange abalalele njengoba nje uJehova wayetshilo.
14 UJehova wasesithi kuMosi: “Inhliziyo kaFaro yomile,+ uyala ukuthi abantu bahambe. 15 Hamba kuFaro ekuseni ngoba uzabe esiya emfuleni. Ufike ume ekhunjini lomfula uNayili ukuze uhlangane laye; njalo kumele uhambe uphethe intonga yakho eyatshintsha yaba yinyoka.+ 16 Kumele uthi kuye, ‘UJehova uNkulunkulu wamaHebheru ungithumile kuwe,+ uthi: “Vumela abantu bami bahambe ukuze bayengikhonza enkangala,” kodwa lakhathesi ulokhu ungafuni ukulalela. 17 UJehova uthi: “Nanku engizakwenza ukuze ukwazi ukuthi nginguJehova.+ Ngizatshaya amanzi omfula uNayili ngentonga esesandleni sami njalo azatshintsha abe ligazi. 18 Inhlanzi ezisemfuleni uNayili zizakufa njalo iphunga lizabamba nki kuNayili. AmaGibhithe kawasoze enelise ukunatha amanzi kuNayili.”’”
19 UJehova wasesithi kuMosi: “Khuluma lo-Aroni uthi: ‘Thatha intonga yakho welulele isandla sakho phezu kwamanzi aseGibhithe,+ phezu kwemifula yayo, lemisele* yayo yamanzi, lasemaxhaphozini+ ayo lakuwo wonke amachibi ayo ukuze amanzi abe ligazi.’ Kuzakuba ligazi lodwa kulo lonke ilizwe laseGibhithe, ngitsho laphakathi kwezitsha ezenziwe ngesigodo lezenziwe ngamatshe.” 20 UMosi lo-Aroni bahle bakwenza lokho uJehova ayebatshele khona. U-Aroni waphakamisa induku yakhe watshaya amanzi omfula uNayili phambi kukaFaro lezinceku zakhe njalo amanzi wonke ayesemfuleni atshintsha aba ligazi.+ 21 Inhlanzi ezazisemfuleni zafa+ kwanuka phu emfuleni njalo amaGibhithe ayengasenelisi ukunatha amanzi omfula uNayili,+ kwasekuligazi lodwa kulo lonke ilizwe laseGibhithe.
22 Lanxa kunjalo abaphristi baseGibhithe abenza amasalamusi+ labo benza okufananayo ngamasalamusi abo ayimfihlo. Ngakho inhliziyo kaFaro yaqhubeka isiba lukhuni njalo kazange abalalele njengoba nje uJehova wayetshilo.+ 23 Ngemva kwalokho uFaro wabuyela endlini yakhe njalo akuzange kuthi thiki enhliziyweni yakhe. 24 Bonke abantu beGibhithe babegebha yonke indawo eduze komfula uNayili ukuze bathole amanzi okunatha ngoba amanzi ayesemfuleni ayengasanatheki. 25 Kwadlula amalanga ayisikhombisa uJehova etshaye umfula uNayili.
8 UJehova wasesithi kuMosi: “Hamba kuFaro ufike uthi kuye, ‘UJehova uthi: “Vumela abantu bami bahambe ukuze bayengikhonza.+ 2 Nxa ulokhu ungafuni ukuthi bahambe, ngizaletha uhlupho lwamaxoxo+ kuzo zonke indawo elizweni lakho. 3 Kuzagcwala amaxoxo emfuleni uNayili futhi azaphuma angene endlini yakho, lasendlini yakho yokulala, lasembhedeni wakho, lasezindlini zezinceku zakho, lasebantwini bakho, laphakathi kwamaziko akho kanye lasemiganwini yakho yokuvubela ifulawa.+ 4 Amaxoxo azabuya kuwe lasebantwini bakho lakuzo zonke izinceku zakho.”’”
5 Ngemva kwesikhathi uJehova wathi kuMosi: “Tshela u-Aroni uthi, ‘Yelula isandla sakho ophethe ngaso intonga ukhombele imifula, lemisele yeNayili, lamaxhaphozi, wenze amaxoxo agcwale elizweni laseGibhithe.’” 6 Ngakho u-Aroni welulela isandla sakhe phezu kwamanzi aseGibhithe, amaxoxo aphuma agcwala elizweni lonke. 7 Kodwa abaphristi baseGibhithe abenza amasalamusi labo benza okufananayo ngamasalamusi abo ayimfihlo, benza kwaba lamaxoxo elizweni laseGibhithe.+ 8 UFaro wasebiza uMosi lo-Aroni wathi: “Ncengani uJehova asuse amaxoxo kimi lasebantwini bami,+ ngoba sengifuna ukuyekela abantu bahambe bayenikela imihlatshelo kuJehova.” 9 UMosi wathi kuFaro: “Ngikutshiyela kuwe ukuthi ungitshele ukuthi ngincenge nini ukuze amaxoxo asuswe kuwe lasezincekwini zakho, lasebantwini bakho lasezindlini zakho. Amaxoxo azasala emfuleni uNayili kuphela.” 10 UFaro waphendula wathi: “Kusasa.” Yena wathi kuye: “Kuzakwenzakala njengokutsho kwakho ukuze ukwazi ukuthi kakho omunye onjengoJehova uNkulunkulu+ wethu. 11 Amaxoxo azasuswa kuwe lasezindlini zakho, lasezincekwini zakho lasebantwini bakho. Azasala emfuleni uNayili+ kuphela.”
12 Ngakho uMosi lo-Aroni basuka kuFaro, uMosi wasencenga uJehova ngendaba yamaxoxo ayewalethe kuFaro.+ 13 UJehova wakwenza lokho uMosi ayekucelile njalo amaxoxo aqalisa ukufa ezindlini lasemagumeni lakuzo zonke izindawo. 14 Babewabuthelela esiba zinqumbi ezinengi njalo kwanuka phu elizweni. 15 UFaro wathi ebona uhlupho seluphelile womisa inhliziyo+ yakhe. Wala ukubalalela njengoba nje uJehova wayetshilo.
16 UJehova wasesithi kuMosi: “Tshela u-Aroni uthi, ‘Phakamisa intonga yakho utshaye uthuli olusemhlabathini, njalo luzakuba yiminyane kulo lonke ilizwe laseGibhithe.’” 17 Ngakho bakwenza lokho. U-Aroni welula isandla sakhe esasiphethe intonga watshaya uthuli olusemhlabathini, iminyane yagcwala ebantwini lasezinyamazaneni. Lonke uthuli olusemhlabathini lwaba yiminyane kulo lonke elaseGibhithe.+ 18 Abaphristi abenza amasalamusi labo bazama ukuthi balethe iminyane ngamasalamusi+ abo ayimfihlo kodwa behluleka. Iminyane yagcwala ebantwini lasezinyamazaneni. 19 Ngakho abaphristi abenza amasalamusi bathi kuFaro: “Lo ngumunwe kaNkulunkulu!”+ Kodwa inhliziyo kaFaro yaqhubeka isiba lukhuni, kazange abalalele njengoba uJehova wayetshilo.
20 UJehova wasesithi kuMosi: “Vuka ekuseni kakhulu ufike ume phambi kukaFaro nxa esesiza emfuleni. Kumele uthi kuye, ‘UJehova uthi: “Vumela abantu bami bahambe ukuze bayengikhonza. 21 Kodwa nxa ungafuni ukuvumela abantu bami bahambe ngizathumela izibawu* kuwe, lasezincekwini zakho lasebantwini bakho lasezindlini zakho. Izibawu zizagcwala ezindlini zamaGibhithe futhi zizasibekela umhlabathi abami* kuwo. 22 Ngalelolanga ngizakwehlukanisa indawo yaseGosheni lapho okuhlala khona abantu bami. Akusoze kube lezibawu kuleyondawo+ njalo lokhu kuzakwenza ukwazi ukuthi mina Jehova ngilapha elizweni.+ 23 Ngizakwehlukanisa abantu bami labantu bakho. Isibonakaliso lesi sizakwenzakala kusasa.”’”
24 Lakanye uJehova wakwenza ayekutshilo, izibawu zagcwala ngobunengi bazo endlini kaFaro lasezindlini zezinceku zakhe lakulo lonke ilizwe laseGibhithe.+ Ilizwe laba ngokunye ngenxa yezibawu+ lezo. 25 Ekucineni uFaro wabiza uMosi lo-Aroni wathi kubo: “Hambani liyenikela imihlatshelo kuNkulunkulu wenu khonapha elizweni.” 26 Kodwa uMosi wathi: “Akuvumi ukuthi senze njalo ngoba imihlatshelo esizayinikela kuJehova uNkulunkulu wethu iyenyanyeka kumaGibhithe.+ Nxa amaGibhithe angasibona sinikela umhlatshelo owenyanyekayo kuwo, ngeke asikhande ngamatshe yini? 27 Sizathatha uhambo lwamalanga amathathu siqonde enkangala siyenikela imihlatshelo yethu kuJehova uNkulunkulu wethu, njengoba nje etshilo.”+
28 UFaro wasesithi: “Ngizalivumela ukuthi lihambe liyenikela imihlatshelo kuJehova uNkulunkulu wenu enkangala. Kodwa akumelanga liye khatshana kakhulu. Ngincengelani-ke+ kuNkulunkulu.” 29 UMosi wathi: “Khathesi sengisuka kuwe njalo ngizamncenga uJehova; kusasa izibawu zizasuka kuFaro lasezincekwini zakhe kanye lasebantwini bakhe. Kodwa uFaro kayekele ukube elokhu edlala ngathi esala ukuthi abantu bahambe bayenikela imihlatshelo kuJehova.”+ 30 UMosi wasesuka kuFaro wayancenga uJehova.+ 31 Ngakho uJehova wenza okwakukhulunywe nguMosi, izibawu zasuka kuFaro lasezincekwini zakhe lasebantwini bakhe. Akula lesisodwa esasalayo. 32 Lanxa kunjalo, uFaro waphinda womisa inhliziyo yakhe njalo kavumanga ukuthi abantu bahambe.
9 Ngakho uJehova wathi kuMosi: “Hamba kuFaro ufike uthi kuye, ‘UJehova uNkulunkulu wamaHebheru uthi: “Vumela abantu bami bahambe ukuze bayengikhonza.+ 2 Kodwa nxa ungala ukuthi bahambe, ubulokhu ubagcinile, 3 isandla+ sikaJehova sizamelana lezifuyo zakho ezisemadlelweni. Isifo esesabekayo+ sizakwehlela amabhiza, labobabhemi, lamakamela, lenkomo kanye lezimvu. 4 Loba sekutheni uJehova uzakwenza kube lomahluko phakathi kwezifuyo zama-Israyeli lezifuyo zamaGibhithe. Akulalutho lwama-Israyeli oluzakufa.”’”+ 5 UJehova waphinda wabeka isikhathi wathi: “Kusasa uJehova uzakwenza lokhu elizweni.”
6 UJehova wakwenza lokho ngalo kanye ilanga elilandelayo futhi yonke imihlobo yezifuyo zamaGibhithe yaqala ukufa+ kodwa asikho lesisodwa isifuyo sama-Israyeli esafayo. 7 UFaro wathi ebuza wathola ukuthi asikho lesisodwa isifuyo sama-Israyeli esifileyo. Lanxa kunjalo, inhliziyo kaFaro yayilokhu ilukhuni futhi kazange avume ukuthi abantu bahambe.+
8 UJehova wasesithi kuMosi lo-Aroni: “Gcwalisani izandla zenu ngesinyayi esiphuma endaweni okutshiselwa kuyo* njalo uMosi kumele asiphosele emoyeni phambi kukaFaro. 9 Sizatshintsha sibe luthuli olucolekileyo kulo lonke ilizwe laseGibhithe. Uthuli lolo luzakuba ngamathumba aphihlikayo ebantwini lasezinyamazaneni kulo lonke ilizwe laseGibhithe.”
10 Ngakho bathatha isinyayi endaweni okutshiselwa kuyo* bayakuma phambi kukaFaro. UMosi wasesiphosela emoyeni njalo saba ngamathumba aphihlikayo ayephuma ebantwini lasezinyamazaneni. 11 Abaphristi abenza amasalamusi abazange benelise ukuma phambi kukaMosi ngenxa yamathumba ngoba labo ayebahlasele njalo ayephume lakubo bonke abantu baseGibhithe.+ 12 Kodwa uJehova wavumela ukuthi inhliziyo kaFaro ibelukhuni njalo uFaro kazange abalalele njengoba nje uJehova wayetshilo kuMosi.+
13 UJehova wasesithi kuMosi: “Vuka ekuseni kakhulu uyekuma phambi kukaFaro uthi kuye, ‘UJehova uNkulunkulu wamaHebheru uthi: “Vumela abantu bami bahambe ukuze bayengikhonza. 14 Khathesi zonke inhlupho zami sengiziqondisa kuwe, lasezincekwini zakho lasebantwini bakho ukuze ukwazi ukuthi kakho onjengami emhlabeni wonke.+ 15 Sikhuluma nje ngabe sengelule isandla sami ngakutshaya wena labantu bakho ngesifo esesabekayo, futhi ngabe awusekho lasemhlabeni. 16 Kodwa ngikuyekele uphila ukuze ngikutshengise amandla ami, ngenze lokuthi ibizo lami limenyezelwe emhlabeni wonke.+ 17 Ulokhu uzikhukhumeza yini umelana labantu bami, ungafuni ukubayekela bahambe? 18 Kusasa ngezikhathi lezi ngizakwenza ukuthi kune isiqhotho esikhulu kakhulu esingakaze sibe khona eGibhithe kusukela yaba khona kuze kube khathesi. 19 Yikho-ke thumela ilizwi lokuthi zonke izifuyo zakho ezisemadlelweni kanye lakho konke okungokwakho okuphandle kungeniswe endaweni ezivikelekileyo. Isiqhotho sizabulala zonke izifuyo ezizabe zisemadlelweni labantu bonke abazabe bengekho ezindlini.”’”
20 Bonke ababesesaba ilizwi likaJehova phakathi kwezinceku zikaFaro bahle baletha izinceku zabo kanye lezifuyo zabo endaweni evikelekileyo,* 21 kodwa abangalinakanga ilizwi likaJehova bayekela izinceku zabo lezifuyo zabo zisemadlelweni.
22 UJehova wasesithi kuMosi: “Yelulela isandla sakho emazulwini ukuze isiqhotho sehlele kulo lonke ilizwe laseGibhithe,+ ebantwini lasezinyamazaneni lakuzo zonke izinto ezimilayo egangeni elizweni lelo.”+ 23 Ngakho uMosi waphakamisela intonga yakhe emazulwini, uJehova wasethumela umdumo wezulu, lesiqhotho njalo umlilo* wehlela emhlabeni. UJehova waqhubeka esenza ukuthi kune isiqhotho elizweni laseGibhithe. 24 Kwaba lesiqhotho njalo kwakulavuka umlilo* phakathi kwesiqhotho. Isiqhotho leso sasisesabeka, sasingakaze sibe khona esinjalo selokhu ilizwe laseGibhithe laqala ukuhlalwa ngabantu.+ 25 Satshaya salobisa zonke izinto ezaziphandle kulo lonke elaseGibhithe, kusukela ebantwini kusiya ezinyamazaneni, njalo satshaya sabhuqa zonke izimila, saphundla zonke izihlahla egangeni.+ 26 Kodwa eGosheni lapho okwakuhlala khona ama-Israyeli yikho kuphela okungazange kube lesiqhotho.+
27 Ngakho uFaro wathi kubizwe uMosi lo-Aroni wasesithi kubo: “Khathesi ngonile sibili. UJehova ulungile, mina labantu bami yithi esiphambanisileyo. 28 Ncengani uJehova amise umdumo wezulu kanye lesiqhotho esivela kuNkulunkulu. Lapho-ke ngizalivumela lihambe futhi alisoze liqhubeke lilapha.” 29 UMosi wasesithi kuye: “Ngizathi ngiphuma nje edolobheni ngelulele izandla zami phambi kukaJehova. Umdumo wezulu uzakuma njalo lesiqhotho sizaphela ukuze ukwazi ukuthi umhlaba ngokaJehova.+ 30 Kodwa vele ngiyakwazi ukuthi lanxa sengikwenzile lokho, wena lezinceku zakho alisoze limesabe uJehova uNkulunkulu.”
31 Ngalesosikhathi isiqhotho sasitshaye sabhuqa ibhali kanye lezihlahlakazana zefilakisi* ngoba ibhali yayisikhahlele njalo lazo zaseziqala ukuba lamaluba. 32 Kodwa ingqoloyi kanye lesipelithi* akuzange kutshaywe yisiqhotho ngoba kwakuvuthwa muva. 33 Ngakho uMosi wasuka kuFaro edolobheni welulela izandla zakhe phambi kukaJehova, isiqhotho lomdumo wezulu kwasekusima lezulu lama ukuthululeka emhlabeni.+ 34 UFaro wathi ebona ukuthi izulu, lesiqhotho kanye lomdumo wezulu sekumile waphinda wona, womisa inhliziyo+ yakhe, yena kanye lezinceku zakhe. 35 Inhliziyo kaFaro yaqhubeka ilukhuni njalo kazange avume ukuthi abako-Israyeli bahambe njengoba nje uJehova wayetshilo kuMosi.+
10 UJehova wasesithi kuMosi: “Hamba kuFaro ngoba sengivumele ukuthi yena lezinceku zakhe bomise izinhliziyo+ zabo ukuze ngenze izibonakaliso zami phambi kwakhe,+ 2 lokuthi ulandisele amadodana akho labazukulu bakho inhlupho engazehlisela abaseGibhithe kanye lezibonakaliso engazenza kubo,+ njalo lizakwazi sibili ukuthi mina nginguJehova.”
3 Ngakho uMosi lo-Aroni baya kuFaro bathi kuye: “UJehova uNkulunkulu wamaHebheru uthi, ‘Kuzaze kube nini ungafuni ukuzehlisa kimi?+ Vumela abantu bami bahambe ukuze bayengikhonza. 4 Phela nxa ulokhu ungafuni ukuvumela abantu bami bahambe ngizaletha intethe elizweni lakho kusasa. 5 Zizasibekela umhlaba, umhlabathi usale ungasakhanyi. Zizakudla konke elisele lakho okutshiywe yisiqhotho, zidle lazo zonke izihlahla zenu ezikhulayo egangeni.+ 6 Zizagcwala ezindlini zakho, lakuzo zonke izindlu zezinceku zakho, lakuzo zonke izindlu zamaGibhithe njalo lokhu kuzabe kuyinto oyihlo kanye laboyihlomkhulu abangazange bake bayibone selokhu bahlala elizweni leli kuze kube lamuhla.’”+ Esetsho njalo watshibilika wasuka kuFaro.
7 Izinceku zikaFaro zasezisithi kuye: “Kambe kuzaze kube nini indoda le ilokhu isithwalise nzima?* Vumela abantu laba bahambe ukuze bayekhonza uJehova uNkulunkulu wabo. Awuboni yini ukuthi iGibhithe isitshabalele?” 8 Ngakho uMosi lo-Aroni baphendukiswa kuFaro wasesithi kubo: “Hambani liyekhonza uJehova uNkulunkulu wenu. Kodwa ngobani vele abahambayo?” 9 UMosi wasesithi: “Sizahamba labasakhulayo bethu labagugileyo, lamadodana lamadodakazi ethu, lezimvu lenkomo zethu+ ngoba sizakwenzela uJehova+ umkhosi.” 10 UFaro wathi kubo: “Nxa ngingaliyekela lihambe lonke labantwabenu, uJehova uyabe elani+ sibili! Kusegcekeni ukuthi kulento embi elifuna ukuyenza. 11 Hatshi, akuhambe amadoda kuphela ayekhonza uJehova ngoba yikho elakucelayo.” Ngakho baxotshwa phambi kukaFaro.
12 UJehova wasesithi kuMosi: “Yelulela isandla sakho kulo lonke elaseGibhithe ukuze intethe zibuye elizweni lelo futhi zidle zonke izimila eziselizweni, konke nje okwatshiywa yisiqhotho.” 13 UMosi wahle waphatha intonga yakhe welulela isandla sakhe kulo lonke elaseGibhithe, uJehova wasesenza ukuthi umoya wempumalanga uvunguze elizweni ilanga lonke lobusuku bonke. Kwathi kusisa, umoya wempumalanga waletha intethe. 14 Intethe lezo zagcwala ilizwe lonke laseGibhithe+ njalo zahlala kuyo yonke indawo elizweni lelo. Zazizinengi okwesabekayo,+ kwakungakaze kube lentethe ezinengi kangako njalo azisoze ziphinde zibe khona ezinengi kangako. 15 Zasibekela ilizwe lonke njalo kwaba mnyama tshu elizweni ngenxa yazo. Zatshaya zabhuqa zonke izimila elizweni kanye lazo zonke izithelo zezihlahla ezazitshiywe yisiqhotho. Akulalutho oluluhlaza olwasalayo ezihlahleni kumbe kuzo zonke izimila elizweni laseGibhithe.
16 Yikho uFaro wabiza uMosi lo-Aroni masinyane wathi kubo: “Ngonile kuJehova uNkulunkulu wenu lakini. 17 Ngicela lingixolele kanye nje kuphela ngenxa yesono engisenzileyo njalo lincenge uJehova uNkulunkulu wenu ukuthi alususe kimi uhlupho lolu olubhubhisayo.” 18 Ngakho wasuka* kuFaro wayancenga uJehova.+ 19 UJehova wasesenza ukuthi umoya utshintshe njalo waba ngumoya olamandla ovelela entshonalanga, wasuthwala intethe lezo wazisa eLwandle Olubomvu. Akula leyodwa intethe eyasalayo kulo lonke elaseGibhithe. 20 Lanxa kunjalo, uJehova wavumela ukuthi inhliziyo kaFaro ibe lukhuni+ futhi kazange avume ukuthi ama-Israyeli ahambe.
21 UJehova wasesithi kuMosi: “Yelulela isandla sakho emazulwini ukuze kube mnyama elizweni laseGibhithe, ubumnyama obujiye okokuthi bungabambeka ngezandla.” 22 UMosi wahle welulela isandla sakhe emazulwini njalo kwaba mnyama tshu okwamalanga amathathu+ kulo lonke ilizwe laseGibhithe. 23 Abantu baseGibhithe babengasabonani njalo kakho owasuka lapho ayekhona okwamalanga amathathu; kodwa ezindaweni ezazihlala ama-Israyeli kwakukhanya.+ 24 UFaro wasebiza uMosi wathi kuye: “Hambani liyekhonza uJehova.+ Labantwabenu lingahamba labo. Litshiye izimvu zenu lenkomo zenu kuphela.” 25 Kodwa uMosi wathi kuye: “Wena uzasinika* imihlatshelo kanye leminikelo yokutshiswa njalo sizayinikela kuJehova uNkulunkulu wethu.+ 26 Izifuyo zethu sizahamba lazo. Akula lesisodwa esizasala ngoba sizasebenzisa ezinye zakhona ukuze sikhonze uJehova uNkulunkulu wethu njalo asikwazi ukuthi kuyini esizakunikela kuJehova, sizabona nxa sesikhonale.” 27 Ngakho uJehova wavumela ukuthi inhliziyo kaFaro ibe lukhuni njalo uFaro kazange avume ukubayekela bahambe.+ 28 UFaro wathi: “Phuma uphele lapha! Woba leqiniso lokuthi awusoze uphinde ubuye uzongibona, ngoba mhla ungibona futhi, nguwe ufile.” 29 UMosi wasesithi: “Njengoba usitsho, angisoze ngiphinde ngibuye ngizokubona.”
11 UJehova wasesithi kuMosi: “Sekusele ukuthi ngehlisele uhlupho olulodwa kuFaro laphezu kweGibhithe. Ngemva kwalokho uzaliyekela lihambe,+ njalo uzathi eselivumele ukuthi lihambe lizaphuma eselixotsha+ sibili. 2 Ngakho tshela abantu ukuthi bonke abesilisa labesifazana kumele bacele izinto ezenziwe ngesiliva lezenziwe ngegolide+ kubomakhelwane babo.” 3 UJehova wenza ukuthi amaGibhithe abe lomusa ebantwini bako-Israyeli. Kanti njalo uMosi wayesehlonitshwa kakhulu yizinceku zikaFaro kanye labantu bonke elizweni laseGibhithe.
4 UMosi wasesithi: “UJehova uthe, ‘Ngizaphuma phakathi kwamabili ngiyengena eGibhithe,+ 5 njalo wonke amazibulo aselizweni laseGibhithe azakufa,+ kusukela ezibulweni likaFaro ohlezi esihlalweni sakhe sobukhosi kuze kuyefika ezibulweni lesigqilikazi esisebenza elitsheni lokuchola, kuphinde kufe wonke amazibulo ezifuyo.+ 6 Kuzakuba lesililo esikhulu kulo lonke ilizwe laseGibhithe, esingakaze sibe khona njalo esingasoze siphinde sibe khona.+ 7 Kodwa akula leyodwa inja ezakhonkotha abantu bako-Israyeli kumbe izifuyo zabo ukuze likwazi ukuthi uJehova uyenelisa ukwenza kube lomehluko phakathi kwamaGibhithe lama-Israyeli.’+ 8 Zonke izinceku zakho zizabuya kimi zizoguqa zikhothamise amakhanda azo zithi, ‘Suka uhambe labantu bonke abakulandelayo.’+ Ngemva kwalokho ngizahamba.” UMosi esetsho njalo wasuka kuFaro ezonde efile.
9 UJehova wasesithi kuMosi: “UFaro kasoze akulalele+ ukuze izimangaliso zami zande elizweni laseGibhithe.”+ 10 UMosi lo-Aroni benza zonke izimangaliso lezi phambi kukaFaro,+ kodwa uJehova wavumela ukuthi inhliziyo kaFaro ibe lukhuni. UFaro kazange avume ukuthi abako-Israyeli baphume elizweni lakhe.+
12 UJehova wasekhuluma loMosi lo-Aroni elizweni laseGibhithe wathi: 2 “Inyanga le izakuba yinyanga yokuqala ezinyangeni zenu. Izakuba ngeyokuqala ezinyangeni zomnyaka kini.+ 3 Khuluma labo bonke abantu bako-Israyeli uthi, ‘Mhlaka 10 ngayonale inyanga, imuli ngayinye kumele ithathe imvu+ kusiya ngezindlu zaboyise, indlu ngayinye ithathe imvu eyodwa. 4 Kodwa nxa abantu bendlu leyo bebalutshwana okokuthi ngeke bayiqede imvu kumele bayidle lomakhelwane wabo endlini yabo, babelane kusiya ngenani labantu. Kumele likhangele ukuthi umuntu ngamunye angadla inyama enganani. 5 Imvu yakhona kumele kube ngengelasici+ futhi kube ngenduna elomnyaka owodwa. Lingakhetha phakathi kwemvana ezinduna loba emazinyaneni embuzi. 6 Kumele liyigcine kuze kufike umhlaka 14 wenyanga+ le njalo ibandla lonke lako-Israyeli kumele liyihlabe sekuhwalala.*+ 7 Kumele bathathe elinye igazi balifafaze emaceleni womabili omgubazi kanye laphezulu emgubazini, eminyango yezindlu abazayidlela kuzo.+
8 “‘Kumele badle inyama yayo ngalobubusuku+ njalo kumele bayose emlilweni, bayidle lesinkwa esingelamvubelo+ kanye lemibhida ebabayo.+ 9 Lingayidli iluhlaza kumbe ixhwathisiwe kodwa liyose emlilweni kanye lenhloko yayo, lamangqina lezangaphakathi. 10 Akumelanga liyigcine kuze kube sekuseni, yonke esele kwaze kwaba sekuseni kumele liyitshise ngomlilo.+ 11 Kumele liyidle libophe amabhanti enu,* ligqoke amanyathela enu, liphethe lezintonga zenu ezandleni futhi kumele liyidle liphangisa ngoba liPhasika likaJehova. 12 Ngalobobusuku ngizadabula phakathi kwelizwe leGibhithe, ngibulale wonke amazibulo aselizweni laseGibhithe kusukela ebantwini kuze kuyefika enyamazaneni.+ Ngizakwahlulela bonke onkulunkulu baseGibhithe.+ Mina nginguJehova. 13 Igazi lelo lizakuba luphawu ezindlini elikuzo. Ngizathi ngibona igazi ngidlule izindlu zenu futhi uhlupho alusoze lufike kini luzolitshabalalisa nxa sengitshaya ilizwe laseGibhithe.+
14 “‘Ilanga leli lizakuba yisikhumbuzo kini, futhi kumele libe ngumkhosi kaJehova elizawunanza kuzo zonke izizukulwane zenu. Lo ngumlayo ozahlala ukhona. 15 Kumele lidle isinkwa esingelamvubelo+ okwamalanga ayisikhombisa. Ngelanga lokuqala kumele likhiphe imvubelo* ezindlini zenu ngoba loba ngubani odla ukudla okulemvubelo kusukela ngelanga lokuqala kuze kuyefika kwelesikhombisa, umuntu lowo kumele abulawe. 16 Ngelanga lokuqala lizakwenza umhlangano ongcwele, beselisenza omunye umhlangano ongcwele ngelanga lesikhombisa. Akulamsebenzi okumele wenziwe ngamalanga la.+ Umsebenzi ongenziwa ngowokulungisa lokho umuntu afuna ukukudla kuphela.
17 “‘Kumele ligcine uMkhosi Wesinkwa Esingelamvubelo+ ngoba ngalelilanga ngizakhipha amaxuku* enu elizweni laseGibhithe. Kanti njalo ilanga leli kumele liligcine kuzo zonke izizukulwane zenu, kube ngumlayo ozahlala ukhona. 18 Mhlaka 14 ngenyanga yokuqala, kumele lidle isinkwa esingelamvubelo kusihlwa kuze kufike umhlaka 21 kusihlwa+ ngenyanga leyo. 19 Akumelanga kutholakale imvubelo* ezindlini zenu okwamalanga ayisikhombisa, ngenxa yokuthi loba ngubani ozakudla ukudla okulemvubelo kumele abulawe+ kungelani lokuthi ngumuntu wesinye isizwe loba oyisizalwane selizwe.+ 20 Akumelanga lidle loba yini elemvubelo. Kuyo yonke imizi yenu kumele lidle isinkwa esingelamvubelo.’”
21 UMosi wahle wabiza bonke abadala bako-Israyeli+ wathi kubo: “Hambani liyekhethela izimuli zenu izifuyo ezincane* emhlambini, lihlabe umhlatshelo wePhasika. 22 Ngemva kwalokho kumele ligxamuze ilixha lehisophi* phakathi kwegazi elisemganwini beselilichela phezulu emigubazini kanye lasemaceleni womabili omgubazi. Akulamuntu okumele aphume emnyango wendlu yakhe kuze kube sekuseni. 23 UJehova uzadlula ukuze atshaye amaGibhithe ngohlupho. Kodwa uzathi ebona igazi elingaphezulu eminyango yenu lasemaceleni womabili emigubazi, uJehova uzawedlula umnyango lowo njalo kasoze avumele ukuthi uhlupho lokufa lungene ezindlini zenu.+
24 “Kumele liwunanze lumkhosi. Lo ngumlayo ozahlala ukhona kini lasemadodaneni+ enu. 25 Nxa selifikile elizweni uJehova azalinika lona njengokutsho kwakhe, kumele liwugcine umkhosi lo.+ 26 Kanti njalo nxa abantwabenu* bangalibuza bathi, ‘Liwenzelani+ umkhosi lo?’ 27 Kumele lithi, ‘Ngumhlatshelo wePhasika owenzelwa uJehova yena owadlula izindlu zama-Israyeli eGibhithe ngesikhathi esetshaya amaGibhithe ngohlupho, waziceza izindlu zethu.’”
Abantu basebeguqa bakhothamisa amakhanda phansi. 28 Ngakho abako-Israyeli basuka bayakwenza lokho uJehova ayekulaye uMosi lo-Aroni.+ Benza khona kanye ababekutsheliwe.
29 Kwathi phakathi kwamabili uJehova wabulala wonke amazibulo elizweni laseGibhithe,+ kusukela ezibulweni likaFaro owayehlezi esihlalweni sakhe sobukhosi kusiya ezibulweni lomuntu othunjiweyo owayesejele kanye lawo wonke amazibulo ezinyamazana.+ 30 Ngalobobusuku uFaro wavuka lazo zonke izinceku zakhe kanye labo bonke abantu baseGibhithe futhi kwaba lesililo esikhulu kwabaseGibhithe ngoba kwakufiwe+ kuzo zonke nje izindlu. 31 UFaro wahle wabiza uMosi lo-Aroni+ ebusuku wathi: “Sukani liphume phakathi kwabantu bami, lina labanye bonke abako-Israyeli. Hambani liyekhonza uJehova njengokutsho kwenu.+ 32 Lithathe lazo zonke izifuyo zenu lihambe njengoba litshilo.+ Kodwa lingibusise lami.”
33 AbaseGibhithe baqalisa ukuncenga abantu ukuthi baphume masinyane+ elizweni ngoba babesithi, “Phela lingayekela ukuhamba sifile+ sonke lapha.” 34 Ngakho abantu bathwala ifulawa yabo eyayisivutshiwe kodwa ingakafakwa imvubelo, bathatha lemiganu yabo yokuvubela ifulawa bayifaka ehlombe ithandelwe ngezigqoko zabo. 35 Abako-Israyeli bakwenza lokho uMosi ayebatshele khona, bacela izinto ezenziwe ngesiliva langegolide kanye lempahla+ kumaGibhithe. 36 UJehova wenza ukuthi amaGibhithe abe lomusa ebantwini, abapha lokho ababekucela; bayibutha sibili inotho yamaGibhithe.+
37 Abako-Israyeli basebesuka-ke eRamesesi+ besiya eSukhothi.+ Kwakulamadoda angaba ngu-600 000 kungabalwanga abantwana.+ 38 Babehamba lexuku labantu abatshiyeneyo*+ kanye lemihlambi yabo njalo izifuyo zabo zazizinengi kakhulu. 39 Baqalisa ukupheka izinkwa ezingelamvubelo eziyisigombolozi ngefulawa evutshiweyo ababesuke layo eGibhithe. Ifulawa leyo yayingelamvubelo ngoba babesuke ngesiphangiphangi eGibhithe, baswela lesikhathi sokulungisa umphako wabo.+
40 Abako-Israyeli bathi bephuma elizweni laseGibhithe+ basebehlale iminyaka engu-430+ bengabezizweni. 41 Yathi iphela iminyaka engu-430, ngalo kanye lelolanga, wonke amaxuku* kaJehova aphuma elizweni laseGibhithe. 42 Lobu yibo ubusuku abazananza ngabo ukukhululwa kwabo nguJehova elizweni laseGibhithe. Ngalobubusuku bonke abantu bako-Israyeli kumele bananze ilanga leli kuzo zonke izizukulwane+ zabo ukuze banike uJehova udumo.
43 UJehova wasesithi kuMosi lo-Aroni, “Nanku umlayo wePhasika: Akulamuntu wesinye isizwe okumele alidle.+ 44 Kodwa nxa umuntu elesigqili asithenga ngemali kumele asisoke.+ Lapho-ke sesingadla iPhasika. 45 Akumelanga lidliwe ngumuntu ovela kwelinye ilizwe loba umuntu oqhatshiweyo. 46 Imvana kumele idlelwe endlini eyodwa. Inyama yayo akumelanga ikhitshelwe phandle njalo akumelanga lephule amathambo+ ayo. 47 Bonke abako-Israyeli kumele balinanze iPhasika. 48 Nxa lihlezi lomuntu wesinye isizwe njalo efuna ukunanza iPhasika likaJehova, bonke abesilisa ahlala labo kumele basokwe. Ngemva kwalokho usengalinanza futhi abe njengesizalwane selizwe. Kodwa owesilisa ongasokwanga akumelanga alidle.+ 49 Kuzasebenza umthetho owodwa emuntwini oyisizalwane lasemuntwini wesinye isizwe elihlezi laye.”+
50 Ngakho bonke abako-Israyeli bakwenza lokho uJehova ayekulaye uMosi lo-Aroni. Benza khona kanye ababekutsheliwe. 51 Ngalo kanye lelilanga uJehova wakhupha abako-Israyeli kanye lamaxuku* abo elizweni laseGibhithe.
13 UJehova waphinda wakhuluma loMosi wathi: 2 “Ngingcwelisela* wonke amazibulo esilisa phakathi kwama-Israyeli. Wonke umfana olizibulo ozazalwa ngowami njalo yonke inyamazana enduna ezazalwa kuqala ngeyami.”+
3 UMosi wasesithi ebantwini: “Khumbulani ilanga leli elisuke ngalo ebugqilini elizweni laseGibhithe+ ngoba uJehova ulikhiphe lapha+ ngesandla esilamandla. Ngakho akulalutho olulemvubelo okumele ludliwe. 4 Lamuhla liyaphuma ngalelilanga ngenyanga ka-Abhibhi.*+ 5 Nxa uJehova eselingenisile elizweni lamaKhenani, lamaHithi, lama-Amori, lamaHivi kanye lamaJebusi,+ ilizwe afunga kubokhokho benu ukuthi uzalipha lona+ njalo eligeleza uchago loluju,+ kumele linanze umkhosi lo ngalinyanga. 6 Kufanele lidle isinkwa esingelamvubelo+ okwamalanga ayisikhombisa njalo ngelanga lesikhombisa kuzakuba lomkhosi kaJehova. 7 Isinkwa esingelamvubelo kumele sidliwe okwamalanga ayisikhombisa.+ Akulalutho olulemvubelo okumele lutholakale kini+ futhi akumelanga kutholakale imvubelo* kini kuzo zonke izindawo zenu. 8 Kumele utshele lendodana yakho ngalelolanga uthi, ‘Kungenxa yalokho engakwenzelwa nguJehova ngesikhathi ngiphuma eGibhithe.’+ 9 Lokhu kuzakuba njengophawu esandleni sakho lanjengesikhumbuzo ebunzini+ lakho, ukuze umthetho kaJehova ube semlonyeni wakho ngoba uJehova wakukhipha eGibhithe ngesandla esilamandla. 10 Kumele ugcine umlayo lo minyaka yonke+ ngesikhathi sawo esibekiweyo.
11 “Nxa uJehova esekungenisile elizweni lamaKhenani, lelo afunga ukuthi uzalinika wena labokhokho+ bakho, 12 kumele unikele kuJehova wonke amazibulo esilisa, kanye lazo zonke izifuyo ezinduna ezizalwa kuqala ozazithola. Konke lokhu ngokukaJehova.+ 13 Wonke ubabhemi ozalwa kuqala kumele umhlenge ngemvu, nxa ungamhlenganga kumele umephule intamo. Kumele uhlenge+ labo bonke abafana abangamazibulo amadodana akho.
14 “Nxa indodana yakho ingakubuza ithi, ‘Kutshoni lokhu?’ Kumele uthi kuyo, ‘UJehova wasikhipha ngesandla esilamandla eGibhithe, elizweni lobugqili.+ 15 UFaro waba yisiqholo wala ukusivumela ukuthi sihambe,+ uJehova wasebulala wonke amazibulo elizweni laseGibhithe, amazibulo abantu kanye lawezinyamazana.+ Yikho ngisenzela uJehova umhlatshelo ngazo zonke izifuyo ezinduna ezizelwe kuqala njalo ngihlenga lawo wonke amazibulo amadodana ami.’ 16 Lokhu kumele kube njengophawu esandleni sakho lanjengophawu* ebunzini+ lakho ngoba uJehova wasikhipha eGibhithe ngesandla esilamandla.”
17 UFaro wathi esevumile ukuthi abantu bahambe, uNkulunkulu kazange abakhokhele ngendlela edlula elizweni lamaFilisti lanxa yayiseduze, ngoba uNkulunkulu wathi: “Nxa abantu bangadibana lempi bangatshintsha ingqondo babuyele eGibhithe.” 18 Ngakho uNkulunkulu wenza ukuthi abako-Israyeli babhode ngendlela edabula enkangala yoLwandle Olubomvu,+ njalo baphuma eGibhithe behlelwe kuhle njengamabutho. 19 Kanti njalo uMosi wathatha amathambo kaJosefa wahamba lawo ngoba uJosefa wayefungise amadodana ka-Israyeli wathi: “UNkulunkulu uzalikhumbula sibili njalo kumele lisuke lamathambo ami lapha.”+ 20 Basuka eSukhothi bayakhempa e-Ethamu emngceleni wenkangala.
21 Emini uJehova wayehamba phambi kwabo ebakhokhela+ ngensika yeyezi njalo ebusuku wayebakhokhela ngensika yomlilo ukuze abakhanyisele benelise ukuhamba emini lebusuku.+ 22 Insika yeyezi yayingasuki phambi kwabantu emini, lensika yomlilo yayingasuki phambi kwabo ebusuku.+
14 UJehova wasesithi kuMosi: 2 “Tshela abako-Israyeli ukuthi babuyele emuva bayekhempa eduze kwePhihahirothi, phakathi laphakathi kweMigidoli lolwandle, bekhangele iBhali-zafoni.+ Kumele likhempe eduze kolwandle maqondana lendawo le. 3 Lapho-ke uFaro uzakhuluma ngabako-Israyeli athi: ‘Sebezulazula elizweni, abasakwazi ukuthi benzeni. Sebeswele ukuthi baphume njani enkangala.’ 4 Ngizavumela ukuthi inhliziyo kaFaro ibe lukhuni,+ uzabahlala izithende njalo ngizazikhazimulisa ngalokho engizakwenza kuFaro lakulo lonke ibutho lakhe.+ AmaGibhithe azakwazi sibili ukuthi nginguJehova.”+ Lakanye abako-Israyeli bakwenza ababekutsheliwe.
5 Ngemva kwesikhathi inkosi yaseGibhithe yabikelwa ukuthi abantu basebebalekile. UFaro lezinceku zakhe bahle batshintsha ingqondo+ bathi: “Sikwenzeleni lokhu? Sizikhululeleni izigqili zethu zako-Israyeli ebezisisebenzela?” 6 Ngakho wahle walungisa izinqola zakhe zempi wabalandela lamasotsha akhe.+ 7 Wathatha izinqola ezingu-600 ezithenjiweyo kanye lazo zonke izinqola zaseGibhithe, inqola ngayinye yayilamabutho. 8 Yikho-ke uJehova wavumela ukuthi inhliziyo kaFaro inkosi yaseGibhithe ibe lukhuni njalo wabahlala izithende abako-Israyeli, kodwa bona babezihambela nje bechelesile.+ 9 AmaGibhithe abaxotshanisa+ abako-Israyeli njalo kwasekuseduze ukuthi abafice ngesikhathi bekhempile ngaselwandle eduze kwePhihahirothi, maqondana leBhali-zefoni. Kwakuyizo zonke inqola zikaFaro ezidonswa ngamabhiza labagadi bakhe bamabhiza lawo wonke amabutho akhe.
10 UFaro wathi esesondele, abako-Israyeli baphakamisa amehlo babona nanka amaGibhithe ayabalandela. Abako-Israyeli batshaywa luvalo baqalisa ukukhala kuJehova.+ 11 Bathi kuMosi: “Kambe bekungelamangcwaba yini eGibhithe uze usilethe lapha ukuthi sizofela enkangala?+ Kuyini lokhu osenze khona? Vele usikhipheleni elizweni laseGibhithe? 12 Ayisikho yini esakutshela khona siseGibhithe? Asitshongo yini ukuthi usiyekele sisebenzele amaGibhithe? Phela kungcono ukuthi sisebenzele amaGibhithe kulokuthi sifele enkangala.”+ 13 UMosi wasetshela abantu wathi: “Lingesabi.+ Manini liqine libone ukuthi uJehova uzalisindisa njani lamuhla.+ AmaGibhithe la eliwabonayo lamuhla alisoze liphinde liwabone futhi.+ 14 UJehova yena ngokwakhe uzalilwela+ njalo lina lizabe lizithulele zwi.”
15 UJehova wasesithi kuMosi: “Kungani ulokhu ukhala kimi? Tshela abako-Israyeli ukuthi baqhubeke ngohambo lwabo. 16 Kodwa wena phakamisela intonga yakho phezu kolwandle ulwehlukanise ukuze abako-Israyeli badabule phakathi kwalo emhlabathini owomileyo. 17 Sengivumela ukuthi izinhliziyo zamaGibhithe zibe lukhuni ukuze abaxotshanise abako-Israyeli. Ngizazikhazimulisa ngalokho engizakwenza kuFaro lawo wonke amabutho akhe lezinqola zakhe zempi kanye labagadi bakhe bamabhiza.+ 18 AmaGibhithe azakwazi sibili ukuthi nginguJehova nxa sengizikhazimulisa ngalokho engizakwenza kuFaro lezinqola zakhe zempi kanye labagadi bakhe bamabhiza.”+
19 Ngemva kwalokho ingilosi kaNkulunkulu+ weqiniso eyayihamba phambi kwabantu bako-Israyeli yasuka yaya ngemuva kwabo, lensika yeyezi eyayiphambi kwabo yasuka yayakuma ngemuva kwabo.+ 20 Yama phakathi laphakathi kwamaGibhithe lama-Israyeli.+ Kwelinye icele yayiliyezi elimnyama kwelinye icele yayikhanyisa ebusuku.+ Ngakho alikho iqembu elasondela eduze kwelinye ubusuku bonke.
21 UMosi waseselulela isandla sakhe phezu kolwandle.+ Ubusuku bonke uJehova wafuqela ulwandle emuva ngomoya wasempumalanga olamandla, wenza ukuthi ngaphansi kolwandle kutshintshe kube ngumhlabathi owomileyo+ njalo amanzi ehlukana phakathi.+ 22 Ngakho abako-Israyeli badabula phakathi kolwandle emhlabathini owomileyo.+ Amanzi ayemi aba ngumduli esandleni sabo sokudla lakwesenxele.+ 23 AmaGibhithe abahlala izithende, wonke amabhiza kaFaro lezinqola zakhe zempi labagadi bakhe bamabhiza bazithela elwandle+ bebalandela. 24 Kwathi ngomlindo wekuseni,* uJehova wakhangela abaseGibhithe ephakathi kwensika yomlilo leyezi+ njalo walidunga ibutho laseGibhithe. 25 Wayelokhu ekhipha amaviri ezinqola zabo futhi abatshayeli bazo basebethwele nzima. AmaGibhithe asesithi: “Asibalekeni sitshiyane labako-Israyeli ngoba uJehova uyabalwela ukuze bangahlaselwa ngamaGibhithe.”+
26 UJehova wasesithi kuMosi: “Yelulela isandla sakho phezu kolwandle ukuze amanzi ambokothe amaGibhithe lezinqola zawo zempi kanye labagadi bawo bamabhiza.” 27 UMosi wahle welulela isandla sakhe phezu kolwandle, amanzi olwandle abuyela endaweni yawo. AmaGibhithe athi ezama ukubaleka uJehova wawathintithela phakathi kolwandle.+ 28 Amanzi asebuyela emuva agubuzela izinqola zempi labagadi bamabhiza lawo wonke amabutho kaFaro ayengene elwandle elandela ama-Israyeli.+ Kakho loyedwa owasilayo+ phakathi kwabo.
29 Kodwa abako-Israyeli bahamba emhlabathini owomileyo+ phakathi kolwandle njalo amanzi ayemi aba ngumduli esandleni sabo sokudla lakwesenxele.+ 30 Ngalelolanga uJehova wasindisa abako-Israyeli esandleni samaGibhithe+ njalo babona amaGibhithe esethe daca ekhunjini lolwandle eseyizidumbu. 31 Abako-Israyeli babona lokuthi uJehova ulamandla amakhulu ngesikhathi etshabalalisa amaGibhithe. Ngakho baqala ukumesaba uJehova lokuba lokholo kuJehova kanye lasencekwini yakhe uMosi.+
15 Ngalesosikhathi uMosi lama-Israyeli bahlabelela uJehova+ ingoma le:
“Ngizahlabelela uJehova ngoba usethole udumo+ olumangalisayo.
Usephosele ibhiza lomgadi walo elwandle.+
2 UJah* ungamandla ami lomvikeli wami ngoba usebe yinsindiso yami.+
UnguNkulunkulu wami njalo ngizamdumisa;+ unguNkulunkulu+ kababa futhi ngizamphakamisa.+
3 UJehova uliqhawe elilamandla.+ UJehova yilo ibizo lakhe.+
4 Usephosele inqola zikaFaro lebutho lakhe elwandle,+
Lamaqhawe akhe athenjiweyo asegalule eLwandle Olubomvu.+
5 Amanzi agubhazelayo abambokothile; bacwila phansi enzikini njengelitshe.+
6 Jehova, isandla sakho sokudla silamandla amakhulu;+
Jehova, isandla sakho sokudla siyenelisa ukuphahlaza isitha.
7 Ngobukhulu bakho obumangalisayo uyabaphosela phansi labo abamisana lawe;+
Uthumela ulaka lwakho oluvuthayo lubatshise balobe njengamahlanga.
8 Ngomoya ophuma emakhaleni akho wenze amanzi abuthana;
Ama athi mpo, abamba izikhukhula.
Amanzi agubhazelayo ajiya phakathi laphakathi kolwandle.*
9 Isitha sathi: ‘Ngizabaxotshanisa ngize ngibafice.
Ngehlukanise impahla yabo ngize ngisuthiseke.
Ngizahwatsha inkemba yami njalo isandla sami sizabanqoba.’+
10 Uvuthele umoya wakho, ulwandle lwabasibekela;+
Bacwila njengensimbi esindayo emanzini amanengi.
11 Awu Jehova,+ ngubani onjengawe phakathi kwabonkulunkulu?
Kambe ngubani onjengawe, otshengisa ukuthi ulobungcwele+ obumangalisayo?
Okumele esatshwe njalo adunyiswe ngezingoma, yena owenza izimanga.+
12 Welule isandla sakho sokudla, umhlaba wabaginya.+
13 Ukhokhele abantu obahlengileyo+ ngothando lwakho oluqotho;
Ngamandla akho uzabakhokhela ubase endaweni yakho yokuhlala engcwele.
15 Ngalesosikhathi izinduna zako-Edomi zizabanjwa ngumhedehede,
Ababusi bakoMowabi+ abalamandla bazaqhuqha.
Zonke izakhamizi zaseKhenani zizaphela amandla.+
16 Bazafikelwa yikwesaba, batshaywe luvalo.+
Abasoze banyikinyeke njengelitshe ngenxa yobukhulu bengalo yakho,
Abantu bakho baze badlule phambi kwabo, awu Jehova,
17 Uzabaletha ubahlanyele entabeni yelifa+ lakho,
Indawo emisiweyo ozilungisele yona ukuze uhlale kuyo Jehova,
Indawo engcwele emiswe yizandla zakho Jehova.
18 UJehova uzakuba yiNkosi kuze kube nini lanini.+
19 Amabhiza kaFaro lezinqola zakhe zempi kanye labagadi bamabhiza bangene elwandle,+
UJehova wasebuyisela amanzi olwandle phezu kwabo,+
Kodwa abako-Israyeli bahambe emhlabathini owomileyo phakathi laphakathi kolwandle.”+
20 UMiriyamu umphrofethikazi udadewabo ka-Aroni wasethatha ithamborini njalo abesifazana bonke bamlandela bethwele amathamborini begida. 21 UMiriyamu wavuma ingoma eyayihlatshelwa ngamadoda wahlabela wathi:
“Hlabelelani uJehova ngoba usethole udumo+ olumangalisayo.
Usephosele ibhiza lomgadi walo elwandle.”+
22 Ngemva kwesikhathi uMosi wakhokhela abako-Israyeli basuka eLwandle Olubomvu baya enkangala yaseShuri. Bahamba enkangala le okwamalanga amathathu kodwa abazange bathole amanzi. 23 Bafika eMara*+ kodwa behluleka ukunatha amanzi akuleyondawo ngoba ayebaba. Yikho yabizwa ngokuthi yiMara. 24 Abantu baqalisa ukukhonona kuMosi+ besithi: “Pho sizanathani?” 25 UMosi wakhala kuJehova,+ uJehova wasemtshengisa isihlahla, wathi esiphosela emanzini atshintsha aba mnandi.
UNkulunkulu wabanika umthetho kuleyondawo, wabatshela lalokho okwakuzabenza bahlulelwe njalo wabalinga+ ukuze abone ukuthi babezamlalela yini. 26 Wathi kubo: “Nxa lingalalelisisa ilizwi likaJehova uNkulunkulu wenu, lenze okulungileyo emehlweni akhe, lilalele lemithetho yakhe futhi ligcine yonke imilayo+ yakhe, angisoze ngililethele ngitsho lowodwa umkhuhlane engawulethela abaseGibhithe+ ngoba mina Jehova ngiyalisilisa.”+
27 Ngemva kwalokho bafika e-Elimi lapho okwakulemithombo yamanzi engu-12 lezihlahla zelala ezingu-70. Ngakho bakhempa khonapho eduze kwamanzi.
16 Abako-Israyeli bathi sebesukile e-Elimi, bafika enkangala yeSini+ ephakathi laphakathi kwe-Elimi leSinayi. Kwakumhlaka 15 ngenyanga yesibili ngemva kokusuka kwabo elizweni leGibhithe.
2 Bonke abako-Israyeli basebeqalisa ukukhonona kuMosi lo-Aroni enkangala.+ 3 Babelokhu besithi kubo: “Ngabe uJehova wasibulala elizweni laseGibhithe, lapho esasisidla khona inyama*+ lesinkwa size sisuthe. Khathesi lisilethe enkangala le ukuze libulalise ibandla lonke ngendlala.”+
4 UJehova wasesithi kuMosi: “Ngizakwenza ukuthi kune isinkwa esivela ezulwini+ njalo umuntu ngamunye kumele aphume ayebutha azasidla mhlalokho.+ Ngizakwenza lokhu ukuze ngibalinge ngibone ukuthi bazawulandela yini umthetho wami.+ 5 Kodwa ngelanga lesithupha,+ nxa sebelungisa abakubuthileyo kumele kube ngokuphindwe kabili nxa kuqathaniswa lalokho abakubutha ngezinye insuku.”+
6 Ngakho uMosi lo-Aroni batshela bonke abako-Israyeli bathi: “Ntambama lizakwazi mhlophe ukuthi nguJehova owalikhipha elizweni laseGibhithe.+ 7 Ekuseni lizayibona inkazimulo kaJehova ngoba uJehova usekuzwile ukukhonona kwenu kuye. Kambe thina singobani ukuthi likhonone kithi?” 8 UMosi waqhubeka wathi: “Nxa uJehova eselinika inyama yokudla ntambama kanye lesinkwa sokuthi lidle ekuseni lize lisuthe, lizabona ukuthi uJehova ulizwile likhonona kuye. Thina singobani kambe? Alikhononi kithi kodwa likhonona kuJehova+ ngokwakhe.”
9 UMosi wasesithi ku-Aroni: “Tshela bonke abako-Israyeli uthi, ‘Wozani phambi kukaJehova ngoba usekuzwile ukukhonona+ kwenu.’” 10 U-Aroni wathi eqeda nje ukukhuluma labo bonke abako-Israyeli, batshibilika bakhangela enkangala njalo inkazimulo kaJehova yabonakala eyezini.+
11 UJehova waphinda wakhuluma loMosi wathi: 12 “Sengikuzwile ukukhonona kwabantu bako-Israyeli.+ Wothi kubo, ‘Kuzathi sekuhwalala* lidle inyama, ekuseni lidle isinkwa+ lisuthe. Lizakwazi sibili ukuthi nginguJehova uNkulunkulu wenu.’”+
13 Ngaleyontambama kwabuya izagwaca zagcwala ezihonqweni+ njalo ekuseni kwavuka kulamazolo kuyo yonke indawo ababekuyo. 14 Kwathi amazolo esenyamalele, kwaba khona okuyizicecedwana okusangqwaqwane enkangala+ futhi kwakugcwele phansi yonke indawo. 15 Ama-Israyeli athi ekubona aqalisa ukubuzana esithi, “Kuyini lokhu?” ngoba ayengakwazi ukuthi kwakuyini. UMosi wathi kuwo: “Yisinkwa uJehova alinike sona ukuze lidle.+ 16 UJehova uthe, ‘Ngamunye kumele abuthe lokho enelisa ukukudla. Umuntu ngamunye kumele abuthe isilinganiso se-omeri*+ njalo kumele abuthe okuhambelana lenani labantu alabo etendeni lakhe.’” 17 Abako-Israyeli baqalisa ukwenza njengokutshelwa kwabo; babutha izicecedwana lezo njalo abanye babebutha okunengi, abanye bebutha okulutshwana. 18 Bathi sebezilinganisa nge-omeri, lowo owayebuthe okunengi kazange abe lokusalayo njalo owayebuthe okuncane kazange asilele.+ Ngamunye wabutha lokho ayesenelisa ukukudla.
19 UMosi wasesithi kubo: “Kakho okumele adle abesegcina okunye kuze kube sekuseni.”+ 20 Kodwa abazange bamlalele uMosi. Abanye batshiya okunye kwaze kwaba sekuseni, kwasekuqalisa ukuba lempethu kwanuka phu. UMosi wabazondela kakhulu. 21 Nsuku zonke ekuseni babebutha imana, umuntu ngamunye ebutha lokho ayesenelisa ukukudla. Kwakusithi nxa ilanga lingatshisa kuncibilike.
22 Ngelanga lesithupha babutha okuphindwe kabili,+ umuntu ngamunye ebutha izilinganiso ze-omeri ezimbili. Ngakho bonke abakhokheli babantu bahamba bayabikela uMosi indaba le. 23 Yena wasesithi kubo: “Yikho vele uJehova akukhulumileyo. Kusasa kuzaba lilanga lokuphumula,* isabatha elingcwele kuJehova.+ Phekani elifuna ukukupheka, lixhwathise elifuna ukukuxhwathisa,+ beselibeka eceleni konke okuseleyo likugcine kuze kube sekuseni.” 24 Ngakho bakugcina kwaze kwaba sekuseni njengokutsho kukaMosi njalo akuzange kunuke futhi akuzange kube lempethu. 25 UMosi wasesithi: “Kudleni lamuhla ngoba lamuhla lisabatha likaJehova. Alisoze lithole lutho emhlabathini lamuhla. 26 Lizabutha okwensuku eziyisithupha kodwa ngeSabatha,+ ngelanga lesikhombisa akusoze kube lolutho.” 27 Lanxa kunjalo, abanye bahamba besiyabutha ngelanga lesikhombisa kodwa abatholanga lutho.
28 UJehova wasesithi kuMosi: “Kuzaze kube nini lilokhu lisala ukugcina imilayo yami lemithetho+ yami? 29 Lingakhohlwa ukuthi uJehova ulinike iSabatha.+ Yikho elinika isinkwa samalanga amabili ngelanga lesithupha. Wonke umuntu kumele ahlale lapho akhona. Akulamuntu okumele asuke endaweni yakhe ngelanga lesikhombisa.” 30 Ngakho abantu bananza iSabatha*+ ngelanga lesikhombisa.
31 Abantu bako-Israyeli babiza isinkwa leso ngokuthi “yimana.”* Sasimhlophe njengentanga zekhoriyanda futhi nxa wawusidla sasingathi ngamakhekhe ayisipatalala aloluju.+ 32 UMosi wasesithi: “Nanku uJehova athe kwenziwe, ‘Gcwalisani imana ibe yisilinganiso se-omeri esisodwa, liyigcine ukuze zonke izizukulwane+ zenu zibone isinkwa engalinika sona ukuthi lisidle enkangala ngesikhathi ngilikhipha elizweni laseGibhithe.’” 33 Ngakho uMosi wathi ku-Aroni: “Thatha imbiza ufake kuyo imana eyisilinganiso se-omeri esisodwa uyibeke phambi kukaJehova ukuze igcinwe kuzo zonke izizukulwane+ zenu.” 34 U-Aroni wayithatha-ke wayibeka phambi kwebhokisi loBufakazi+ ukuze ilondolozwe njengoba nje uJehova wayetshilo kuMosi. 35 Abako-Israyeli badla imana okweminyaka engu-40+ baze bafika endaweni eyayihlala abantu.+ Badla imana baze bafika emngceleni welizwe laseKhenani.+ 36 I-efa eyodwa ilingana lama-omeri alitshumi.*
17 Bonke abantu bako-Israyeli basuka enkangala yeSini+ njalo babehamba besima ezindaweni ezitshiyeneyo belandela lokho ababekutshelwa nguJehova.+ Bafika bakhempa eRefidimu+ kodwa kwakungelamanzi okunatha.
2 Ngakho abantu baqalisa ukuxabana loMosi+ besithi: “Sinike amanzi okunatha.” Kodwa uMosi wathi kubo: “Kungani lixabana lami? Kungani lilokhu lilinga+ uJehova?” 3 Kodwa abantu basebewome kakhulu kuleyondawo njalo baqhubeka bekhonona kuMosi+ besithi: “Usikhipheleni eGibhithe uzosibulalisa ngokoma thina lamadodana ethu lezifuyo zethu?” 4 UMosi wasekhala kuJehova wathi: “Ngithini ngabantu laba? Sekusele kancane ukuthi bangikhande ngamatshe.”
5 UJehova wasesithi kuMosi: “Thatha abanye abadala bako-Israyeli uhambe labo phambi kwabantu. Uthathe lentonga yakho owatshaya ngayo umfula uNayili,+ uyiphathe ngesandla uhambe. 6 Ngizabe ngimi phambi kwakho edwaleni eliseHorebhi. Kumele utshaye idwala liphume amanzi, abantu besebenatha.”+ UMosi wakwenza lokhu abadala bako-Israyeli bekhangele. 7 Ngakho wabiza indawo le ngokuthi yiMasa*+ kanye leMeribha*+ ngoba abako-Israyeli babexabane laye njalo balinga+ uJehova besithi: “UJehova uphakathi kwethu yini kumbe hatshi?”
8 Ngemva kwalokho ama-Amaleki+ abuya azokulwa labako-Israyeli eRefidimu.+ 9 UMosi wasesithi kuJoshuwa:+ “Sikhethele amadoda beseliphuma liyekulwa lama-Amaleki. Kusasa ngizakuma phezu koqaqa ngiphethe intonga kaNkulunkulu weqiniso ngesandla sami.” 10 UJoshuwa wahamba wayakulwa lama-Amaleki njengokutsho kukaMosi.+ UMosi lo-Aroni loHuri+ bona baqansa baya phezu koqaqa.
11 Kwakusithi nxa uMosi ephakamise izandla zakhe abako-Israyeli bawakhulele ama-Amaleki, kodwa angazehlisa nje ama-Amaleki ayebakhulela. 12 Izandla zikaMosi zathi sezidiniwe bathatha ilitshe balibeka ngaphansi kwakhe wasehlala kulo. U-Aroni wama kwelinye icele, uHuri laye wama kwelinye icele bajeka izandla zakhe, azizange zinyikinyeke ilanga laze latshona. 13 Ngakho uJoshuwa wawanqoba ama-Amaleki ngenkemba.+
14 UJehova wasesithi kuMosi: “Bhala lokhu ebhukwini kube yisikhumbuzo uphinde ukutshele uJoshuwa uthi, ‘Ngizawaqeda wonke ama-Amaleki njalo awasoze aphinde akhunjulwe ngaphansi kwamazulu.’”+ 15 UMosi wasesakha i-alithare walibiza ngokuthi Jehova-nisi,* 16 esithi: “Ngoba isandla sama-Amaleki simelane lesihlalo sobukhosi sikaJah.*+ UJehova uzakulwa lama-Amaleki kuzo zonke izizukulwane+ zawo.”
18 UJethro umphristi waseMidiyani uyisezala+ kaMosi wezwa konke uNkulunkulu ayekwenzele uMosi kanye labantu bakhe ama-Israyeli, lendlela uJehova ayebakhiphe ngayo eGibhithe.+ 2 UJethro uyisezala kaMosi wemukela uZiphora umkaMosi wahlala laye ngesikhathi ebuyiselwe kuye 3 kanye lamadodana akhe amabili.+ Enye indodana kaMosi yayibizwa ngokuthi nguGeshomu*+ ngoba uMosi wathi, “Sengibe ngowezizweni elizweni elingayisilo lakithi.” 4 Enye yayibizwa ngokuthi ngu-Eliyezeri* ngoba wathi, “UNkulunkulu kababa ungumsizi wami futhi ungikhulule enkembeni+ kaFaro.”
5 Ngakho uJethro uyisezala kaMosi wabuya lomkaMosi kanye lamadodana akhe bafika kuMosi enkangala lapho ayemise khona itende entabeni kaNkulunkulu weqiniso.+ 6 Wasethumela ilizwi kuMosi wathi: “Mina yihlozala uJethro,+ ngiza kuwe lomkakho lamadodana akho amabili.” 7 UMosi wahle waphuma wayahlangabeza uyisezala, wafika wakhothama wamqabuza, babuzana impilo basebengena etendeni.
8 UMosi walandisela uyisezala konke uJehova ayekwenze kuFaro laseGibhithe elwela abako-Israyeli.+ Wamlandisela labo bonke ubunzima abahlangana labo endleleni+ kanye lendlela uJehova ayebakhulule ngayo. 9 UJethro wathokoza esizwa zonke izinto ezinhle uJehova ayezenzele abako-Israyeli ngesikhathi ebakhulula eGibhithe.* 10 UJethro wasesithi: “Kadunyiswe uJehova olikhulule eGibhithe lakuFaro, okhulule abantu emandleni amaGibhithe. 11 Khathesi sengikwazi ukuthi uJehova mkhulu kakhulu ukwedlula abanye onkulunkulu,+ ngenxa yalokho akwenze kulabo akade beziphakamisa bemelana labantu bakhe.” 12 Ngemva kwalokho uJethro uyisezala kaMosi waletha umnikelo wokutshiswa kanye lemihlatshelo kuNkulunkulu. U-Aroni labo bonke abadala bako-Israyeli babuya bazokudla loyisezala kaMosi phambi kukaNkulunkulu weqiniso.
13 Ngelanga elilandelayo uMosi wahlala phansi njengenjayelo ukuze ahlulele abantu njalo baqhubeka bemi phambi kwakhe kusukela ekuseni kwaze kwahlwa. 14 Uyisezala wathi ebona konke uMosi ayekwenzela abantu wathi: “Kanti ukwenzelani lokhu? Kungani uhlala lapha wedwa uhanqwe ngabantu bonke laba abami phambi kwakho kusukela ekuseni kuze kuhlwe?” 15 UMosi waphendula uyisezala wathi: “Kungenxa yokuthi abantu baqhubeka bengilanda bezobuza kuNkulunkulu. 16 Nxa kungavuka indaba ilethwa kimi njalo kuyabe kumele ngahlulele phakathi kwabantu ababili besengibazisa izinqumo zikaNkulunkulu weqiniso kanye lemithetho+ yakhe.”
17 Uyisezala wasesithi kuye: “Akukuhle lokhu okwenzayo. 18 Wena labantu laba olabo lizadinwa sibili ngoba umthwalo lo mkhulu kakhulu kuwe, ngeke uwuthwale uwedwa. 19 Lalela-ke, ngikucebise njalo uNkulunkulu uzakuba lawe.+ Wena woba ngummeli wabantu phambi kukaNkulunkulu+ weqiniso futhi kumele uyekwethula amacala lawo phambi kukaNkulunkulu+ weqiniso. 20 Kumele ubaxwayise ubatshele imilayo lemithetho+ njalo ubatshele lendlela okumele bahambe ngayo kanye lomsebenzi okumele bawenze. 21 Kodwa kumele ukhethe amadoda ahlakaniphileyo+ phakathi kwabantu, amadoda amesabayo uNkulunkulu futhi athembekileyo, azonda inzuzo yobuqili.+ Wabeke ukuthi abe zinduna zabantu abayinkulungwane, lezinduna zabantu abalikhulu, lezinduna zabantu abangamatshumi amahlanu kanye lezinduna zabantu abalitshumi.+ 22 Kumele ahlulele abantu nxa kungavuka izindaba. Amadoda la azaletha kuwe+ zonke izindaba ezinzima kodwa zonke izindaba ezincane yiwo azazahlulela. Zenzele izinto zibe lula, uvume ukuthi akuthwalise+ umthwalo. 23 Nxa ungakwenza lokhu njalo kwenzakale njengokulaya kukaNkulunkulu, uzakwenelisa ukuwuthwala umthwalo lo futhi wonke umuntu uzabuyela emzini wakhe esuthisekile.”
24 UMosi wamlalela uyisezala, wahle wenza konke ayemtshele khona. 25 UMosi wakhetha amadoda ahlakaniphileyo kubo bonke abako-Israyeli wawabeka ukuthi akhangele abantu, abe zinduna zabantu abayinkulungwane, lezinduna zabantu abalikhulu, lezinduna zabantu abangamatshumi amahlanu kanye lezinduna zabantu abalitshumi. 26 Ngakho ayesahlulela abantu nxa kungavuka izindaba. Indaba enzima ayeyihambisa kuMosi+ kodwa zonke indaba ezincane yiwo ayezahlulela. 27 Ngemva kwalokho uMosi wavalelisa+ uyisezala, uyisezala wasengena indlela wabuyela elizweni lakibo.
19 Ngenyanga yesithathu abako-Israyeli bephume elizweni leGibhithe, ngalo kanye lelolanga,* bafika enkangala yeSinayi. 2 Basuka eRefidimu+ bafika enkangala yeSinayi, basebemisa ametende khonapho enkangala. Abako-Israyeli bamisa amatende abo phambi kwentaba.+
3 UMosi waseqansa waya kuNkulunkulu weqiniso, uJehova wambiza esentabeni+ wathi: “Nanku okumele ukutsho kwabendlu kaJakhobe, okumele ukutshele abako-Israyeli, 4 ‘Lizibonele ngawenu lokho engikwenze kumaGibhithe+ ukuze ngiliphakamise ngamaphiko ezinkozi ngililethe kimi.+ 5 Nxa lingalalela ilizwi lami kukho konke, ligcine lesivumelwano sami, lizakuba yimpahla yami eqakathekileyo* phakathi kwabo bonke abantu,+ ngoba umhlaba wonke ngowami.+ 6 Lizakuba ngumbuso wabaphristi kimi, libe yisizwe esingcwele.’+ La yiwo amazwi okumele uwatshele abako-Israyeli.”
7 Ngakho uMosi wahamba wayabiza abadala babantu wabatshela wonke amazwi uJehova ayemtshele wona.+ 8 Ngemva kwalokho bonke abantu baphendula kanye kanye bathi: “Konke uJehova akukhulumileyo sizimisele ukukwenza.”+ UMosi wahle wahambisa impendulo yabantu kuJehova. 9 UJehova wasesithi kuMosi: “Ngiza kuwe ngiseyezini elimnyama ukuze abantu bazwe nxa sengikhuluma lawe lokuthi bahlale bekukholwa.” UMosi wasebikela uJehova lokho abantu ababekutshilo.
10 UJehova wasesithi kuMosi: “Hamba ebantwini ufike ubangcwelise lamuhla lakusasa futhi kumele bawatshe izigqoko zabo. 11 Kanti njalo kumele balungele ilanga lesithathu ngoba ngelanga lesithathu uJehova uzakwehlela entabeni iSinayi phambi kwabo bonke abantu. 12 Kumele ufakele abantu imingcele egombolozele yonke intaba, ubususithi kubo, ‘Nanzelelani ukuthi aliqansi entabeni njalo lingathinti umngcele wayo. Loba ngubani othinta intaba uzakufa loba sekutheni. 13 Akungabi lesandla esizamthinta lowomuntu, kodwa uzakhandwa ngamatshe kumbe agwazwe.* Kungelani lokuthi yinyamazana kumbe ngumuntu akusoze kuphile.’+ Kodwa nxa bangezwa ukukhala kophondo+ lwenqama bangasondela entabeni.”
14 UMosi wasesehla entabeni waya ebantwini, waqalisa ukubangcwelisa njalo bawatsha izigqoko zabo.+ 15 Wasetshela abantu wathi: “Lungiselelani ilanga lesithathu njalo lingayi emacansini.”*
16 Ekuseni ngelanga lesithathu kwaba lomdumo lombane njalo kwakuleyezi elijiyileyo+ entabeni kanye lomsindo wophondo omkhulu kakhulu. Ngakho bonke abantu ezihonqweni baqalisa ukuqhuqha+ ngenxa yokwesaba. 17 UMosi wasekhiphela abantu phandle kwezihonqo ukuze bayehlangana loNkulunkulu weqiniso njalo bafika bama phansi kwentaba. 18 Kwathunqa intuthu kuyo yonke indawo entabeni iSinayi ngoba uJehova wehlela kuyo esemlilweni.+ Intuthu yayo yayilokhu iphakama njengentuthu ephuma endaweni okutshiselwa kuyo* njalo intaba yonke yayinyikinyeka kakhulu.+ 19 Umsindo wophondo wathi ulokhu usiba mkhulu ngamandla uMosi wakhuluma, ilizwi likaNkulunkulu weqiniso laselimphendula.
20 UJehova wehlela esiqongweni sentaba iSinayi. UJehova wasebiza uMosi ukuthi abuye phezu kwentaba njalo uMosi waqansa waya phezulu.+ 21 UJehova wasesithi kuMosi: “Buyela phansi uyexwayisa abantu ukuthi bangazami ukweqa umngcele befuna ukubona uJehova ngoba bangenza njalo abanengi babo bazabhubha. 22 Abaphristi abahlala bebuya phambi kukaJehova abazihlambulule* ukuze uJehova angababulali.”+ 23 UMosi wasesithi kuJehova: “Abantu ngeke baqanse intaba iSinayi ngoba uvele wasixwayisa wathi, ‘Fakani imingcele egombolozele yonke intaba liyenze ibe ngcwele.’”+ 24 Kodwa uJehova wathi kuye: “Yehla ubusuphenduka lo-Aroni kodwa ungavumeli ukuthi abaphristi labantu bazame ukweqa imingcele besiza kuJehova ngoba bangenza njalo angababulala.”+ 25 Ngakho uMosi wehla waya ebantwini wafika wabatshela lokho.
20 UNkulunkulu wasekhuluma wonke amazwi la wathi:+
2 “NginguJehova uNkulunkulu wakho owakukhipha elizweni laseGibhithe, elizweni lobugqili.+ 3 Akumelanga ube labanye onkulunkulu ngaphandle kwami.*+
4 “Akumelanga uzenzele isithombe esibaziweyo kumbe isithombe saloba yini ephezulu emazulwini loba emhlabeni phansi kumbe esemanzini ngaphansi komhlaba.+ 5 Akumelanga ukhothamele izinto lezi kumbe uhugwe ukuthi uzikhonze+ ngoba mina Jehova uNkulunkulu wakho, nginguNkulunkulu ofuna umuntu azinikele kimi kuphela+ njalo ojezisa amadodana ngenxa yamacala aboyise kuze kufike kusizukulwane sesithathu lesesine salabo abangizondayo, 6 kodwa ngiba lothando oluqotho kuzizukulwane eziyinkulungwane zalabo abangithandayo njalo abagcina imithetho yami.+
7 “Akumelanga ulisebenzise kubi* ibizo likaJehova uNkulunkulu wakho+ ngoba uJehova kasoze ayekele ukujezisa loba ngubani olisebenzisa kubi ibizo lakhe.+
8 “Khumbula ilanga leSabatha uligcine lingcwele.+ 9 Kumele usebenze amalanga ayisithupha uqede yonke imisebenzi yakho,+ 10 kodwa ilanga lesikhombisa lisabatha likaJehova uNkulunkulu wakho. Akumelanga wenze loba yiwuphi umsebenzi, wena lendodana yakho, lendodakazi yakho, lesigqili sakho lesigqilikazi sakho kumbe isifuyo sakho loba umuntu wesinye isizwe ohlala lawe,*+ 11 ngoba ngamalanga ayisithupha uJehova wenza amazulu, lomhlaba, lolwandle lakho konke okukukho, waseqalisa ukuphumula ngelanga lesikhombisa.+ Yikho uJehova walibusisa ilanga leSabatha walenza laba ngcwele.
12 “Hlonipha uyihlo lonyoko+ ukuze uphile isikhathi eside elizweni uJehova uNkulunkulu wakho akupha lona.+
13 “Ungabulali.+
14 “Ungafebi.+
15 “Ungatshontshi.+
16 “Ungafakazi amanga ngomakhelwane wakho.*+
17 “Ungahawukeli indlu kamakhelwane wakho. Ungahawukeli umfazi kamakhelwane wakho,+ kumbe isigqili sakhe loba isigqilikazi sakhe, loba inkunzi yakhe loba ubabhemi wakhe, lakho konke nje okungokwakhe.”+
18 Abantu bonke bathi besizwa umdumo wezulu, bebona lombane, besizwa lomsindo wophondo futhi bebona lentuthu ithunqa entabeni, batshaywa luvalo, bamela khatshana.+ 19 Ngakho bathi kuMosi: “Wena khuluma lathi sizalalela, akungabi nguNkulunkulu okhuluma lathi ngoba sesaba ukuthi sizakufa.”+ 20 UMosi wasesithi ebantwini: “Lingesabi ngoba uNkulunkulu weqiniso uzolilinga+ ukwenzela ukuthi liqhubeke limesaba ukuze lingoni.”+ 21 Ngakho abantu babelokhu bemele khatshana kodwa uMosi wasondela eduze kweyezi elimnyama lapho okwakuloNkulunkulu weqiniso khona.+
22 UJehova wasesithi kuMosi: “Nanku okumele ukutshele abako-Israyeli, ‘Lizibonele ngawenu ukuthi ngikhulume lani ngisezulwini.+ 23 Akumelanga lenze onkulunkulu besiliva loba abegolide ngoba akumelanga libe labanye onkulunkulu ngaphandle kwami.+ 24 Kumele ungenzele i-alithare ngenhlabathi njalo yilo ozahlabela kulo iminikelo yokutshiswa, lemihlatshelo yobudlelwano,* evela emihlambini yakho yezimvu leyenkomo. Kuloba yiphi indawo engizakwenza ukuthi ibizo lami likhunjulwe khona+ ngizakuza kuwe futhi ngizakubusisa. 25 Nxa ungangenzela i-alithare ngamatshe, akumelanga ulakhe ngamatshe abazwe ngamathuluzi,+ ngoba ungasebenzisa itshizela yakho kulo uzalingcolisa. 26 Kanti njalo ungaqansi ngamasitephisi phezu kwe-alithare lami ukuze izitho zakho zensitha zingabi* segcekeni phezu kwalo.’
21 “Nansi imithetho yokwahlulela okumele uyitshele abantu:+
2 “Nxa ungathenga isigqili esingumHebheru+ sizakuba yisigqili okweminyaka eyisithupha kodwa ngomnyaka wesikhombisa kumele sikhululwe singabhadalanga lutho.+ 3 Nxa sazibuyela sodwa sizazihambela sodwa kodwa nxa sabuya silomfazi kumele sibuyele laye. 4 Nxa inkosi yaso ingasinika umfazi, abesesizalela amadodana kumbe amadodakazi, umfazi lo labantwabakhe bazakuba ngabenkosi yaso, sona sizabuyela sodwa.+ 5 Kodwa nxa isigqili leso singaphikelela sithi, ‘Ngiyayithanda inkosi yami lomkami labantwabami; angifuni ukukhululwa,’+ 6 Inkosi yaso kumele isilethe phambi kukaNkulunkulu weqiniso. Ngemva kwalokho kumele isimise emnyango kumbe emgubazini, isibhoboze indlebe ngosungulo, sibe yisigqili sayo okwempilo yaso yonke.
7 “Nxa umuntu angathengisa indodakazi yakhe ukuthi ibe yisigqili ayisoze ikhululwe ngendlela isigqili sesilisa esikhululwa ngayo. 8 Nxa inkosi yayo ingayithandi njalo ingayikhethi ukuthi ibe ngomunye wabafazi bayo kodwa ibisivuma ukuthi ithengwe* ngomunye umuntu, inkosi yayo ayisoze ivunyelwe ukuyithengisela umuntu wesinye isizwe ngoba iyabe iyikhohlisile. 9 Nxa ingayikhethela indodana yayo kumele iyinike amalungelo okuba yindodakazi. 10 Nxa ingathatha omunye umfazi akumelanga iyekele ukunika umfazi wokuqala ukudla lezigqoko kanye lamalungelo omtshado.*+ 11 Nxa ingasoze imnike izinto lezi ezintathu kumele akhululwe azihambele kungelamali ayibhadalileyo.
12 “Loba ngubani otshaya omunye umuntu ambulale laye kumele abulawe.+ 13 Kodwa nxa lokhu engakwenzanga ngabomo njalo uNkulunkulu weqiniso evumele ukuthi kwenzakale, ngizakukhethela indawo angabalekela kuyo.+ 14 Nxa umuntu angazondela umakhelwane wakhe* abesembulala ngabomo,+ lowomuntu kumele afe lanxa engabalekela e-alithareni lami.+ 15 Loba ngubani otshaya uyise kumbe unina kumele abulawe.+
16 “Loba ngubani othumba omunye umuntu+ abesemthengisa kumbe abanjwe eseselaye+ kumele abulawe.+
17 “Loba ngubani othuka uyise kumbe unina kumele abulawe.+
18 “Nxa abantu bengaxabana, omunye abesetshaya omunye ngelitshe kumbe ngenqindi* angafi kodwa alimale angenelisi lokuvuka embhedeni, nanku okumele kwenzakale: 19 Nxa olimeleyo esenelisa ukuvuka ahambahambe phandle ngodondolo, omtshayileyo akumelanga ajeziswe. Okumele akwenze yikumbhadala okwesikhathi leso elimele ngoba uyabe engasoze asebenze aze aphole.
20 “Nxa umuntu angatshaya isigqili sakhe loba isigqilikazi sakhe ngomqwayi besesisifa, lowomuntu kumele aphindiselwe.+ 21 Kodwa nxa singaphila okwelanga elilodwa loba amabili akumelanga siphindiselwe ngenxa yokuthi sathengwa ngemali yomnikazi waso.
22 “Nxa abantu bengathi besilwa besebelimaza owesifazana ozithweleyo, abelethe isikhathi sakhe singakafiki*+ kodwa kungabi lengozi yokufa,* owenze lelocala kumele abhadale konke okuzaqanjwa yindoda yowesifazana lo njalo kumele akhiphe imbadalo emiswe ngabahluleli.+ 23 Kodwa nxa kungafa umuntu* kumele kuphindiselwe impilo ngempilo,+ 24 ilihlo ngelihlo, izinyo ngezinyo, isandla ngesandla, unyawo ngonyawo,+ 25 ukutshiswa ngokutshiswa, inxeba ngenxeba, ukulimala ngokulimala.
26 “Nxa umuntu angatshaya isigqili sakhe loba isigqilikazi sakhe ilihlo alibulale, kumele asikhulule sihambe ukuze kube yimbadalo yelihlo laso.+ 27 Nxa angatshaya isigqili sakhe loba isigqilikazi sakhe asikhiphe izinyo kumele asiyekele sihambe ukuze kube yimbadalo yezinyo laso.
28 “Nxa inkunzi ingahlaba umuntu oyindoda kumbe owesifazana afe, kumele ikhandwe ngamatshe ize ife+ njalo inyama yayo akumelanga idliwe. Kodwa umnikazi wayo akumelanga ajeziswe. 29 Nxa kuyikuthi inkunzi leyo ibilomkhuba wokuhlaba njalo umnikazi wayo exwayisiwe ngakho kodwa wayekela ukuyivalela yaze yabulala umuntu oyindoda loba owesifazana, inkunzi leyo kumele ikhandwe ngamatshe njalo lomnikazi wayo kumele abulawe. 30 Nxa engahlawuliswa kumele akhiphe konke ayabe ekubhadalisiwe ukuze ahlenge impilo yakhe. 31 Umnikazi wenkunzi leyo kumele ahlulelwe ngaleyondlela kungelani lokuthi ihlabe umntwana ongumfana kumbe oyinkazana. 32 Nxa ihlabe isigqili loba isigqilikazi umnikazi wayo kumele abhadale amashekheli* angu-30 enkosini yaso njalo inkunzi leyo kumele ikhandwe ngamatshe ize ife.
33 “Nxa umuntu angavula umgodi kumbe awugebhe abeseyekela ukuwuvala, kuwele inkunzi kumbe ubabhemi, 34 umnikazi womgodi lowo kumele abhadale.+ Kumele ambhadale umnikazi wesifuyo njalo leso esifileyo sizakuba ngesakhe. 35 Nxa inkunzi yomuntu ingalimaza inkunzi yomunye ibisisifa, kumele bathengise inkunzi esele iphila, babelane intengo yayo njalo kumele babelane lenkunzi efileyo. 36 Kodwa nxa bekusaziwa ukuthi inkunzi leyo ilomkhuba wokuhlaba ezinye, umnikazi wayekela ukuyivalela kumele abhadale inkunzi ngenkunzi njalo efileyo izakuba ngeyakhe.
22 “Nxa umuntu angatshontsha inkunzi kumbe imvu abeseyihlaba kumbe ayithengise, kumele abhadale inkunzi leyo ngenkunzi ezinhlanu, nxa kuyimvu kumele abhadale ngezimvu ezine.+
2 (“Nxa isela+ lingabanjwa ligqekeza beselitshaywa life olibuleleyo kalacala legazi. 3 Kodwa nxa lokho kungenzakala ilanga seliphumile uyabe elecala legazi.)
“Isela lelo kumele libhadale. Nxa lingelalutho kumele lithengiswe ukuze kubhadalwe izinto elizitshontshileyo. 4 Nxa elikutshontshileyo kungatholakala kulo kuphila, kungelani lokuthi yinkunzi kumbe ngubabhemi loba yimvu, kumele libhadale okuphindwe kabili.
5 “Nxa umuntu angavulela izifuyo zakhe ukuthi ziyekudla emadlelweni akhe kumbe ensimini yakhe yamagilebisi abeseziyekela zingene ensimini yomunye, kumele abhadale ngokuhle kakhulu okuphuma ensimini yakhe kumbe ensimini yakhe yamagilebisi.
6 “Nxa umlilo ungalumatha ubusumemetheka utshise izihlahla zameva uze utshise lezithungo zamabele loba amabele amileyo kumbe insimu esilungele ukuvunwa, lowo olumathise umlilo kumele abhadale konke okutshileyo.
7 “Nxa umuntu anganika omunye wakhe imali kumbe ezinye izinto ukuthi amgcinele besezitshontshwa zisendlini yakhe, isela lelo lingabanjwa kumele libhadale okuphindwe kabili.+ 8 Nxa isela lingatholakalanga, umnikazi wendlu leyo kumele alethwe phambi kukaNkulunkulu weqiniso,+ ukuze kubonakale ukuthi kafakanga yini isandla sakhe empahleni azigciniswe ngomunye wakhe. 9 Loba ngubani omangalelwa ukuthi ulempahla engasiyakhe, kungaba yinkunzi, ubabhemi, imvu, isigqoko kumbe olunye nje ulutho olungabe lulahlekile abesesithi: ‘Ngokwami lokhu.’ Bobabili kumele bethule udaba lwabo phambi kukaNkulunkulu weqiniso.+ Lowo uNkulunkulu azakuthi ulecala kumele abhadale okuphindwe kabili.+
10 “Nxa umuntu anganika omunye wakhe ubabhemi loba inkunzi kumbe imvu kumbe esinye nje isifuyo ukuthi asigcine, besesisifa kumbe silimale kakhulu kumbe sithunjwe kungelamuntu obonayo, 11 bobabili kumele baye kubahluleli, obesigcinile abesefunga phambi kukaJehova ukuthi kazange abeke isandla sakhe empahleni yomunye wakhe njalo umnikazi wempahla kumele akwamukele lokho. Obesigcinisiwe akumelanga abhadale.+ 12 Kodwa nxa isifuyo sitshontshwe sikuye kumele abhadale umnikazi waso. 13 Nxa sidlithizwe yinyamazana yeganga kumele asilethe sibe yibufakazi. Akumelanga abhadale isifuyo esidlithizwe yinyamazana yeganga.
14 “Kodwa nxa umuntu angaboleka isifuyo komunye wakhe, besesilimala kakhulu kumbe sife singekho kumnikazi waso, osibolekileyo kumele abhadale. 15 Nxa kuyikuthi besikumnikazi waso akumelanga abhadale. Nxa besiqhatshwe ngemali, leyomali yiyo ezakuba yimbadalo.
16 “Nxa indoda ingayenga intombi egcweleyo engakathembisani lomuntu, ibisilala layo, kumele ibhadale amalobolo ukuze iyithathe ibe ngumkayo.+ 17 Nxa uyise wentombi engala embe phansi ukuthi iyithathe, kumele indoda leyo ibhadale imali elingana leyamalobolo.
18 “Akumelanga uvumele umthakathikazi aphile.+
19 “Loba ngubani olala lenyamazana kumele abulawe loba sekutheni.+
20 “Loba ngubani owenzela omunye unkulunkulu imihlatshelo ngaphandle kukaJehova kumele abhujiswe.+
21 “Akumelanga uphathe kubi umuntu wesinye isizwe kumbe umcindezele+ ngoba lani lalingabezizweni elizweni laseGibhithe.+
22 “Akumelanga uhluphe loba nguphi umfelokazi kumbe intandane.+ 23 Nxa ungavele umthwalise nzima aze akhale kimi, ukukhala kwakhe ngizakuzwa sibili,+ 24 njalo ulaka lwami luzavutha ngilibulale ngenkemba. Amakhosikazi enu azakuba ngabafelokazi, labantwabenu basale bengelaboyise.
25 “Nxa ungaboleka umyanga* ophakathi kwabantu bami imali, umuntu ohlala phakathi kwenu, akumelanga wenze njengababolekisa imali. Akumelanga uzalise imali omboleke yona.+
26 “Nxa ungathatha isembatho somunye wakho ukuze sibe yisibambiso semali ayibolekileyo,+ akumelanga ilanga litshone ungasibuyiselanga. 27 Phela yiso sodwa isembatho alaso, isigqoko avala ngaso umzimba wakhe, pho uzalala egqokeni?+ Nxa engakhala kimi ngizamuzwa sibili ngoba ngilozwelo.*+
28 “Akumelanga uthuke uNkulunkulu+ kumbe umkhokheli* wabantu bakini.+
29 “Akumelanga uthikaze ukunikela ngezinto ozikhiphe enaleni yakho, langalokho okuphuphuma ezikhamelweni zakho.*+ Kanti njalo kumele ungiphe amazibulo amadodana akho.+ 30 Nanku okumele ukwenze ngenkunzi yakho langemvu yakho:+ Izahlala lonina okwamalanga ayisikhombisa kodwa ngelanga lesi-8 kumele ungiphe yona.+
31 “Kumele libe ngabantu abangcwele kimi,+ njalo akumelanga lidle inyama yaloba yini ebulewe yinyamazana yeganga.+ Kumele liyiphosele izinja.
23 “Akumelanga uhambe ufafaza indaba engasiqiniso.+ Ungabambisani lomuntu oxhwalileyo ngokuba ngufakazi olamacebo okulimaza abanye.+ 2 Akumelanga wenze okubi ulandela okwenziwa ngabanengi njalo akumelanga wenze ukuthi indaba yahlulelwe kubi ngokunika ubufakazi ulandela abanengi nje. 3 Nxa usahlulela ungazweli umuntu ngenxa nje yokuthi ungumyanga.+
4 “Nxa ungabona inkunzi yesitha sakho ilahlekile loba ubabhemi waso, kumele ukubuyisele kuye.+ 5 Ungabona ubabhemi womuntu okuzondayo ewiswe ngumthwalo, akumelanga umtshiye uzihambele. Kumele umncedise akhiphe lowomthwalo kubabhemi wakhe.+
6 “Akumelanga wahlulele kubi umyanga nxa uthonisisa udaba lwakhe.+
7 “Tshiyana lobufakazi obungamanga,* futhi ungabulali umuntu ongelacala loba olungileyo ngoba angisoze ngithi umuntu owenza okubi ulungile.*+
8 “Akumelanga uvume ukufunjathiswa ngoba kwenza abantu abahlulela kuhle babe angathi yiziphofu futhi kungenza ukuthi abalungileyo batshintshe amazwi abo.+
9 “Akumelanga ucindezele umuntu wesinye isizwe. Liyakwazi ukuthi kunjani ukuba ngumuntu* wezizweni ngoba lani lalingabezizweni elizweni laseGibhithe.+
10 “Okweminyaka eyisithupha kumele uhlanyele inhlanyelo ensimini yakho njalo kumele ubuthe isivuno sayo.+ 11 Kodwa ngomnyaka wesikhombisa kumele uyitshiye ingalinywanga njalo ungenzi lutho kuyo. Abayanga abaphakathi kwenu bazakudla okuphume kuyo futhi abakutshiyileyo kuzadliwa zinyamazana zeganga. Lokhu yikho okumele ukwenze langensimu yakho yamagilebisi leyama-oliva.
12 “Kumele wenze umsebenzi wakho ngamalanga ayisithupha. Kodwa ngelanga lesikhombisa akumelanga usebenze ukuze inkunzi yakho lobabhemi wakho kuphumule lokuthi indodana yesigqilikazi sakho kanye lomuntu wesinye isizwe bake babethwe ngumoya.+
13 “Kumele libe leqiniso lokuthi lenza konke engilitshele khona+ njalo akumelanga libize amabizo abanye onkulunkulu. Amabizo abo akumelanga azwakale emlonyeni wakho.+
14 “Kumele lingenzele umkhosi kathathu ngomnyaka.+ 15 Lizananza uMkhosi Wesinkwa Esingelamvubelo,+ lidle isinkwa esingelamvubelo okwamalanga ayisikhombisa njengoba nje ngitshilo kini. Lokhu lizakwenza ngesikhathi esibekiweyo ngenyanga ka-Abhibhi*+ ngoba laphuma eGibhithe ngalesosikhathi. Kakho okumele azokuma phambi kwami elengise izandla.+ 16 Kanti njalo kumele linanze uMkhosi Wokuvuna* izithelo zomsebenzi wenu ezivuthwa kuqala, owalokho elakuhlanyela emasimini enu.+ Ekupheleni komnyaka kumele linanze uMkhosi Wokubutha* nxa selibutha konke elikusebenzeleyo okuphume emasimini enu.+ 17 Kathathu ngomnyaka, wonke amadoda aphakathi kwenu kumele azokuma phambi kukaJehova iNkosi yeqiniso.+
18 “Igazi lomhlatshelo wami akumelanga linikelwe laloba yini elemvubelo njalo imihlatshelo yamahwahwa enikelwa emikhosini yami akumelanga ihlale ubusuku bonke kuze kube sekuseni.
19 “Izithelo zakho ezivuthwa kuqala ezinhle kulazo zonke kumele uzilethe endlini kaJehova uNkulunkulu wakho.+
“Akumelanga uxhwathise izinyane lembuzi ngochago lukanina.+
20 “Ngithumela ingilosi phambi kwenu+ ukuze ilivikele endleleni njalo iyelifikisa endaweni engiyilungisileyo.+ 21 Yilaleleni lilandele lokho elitshela khona. Lingayihlamukeli ngoba ibizo lami likuyo njalo ayisoze ixolele iziphambeko zenu.+ 22 Kodwa nxa lingalalelisisa ilizwi layo, lenze konke engikutshoyo, ngizakuba yisitha sezitha zenu, ngimelane labamelana lani. 23 Ingilosi yami izahamba phambi kwenu njalo izalifikisa kuma-Amori, lamaHithi, lamaPherizi, lamaKhenani, lamaHivi, lamaJebusi njalo ngizawatshabalalisa aphele nya.+ 24 Akumelanga likhothamele onkulunkulu babantu laba kumbe lihugwe ukuthi libakhonze njalo akumelanga lilandele imikhuba yabo.+ Kodwa kumele libhidlize izithombe zabo futhi liphahlaze lensika zabo abazisebenzisa ekukhonzeni.+ 25 Kumele likhonze uJehova uNkulunkulu wenu+ njalo uzabusisa ukudla kwenu lamanzi enu.+ Ngizasusa ukugula phakathi kwenu.+ 26 Izisu zabesifazana abaselizweni lenu azisoze zichitheke futhi abasoze babe zinyumba.+ Ngizalenza liphile impilo ende.
27 “Ngizakwenza ukuthi abantu bangesabe lingakafiki lokufika kubo+ njalo bonke abantu elihlangana labo ngizabaphithanisa amakhanda. Ngizakwenza lokuthi linqobe zonke izitha zenu futhi zizalibalekela.*+ 28 Ngizakwenza abantu baphele amandla* lingakafiki kubo;+ lokhu kuzaxotsha amaHivi lamaKhenani lamaHithi phambi kwenu.+ 29 Angisoze ngibadudule phambi kwenu ngomnyaka owodwa nje ukuze ilizwe lingasali lilunxiwa, inyamazana zeganga besezisanda zilihlasele.+ 30 Ngizabasusa kancane kancane phambi kwenu lize libe banengi, lilithathe ilizwe.+
31 “Ngizabeka umngcele wenu kusukela eLwandle Olubomvu kuze kuyefika elwandle lwamaFilisti, kusukela enkangala kuze kuyefika emfuleni*+ ngoba ngizanikela izakhamizi zelizwe esandleni senu njalo lizazisusa phambi kwenu.+ 32 Akumelanga lenze isivumelwano labo kumbe labonkulunkulu babo.+ 33 Akumelanga bahlale elizweni lenu ukuze bangabangeli ukuthi lenze isono kimi. Nxa lingakhonza onkulunkulu babo, kuzakuba ngumjibila kini.”+
24 Wasesithi kuMosi: “Khwela uye kuJehova wena, lo-Aroni, loNadabi, lo-Abhihu+ kanye labadala bako-Israyeli abangu-70 lifike likhothame lisesekhatshana. 2 UMosi kumele asondele kuJehova eyedwa kodwa abanye akumelanga basondele njalo abantu akumelanga bakhwele laye.”+
3 UMosi wasebuya walandisela abantu wonke amazwi kaJehova kanye lemithetho yakhe yokwahlulela.+ Bonke abantu baphendula ngazwi linye bathi: “Sizimisele ukwenza konke uJehova akukhulumileyo.”+ 4 Ngakho uMosi wawabhala phansi wonke amazwi kaJehova.+ Wasevuka ekuseni kakhulu wakha i-alithare phansi kwentaba kanye lensika ezingu-12 ezazilingana lenani lezizwana zako-Israyeli ezingu-12. 5 Ngemva kwalokho wathuma amajaha ako-Israyeli njalo anikela iminikelo yokutshiswa futhi ahlabela uJehova inkunzi zemihlatshelo yobudlelwano.+ 6 UMosi wasethatha enye ingxenye yegazi wayithela emiganwini, enye yakhona wayifafaza e-alithareni. 7 Ngemva kwalokho wathatha ibhuku lesivumelwano wabalela phezulu abantu besizwa.+ Basebesithi: “Sizimisele ukulalela lokwenza konke uJehova akukhulumileyo.”+ 8 Ngakho uMosi wathatha igazi wachela ngalo abantu+ esithi: “Leli ligazi lesivumelwano uJehova asenze lani mayelana lawo wonke amazwi la.”+
9 UMosi, lo-Aroni, loNadabi, lo-Abhihu kanye labadala bako-Israyeli abangu-70 baqansa-ke 10 njalo bambona uNkulunkulu ka-Israyeli.+ Ngaphansi kwenyawo zakhe kwakulokuthile okwakungathi liphansi elenziwe ngamatshe esafire njalo kwakucwebezela angathi yikukhanya kwesibhakabhaka.+ 11 Kazange awalimaze amadoda ako-Israyeli ayengabahlonitshwa+ njalo awubona umbono kaNkulunkulu weqiniso, adla futhi anatha.
12 UJehova wasesithi kuMosi: “Woza kimi entabeni uhlale khona. Ngizakupha izibhebhedu zamatshe ezibhalwe umthetho kanye lomlayo engizawubhala ukuze bawufunde.”+ 13 Ngakho uMosi wasuka lenceku yakhe uJoshuwa,+ wakhwela entabeni kaNkulunkulu weqiniso.+ 14 Kodwa engakasuki, watshela abadala bako-Israyeli wathi: “Lisimelele lapha size siphenduke kini.+ U-Aroni loHuri+ bazasala lani. Loba ngubani olodaba olufuna ukwahlulelwa angayalubikela bona.”+ 15 UMosi waseqansa entabeni futhi yayilokhu igubuzelwe liyezi.+
16 Inkazimulo kaJehova+ yayilokhu isentabeni iSinayi+ njalo iyezi layisibekela okwamalanga ayisithupha. Ngelanga lesikhombisa wabiza uMosi ephakathi kweyezi. 17 Ebantwini bako-Israyeli ababebukele, inkazimulo kaJehova yayikhanya injengomlilo ovuthayo esiqongweni sentaba. 18 UMosi wasengena phakathi kweyezi, waqhubeka ekhwela esiya phezulu entabeni.+ Wahlala entabeni okwamalanga angu-40 lobusuku obuyi-40.+
25 UJehova wasesithi kuMosi: 2 “Tshela abantu bako-Israyeli ukuthi bangilethele umnikelo njalo kumele lingiqoqele umnikelo kuye wonke umuntu ozwa kusitsho enhliziyweni yakhe ukuthi anikele.+ 3 Nanku umnikelo okumele liwamukele kubo: igolide,+ lesiliva,+ lekhopha,+ 4 lohali oluluhlaza okwesibhakabhaka, lewulu eyibubende,* lohali olubomvu, lelineni elohlonzi, loboya bembuzi, 5 lezikhumba zenqama ezidaywe zaba bomvu, lezikhumba zenyamazana yolwandle, lezigodo zesinga,+ 6 lamafutha ezibane,+ lebhalisamu yokwenza amafutha angcwele,+ leyokwenza impepha+ enukelelayo, 7 lamatshe e-onekisi, lamanye amatshe azafakwa ku-efodi*+ kanye laphezu kwesikhwama sesifubeni.+ 8 Kumele lingenzele indawo engcwele njalo ngizahlala phakathi kwenu.+ 9 Kumele lingenzele ithabanikeli kanye lazo zonke izinto okumele zibe kulo, lilandela khona kanye engizakutshengisa khona.+
10 “Kumele lenze ibhokisi ngezigodo zesinga. Ubude balo bube zingalo* ezimbili lengxenye, ububanzi balo bube yingalo eyodwa lengxenye njalo ukuphakama kwalo kube yingalo eyodwa lengxenye.+ 11 Kumele lilihuqe ngegolide+ elicengekileyo, lilihuqe phakathi langaphandle. Kanti njalo kumele lilicecise ngomqolo wegolide emaceleni wonke.+ 12 Kumele libumbele kulo amaringi egolide amane liwafake ngaphezu kwenyawo zalo ezine, amabili abe kwelinye icele besekusithi amanye amabili abe kwelinye. 13 Lizabaza lezigodo zesinga lizihuqe ngegolide.+ 14 Izigodo lezo kumele lizihlome phakathi kwamaringi asemaceleni ebhokisi ukuze lithwalwe ngazo. 15 Izigodo lezo kumele zihlale ziphakathi kwamaringi ebhokisi njalo akumelanga zikhitshwe kulo.+ 16 UBufakazi engizakupha bona+ kumele ubufake ebhokisini lelo.
17 “Kumele lenze isivalo sebhokisi ngegolide elicengekileyo; ubude baso bube zingalo ezimbili lengxenye njalo ububanzi baso bube yingalo eyodwa lengxenye.+ 18 Kumele lenze amakherubhi amabili ngegolide, liwenze lisebenzisa isando, abe sekucineni kwesivalo+ sebhokisi, elinye libe kwelinye icele elinye ngakwelinye icele. 19 Elinye ikherubhi alibe sekucineni kwesivalo, elinye libe kwelinye icele ekucineni kwaso. 20 Amakherubhi la kumele elulele impiko zawo phezulu, agubuzele isivalo sebhokisi ngempiko zawo+ futhi kumele akhangelane. Ubuso bawo kumele bukhangele phansi esivalweni. 21 Kumele ufake isivalo+ phezu kwebhokisi, ufake loBufakazi engizakunika bona phakathi kwalo. 22 Ngizabonakala kuwe kuleyondawo, ngikhulume lawe ngiphezu kwesivalo.+ Ngizakwazisa konke okuzamele ukutshele abako-Israyeli ngiphakathi laphakathi kwamakherubhi amabili aphezu kwebhokisi loBufakazi.
23 “Kanti njalo kumele lenze itafula+ ngezigodo zesinga; ubude bayo bube zingalo ezimbili, ububanzi bayo bube yingalo eyodwa njalo ukuphakama kwayo kube yingalo eyodwa lengxenye.+ 24 Kumele liyihuqe ngegolide elicengekileyo njalo liyicecise ngomqolo wegolide emaceleni ayo wonke. 25 Kumele lenze ibhanti elizagombolozela itafula leyo, elilobubanzi obulingana lobubanzi beminwe emine nxa ihlangene* njalo kumele libe lomqolo wegolide emaceleni wonke. 26 Kumele liyenzele amaringi amane egolide njalo liwafake phezulu enyaweni zayo ezine kuwo wonke amakhona ayo amane. 27 Amaringi la kumele abe seduze lebhanti ukuze abambe izigodo zokuthwala itafula. 28 Kumele libaze izigodo zesinga lizihuqe ngegolide ukuze zibe ngezokuthwala itafula.
29 “Kanti njalo kumele lenze izitsha zayo, lamankomitsho ayo, lamajagi kanye lemiganu lapho abazathela khona iminikelo yokunathwayo. Izinto lezi kumele lizenze ngegolide elicengekileyo.+ 30 Kumele lifake isinkwa sokubukiswa etafuleni sibe phambi kwami ngazo zonke izikhathi.+
31 “Lizakwenza uluthi lwesibane+ ngegolide elicengekileyo njalo kumele lube ngumsebenzi owenziwe ngesando. Isisekelo salo, lomqwayi walo obambe ingatsha, lengatsha zalo, lamankomitsho alo, leziduku zalo kanye lamaluba alo kumele kube yintonye.+ 32 Uluthi lwesibane kufanele lube lengatsha eziyisithupha emaceleni alo, ingatsha ezintathu kwelinye icele, lezinye ezintathu kwelinye icele. 33 Ugatsha ngalunye luzakuba lamankomitsho amathathu abunjwe samaluba esihlahla sama-alimondi, isiduku leluba kufakwe kulandelane. Engatsheni ezikwelinye icele lakho kumele kube lamankomitsho amathathu abunjwe samaluba esihlahla sama-alimondi, isiduku leluba kufakwe kulandelane. Yiyo-ke indlela okumele kwenziwe ngayo ingatsha eziyisithupha ezisemaceleni oluthi lwesibane. 34 Umqwayi obambe ingatsha kumele ube lamankomitsho amane abunjwe samaluba esihlahla sama-alimondi, isiduku salo leluba lakho kufakwe kulandelane. 35 Ngaphansi kwengatsha zokuqala ezimbili ezisemqwayini woluthi lwesibane kumele kube lesiduku, kuphinde kube lesiduku ngaphansi kwengatsha ezimbili ezilandelayo, kube lesinye isiduku ngaphansi kwezinye ezimbili ezilandelayo. Kumele zibe njalo ingatsha eziyisithupha ezisemqwayini woluthi lwesibane. 36 Uluthi lwesibane, leziduku kanye lengatsha, konke kumele kwenziwe kube yintonye eyenziwe ngegolide+ elicengekileyo, kusetshenziswa isando. 37 Kumele lenze izibane zalo eziyisikhombisa njalo nxa izibane lezi zingalunyathiswa, zizakhanyisa indawo ephambi kwalo.+ 38 Indlawu* zalo lenkezwana zokuthwala amalahle kumele kwenziwe ngegolide+ elicengekileyo. 39 Uluthi lwesibane kanye lazo zonke izinto lezi kumele kwenziwe ngethalenta* legolide elicengekileyo. 40 Woba leqiniso lokuthi izinto lezi uzenza ngendlela yazo ulandela lokho okutshengiswe entabeni.+
26 “Kumele lenze ithabanikeli+ ngamalembu etende alitshumi enziwe ngelineni elohlonzi ephothiweyo, lohali oluluhlaza okwesibhakabhaka, lewulu eyibubende,* kanye lohali olubomvu. Kumele liwathungele umceciso+ wamakherubhi.+ 2 Ilembu ngalinye lokwenza itende kumele libe zingalo* ezingu-28 ubude njalo libe zingalo ezine ububanzi. Wonke amalembu la kumele alingane.+ 3 Amalembu etende amahlanu kumele ahlanganiswe wonke abe lilembu elilodwa elikhulu futhi lamanye amahlanu kumele ahlanganiswe. 4 Kumele lenze izihitshela ngohali oluluhlaza okwesibhakabhaka emphethweni welembu elisekucineni emalenjini ahlanganisiweyo, lenze njalo laselenjini elisekucineni kwamanye ahlanganisiweyo, lapho azahlanganiswa khona womabili. 5 Lizakwenza izihitshela ezingu-50 kwelinye ilembu letende, lezihitshela ezingu-50 emphethweni welinye ilembu letende ukuze izihitshela lezi ziqondane lapho amalembu la ahlangana khona. 6 Kumele lenze ingwegwe zegolide ezingu-50 beselihlanganisa amalembu etende ngazo ukuze ithabanikeli libe yintonye.+
7 “Kumele lenze amanye amalembu etende ngoboya bembuzi+ ukuze afakwe phezu kwethabanikeli. Amalembu+ la kumele abengu-11. 8 Ilembu ngalinye kumele libe zingalo ezingu-30 ubude lengalo ezine ububanzi. Wonke amalembu la angu-11 kumele alingane. 9 Kumele lihlanganise amalembu etende amahlanu abe lilembu elilodwa, lihlanganise lamanye ayisithupha abe lilembu elilodwa. Elesithupha kumele lilipheqe emhlubulweni wetende ophambili. 10 Kumele lenze izihitshela ezingu-50 emphethweni welembu ngalinye elisekucineni emalenjini ahlanganisiweyo, kanye lezihitshela ezingu-50 emphethweni welembu letende lapho amalembu la ahlangana khona. 11 Kumele lenze ingwegwe zekhopha ezingu-50 beselizifaka ezihitsheleni lihlanganise amalembu etende abe lilembu elilodwa. 12 Ingxenye eseleyo yelembu letende liyitshiye ilenga. Kumele isale ilenga ngemva kwethabanikeli. 13 Ingxenye eseleyo yamalembu etende elingana lengalo eyodwa kumele ilengele ngapha langapha ukuze yembathise ithabanikeli.
14 “Kanti njalo kumele lenze isembeso setende ngezikhumba zenqama ezidaywe zaba bomvu njalo phezu kwaso kumele lifake izikhumba zenyamazana yolwandle.+
15 “Kumele libaze lamapulanka*+ ngezigodo zesinga elizalungisa ngawo ithabanikeli futhi kumele amiswe aqonde.+ 16 Ipulanka ngalinye kumele libe zingalo ezilitshumi ubude njalo libe yingalo eyodwa lengxenye ububanzi. 17 Ngaphansi kwepulanka ngalinye kumele kube lezigxingi ezimbili eziqondeneyo. Le yiyo indlela okumele ulungise ngayo wonke amapulanka ethabanikeli. 18 Kumele libaze amapulanka angu-20 azangena eceleni lethabanikeli elikhangele eningizimu.
19 “Kumele lenze izisekelo zesiliva ezingu-40 ezilezikhala+ futhi yizo ezizafakwa ngaphansi kwamapulanka angu-20. Izisekelo ezimbili kazibe ngaphansi kwepulanka elilodwa ukuze kungeniswe izigxingi zalo ezimbili, ezinye izisekelo ezimbili zibe ngaphansi kwepulanka ngalinye elilandelayo ukuze kungeniswe izigxingi+ zalo ezimbili. 20 Kumele libaze amapulanka angu-20 azangena eceleni lethabanikeli elisenyakatho. 21 njalo lenze lezisekelo zawo zesiliva ezingu-40 ezilezikhala, izisekelo ezimbili zibe ngaphansi kwepulanka elilodwa, lezisekelo ezimbili ngaphansi kwepulanka ngalinye elilandelayo. 22 Kumele libaze amanye amapulanka ayisithupha+ azangena engxenyeni yethabanikeli engemuva ekhangele entshonalanga. 23 Bazani lamanye amapulanka amabili azasekela amakhona amabili ethabanikeli angemuva. 24 Amapulanka la kumele ahlanganiswe abe mabili kusukela phansi kuze kuyefika phezulu lapho okulesongo lokuqala khona.* Lokhu kumele likwenze kuwo womabili njalo yiwo azasekela amakhona womabili. 25 Kuzakuba lamapulanka angu-8 lezisekelo zesiliva ezingu-16 ezilezikhala, izisekelo ezimbili kumele zifakwe ngaphansi kwepulanka elilodwa njalo ezinye izisekelo ezimbili zibe ngaphansi kwepulanka ngalinye elilandelayo.
26 “Kumele lilungise imithando ngezigodo zesinga, emihlanu ibe ngeyamapulanka aseceleni elilodwa lethabanikeli,+ 27 eminye imithando emihlanu ibe ngeyamapulanka akwelinye icele lethabanikeli, njalo eminye emihlanu ibe ngeyamapulanka aseceleni elisentshonalanga, ngemuva kwethabanikeli. 28 Umthando ophakathi laphakathi kwamapulanka kumele usuke ekuqaliseni uze uyefika ekucineni.
29 “Amapulanka okulungisa ithabanikeli kumele liwahuqe ngegolide+ njalo liwenzele amaringi egolide azabamba imithando futhi layo kumele liyihuqe ngegolide. 30 Kumele umise ithabanikeli ulandela iplani oyitshengiswe entabeni.+
31 “Kumele lenze ikhetheni+ ngohali oluluhlaza okwesibhakabhaka, lewulu eyibubende, lohali olubomvu kanye lelineni elohlonzi ephothiweyo njalo lithungele kulo imiceciso yamakherubhi. 32 Kumele lilifake phezu kwensika ezine ezenziwe ngezigodo zesinga ezihuqwe ngegolide. Amawuka azo kumele abe ngawegolide. Insika lezi kumele zibe phezu kwezisekelo zesiliva ezine ezilezikhala. 33 Ikhetheni lizalifaka ngaphansi kwezingwegwe njalo lingenise ibhokisi loBufakazi+ khonapho phakathi endaweni evalwe ngekhetheni. Ikhetheni leli yilo elizakwehlukanisa iNdawo eNgcwele+ leNgcwelengcwele.+ 34 Kumele lifake isivalo phezu kwebhokisi loBufakazi eliseNgcwelengcwele.
35 “Lizafaka itafula phandle kwekhetheni eceleni elisenyakatho phakathi kwethabanikeli. Kumele ikhangelane loluthi lwesibane+ olungaseningizimu phakathi kwethabanikeli. 36 Lizakwenza elinye ikhetheni lokuvala umnyango wetende ngohali oluluhlaza okwesibhakabhaka, lewulu eyibubende, lohali olubomvu kanye lelineni elohlonzi ephothiweyo.+ 37 Lizakwenzela elinye ikhetheni insika ezinhlanu ngezigodo zesinga, beselizihuqa ngegolide. Amawuka azo kumele abe ngawegolide njalo lizazenzela izisekelo ezinhlanu ezilezikhala, ezenziwe ngekhopha.
27 “Kumele lenze i-alithare ngezigodo zesinga,+ libe zingalo* ezinhlanu ubude lengalo ezinhlanu ububanzi. Amacele alo wonke kumele alingane futhi kumele libe zingalo ezintathu ukuphakama.+ 2 Kumele lenze i-alithare libe lempondo+ emakhoneni alo womane, zibambane lalo, beselilihuqa ngekhopha.+ 3 Lizakwenza lemigqomo yokukhipha umlotha,* lamafotsholo, lemiganu, lamafologwe, lenkezwana zokuthwala amalahle futhi lenze lazo zonke izitsha zalo zekhopha.+ 4 Kumele lenzele i-alithare leli isefa yekhopha, lenze lamaringi amane esefeni leyo njalo abe semakhoneni womane; 5 beseliyihlalisa phakathi ibe ngaphansi komqolo we-alithare njalo isefa le kumele ifike phakathi laphakathi kwalo. 6 Kumele lenzele i-alithare izigodo zesinga, beselizihuqa ngekhopha. 7 Nxa sebethwala i-alithare kumele bahlome izigodo lezo phakathi kwamaringi amabili asemaceleni e-alithare ukuze liphakanyiswe ngazo.+ 8 Kumele lenze i-alithare libe njengebhokisi lamapulanka elikhamisileyo. Kumele lenziwe ngayo kanye indlela engikutshengise yona entabeni.+
9 “Lizalungisa leguma+ lethabanikeli. Eceleni lalo eliseningizimu kumele kufakwe amakhetheni enziwe ngelineni elohlonzi ephothiweyo futhi ubude bawo kumele bube zingalo ezingu-100 eceleni lelo.+ 10 Kumele libe lensika ezingu-20 lezisekelo zekhopha ezingu-20. Amawuka ensika lezi lezibopho zakhona* kumele kube ngokwesiliva. 11 Amakhetheni afakwe eceleni elisenyakatho lawo kumele abe zingalo ezingu-100 ubude, abe lensika ezingu-20 lezisekelo zekhopha ezingu-20, lamawuka esiliva kanye lezibopho* zensika zakhona. 12 Eceleni elisentshonalanga ebubanzini beguma kumele kufakwe amakhetheni azingalo ezingu-50 futhi kumele abe lensika ezingu-10 lezisekelo ezingu-10. 13 Ububanzi beguma eceleni elikhangele empumalanga kumele bube zingalo ezingu-50. 14 Kwelinye icele legedi kumele kufakwe amakhetheni azingalo ezingu-15 futhi kumele abe lensika ezintathu kanye lezisekelo+ ezintathu. 15 Lakwelinye icele kumele kufakwe amakhetheni azingalo ezingu-15 futhi kumele abe lensika ezintathu kanye lezisekelo ezintathu.
16 “Igedi leguma kumele libe lekhetheni elizingalo ezingu-20 ubude njalo ikhetheni lelo kufanele lenziwe ngohali oluluhlaza okwesibhakabhaka, lewulu eyibubende,* lohali olubomvu, kanye lelineni elohlonzi ephothiweyo.+ Kumele libe lensika ezine kanye lezisekelo zazo+ ezine. 17 Zonke insika ezigombolozele iguma kumele zibe lezibopho zesiliva kanye lamawuka esiliva kodwa izisekelo zazo kumele zibe ngezekhopha.+ 18 Iguma lelo kumele libe zingalo ezingu-100 ubude,+ libe zingalo ezingu-50 ububanzi, njalo libe zingalo ezinhlanu ukuphakama. Kumele lenziwe ngelineni elohlonzi ephothiweyo futhi kumele libe lezisekelo zekhopha. 19 Zonke izitsha kanye lezinto ezizasetshenziswa enkonzweni yethabanikeli, lezikhonkwane zalo zetende, lazo zonke izikhonkwane zeguma, konke kumele kwenziwe ngekhopha.+
20 “Kumele utshele ama-Israyeli ukuthi alethe kuwe amafutha ama-oliva acengekileyo azafakwa phakathi kwezibane ukuze ziqhubeke zikhanyisa ngaso sonke isikhathi.+ 21 Etendeni lokuhlangana, phandle kwekhetheni eliseduze lebhokisi loBufakazi,+ u-Aroni lamadodana akhe bazahlela ukuthi izibane ziqhubeke zibhebha phambi kukaJehova+ kusukela ntambama kuze kuse. Lo ngumlayo ozahlala ukhona okumele ugcinwe ngama-Israyeli+ kuzo zonke izizukulwane zawo.
28 “Kumele ubize u-Aroni lamadodana akhe phakathi kwabako-Israyeli ukuze babe ngabaphristi bami.+ Akube ngu-Aroni+ lamadodana akhe,+ uNadabi, lo-Abhihu,+ lo-Eliyazari lo-Ithamari.+ 2 Kumele wenzele umfowenu u-Aroni izigqoko ezingcwele njalo ezinhle, ezizamenza abe lesithunzi.+ 3 Tshela labo bonke abazingcitshi, engibagcwalise ngomoya wokuhlakanipha+ ukuthi benzele u-Aroni izigqoko zokumngcwelisa ukuze abe ngumphristi wami.
4 “Nanzi izigqoko okufanele bazenze: isikhwama sesifubeni,+ le-efodi,+ lejazi elingelamikhono,+ lesigqoko esiyisikotshi, leqhiye+ kanye lebhanti.+ Kumele benzele umfowenu u-Aroni lamadodana akhe izigqoko lezi ezingcwele ukuze babe ngabaphristi bami. 5 Izisebenzi ezilobungcitshi zizasebenzisa igolide, lohali oluluhlaza okwesibhakabhaka, lewulu eyibubende,* lohali olubomvu kanye lelineni elohlonzi.
6 “Kumele zenze i-efodi ngegolide, lohali oluluhlaza okwesibhakabhaka, lewulu eyibubende, lohali olubomvu kanye lelineni elohlonzi ephothiweyo njalo izinto lezi kumele zithungelwe elenjini lakhona.+ 7 I-efodi kumele ibe leziqephu zelembu ezimbili emahlombe ezihlanganiswe phezulu emphethweni yomibili. 8 Ibhanti elelukiweyo*+ lokubopha i-efodi ukuze ihlale isendaweni yayo kumele lenziwe ngegolide, lohali oluluhlaza okwesibhakabhaka, lewulu eyibubende, lohali olubomvu kanye lelineni elohlonzi ephothiweyo. Yilo elizabe libopha i-efodi ukuze ihlale isendaweni yayo.
9 “Kumele uthathe amatshe amabili e-onekisi,+ ubusubhala kuwo amabizo amadodana ka-Israyeli,+ 10 amabizo awo ayisithupha abe kwelinye ilitshe, lamanye ayisithupha abe kwelinye njalo alandelane kusiya ngeminyaka yokuzalwa kwamadodana la. 11 Umuntu oyingcitshi yokubhala ematsheni uzabhala amabizo amadodana ka-Israyeli ematsheni la amabili njengokwenziwa nxa umuntu efaka uphawu lwesidindo.+ Ngemva kwalokho kumele uwafake phakathi kwezibambiso zegolide. 12 Faka amatshe la amabili eziqetshini zelembu ezimbili ezisemahlombe phezu kwe-efodi ukuze abe ngamatshe esikhumbuzo kumadodana ka-Israyeli.+ U-Aroni kumele athwale amabizo awo phambi kukaJehova, eziqetshini zelembu le-efodi ezisemahlombe womabili ukuze kube yisikhumbuzo. 13 Kumele wenze izibambiso zegolide 14 kanye lamaketane amabili egolide elicengekileyo, aphothwe njengentambo.+ Amaketane la aphothiweyo kumele uwafake ezibambisweni.+
15 “Tshela umuntu othungayo ukuthi enze isikhwama sesifubeni esizasetshenziswa ukwahlulela.+ Kumele asenze njenge-efodi, esebenzisa igolide, lohali oluluhlaza okwesibhakabhaka, lewulu eyibubende, lohali olubomvu kanye lelineni elohlonzi ephothiweyo.+ 16 Kumele silingane amacele womane nxa sigoqiwe, ubude baso bulingane lobubanzi besandla* njalo ububanzi baso labo bulingane lobubanzi besandla. 17 Kumele ufake amatshe aligugu phezu kwaso, abe yimizila emine. Emzileni wakuqala kube lerubhi lethophazi le-emeraldi. 18 Emzileni wesibili kumele kube lethekhoyisi lesafire lejaspa. 19 Umzila wesithathu kumele ube leleshemu* le-agathe le-amethisithi. 20 Umzila wesine wona kumele ube lekhrisolithe le-onekisi lejedi. Amatshe la kumele afakwe phakathi kwezibambiso zegolide. 21 Amatshe la kumele alingane lenani lamabizo amadodana ka-Israyeli angu-12. Ilitshe ngalinye kumele libhalwe njengophawu lwesidindo njalo ibizo ngalinye limela isizwana ngasinye kwezingu-12.
22 “Kumele wenzele isikhwama sesifubeni amaketane aphothiweyo, abe njengentambo ezenziwe ngegolide+ elicengekileyo. 23 Kufanele wenzele isikhwama sesifubeni amaringi egolide amancane amabili ubusuwafaka phezulu emakhoneni aso. 24 Amaketane egolide amabili kumele uwafake phakathi kwamaringi amancane amabili asemakhoneni esikhwama sesifubeni. 25 Ingxenye esekucineni yeketane ngayinye kumele ingene phakathi kwezibambiso zegolide ezimbili njalo ngasinye kumele sihlanganiswe leziqephu zamalembu e-efodi emahlombe womabili,* ngaphambili. 26 Uzakwenza amaringi egolide amancane amabili ubusuwafaka emakhoneni womabili ngaphansi, abe semphethweni ongaphakathi kwesikhwama sesifubeni, akhangelane le-efodi.+ 27 Kumele wenze amanye amaringi egolide amancane amabili ngaphambi kwe-efodi lapho okuhlangana khona ibhanti kanye le-efodi,+ ngaphansi kweziqephu ezimbili ezisemahlombe, phezudlwana kwebhanti elelukiweyo. 28 Isikhwama sesifubeni kumele sibanjwe ngentambo eluhlaza okwesibhakabhaka. Intambo le yiyo ezahlanganisa amaringi aso lawe-efodi ukuze sihlale sisendaweni yaso phezu kwe-efodi, ngaphezu kwebhanti elelukiweyo.
29 “U-Aroni kumele athwale amabizo amadodana ka-Israyeli phezu kwesikhwama sesifubeni esisetshenziswa ukwahlulela, sibe phezu kwenhliziyo yakhe nxa engena eNdaweni Engcwele ukuze kube yisikhumbuzo zikhathi zonke phambi kukaJehova. 30 Faka i-Urimi leThumimi+ esikhwameni sesifubeni esizasetshenziswa ukwahlulela njalo izinto lezi kumele zibe phezu kwenhliziyo ka-Aroni nxa esiza phambi kukaJehova. Kumele athwale izinto lezi azazisebenzisa nxa esahlulela abako-Israyeli, zibe phezu kwenhliziyo yakhe zikhathi zonke phambi kukaJehova.
31 “Kuzamele wenzele i-efodi ijazi elingelamikhono ngohali+ oluluhlaza okwesibhakabhaka. 32 Phakathi laphakathi kumele libe lesikhala sokungenisa ikhanda. Umaluki kumele athungele umphetho ogombolozele isikhala leso. Isikhala leso kumele sibe njengesejazi elenziwe ngensimbi ukuze ijazi lingadabuki. 33 Ngaphansi emphethweni walo kumele wenze imiceciso enjengamaharinathi ngohali oluluhlaza okwesibhakabhaka, lewulu eyibubende kanye lohali olubomvu njalo kumele kulandelane lamabhera amancane enziwe ngegolide. 34 Kumele kufakwe ibhera yegolide leharinathi kulandelane, kube yibhera yegolide leharinathi njalo kugombolozele wonke umphetho wejazi elingelamikhono. 35 U-Aroni kumele aligqoke nxa esenza inkonzo yakhe njalo umsindo wokukhala kwamabhera la kumele uzwakale nxa engena endaweni engcwele phambi kukaJehova lalapho ephuma ukuze angafi.+
36 “Kumele wenze icence elicazimulayo ngegolide elicengekileyo, ubusubhala kulo njengokwenziwa nxa umuntu efaka uphawu lwesidindo, uthi: ‘Ubungcwele ngobukaJehova.’+ 37 Kumele ulibophele eqhiyeni+ ngentambo eluhlaza okwesibhakabhaka njalo kumele lihlale liphambili eqhiyeni. 38 Kumele libe sebunzini lika-Aroni njalo kuzabuzwa yena nxa umuntu angenza icala, aphambanise izinto+ ezingcwele, ezingcweliswa ngabako-Israyeli nxa benikela ngazo ukuthi zibe yizipho ezingcwele. Kufanele lihlale lisebunzini lakhe ukuze uJehova abamukele.
39 Kumele uthunge isigqoko esiyisikotshi ngelineni elohlonzi, wenze leqhiye ngelineni elohlonzi njalo wenze lebhanti+ elelukiweyo.
40 “Kumele wenzele amadodana+ ka-Aroni izigqoko lamabhanti kanye lokokugqoka ekhanda okuhle futhi okuzabenza babe lesithunzi.+ 41 Uzagqokisa umnewenu u-Aroni lamadodana akhe, ubagcobe,*+ ubabeke+ ukuba ngabaphristi njalo ubangcwelise, babe ngabaphristi bami. 42 Kanti njalo kumele ubenzele amabhulugwe amafitshane ngelineni ukuze bavale ubunqunu+ babo. Kumele asukele ekhalweni esiyafika emlenzeni. 43 U-Aroni lamadodana akhe kumele bagqoke izinto lezi nxa besiza etendeni lokuhlangana kumbe besondela e-alithareni bezokwenza inkonzo endaweni engcwele. Lokhu kuzabenza bangabi lecala futhi bangafi. Lo ngumlayo ozahlala usebenza kokuphela kuye lakuzizukulwane zakhe ezizalandela ngemva kwakhe.
29 “Nanku okumele ukwenze ukuze ubangcwelise babe ngabaphristi bami: Thatha ijongosi kanye lenqama+ ezimbili ezingelasici, 2 lesinkwa esingelamvubelo, lezinkwa ezingelamvubelo eziyisigombolozi ezihlanganiswe lamafutha+ kanye lezinkwa ezingelamvubelo eziyisipatalala ezigcotshwe amafutha. Kumele uzipheke ngefulawa yengqoloyi ecolekileyo, 3 ubusuzifaka ebhasikitini uzilethe ziphakathi kwayo,+ ulethe lejongosi kanye lenqama ezimbili.
4 “Buya lo-Aroni lamadodana akhe emnyango wetende lokuhlangana+ ubagezise ngamanzi.+ 5 Ngemva kwalokho thatha izigqoko+ ugqokise u-Aroni. Kumele umgqokise isigqoko lejazi elingelamikhono eligqokwa le-efodi, le-efodi, lesikhwama sesifubeni futhi ubophele ibhanti elelukiweyo ekhalweni+ lwakhe liqine. 6 Kumele ufake leqhiye ekhanda lakhe, ufake lophawu lokuzinikela olungcwele* eqhiyeni+ leyo, 7 ubusuthatha amafutha angcwele*+ uwathele ekhanda lakhe umgcobe.+
8 “Ngemva kwalokho sondeza amadodana akhe uwagqokise izigqoko+ ezinde, 9 ubusubopha u-Aroni lamadodana akhe ngamabhanti, ubafake lokokugqoka ekhanda. Ubuphristi buzakuba ngobabo njalo lo ngumlayo ozahlala usebenza kokuphela.+ Le yiyo indlela okumele ubeke ngayo u-Aroni lamadodana akhe ukuthi babe ngabaphristi.*+
10 “Nxa usuqedile usungaletha-ke ijongosi phambi kwetende lokuhlangana njalo u-Aroni lamadodana akhe bazabeka izandla zabo phezu kwekhanda lalo.+ 11 Kumele uhlabe ijongosi lelo phambi kukaJehova emnyango wetende lokuhlangana.+ 12 Thatha elinye igazi lejongosi ngomunwe wakho ulininde empondweni ze-alithare,+ eliseleyo ubusulithela phansi kwe-alithare.+ 13 Ngemva kwalokho uthathe lonke idanga*+ elembese amathumbu, lamafutha aphezu kwesibindi, lezinso ezimbili kanye lamafutha azo, ubusukutshisa konke kuthunqe phezu kwe-alithare.+ 14 Kodwa inyama yejongosi lesikhumba salo kanye lomswane walo kumele ukutshise ngomlilo phandle kwezihonqo. Ijongosi leli lingumnikelo wesono.
15 “Ngemva kwalokho thatha inqama eyodwa njalo u-Aroni lamadodana akhe kumele babeke izandla zabo phezu kwekhanda layo.+ 16 Hlaba inqama leyo ubusuthatha igazi layo ulifafaze kuwo wonke amacele e-alithare.+ 17 Quma inqama ibe yiziqa, ugezise amathumbu+ ayo lamangqina, ubusubeka kuhle iziqa zakhona kanye lenhloko yayo. 18 Kumele utshise yonke inqama leyo, uyenze ithunqe e-alithareni. Ingumnikelo wokutshiswa oya kuJehova, uqhatshi olumnandi+ kuye. Ingumnikelo otshiselwa uJehova ngomlilo.
19 “Ngemva kwalokho kumele uthathe enye inqama njalo u-Aroni lamadodana akhe kumele babeke izandla zabo phezu kwekhanda layo.+ 20 Hlaba inqama leyo uthathe elinye igazi layo ulininde endlebeni ka-Aroni esesandleni sokudla, lasendlebeni zamadodana akhe ezisesandleni sokudla, lasezithupheni zabo ezisesandleni sokudla, lasemazwaneni amakhulu angakwesokudla. Ngemva kwalokho ufafaze elinye igazi kuwo wonke amacele e-alithare, 21 ubusuthatha elinye igazi elise-alithareni kanye lamanye amafutha angcwele+ uchele u-Aroni, uchele lezigqoko zakhe, uchele lamadodana akhe kanye lezigqoko zawo ukuze yena lezigqoko zakhe lamadodana akhe lezigqoko zawo babe ngcwele.+
22 “Ngemva kwalokho thatha amafutha enqama, lamafutha asemsileni, ledanga* elembese amathumbu, lamafutha aphezu kwesibindi, lezinso ezimbili lamafutha azo+ kanye lomlenze wesokudla ngoba inqama le ngeyokubekwa+ kwabaphristi. 23 Thatha lesinkwa esiyindingilizi, lesinkwa esiyisigombolozi esilamafutha kanye lesinkwa esiyisipatalala esithethwe ebhasikitini elezinkwa ezingelamvubelo ephambi kukaJehova. 24 Zonke izinto lezi kumele uzibeke ezandleni zika-Aroni lasezandleni zamadodana akhe, njalo kumele uzizunguze ukuze zibe ngumnikelo wokuzunguzwa phambi kukaJehova. 25 Ngemva kwalokho kumele uthathe izinto lezi ezandleni zabo uzitshise e-alithareni phezu komnikelo wokutshiswa, kube luqhatshi olumnandi phambi kukaJehova. Lokhu kungumnikelo otshiselwa uJehova ngomlilo.
26 “Ubusuthatha-ke isifuba senqama yokubekwa+ kwabaphristi, enikelelwa u-Aroni, usizunguze sibe ngumnikelo wokuzunguzwa phambi kukaJehova futhi sizakuba yisabelo sakho. 27 Kumele ungcwelise isifuba somnikelo wokuzunguzwa lomlenze wesabelo esingcwele esizunguziweyo njalo esithethwe enqameni yokubekwa+ kuka-Aroni lamadodana akhe ukuthi babe ngabaphristi. 28 Izinto lezi kumele zibe ngezika-Aroni lamadodana akhe, kube ngumlayo ozahlala ukhona okumele ulandelwe ngabako-Israyeli ngoba ziyisabelo esingcwele. Zizakuba yisabelo esingcwele okumele sinikelwe ngabako-Israyeli.+ Ziyisabelo sabo esingcwele esiphiwa uJehova sivela emihlatshelweni yabo yobudlelwano.+
29 “Izigqoko+ zika-Aroni ezingcwele zizasetshenziswa ngamadodana+ akhe azangena esikhundleni sakhe nxa esegcotshwa futhi ebekwa ukuthi abe ngabaphristi. 30 Umphristi ozangena esikhundleni sakhe ovela kumadodana akhe njalo ongena etendeni lokuhlangana ezokwenza inkonzo endaweni engcwele uzazigqoka okwamalanga ayisikhombisa.+
31 “Thatha inqama yokubekwa kwabaphristi uxhwathise inyama yayo endaweni engcwele.+ 32 U-Aroni lamadodana akhe bazakudla+ inyama yenqama leyo lesinkwa esisebhasikitini emnyango wetende lokuhlangana. 33 Kumele badle izinto ezinikelwe ngesikhathi behlawulelwa ukuze babekwe ukuthi babe ngabaphristi njalo bangcweliswe. Kodwa umuntu ongelamvumo* yokuzidla akumelanga azidle ngoba zingcwele.+ 34 Nxa kulenyama yomhlatshelo wokubekwa kwabaphristi kanye lesinkwa okusele kwaze kwaba sekuseni, kumele likutshise ngomlilo+ konke okuseleyo. Akumelanga kudliwe ngoba kungcwele.
35 “Lokhu yikho okumele ukwenze ku-Aroni lamadodana akhe, ulandela konke engikutshele khona. Uzathatha amalanga ayisikhombisa ukuthi ubabeke babe ngabaphristi.*+ 36 Uzanikela inkunzi yomnikelo wesono nsuku zonke ukuze ibe ngumnikelo wokuhlawulelwa. Kumele uhlawulele i-alithare ukuze ulihlambulule esonweni njalo uthele amafutha kulo ukuze ulingcwelise.+ 37 Uzathatha amalanga ayisikhombisa usenzela i-alithare umhlatshelo wokuhlawulelwa njalo kumele ulingcwelise ukuze libe ngcwele kakhulu.+ Loba ngubani obamba i-alithare kumele abe ngcwele.
38 “Nanku okumele uhlale unikela ngakho e-alithareni: nsuku zonke+ kumele unikele ngenqama ezimbili ezilomnyaka owodwa. 39 Nikela inqama eyodwa ekuseni, enye unikele ngayo sekuhwalala.*+ 40 Inqama yokuqala izanikelwa lefulawa ecolekileyo eyingxenye yetshumi ye-efa* ehlanganiswe lamafutha acengekileyo ayingxenye yehini* eyodwa kwezine kanye lomnikelo wokunathwayo wewayini elingana lengxenye yehini eyodwa kwezine. 41 Uzanikela ngenqama yesibili sekuhwalala, kanye lomnikelo wamabele, lomnikelo wokunathwayo okufanana lalokho onikele ngakho ekuseni. Uzakunikela kube luqhatshi olumnandi, umnikelo otshiselwa uJehova ngomlilo. 42 Kuzo zonke izizukulwane zenu, lo kuzakuba ngumnikelo wokutshiswa owenziwa zikhathi zonke emnyango wetende lokuhlangana, phambi kukaJehova, lapho engizaziveza khona kini ukuze ngikhulume lawe khonapho.+
43 “Ngizaziveza kuma-Israyeli kuleyondawo njalo izangcweliswa yinkazimulo+ yami. 44 Ngizangcwelisa itende lokuhlangana kanye le-alithare, ngingcwelise lo-Aroni lamadodana+ akhe ukuze babe ngabaphristi bami. 45 Ngizahlala phakathi kwabantu bako-Israyeli njalo ngizakuba nguNkulunkulu wabo.+ 46 Bazakwazi sibili ukuthi nginguJehova uNkulunkulu wabo owabakhipha elizweni laseGibhithe ukuze ngihlale phakathi kwabo.+ NginguJehova uNkulunkulu wabo.
30 “Kumele wenze i-alithare okuzatshiselwa kulo impepha,+ ulenze ngezigodo zesinga.+ 2 Kumele lilingane amacele wonke womane, libe yingalo* eyodwa ubude lengalo eyodwa ububanzi futhi libe zingalo ezimbili ukuphakama. Impondo zalo zizabambana lalo.+ 3 Kumele ulihuqe ngegolide elicengekileyo phezulu, lasemaceleni wonke, lasempondweni zalo njalo ulenzele umqolo wegolide ozaligombolozela phezulu. 4 Uzalenzela lamaringi amabili egolide abe ngaphansi komqolo walo, emaceleni amabili akhangeleneyo. Yiwo azabamba izigodo zokulithwala. 5 Baza izigodo zesinga uzihuqe ngegolide. 6 Kumele ufake i-alithare phambi kwekhetheni leNgcwelengcwele ukuze libe seduze kwebhokisi loBufakazi.+ Ngizaziveza kuwe+ khonapho phezu kwesivalo sebhokisi loBufakazi.
7 “U-Aroni+ uzatshisa impepha+ enukelelayo e-alithareni,+ ayithunqise phezu kwalo nxa eselungisa izibane+ ekuseni nsuku zonke. 8 U-Aroni uzaphinda atshise impepha nxa eselumathisa izibane sekuhwalala.* Lo ngumnikelo wempepha elizawenza zikhathi zonke phambi kukaJehova kuzo zonke izizukulwane zenu. 9 Akumelanga litshisele kulo impepha engavunyelwayo+ loba umnikelo wokutshiswa kumbe umnikelo wamabele, futhi akumelanga lithele umnikelo wokunathwayo kulo. 10 Kanye ngomnyaka+ u-Aroni kumele athathe elinye igazi lomnikelo wesono alininde empondweni ze-alithare ukuze alihlawulele.+ Lokhu kumele akwenze kanye ngomnyaka kuzo zonke izizukulwane zenu ukuze angcwelise i-alithare. Phela lingcwele kakhulu kuJehova.”
11 UJehova wasesithi kuMosi: 12 “Loba nini lapho ozabala khona abantu, ubale amadodana ako-Israyeli,+ ngamunye wabo kumele ahlawulele impilo yakhe kuJehova ngalesosikhathi sokubalwa kwabantu. Lokhu kwenzelwa ukuthi bangehliselwa uhlupho nxa sebebalwa. 13 Nanku okuzanikelwa yibo bonke ababaliweyo: ingxenye yeshekheli,* kulinganiswa ngeshekheli yendawo engcwele.*+ Ishekheli lilingana lamagera* angu-20. Ingxenye yeshekheli yiyo engumnikelo ozaphiwa uJehova.+ 14 Bonke ababaliweyo abaleminyaka engu-20 kusiya phezulu bazakhipha umnikelo kaJehova.+ 15 Nxa umuntu ekhipha umnikelo kaJehova ukuze ahlenge impilo yakhe, onothileyo akumelanga akhiphe okunengi, lomyanga akumelanga akhiphe okungaphansi kwengxenye yeshekheli.* 16 Kumele uthathe imali yesiliva eyomhlatshelo wokuhlawulelwa izono ekhitshwe ngabako-Israyeli, ubusunikela ngayo ukuthi isetshenziswe enkonzweni yetende lokuhlangana, ukuze ibe yisikhumbuzo phambi kukaJehova ebantwini bako-Israyeli ukuze impilo zabo zihlengwe.”
17 UJehova waphinda wakhuluma loMosi wathi: 18 “Yenza inditshi yekhopha, wenze lesisekelo sayo.+ Ubusuyibeka phakathi laphakathi kwetende lokuhlangana kanye le-alithare, uthele amanzi phakathi kwayo.+ 19 U-Aroni lamadodana akhe bazageza izandla lenyawo zabo khonapho.+ 20 Kumele bageze ngamanzi ukuze bangafi nxa besiya etendeni lokuhlangana loba besiya e-alithareni ukuyakwenza inkonzo yabo lokuyanikela iminikelo etshiselwa uJehova ngomlilo ukuze intuthu ithunqe. 21 Kumele bageze izandla lenyawo zabo ukuze bangafi futhi lo ngumlayo ozahlala ukhona okumele bawulandele, yena labantwabakhe kuzo zonke izizukulwane zabo.”+
22 UJehova waqhubeka ekhuluma loMosi wathi: 23 “Ngemva kwalokho thatha amakha anukelela kamnandi: imure ewomileyo engamashekheli angu-500, lengxenye yesilinganiso leso yesinamoni enukelela kamnandi engamashekheli angu-250 kanye lamashekheli angu-250 ekhalamusi enukelelayo, 24 kanye lamashekheli ekhasiya angu-500 nxa kulinganiswa ngeshekheli yendawo engcwele,*+ lamafutha ama-oliva agcwala ihini* eyodwa. 25 Ngemva kwalokho, yenza amafutha angcwele futhi kumele ahlanganiswe+ ngobungcitshi. Kumele kube ngamafutha angcwele.
26 “Kumele ugcobe ngawo itende lokuhlangana,+ lebhokisi loBufakazi, 27 letafula kanye lezitsha zayo, loluthi lwesibane kanye lezitsha zalo, le-alithare lempepha, 28 le-alithare lomnikelo wokutshiswa kanye lezitsha zalo zonke, lenditshi kanye lesisekelo sayo. 29 Izinto lezi kumele uzingcwelise ukuze zibe ngcwele kakhulu.+ Loba ngubani ozazithinta kumele abe ngcwele.+ 30 Kanti njalo uzagcoba u-Aroni+ lamadodana akhe,+ ubangcwelise ukuze babe ngabaphristi bami.+
31 “Uzakhuluma labako-Israyeli uthi, ‘La kumele aqhubeke engamafutha okugcoba angcwele kuzo zonke izizukulwane zenu.+ 32 Akumelanga agcotshwe emzimbeni womuntu njalo akumelanga lenze loba yini ehlanganiswe njengawo. Amafutha la angcwele njalo kumele aqhubeke engcwele kini. 33 Loba ngubani owenza amafutha anjengawo, abesegcoba amanye akhona emuntwini okungelamvumo* ukuthi agcotshwe ngawo kumele abulawe.’”+
34 UJehova wasesithi kuMosi: “Thatha izilinganiso ezilinganayo zamakha+ la alandelayo: isitakethe, le-onika, legalibhanami enukelelayo kanye lenhlaka yokwenza impepha. 35 Yenza impepha+ ngezinto lezi futhi kumele zihlanganiswe ngobungcitshi, kube yimpepha enukelelayo efakwe isawudo,+ ehlanzekileyo futhi engcwele. 36 Kumele uchole enye yakhona ibe yimpuphu ecolekileyo, ubusufaka enye yakhona phambi koBufakazi etendeni lokuhlangana lapho engizaziveza khona kuwe. Kumele ibe ngcwele kakhulu kini. 37 Akumelanga lizenzele enye impepha enziwe ngezinto lezi+ lifuna ukuzisebenzisela yona. Kumele liyibone iyinto engcwele kuJehova. 38 Loba ngubani ozakwenza loba yini efanana layo ukuze akholise ukunukelela kwayo kumele abulawe.”
31 UJehova waqhubeka ekhuluma loMosi wathi: 2 “Sengikhethe* uBhezaleli+ indodana ka-Uri, indodana kaHuri owesizwana sakoJuda.+ 3 Ngizamgcwalisa ngomoya wami ngimuphe ukuhlakanipha lokuzwisisa kanye lolwazi lwayo yonke imisebenzi yobungcitshi, 4 ukuze enze izinto ngobuciko, asebenze ngegolide, lesiliva, lekhopha, 5 abaze amatshe+ aligugu, awahlele kuhle endaweni zawo njalo abaze yonke imihlobo yezinto ezenziwe ngezigodo.+ 6 Kanti njalo sengibeke u-Oholiyabhi+ indodana ka-Ahisamakhi owesizwana sakoDani ukuthi amncedise. Sengifaka ukuhlakanipha ezinhliziyweni zabo bonke abazingcitshi ukuze benze konke lokhu engikutshele+ khona, okugoqela: 7 itende lokuhlangana,+ lebhokisi loBufakazi+ kanye lesivalo+ esiphezu kwalo, lazo zonke nje impahla zetende, 8 itafula+ lezitsha zayo, loluthi lwesibane olwenziwe ngegolide elicengekileyo kanye lezitsha+ zalo zonke, le-alithare lokutshisela impepha,+ 9 le-alithare lomnikelo wokutshiswa+ kanye lazo zonke izitsha zalo, lenditshi kanye lesisekelo sayo,+ 10 lezigqoko ezithungwe kuhle, lezigqoko ezingcwele zika-Aroni umphristi, lezamadodana akhe ukuze abe ngabaphristi,+ 11 lamafutha angcwele, lempepha enukelelayo yendawo engcwele.+ Bazakwenza zonke izinto engikutshele ukuthi zenziwe.”
12 UJehova waphinda wathi kuMosi: 13 “Khuluma labako-Israyeli uthi kubo, ‘Wobani leqiniso lokuthi liyawagcina amasabatha ami+ ngoba lokhu kuluphawu phakathi kwami lani kuzo zonke izizukulwane zenu ukuze likwazi ukuthi mina Jehova ngiyalingcwelisa. 14 Kumele ligcine iSabatha ngoba lingcwele kini.+ Loba ngubani olingcolisayo kumele abulawe. Nxa umuntu angenza umsebenzi ngalelolanga kumele abulawe.+ 15 Imisebenzi lingayenza ngamalanga ayisithupha kodwa ilanga lesikhombisa lisabatha lokuphumula okupheleleyo,+ lingcwele kuJehova. Loba ngubani ozakwenza umsebenzi ngelanga leSabatha kumele abulawe. 16 Abako-Israyeli kumele bagcine iSabatha; kumele balinanze iSabatha kuzo zonke izizukulwane zabo. Lesi kuzakuba yisivumelwano esizahlala okwesikhathi eside. 17 ISabatha lizahlala liluphawu phakathi kwami labantu bako-Israyeli+ ngoba ngamalanga ayisithupha uJehova wenza amazulu lomhlaba wasephumula ngelanga lesikhombisa, wama ukusebenza.’”+
18 Wathi eqeda nje ukukhuluma loMosi entabeni iSinayi wasemnika izibhebhedu ezimbili zamatshe oBufakazi,+ izibhebhedu zamatshe ezibhalwe ngomunwe+ kaNkulunkulu.
32 Kwathi abantu bebona ukuthi uMosi wayesehambe nya entabeni,+ bayabuthana ku-Aroni bathi kuye: “Sukuma usenzele unkulunkulu ozahamba phambi kwethu+ ngoba asikwazi osekwenzakale emuntwini lo uMosi, owasikhokhelayo siphuma eGibhithe.” 2 U-Aroni wathi kubo: “Khiphani amacici+ egolide asendlebeni zabomkenu lamadodana enu lamadodakazi enu liwalethe kimi.” 3 Abantu bonke baqalisa-ke ukukhipha amacici egolide ayesendlebeni zabo bawasa ku-Aroni. 4 Ngakho wathatha igolide ababelilethe kuye wenza ngalo isithombe sethole+ esebenzisa itshizela. Abantu basebeqalisa ukuthi: “Lo nguye uNkulunkulu wakho Israyeli owakukhipha elizweni laseGibhithe.”+
5 U-Aroni wathi ebona okwakusenzakala wakha i-alithare phambi kwaso wasememeza wathi: “Kusasa kuzakuba lomkhosi kaJehova.” 6 Yikho ngelanga elilandelayo bavuka ekuseni kakhulu baqala ukunikela iminikelo yokutshiswa baletha lemihlatshelo yobudlelwano. Ngemva kwalokho abantu bahlala phansi badla banatha, basebesukuma bazikholisela.+
7 UJehova wasesithi kuMosi: “Yehla ubuyele phansi ngoba abantu bakho owabakhupha elizweni laseGibhithe sebexhwalile.+ 8 Baphambuke masinyane endleleni engabalaya ukuthi bahambe ngayo,+ bazenzela isithombe sethole njalo baqhubeka bekhothama kuso, benikela lemihlatshelo kuso besithi, ‘Lo nguye uNkulunkulu wakho Israyeli owakukhipha elizweni laseGibhithe.’” 9 UJehova waphinda wathi kuMosi: “Sengibonile ukuthi abantu laba bayiziqholo sibili.*+ 10 Ulaka lwami luyavutha, ngakho ngiyekela ngibatshabalalise, besengisenza wena+ ube yisizwe esikhulu.”
11 UMosi wasencenga uJehova uNkulunkulu+ wakhe wathi: “Awu Jehova, kungani kumele wehlisele ulaka lwakho oluvuthayo ebantwini bakho, wena usubakhiphe elizweni laseGibhithe ngamandla amakhulu langesandla+ esilamandla. 12 Kungani kumele abaseGibhithe bathi, ‘Wayevele ehlose okubi ngesikhathi ebasusa lapha. Wayefuna ukubabulalela ezintabeni abatshabalalise baphele nya emhlabeni.’+ Yehlisa ulaka lwakho njalo ucabangisise* ngohlupho osufuna ukululetha ebantwini bakho. 13 Khumbula izinceku zakho u-Abrahama lo-Isaka lo-Israyeli owafunga kuzo wena ngokwakho wathi: ‘Ngizakwandisa izizukulwane* zenu zibe njengezinkanyezi zamazulu+ njalo ngizanika izizukulwane* zenu lonke ilizwe leli ukuze zilithathe libe ngelazo kokuphela.’”+
14 Ngakho uJehova watshintsha ingqondo* ngohlupho ayethe uzaluletha ebantwini bakhe.+
15 Ngemva kwalokho uMosi waphenduka njalo wehla entabeni ethwele amatshe amabili oBufakazi+ esandleni sakhe.+ Amatshe la ayebhalwe emaceleni womabili, ebhalwe ngapha langapha. 16 Amatshe la ayengumsebenzi kaNkulunkulu njalo okwakulotshwe kuwo+ kwakubhalwe nguNkulunkulu ngokwakhe. 17 UJoshuwa wathi esizwa umsindo wokuklabalala kwabantu wathi kuMosi: “Kuzwakala umsindo wempi ezihonqweni.” 18 Kodwa uMosi wathi kuye:
“Ayisiwo msindo wokuhlabela kwabantu abanqobileyo,
Njalo ayisiwo msindo wokukhala kwabantu abanqotshiweyo;
Ngizwa olunye uhlobo lomsindo wokuhlabela.”
19 UMosi wathi esezafika ezihonqweni wabona ithole+ kanye lokugida ababekwenza, ulaka lwakhe lwavutha, waphosela phansi izibhebhedu zamatshe ayesezandleni zakhe zaphahlazeka zaba yizicucu khonapho phansi kwentaba.+ 20 Wasethatha ithole ababelenzile walitshisa ngomlilo njalo walichola laba yimpuphu+ waseyithela emanzini wathi abako-Israyeli banathe lawomanzi.+ 21 UMosi wasesithi ku-Aroni: “Abantu laba bakwenzeni uze ulethe isono esikhulu kangaka kubo?” 22 U-Aroni waphendula wathi: “Ungathukutheli nkosi yami. Lawe uyazazela ukuthi abantu laba bayakuthanda ukwenza okubi.+ 23 Bathe kimi, ‘Senzele unkulunkulu ozahamba phambi kwethu ngoba asikwazi osekwenzakale emuntwini lo uMosi, owasikhokhelayo siphuma eGibhithe.’+ 24 Yikho ngithe kubo, ‘Loba ngubani olegolide kalikhiphe alilethe kimi.’ Ngasengiliphosela emlilweni kwaphuma ithole leli.”
25 UMosi wabona ukuthi abantu babengasabambeki ngoba u-Aroni wayebayekele bazenzela umathanda baze baba lihlazo phambi kwezitha zabo. 26 UMosi wasesima egedini lezihonqo wathi: “Loba ngubani osekela uJehova keze kimi!”+ Wonke amaLevi asebuthana kuye. 27 Wasesithi kuwo: “Nanku okutshiwo nguJehova uNkulunkulu ka-Israyeli, ‘Ngamunye wenu kahlome ngenkemba yakhe adabule phakathi kwezihonqo kusukela kwelinye igedi kusiya kwelinye, abulale umfowabo lomakhelwane wakhe kanye lomngane wakhe oseduze.’”+ 28 AmaLevi akwenza okwakukhulunywe nguMosi. Ngakho mhlalokho kwabulawa amadoda angaba ngu-3 000. 29 Ngemva kwalokho uMosi wathi kuwo: “Zehlukaniseleni ukwenza inkonzo kaJehova lamuhla ngoba ngamunye wenu umelane lendodana yakhe kanye lomfowabo.+ Lamuhla uNkulunkulu uzalibusisa.”+
30 Ngelanga elilandelayo uMosi wathi ebantwini: “Lenze isono esikhulu kakhulu. Khathesi ngizakuya kuJehova ngiyemncenga, mhlawumbe angalithethelela isono+ senu.” 31 Ngakho uMosi wabuyela kuJehova wafika wathi: “Abantu laba benze isono esikhulu kakhulu. Bazenzele unkulunkulu ngegolide.+ 32 Nxa ufuna, bathethelele isono+ sabo. Kodwa nxa ungasoze ubathethelele, ngicela ungicitshe ebhukwini lakho olilobileyo.”+ 33 UJehova wasesithi kuMosi: “Loba ngubani owenze isono kimi ngizamcitsha ebhukwini lami. 34 Khathesi hamba, ukhokhele abantu laba ubase endaweni engikutshele yona. Ingilosi yami izahamba phambi kwakho+ njalo ngelanga engizabahlola ngalo ngizabajezisa ngenxa yesono abasenzileyo.” 35 UJehova wasebajezisa abantu ngenxa yethole ababelenzile, lelo elalenziwe ngu-Aroni.
33 UJehova waphinda wathi kuMosi: “Suka uhambe labantu laba owabakhipha elizweni laseGibhithe. Yanini elizweni engafunga ngalo ku-Abrahama lo-Isaka loJakhobe ngathi, ‘Ngizalinika inzalo yakho.’+ 2 Ngizathuma ingilosi phambi kwenu,+ ngidudule amaKhenani, lama-Amori, lamaHithi, lamaPherizi, lamaHivi kanye lamaJebusi.+ 3 Yanini elizweni eligeleza uchago loluju.+ Kodwa mina angisoze ngihambe lani ngoba lingabantu abayiziqholo,*+ phela ngingacina ngilitshabalalisa endleleni.”+
4 Abantu bathi besizwa amazwi la abuhlungu baqalisa ukukhala futhi kakho loyedwa owagqoka imiceciso yakhe. 5 UJehova wathi kuMosi: “Tshela abako-Israyeli uthi, ‘Lingabantu abayiziqholo.*+ Ngesikhatshana nje ngingadabula phakathi kwenu ngilitshabalalise.+ Ngakho lingayigqoki imiceciso yenu njengoba ngisacabanga ukuthi ngilenzeni.’” 6 Yikho kusukela entabeni iHorebhi kusiya phambili ama-Israyeli ayengasayigqoki* imiceciso yawo.
7 UMosi wasethatha itende lakhe wayalimisa ngaphandle kwezihonqo. Walimisa bucwadlana lezihonqo, waselibiza ngokuthi litende lokuhlangana. Wonke umuntu owayefuna ukubuza kuJehova+ wayesiya etendeni lokuhlangana elaliphandle kwezihonqo. 8 Kwakusithi nxa uMosi ephuma nje esiya etendeni bonke abantu basukume bame eminyango yamatende abo njalo babemkhangela aze ayengena etendeni. 9 Kwakusithi nxa uMosi engena nje etendeni, insika yeyezi+ yehle iyekuma emnyango walo ngesikhathi uNkulunkulu esakhuluma loMosi.+ 10 Bonke abantu babesithi bangabona insika yeyezi imi emnyango wetende, ngamunye wabo akhothame emnyango wetende lakhe. 11 UJehova wayekhuluma loMosi ubuso ngobuso+ njengoba nje umuntu engakhuluma lomunye umuntu bekhangelene. UMosi wayesithi nxa esephendukile ezihonqweni, inceku yakhe uJoshuwa+ indodana kaNuni, eyayingumsizi+ wakhe yayiqhubeka isetendeni.
12 UMosi wasesithi kuJehova: “Nguwe othe kimi, ‘Khokhela abantu laba,’ kodwa awungitshelanga ukuthi ngubani ozamthuma ukuthi ahambe lami. Uphinde wathi, ‘Ngikwazi ngebizo* futhi usuthole umusa kimi.’ 13 Nxa ngithole umusa kuwe, ngicela ungifundise indlela+ zakho ukuze ngikwazi njalo ngiqhubeke ngithola umusa kuwe. Khumbula lokuthi abantu+ laba bayisizwe sakho.” 14 Ngakho yena wathi: “Mina ngokwami ngizahamba lawe+ njalo ngizakunika ukuphumula.”+ 15 UMosi wasesithi kuye: “Nxa ungasoze uhambe lathi ungasisusi endaweni le. 16 Abantu bazakwazi njani ukuthi mina labantu bakho sithole umusa kuwe? Phela nxa ungahamba lathi+ kuzakhanya ukuthi mina labantu bakho sehlukene labo bonke abantu abakhona emhlabeni.”+
17 UJehova wasesithi kuMosi: “Ngizakwenza lalokho okucelayo ngoba uthole umusa kimi njalo ngikwazi ngebizo.” 18 UMosi wasesithi: “Ngicela ungitshengise inkazimulo yakho.” 19 Kodwa yena wathi kuye: “Ngizakwenza ukuthi ubuhle bami budlule phambi kobuso bakho njalo ngizamemezela ibizo likaJehova+ phambi kwakho. Ngizakuba lomusa kulowo engifuna ukuba lomusa kuye, ngibe lesihawu kulowo engifuna ukuba lesihawu kuye.”+ 20 Waseqhubeka wathi: “Awusoze ububone ubuso bami ngoba akulamuntu ongangibona aphile.”
21 UJehova waphinda wathi: “Nansi indawo eduze kwami. Mana phezu kwedwala elikhonapho. 22 Nxa inkazimulo yami isidlula, ngizakufaka engoxweni yedwala njalo ngikusithe ngesandla sami ngize ngidlule. 23 Ngemva kwalokho ngizasusa isandla sami ubusubona umhlane wami. Kodwa ubuso bami ngeke bubonwe.”+
34 UJehova wasesithi kuMosi: “Baza amatshe amabili ayizibhebhedu anjengawokuqala.+ Ngizabhala kuwo amazwi abebhalwe ematsheni+ okuqala owaphahlazileyo.+ 2 Lungiselela ngoba kusasa ekuseni kuzamele ukhwele entabeni iSinayi uyekuma phambi kwami phezulu esiqongweni sentaba.+ 3 Kodwa akungabi lomuntu ozaqansa lawe njalo kakho okumele abonakale loba ngaphi kwentaba. Ngitsho lemihlambi yezimvu leyenkomo akumelanga idle phansi kwaleyontaba.”+
4 Ngakho uMosi wabaza amatshe amabili aba yizibhebhedu njengawokuqala, wasevuka ekuseni kakhulu wakhwela entabeni iSinayi njengoba nje uJehova wayetshilo futhi wayephethe amatshe amabili esandleni sakhe. 5 UJehova wasesehla+ ngeyezi wama laye khonapho, wamemezela ibizo likaJehova.+ 6 UJehova wadlula phambi kwakhe ememeza esithi: “UJehova, uJehova, uNkulunkulu olozwelo*+ lesihawu,+ ophuza ukuthukuthela,+ ogcwele uthando oluqotho+ kanye leqiniso,*+ 7 otshengisa uthando oluqotho kuzinkulungwane,+ oxolela amacala leziphambeko lezono.+ Kodwa kayekeli ukumjezisa umuntu olecala+ njalo ujezisa amadodana labazukulu ngenxa yecala laboyise kuze kufike kusizukulwane sesithathu lesizukulwane sesine.”+
8 Masinyane nje uMosi waguqa phansi wakhothamisa ikhanda. 9 Wasesithi: “Awu Jehova, nxa ngithole umusa kuwe ngicela uJehova ahambe lathi, abe phakathi kwethu+ lanxa singabantu abayiziqholo.*+ Sithethelele isiphambeko sethu lesono sethu,+ usithathe sibe lilifa lakho.” 10 Yena wasesithi: “Sengisenza isivumelwano lani: Ngizakwenza izinto ezimangalisayo phambi kwabo bonke abantu bakini, izinto ezingakaze zenzakale* emhlabeni wonke loba phakathi kwezizwe+ zonke. Bonke abantu elihlala phakathi kwabo bazawubona umsebenzi kaJehova ngoba engizalenzela khona kukhulu kakhulu.+
11 “Lalelani lokho engilitshela khona lamuhla.+ Sengiwaxotsha phambi kwenu ama-Amori, lamaKhenani, lamaHithi, lamaPherizi, lamaHivi kanye lamaJebusi.+ 12 Nanzelelani ukuthi alenzi isivumelwano labantu abahlala elizweni eliya kulo.+ Phela lokho kungacina kungumjibila phakathi kwenu.+ 13 Kumele lidilize ama-alithare abo, liphahlaze lensika abazikhonzayo njalo ligamule+ lezithombe zika-Ashera.* 14 Akumelanga likhothamele omunye unkulunkulu+ ngoba uJehova ufuna abantu bazinikele kuye kuphela. UnguNkulunkulu ofuna umuntu azinikele kuye kuphela.+ 15 Nanzelelani ukuthi alenzi isivumelwano labantu abahlala elizweni lelo ngoba nxa sebekhonza* onkulunkulu babo,+ benikela lemihlatshelo kubo bangacina belinxusa lani ukuthi liyekudla labo imihlatshelo yabo.+ 16 Lizacina lithatha amadodakazi abo ukuthi abe ngabafazi bamadodana enu+ njalo amadodakazi lawo azaqala ukungathembeki ngokukhonza onkulunkulu* babo abesebangela ukuthi lamadodana enu angathembeki ngokukhonza onkulunkulu* babo.+
17 “Lingazenzeli onkulunkulu bensimbi.”+
18 Kumele linanze uMkhosi Wesinkwa Esingelamvubelo.+ Lizakudla isinkwa esingelamvubelo njengoba nje ngitshilo kini. Kwenzeni lokhu okwamalanga ayisikhombisa, ngesikhathi esibekiweyo ngenyanga ka-Abhibhi*+ ngoba laphuma eGibhithe ngenyanga ka-Abhibhi.
19 “Wonke amazibulo angabafana ngawami,+ lazo zonke izifuyo ezinduna ezizalwa kuqala ngezami, kungaba yinkunzi loba imvu.+ 20 Wonke ubabhemi ozalwa kuqala kumele ahlengwe ngemvu. Kodwa nxa lingamhlenganga kumele limephule intamo. Kumele uhlenge wonke amazibulo amadodana akho.+ Kakho okumele azokuma phambi kwami elengise izandla.
21 “Yenzani imisebenzi yenu ngamalanga ayisithupha kodwa ngelanga lesikhombisa kumele liphumule.*+ Kumele liphumule lanxa kuyisikhathi sokulima loba esokuvuna.
22 “Lizananza loMkhosi Wamaviki ngesivuno senu sengqoloyi evuthwa kuqala, njalo ekupheleni komnyaka+ kufanele linanze uMkhosi Wokubutha.*
23 “Kathathu ngomnyaka, wonke amadoda aphakathi kwenu kumele azokuma phambi kweNkosi yeqiniso, uJehova uNkulunkulu ka-Israyeli.+ 24 Ngizadudula izizwe phambi kwenu,+ ngiqhelise indawo yenu njalo akulamuntu ozahawukela ilizwe lenu ngesikhathi lisiyakuma phambi kukaJehova uNkulunkulu wenu kathathu ngomnyaka.
25 “Igazi lomhlatshelo wami akumelanga linikelwe laloba yini elemvubelo.+ Umhlatshelo womkhosi wePhasika akumelanga ugcinwe kuze kube sekuseni.+
26 “Izithelo zenu zokuqala ezinhle kakhulu zomhlabathi wenu kumele lizilethe endlini kaJehova uNkulunkulu wenu.+
“Akumelanga lixhwathise izinyane lembuzi ngochago lukanina.”+
27 UJehova waseqhubeka wathi kuMosi: “Kumele ubhale phansi amazwi+ la ngoba ngenza isivumelwano lawe labantu bako-Israyeli+ ngokuvumelana lamazwi la.” 28 UMosi waqhubeka eloJehova khonapho okwamalanga angu-40 lobusuku obungu-40. Kazange adle lutho njalo kanathanga manzi.+ Amazwi esivumelwano, okutsho iMithetho Elitshumi+ wawabhala* ematsheni ayizibhebhedu.
29 UMosi wasesehla entabeni iSinayi ephethe izibhebhedu ezimbili zamatshe oBufakazi esandleni sakhe.+ Wathi esehla entabeni wayengakwazi ukuthi ubuso bakhe basebukhazimula ngenxa yokuthi wayekhulume loNkulunkulu. 30 U-Aroni labo bonke abako-Israyeli bathi bembona uMosi bananzelela ukuthi ubuso bakhe buyakhazimula futhi besaba ukusondela eduze kwakhe.+
31 Kodwa uMosi wababiza, u-Aroni labo bonke abakhokheli bako-Israyeli basebesiya kuye, uMosi wasekhuluma labo. 32 Ngemva kwalokho bonke abako-Israyeli basondela kuye, wasebanika yonke imilayo ayeyinikwe nguJehova entabeni iSinayi.+ 33 UMosi wayesithi angaqeda ukukhuluma labo avale ubuso bakhe ngeveyili.+ 34 Kodwa kwakusithi nxa uMosi engena phambi kukaJehova ukuze akhulume laye, wayelikhipha iveyili aze aphume.+ Ngemva kwalokho wayephuma ayetshela abako-Israyeli imilayo ayeyiphiwe.+ 35 Abako-Israyeli babebona ukuthi ubuso bukaMosi buyakhazimula, yikho uMosi wayevala ubuso bakhe ngeveyili aze alikhiphe esesiyakhuluma loNkulunkulu.+
35 Ngokuhamba kwesikhathi uMosi wabuthanisa bonke abantu bako-Israyeli wathi kubo: “Nanzi izinto uJehova athe kumele zenziwe:+ 2 Yenzani loba yiwuphi umsebenzi ngamalanga ayisithupha kodwa ilanga lesikhombisa kumele libe ngcwele kini, kufanele libe lisabatha likaJehova,+ ilanga lokuphumula okupheleleyo. Loba ngubani ozakwenza umsebenzi ngelanga leli kumele abulawe.+ 3 Akumelanga libase umlilo ngelanga leSabatha kuzo zonke indawo elihlala kuzo.”
4 UMosi wasekhuluma labo bonke abantu bako-Israyeli wathi: “Nanku uJehova athe kwenziwe, 5 Qoqani umnikelo phakathi kwenu elizawunika uJehova.+ Loba ngubani ozwa kusitsho enhliziyweni+ yakhe kalethe umnikelo kuJehova, kungaba ligolide, lesiliva, lekhopha, 6 lohali oluluhlaza okwesibhakabhaka, lewulu eyibubende,* lohali olubomvu, lelineni elohlonzi, loboya bembuzi,+ 7 lezikhumba zenqama ezidaywe zaba bomvu, lezikhumba zenyamazana yolwandle, lezigodo zesinga, 8 lamafutha ezibane, lebhalisamu yokwenza amafutha angcwele, leyokwenza impepha+ enukelelayo, 9 lamatshe e-onekisi lamanye amatshe azafakwa ku-efodi+ laphezu kwesikhwama sesifubeni.+
10 “‘Akuthi bonke abazingcitshi*+ babuye bazokwenza konke uJehova athe kwenziwe, 11 ithabanikeli kanye letende lalo, lesembozo salo, lengwegwe zalo, lamapulanka alo, lemithando yalo, lensika zalo lezisekelo zalo; 12 lebhokisi+ kanye lezigodo zalo,+ lesivalo,+ lekhetheni+ lokuvala; 13 letafula+ lezigodo zayo, lazo zonke izitsha zayo kanye lesinkwa sokubukiswa;+ 14 loluthi lwesibane+ lezitsha zalo, lezibane zalo, lamafutha okukhanyisa;+ 15 le-alithare lokutshisela impepha+ lezigodo zalo; lamafutha angcwele kanye lempepha enukelelayo;+ lekhetheni elizafakwa emnyango wethabanikeli; 16 le-alithare lomnikelo wokutshiswa,+ lesefa yalo yekhopha, lezigodo zalo, lazo zonke izitsha zalo; lenditshi kanye lesisekelo sayo;+ 17 lamakhetheni okugombolozela iguma,+ lezinsika zawo kanye lezisekelo zawo; lekhetheni lokuvala igedi leguma; 18 lezikhonkwane zethabanikeli kanye lezikhonkwane zeguma lentambo zazo;+ 19 lezigqoko+ ezithungwe kuhle zokwenza inkonzo endaweni engcwele, lezigqoko ezingcwele zika-Aroni+ umphristi kanye lezigqoko ezizasetshenziswa ngamadodana akhe emsebenzini wokuba ngabaphristi.’”
20 Ngakho bonke abantu bako-Israyeli basuka phambi kukaMosi. 21 Wonke umuntu owayesizwa kusitsho enhliziyweni yakhe,+ bonke nje ababezimisele ukupha baletha umnikelo wabo kuJehova ukuze usetshenziswe etendeni lokuhlangana, lakuyo yonke imisebenzi ezakwenziwa kulo kanye lokwenza izigqoko ezingcwele. 22 Bonke abesilisa labesifazana ababesizwa kusitsho enhliziyweni zabo baqhubeka bebuya. Babeletha izipenede zomceco, lamacici, lendandatho leminye nje imiceciso, lazo zonke izinto ezenziwe ngegolide. Bonke banika uJehova+ iminikelo yabo yegolide.* 23 Bonke ababelohali oluluhlaza okwesibhakabhaka, lewulu eyibubende, lohali olubomvu, lelineni elohlonzi, loboya bembuzi, lezikhumba zenqama ezidaywe zaba bomvu, lezikhumba zenyamazana yolwandle, baletha izinto lezi. 24 Bonke ababelesiliva lekhopha banikela kuJehova njalo bonke ababelezigodo zesinga ezazingasetshenziswa loba ngaphi emsebenzini lo baziletha.
25 Bonke abesifazana+ ababezingcitshi baphotha ngezandla zabo basebeletha lokho ababekwenzile, uhali oluluhlaza okwesibhakabhaka, lewulu eyibubende, lohali olubomvu, lelineni elohlonzi, 26 njalo bonke abesifazana abazingcitshi ababesizwa kusitsho enhliziyweni zabo baphotha uboya bembuzi.
27 Abakhokheli baletha amatshe e-onekisi lamanye amatshe ukuze afakwe ku-efodi, laphezu kwesikhwama sesifubeni,+ 28 kanye lebhalisamu, lamafutha okukhanyisa, lamafutha okwenza amafutha angcwele+ kanye lempepha enukelelayo.+ 29 Bonke abesilisa labesifazana ababesizwa kusitsho enhliziyweni zabo baletha okuthile ukuze kusetshenziswe emsebenzini uJehova ayetshele uMosi ukuthi wenziwe. Abako-Israyeli baletha izinto lezo zaba ngumnikelo wokuzithandela oya kuJehova.+
30 UMosi wasesithi kuma-Israyeli: “UJehova usekhethe uBhezaleli indodana ka-Uri, indodana kaHuri owesizwana sakoJuda.+ 31 Usemgcwalise ngomoya kaNkulunkulu, wamupha ukuhlakanipha lokuzwisisa kanye lolwazi lwayo yonke imisebenzi yobungcitshi, 32 ukuze enze izinto ngobuciko, asebenze ngegolide, lesiliva, lekhopha, 33 abaze amatshe aligugu, awahlele kuhle endaweni zawo njalo abaze yonke imihlobo yezinto ezenziwe ngezigodo. 34 Kanti njalo uNkulunkulu usenike uBhezaleli lo-Oholiyabhi+ indodana ka-Ahisamakhi owesizwana sakoDani ubungcitshi ukuze bafundise abanye. 35 Usebagcwalise ngobuciko*+ ukuze babe zingcitshi kuyo yonke imisebenzi yezandla kanye lokuthunga, lokweluka besebenzisa iwulu eluhlaza okwesibhakabhaka, lewulu eyibubende, lohali olubomvu, lelineni yohlonzi lokuthi benze umsebenzi womaluki. Amadoda la azakwenza yonke imisebenzi kanye lezinto ezitshiyeneyo ezenziwe ngobuciko.
36 “UBhezaleli uzasebenza lo-Oholiyabhi kanye lawo wonke amadoda azingcitshi* aphiwe ukuhlakanipha lokuzwisisa nguJehova ukuze enelise ukwenza wonke umsebenzi ongcwele uJehova athe+ wenziwe.”
2 UMosi wasebiza uBhezaleli lo-Oholiyabhi lawo wonke amadoda uJehova ayewanike ukuhlakanipha,*+ bonke ababesizwa kusitsho enhliziyweni zabo ukuthi bancedise emsebenzini lo.+ 3 Ngakho uMosi wabanika konke okwakunikelwe+ ngabako-Israyeli ukuthi kusetshenziswe emsebenzini ongcwele. Lanxa kunjalo, nsuku zonke ekuseni abantu babelokhu beletha kuye iminikelo yabo ababeyikhipha ngokuthanda kwabo.
4 Bathi sebewuqalisile umsebenzi ongcwele bonke abazingcitshi zomsebenzi babelokhu bebuya betshintshana, 5 njalo batshela uMosi bathi: “Izinto ezilethwa ngabantu sezinengi kakhulu ukwedlula lokho okufunekayo emsebenzini uJehova athe wenziwe.” 6 UMosi wasesithi kwenziwe isaziso kubo bonke abantu ezihonqweni, wathi: “Bobaba labomama lingasalethi ezinye impahla ukuthi zibe ngumnikelo ongcwele.” Ngakho abantu bamiswa ukuletha ezinye izinto. 7 Impahla eyayisikhona yayisenela wonke umsebenzi okwakumele wenziwe futhi yayisinengi okokuthi yayizacina isala.
8 Ngakho zonke ingcitshi zomsebenzi+ zenza ithabanikeli+ ngamalembu etende alitshumi enziwe ngelineni elohlonzi ephothiweyo, lohali oluluhlaza okwesibhakabhaka, lewulu eyibubende* kanye lohali olubomvu njalo wathungela* kuwo+ imiceciso yamakherubhi. 9 Ilembu ngalinye letende lalizingalo* ezingu-28 ubude lengalo ezine ububanzi. Wonke amalembu la ayelingana. 10 Wasethatha amalembu etende amahlanu wawahlanganisa aba lilembu elilodwa, waphinda wahlanganisa lamanye amahlanu aba lilembu linye. 11 Ngemva kwalokho wenza izihitshela ngohali oluluhlaza okwesibhakabhaka emphethweni welembu elisekucineni kulawo ahlanganisiweyo. Wenza okufananayo lakwamanye akhona, emphethweni welembu elisekucineni lapho ayezahlanganiswa khona. 12 Wenza izihitshela ezingu-50 emphethweni welinye ilembu letende wafaka ezinye ezingu-50 emphethweni welinye, lapho amalembu la ayezahlangana khona ukuze izihitshela ziqondane. 13 Wasesenza ingwegwe zegolide ezingu-50, wahlanganisa ngazo amalembu etende ukuze ithabanikeli libe yintonye.
14 Ngemva kwalokho wenza amanye amalembu etende ngoboya bembuzi ukuze afakwe phezu kwethabanikeli. Wenza amalembu+ angu-11. 15 Ilembu ngalinye lalizingalo ezingu-30 ubude lengalo ezine ububanzi. Wonke amalembu angu-11 ayelingana. 16 Wasehlanganisa amalembu etende amahlanu aba lilembu elilodwa, waphinda wahlanganisa lamanye ayisithupha aba lilembu elilodwa. 17 Ngemva kwalokho wenza izihitshela ezingu-50 emphethweni welembu elisekucineni lapho ayezahlanganiswa khona, wasesenza lezinye izihitshela ezingu-50 emphethweni welinye ilembu elisekucineni elalizahlanganiswa lalo. 18 Wenza lengwegwe zekhopha ezingu-50 ukuze kuhlanganiswe ngazo itende libe yintonye.
19 Wenza isembeso setende ngezikhumba zenqama ezidaywe zaba bomvu njalo phezu kwaso+ wafaka esinye esenziwe ngezikhumba zenyamazana yolwandle.
20 Wasebaza amapulanka ethabanikeli ngezigodo zesinga+ futhi ayemiswe aqonda.+ 21 Ipulanka ngalinye lalizingalo ezilitshumi ubude, ububanzi balo buyingalo eyodwa lengxenye. 22 Ngaphansi ipulanka ngalinye lalilezigxingi ezimbili eziqondeneyo. Le yiyo indlela enza ngayo wonke amapulanka ethabanikeli. 23 Ngakho wabaza amapulanka angu-20 ayezafakwa eceleni lethabanikeli elikhangele eningizimu. 24 Wenza lezisekelo zesiliva ezingu-40 ezilezikhala ukuze zifakwe ngaphansi kwamapulanka angu-20. Izisekelo ezimbili zazingaphansi kwepulanka elilodwa ukuze kungeniswe izigxingi zalo ezimbili, ezinye izisekelo ezimbili ngaphansi kwepulanka ngalinye elilandelayo ukuze kungeniswe izigxingi+ zalo ezimbili. 25 Wabaza amanye amapulanka angu-20 ayezafakwa eceleni lethabanikeli elisenyakatho, 26 wenza lezisekelo zawo zesiliva ezingu-40 ezilezikhala, izisekelo ezimbili zazingaphansi kwepulanka elilodwa, lezisekelo ezimbili ngaphansi kwepulanka ngalinye elilandelayo.
27 Engxenyeni yethabanikeli engemuva ekhangele entshonalanga wabaza amapulanka ayisithupha.+ 28 Wabaza lamapulanka amabili ayezafakwa ngemuva emakhoneni amabili ethabanikeli. 29 Amapulanka la ayehlanganiswe aba mabili kusukela phansi kuze kuyefika phezulu esongweni lokuqala. Le yiyo indlela enza ngayo amapulanka amabili ayesemakhoneni. 30 Esehlangene wonke amapulanka la ayengu-8 njalo ayelezisekelo zesiliva ezingu-16 ezilezikhala. Ngaphansi kwepulanka ngalinye kwakulezisekelo ezimbili.
31 Ngemva kwalokho wenza imithando ngezigodo zesinga, emihlanu yayingeyamapulanka akwelinye icele lethabanikeli,+ 32 eminye emihlanu ingeyamapulanka akwelinye icele lethabanikeli njalo eminye emihlanu ingeyamapulanka ethabanikeli angemuva, eceleni elisentshonalanga. 33 Wenza umthando waphakathi laphakathi owawusuka ekuqaliseni uze uyefika ekucineni njalo wawuquma phakathi kwamapulanka. 34 Wasehuqa amapulanka ngegolide, wawenzela lamaringi egolide ayezabamba imithando futhi lemithando yakhona wayihuqa ngegolide.+
35 Ngemva kwalokho wenza ikhetheni+ ngohali oluluhlaza okwesibhakabhaka, lewulu eyibubende, lohali olubomvu kanye lelineni elohlonzi ephothiweyo. Wathungela kulo+ imiceciso yamakherubhi.+ 36 Wenzela ikhetheni lelo insika ezine ngezigodo zesinga wazihuqa ngegolide njalo wenzela insika lezi izisekelo zesiliva ezine ezilezikhala kanye lamawuka egolide. 37 Wasesenza elinye ikhetheni lokuvala umnyango wetende esebenzisa uhali oluluhlaza okwesibhakabhaka, lewulu eyibubende, lohali olubomvu kanye lelineni elohlonzi ephothiweyo,+ 38 wenza lensika zalo ezinhlanu lamawuka azo. Wasehuqa izihloko zazo lezibopho* zazo ngegolide kodwa izisekelo zazo ezinhlanu zazenziwe ngekhopha.
37 UBhezaleli+ wasesenza ibhokisi+ ngezigodo zesinga. Ubude balo babuzingalo* ezimbili lengxenye, ububanzi balo buyingalo eyodwa lengxenye njalo ukuphakama kwalo kuyingalo eyodwa lengxenye.+ 2 Waselihuqa ngegolide elicengekileyo phakathi langaphandle futhi waligombolozela ngomqolo wegolide amacele wonke.+ 3 Waphinda wenzela ibhokisi amaringi egolide amane, aba ngaphezu kwenyawo zalo ezine. Amabili ayekuleli icele, amanye amabili ekwelinye icele. 4 Ngemva kwalokho wabaza izigodo zesinga wazihuqa ngegolide.+ 5 Wasehloma izigodo lezo phakathi kwamaringi asemaceleni ebhokisi ukuze zibe ngezokulithwala.+
6 Wasesenza isivalo sebhokisi ngegolide elicengekileyo,+ ubude baso babuzingalo ezimbili lengxenye, ububanzi baso buyingalo eyodwa lengxenye.+ 7 Wenza lamakherubhi+ amabili ngegolide esebenzisa isando, wawenza aba sekucineni kwesivalo+ ngapha langapha kwaso. 8 Elinye ikherubhi lalikuleli icele ekucineni, elinye likwelinye icele ekucineni. Wawenza aba sekucineni kwesivalo ngapha langapha kwaso. 9 Amakherubhi la womabili ayeyelulele impiko zawo phezulu agubuzela isivalo ngempiko zawo.+ Ayekhangelene futhi ekhotheme akhangelisa ubuso bawo phansi esivalweni.+
10 Wasesenza itafula ngezigodo zesinga.+ Ubude bayo babuzingalo ezimbili, ububanzi bayo buyingalo eyodwa njalo ukuphakama kwayo kuyingalo eyodwa lengxenye.+ 11 Waseyihuqa ngegolide elicengekileyo futhi wayicecisa ngomqolo wegolide amacele wonke. 12 Wasesenza ibhanti eliyigombolozeleyo elilingana lobubanzi beminwe emine nxa ihlangene* njalo wenza lomqolo wegolide owawugombolozela ibhanti lelo. 13 Kanti njalo wayenzela amaringi egolide amane wawafaka emakhoneni ayo amane lapho okuhlangana khona inyawo zayo ezine lengxenye ephezulu. 14 Amaringi la ayeseduze lebhanti ukuze abambe izigodo zokuthwala itafula. 15 Wasebaza izigodo zesinga wazihuqa ngegolide ukuze zibe ngezokuthwala itafula. 16 Ngemva kwalokho wenza izitsha ngegolide elicengekileyo, ezazizafakwa phezu kwetafula. Wenza inditshi, lamankomitsho, lemiganu kanye lamajagi okwakuzathelwa ngakho iminikelo yokunathwayo.+
17 Wasesenza uluthi lwesibane+ ngegolide elicengekileyo, walwenza esebenzisa isando. Isisekelo salo, lomqwayi walo, lamankomitsho alo, leziduku zalo kanye lamaluba alo kwakuyintonye.+ 18 Umqwayi woluthi lwesibane wawulengatsha eziyisithupha, ezintathu zikwelinye icele lezinye ezintathu kwelinye icele. 19 Ugatsha ngalunye lwalulamankomitsho amathathu ayebunjwe samaluba esihlahla sama-alimondi, isiduku leluba kufakwe kwalandelana. Lakwelinye icele ugatsha ngalunye lwalulamankomitsho amathathu ayebunjwe samaluba esihlahla sama-alimondi, isiduku leluba kufakwe kwalandelana. Lokhu yikho okwenziwa engatsheni eziyisithupha ezazisemqwayini woluthi lwesibane. 20 Umqwayi woluthi lwesibane lawo wawulamankomitsho amane ayebunjwe samaluba esihlahla sama-alimondi, isiduku leluba kufakwe kwalandelana. 21 Ngaphansi kwengatsha zokuqala ezazisemqwayini woluthi lwesibane kwakulesiduku, langaphansi kwezimbili ezilandelayo kwakulesiduku, langaphansi kwezinye ezimbili ezilandelayo kwakulesiduku. Zazinjalo ingatsha eziyisithupha ezazisemqwayini woluthi lwesibane. 22 Iziduku lengatsha kanye lalo lonke uluthi lwesibane kwakwenziwe kwaba yintonye eyenziwe ngegolide elicengekileyo kusetshenziswa isando. 23 Waselwenzela izibane eziyisikhombisa+ lendlawu* zakhona kanye lenkezwana zokuthwala amalahle. Konke lokhu wakwenza ngegolide elicengekileyo. 24 Wenza uluthi lwesibane kanye lazo zonke izitsha zalo ngegolide elicengekileyo elilingana lethalenta.*
25 Wasesenza i-alithare lokutshisela impepha+ ngezigodo zesinga. Lalilingana amacele wonke, liyingalo eyodwa ubude, lengalo eyodwa ububanzi, lengalo ezimbili ukuphakama. Impondo zalo zazibunjwe zaba yintonye lalo.+ 26 Walihuqa ngegolide elicengekileyo, phezulu lasemaceleni alo wonke lasempondweni zalo, walenzela lomqolo wegolide oligombolozeleyo. 27 Waselenzela amaringi amabili egolide ngaphansi komqolo walo, emaceleni amabili akhangeleneyo ukuze abambe izigodo zokulithwala. 28 Ngemva kwalokho wabaza izigodo zesinga wazihuqa ngegolide. 29 Wenza lamafutha angcwele+ kanye lempepha enukelelayo,+ ehlanzekileyo futhi konke kwakuhlanganiswe ngobungcitshi.*
38 Wenza i-alithare lomnikelo wokutshiswa ngezigodo zesinga. Lalilingana amacele wonke, ubude balo buzingalo* ezinhlanu, lobubanzi balo buzingalo ezinhlanu njalo ukuphakama+ kwalo kwakuzingalo ezintathu. 2 Wasesenza impondo emakhoneni alo amane zaba yintonye lalo, walihuqa ngekhopha.+ 3 Ngemva kwalokho wenza zonke izitsha ze-alithare, amakani, lamafotsholo, lemiganu, lamafologwe, kanye lenkezwana zokuthwala amalahle. Zonke izitsha zalo wazenza ngekhopha. 4 Kanti njalo wenzela i-alithare isefa yekhopha ngaphansi komqolo walo, yehla yaze yayafika phakathi laphakathi kwalo. 5 Wenza amaringi amane emakhoneni amane, eduze kwesefa yekhopha ukuze abambe izigodo zokulithwala. 6 Ngemva kwalokho wabaza izigodo zesinga wazihuqa ngekhopha. 7 Wasehloma izigodo lezo phakathi kwamaringi asemaceleni e-alithare ukuze lithwalwe ngazo. Wenza i-alithare laba njengebhokisi lamapulanka elikhamisileyo.
8 Wasesenza inditshi yekhopha+ kanye lesisekelo sayo. Wakwenza esebenzisa izibuko* zabesifazana ababehlelelwe ukuthi basebenze emnyango wetende lokuhlangana.
9 Ngemva kwalokho walungisa iguma.+ Eceleni leguma eliseningizimu wafaka amakhetheni enziwe ngelineni elohlonzi ephothiweyo, ubude bawo babuzingalo ezingu-100.+ 10 Kwakulensika ezingu-20 kanye lezisekelo zekhopha ezingu-20 njalo amawuka ensika lezo lezibopho zakhona kwakungokwesiliva. 11 Eceleni leguma elisenyakatho kwakufakwe amakhetheni azingalo ezingu-100 ubude. Insika zawo ezingu-20 kanye lezisekelo zawo ezingu-20 kwakungokwekhopha. Amawuka ensika lezo lezibopho zazo kwakungokwesiliva. 12 Kodwa eceleni elisentshonalanga kwakufakwe amakhetheni azingalo ezingu-50. Kwakulensika ezilitshumi lezisekelo ezilitshumi njalo amawuka ensika lezo lezibopho zazo kwakungokwesiliva. 13 Ububanzi becele elikhangele empumalanga babuzingalo ezingu-50. 14 Kwelinye icele legedi leguma kwakufakwe amakhetheni azingalo ezingu-15 ubude njalo ayelensika ezintathu kanye lezisekelo ezintathu. 15 Ikanti lakwelinye icele legedi kwakufakwe amakhetheni azingalo ezingu-15 ubude njalo ayelensika ezintathu kanye lezisekelo ezintathu. 16 Wonke amakhetheni ayegombolozele iguma ayengawelineni elohlonzi ephothiweyo. 17 Izisekelo ezazibambe insika zazenziwe ngekhopha, amawuka ensika lezi kanye lezibopho zazo kwakungokwesiliva. Izihloko zazo zazihuqwe ngesiliva njalo kwakulezihlanganiso zesiliva kuzo zonke insika zeguma.+
18 Ikhetheni elalisegedini leguma lalenziwe ngohali oluluhlaza okwesibhakabhaka, lewulu eyibubende,* lohali olubomvu kanye lelineni elohlonzi ephothiweyo. Lalizingalo ezingu-20 ubude lezingalo ezinhlanu ukuphakama, lilingana lamakhetheni ayegombolozele iguma.+ 19 Insika zalo ezine lezisekelo zazo ezine kwakwenziwe ngekhopha. Amawuka azo lezibopho zazo kwakwenziwe ngesiliva njalo izihloko zazo zazihuqwe ngesiliva. 20 Zonke izikhonkwane zethabanikeli kanye lalezo ezazifakwe egumeni zazenziwe ngekhopha.+
21 Nansi-ke impahla eyasetshenziswa ukwakha ithabanikeli, okutsho ithabanikeli loBufakazi.+ UMosi watshela amaLevi+ ukuthi abale inani lempahla leyo njalo lokhu akwenza ekhokhelwa ngu-Ithamari+ indodana ka-Aroni umphristi. 22 UBhezaleli+ indodana ka-Uri, indodana kaHuri, owesizwana sakoJuda wakwenza konke uMosi ayekutshelwe nguJehova. 23 Wayencediswa ngu-Oholiyabhi+ indodana ka-Ahisamakhi owesizwana sakoDani. Indoda le yayiyingcitshi yomsebenzi wezandla njalo isenelisa ukuthunga lokweluka isebenzisa uhali oluluhlaza okwesibhakabhaka, lewulu eyibubende, lohali olubomvu kanye lelineni elohlonzi.
24 Lonke igolide elasetshenziswa kuwo wonke umsebenzi wendawo engcwele lalilingana legolide lomnikelo wokuzunguzwa.+ Lalingamathalenta* angu-29 lamashekheli* angu-730 nxa kulinganiswa ngeshekheli yendawo engcwele.* 25 Isiliva esalethwa ngamadoda ayebhalisile sasingamathalenta angu-100 lamashekheli angu-1 775 nxa kulinganiswa ngeshekheli yendawo engcwele.* 26 Umuntu ngamunye owayebhalisile kusukela kwabaleminyaka engu-20 kusiya phezulu+ waletha ingxenye yeshekheli nxa kulinganiswa ngeshekheli yendawo engcwele.* Sebebonke babengu-603 550.+
27 Kwasetshenziswa amathalenta esiliva angu-100 ukulungisa izisekelo zendawo engcwele lezisekelo zamakhetheni. Izisekelo ezingu-100 zalungiswa ngamathalenta angu-100, kwasetshenziswa ithalenta elilodwa ukulungisa isisekelo ngasinye.+ 28 Kanti njalo wasebenzisa amashekheli esiliva angu-1 775 ukwenza amawuka ensika, wasehuqa lezihloko zazo njalo wakuhlanganisa ndawonye.
29 Ikhopha eyanikelwayo* yayingamathalenta angu-70 kanye lamashekheli angu-2 400. 30 Yiyo ayisebenzisa ukwenza izisekelo zomnyango wetende lokuhlangana, le-alithare lekhopha, lesefa yalo, lazo zonke izitsha ze-alithare, 31 lezisekelo ezazigombolozele iguma, lezisekelo ezisegedini leguma, lezikhonkwane zonke zethabanikeli, lazo zonke izikhonkwane+ ezazifakwe egumeni.
39 Basebesenza izigqoko zokwenza inkonzo endaweni engcwele ezithungwe kuhle kakhulu besebenzisa uhali oluluhlaza okwesibhakabhaka, lewulu eyibubende,*+ lohali olubomvu. Bathunga izigqoko zika-Aroni+ ezingcwele njengoba nje uJehova wayetshilo kuMosi.
2 UBhezaleli wenza i-efodi+ ngegolide, lohali oluluhlaza okwesibhakabhaka, lewulu eyibubende, lohali olubomvu, lelineni elohlonzi ephothiweyo. 3 Bakhanda igolide laba yizicecedu, waselisika laba zincingwana waziphotha ndawonye lohali oluluhlaza okwesibhakabhaka, lewulu eyibubende, lohali olubomvu, lelineni elohlonzi ukuze athunge ngakho i-efodi. 4 Basebeyenzela iziqephu zamalembu emahlombe ezazihlanganiswe phezulu emphethweni yomibili. 5 Kanti njalo ibhanti elelukiweyo* lokubopha i-efodi ukuze ihlale isendaweni yayo+ lalo lalenziwe ngegolide lohali oluluhlaza okwesibhakabhaka lewulu eyibubende lohali olubomvu lelineni elohlonzi ephothiweyo njengoba nje uJehova wayetshilo kuMosi.
6 Basebefaka amatshe e-onekisi phakathi kwezibambiso zegolide, babhala kuwo amabizo amadodana ka-Israyeli, ebhalwe njengophawu lwesidindo.+ 7 Wawafaka eziqetshini zelembu ezimbili ezisemahlombe phezu kwe-efodi ukuze abe ngamatshe esikhumbuzo kumadodana ka-Israyeli,+ njengoba nje uJehova wayetshilo kuMosi. 8 Ngemva kwalokho wenza isikhwama sesifubeni+ esebenzisa igolide, lohali oluluhlaza okwesibhakabhaka, lewulu eyibubende, lohali olubomvu kanye lelineni elohlonzi ephothiweyo.+ Sasingumsebenzi owenziwe yingcitshi yokuthunga, sithungwe njenge-efodi. 9 Nxa sigoqiwe, isikhwama lesi sasilingana amacele womane njalo ubude baso lobubanzi baso babulingana lobubanzi besandla.* 10 Bafaka kuso imizila emine yamatshe aligugu. Emzileni wokuqala kwakulerubhi lethophazi le-emeraldi. 11 Emzileni wesibili kulethekhoyisi lesafire lejaspa. 12 Emzileni wesithathu kuleleshemu* le-agathe le-amethisithi. 13 Emzileni wesine kulekhrisolithe le-onekisi lejedi. Amatshe la ayefakwe phakathi kwezibambiso zegolide. 14 Inani lamatshe la lalilingana lamabizo amadodana ka-Israyeli angu-12 njalo amabizo la ayebhalwe njengophawu lwesidindo. Ibizo ngalinye lalimela isizwana ngasinye kwezingu-12.
15 Ngemva kwalokho benza amaketane aphothiweyo bawafaka phezu kwesikhwama sesifubeni njalo ayenjengentambo ezenziwe ngegolide elicengekileyo.+ 16 Benza lezibambiso zegolide ezimbili lamaringi egolide amancane amabili, bawafaka emakhoneni amabili esikhwama sesifubeni. 17 Basebefaka amaketane egolide amabili phakathi kwamaringi amancane amabili asemakhoneni esikhwama sesifubeni. 18 Ngemva kwalokho bangenisa ingxenye ezisekucineni zamaketane la phakathi kwezibambiso zegolide ezimbili basebezihlanganisa leziqephu zamalembu e-efodi ezisemahlombe,* ngaphambili. 19 Basebesenza amaringi egolide amancane amabili bawafaka emakhoneni amabili, ngaphansi emphethweni ongaphakathi kwesikhwama sesifubeni, akhangelana le-efodi.+ 20 Benza lamanye amaringi egolide amancane amabili bawafaka ngaphambi kwe-efodi, ngaphansi kweziqephu zamalembu ezisemahlombe, phezu kwalapho okuhlangana khona ibhanti elelukiweyo le-efodi. 21 Basebecina ngokubophela intambo eluhlaza okwesibhakabhaka emaringini amancane esikhwama sesifubeni lawe-efodi ukuze isikhwama sesifubeni sihlale sisendaweni yaso phezu kwe-efodi, ngaphezu kwebhanti elelukiweyo, njengoba nje uJehova wayetshilo kuMosi.
22 Ngemva kwalokho wathunga ijazi elingelamikhono eligqokwa ngaphansi kwe-efodi. Lalingumsebenzi owenziwe ngumaluki njalo lonke lalenziwe ngohali oluluhlaza okwesibhakabhaka.+ 23 Isikhala sokungenisa ikhanda sejazi elingelamikhono sasiphakathi laphakathi njengesejazi elenziwe ngensimbi. Isikhala leso sasilomphetho osigombolozeleyo ukuze ijazi lingadabuki. 24 Ngaphansi emphethweni walo benza imiceciso enjengamaharinathi ngohali oluluhlaza okwesibhakabhaka, lewulu eyibubende kanye lohali olubomvu, konke kuphothwe ndawonye. 25 Kanti njalo benza amabhera amancane ngegolide elicengekileyo basebewafaka phakathi laphakathi kwamaharinathi. Ayegombolozele wonke umphetho wejazi elingelamikhono, efakwe phakathi laphakathi kwamaharinathi. 26 Bafaka ibhera leharinathi kwalandelana, kwaba yibhera leharinathi njalo kwakugombolozele wonke umphetho wejazi elingelamikhono elalingelokwenza inkonzo njengoba nje uJehova wayetshilo kuMosi.
27 Basebethungela u-Aroni lamadodana akhe+ izigqoko ngelineni elohlonzi, eyayenziwe ngumaluki, 28 leqhiye+ yelineni elohlonzi, lokokugqoka ekhanda+ okulomceciso okwenziwe ngelineni elohlonzi, lamabhulugwe amafitshane+ enziwe ngelineni elohlonzi ephothiweyo 29 kanye lebhanti elenziwe ngelineni elohlonzi ephothiweyo, lohali oluluhlaza okwesibhakabhaka, lewulu eyibubende, lohali olubomvu, kuthungwe kwahlanganiswa njengoba nje uJehova wayetshilo kuMosi.
30 Bacina ngokwenza icence elicazimulayo ngegolide elicengekileyo, uphawu lokuzinikela olungcwele,* babhala kulo njengokwenziwa nxa umuntu efaka uphawu lwesidindo, bathi: “Ubungcwele ngobukaJehova.”+ 31 Basebelifaka intambo enziwe ngohali oluluhlaza okwesibhakabhaka ukuze libotshelwe eqhiyeni njengoba nje uJehova wayetshilo kuMosi.
32 Waphela-ke wonke umsebenzi wethabanikeli, lona itende lokuhlangana njalo abako-Israyeli benza konke uJehova ayekutshele uMosi.+ Benza khona kanye ababekutsheliwe.
33 Ngemva kwalokho baletha ithabanikeli+ kuMosi, itende+ layo yonke impahla yalo, izingwegwe zalo,+ lamapulanka alo,+ lemithando yalo,+ lezinsika zalo kanye lezisekelo zalo,+ 34 lesembeso salo esenziwe ngezikhumba zenqama ezidaywe zaba bomvu,+ lesembeso salo esenziwe ngezikhumba zenyamazana yolwandle kanye lekhetheni lokuvala,+ 35 lebhokisi loBufakazi lezigodo zalo+ kanye lesivalo salo,+ 36 letafula, lazo zonke izitsha zayo,+ lesinkwa sokubukiswa, 37 uluthi lwesibane olwenziwe ngegolide elicengekileyo, lezibane zalo+ ezibekwe zalandelana emzileni munye kanye lazo zonke izitsha zalo,+ lamafutha okukhanyisa,+ 38 le-alithare+ legolide, lamafutha okugcoba angcwele,+ lempepha enukelelayo+ kanye lekhetheni+ lokuvala umnyango wetende, 39 le-alithare yekhopha,+ lesefa yalo yekhopha, lezigodo zalo,+ lazo zonke izitsha zalo+ kanye lenditshi lesisekelo sayo,+ 40 lamakhetheni ayefakwe egumeni, lensika zawo lezisekelo zawo,+ lekhetheni+ legedi leguma, lentambo zalo zetende, lezikhonkwane zalo+ kanye lazo zonke izitsha ezisetshenziswa enkonzweni yethabanikeli, lona kanye itende lokuhlangana, 41 lezigqoko ezithungwe kuhle zokwenza inkonzo endaweni engcwele, lezigqoko ezingcwele zika-Aroni umphristi,+ lezigqoko zamadodana akhe ezokwenza umsebenzi wobuphristi.
42 Abako-Israyeli benza wonke umsebenzi+ belandela konke uJehova ayekutshele uMosi. 43 Ngakho uMosi wathi ehlola wonke umsebenzi ababewenzile wabona ukuthi babenze khona kanye uJehova ayekutshilo, uMosi wasebabusisa.
40 Ngemva kwalokho uJehova wathi kuMosi: 2 “Mhlaka 1 ngenyanga yokuqala kumele umise ithabanikeli, okutsho itende lokuhlangana.+ 3 Faka ibhokisi loBufakazi phakathi kwalo,+ ubusuvala ngekhetheni+ lapho okulebhokisi lelo khona. 4 Kumele ungenise itafula+ phakathi kwethabanikeli, uhlele kuhle lezinto okufanele zibe phezu kwayo, ubusungenisa loluthi lwesibane+ ulumathise lezibane zalo.+ 5 Ngemva kwalokho thatha i-alithare lokutshisela impepha+ elenziwe ngegolide ulifake phambi kwebhokisi loBufakazi, ufake lekhetheni lokuvala umnyango wethabanikeli endaweni yalo.+
6 “Kumele uthathe i-alithare lomnikelo wokutshiswa+ ulifake phambi komnyango wethabanikeli, okutsho itende lokuhlangana, 7 ubusubeka inditshi phakathi laphakathi kwetende lokuhlangana kanye le-alithare, uthele amanzi phakathi kwayo.+ 8 Ngemva kwalokho kumele ulungise iguma+ elizagombolozela ithabanikeli njalo ufake lekhetheni+ lokuvala igedi leguma. 9 Ubusuthatha amafutha angcwele+ ugcobe ithabanikeli lezinto zonke eziphakathi kwalo,+ ulingcwelise kanye lezitsha zalo zonke ukuze libe ngcwele. 10 Kumele ugcobe i-alithare lomnikelo wokutshiswa lazo zonke izitsha zalo, ulingcwelise ukuze libe li-alithare elingcwele kakhulu.+ 11 Ugcobe lenditshi kanye lesisekelo sayo uyingcwelise.
12 “Ngemva kwalokho sondeza u-Aroni lamadodana akhe eduze komnyango wetende lokuhlangana, ubagezise ngamanzi.+ 13 Kumele ugqokise u-Aroni izigqoko ezingcwele,+ umgcobe+ njalo umngcwelise ukuze abe ngumphristi wami, 14 ubususondeza lamadodana akhe uwagqokise izigqoko ezinde.+ 15 Kufanele uwagcobe njengalokho okwenze kuyise+ ukuze abe ngabaphristi bami njalo ukugcotshwa kwawo kuzakwenza umsebenzi wobuphristi uhlale ungowabo kuzo zonke izizukulwane zabo.”+
16 UMosi wenza konke uJehova ayemtshele khona.+ Wenza khona kanye ayekutsheliwe.
17 Ngakho ithabanikeli lamiswa+ mhlaka 1 ngenyanga yokuqala, ngomnyaka wesibili. 18 UMosi wathi emisa ithabanikeli wafaka izisekelo zalo+ phansi, wamisa lamapulanka,+ wafaka lemithando yalo+ njalo wamisa lensika zalo. 19 UMosi wasesendlala ilembu letende+ phezu kwethabanikeli, wafaka lesembeso+ salo phezu kwalo njengoba nje uJehova wayetshilo kuye.
20 Ngemva kwalokho wathatha amatshe oBufakazi+ wawafaka phakathi kwebhokisi loBufakazi,+ wahloma lezigodo+ zokulithwala, wafaka lesivalo+ phezu kwalo.+ 21 Wasengenisa ibhokisi lelo phakathi kwethabanikeli wafaka lekhetheni+ endaweni yalo, walivalela ibhokisi loBufakazi+ njengoba nje uJehova wayetshilo kuye.
22 Wasefaka itafula+ phakathi kwethabanikeli, okutsho itende lokuhlangana. Wayibeka eceleni elingasenyakatho phandle kwekhetheni, 23 UMosi wasefolisa izinkwa+ endaweni yazo phezu kwetafula, phambi kukaJehova, njengoba nje uJehova wayetshilo kuye.
24 Wafaka loluthi lwesibane+ phakathi kwethabanikeli, okutsho itende lokuhlangana njalo lwaluphambi kwetafula eceleni elingaseningizimu. 25 UMosi walumathisa izibane+ phambi kukaJehova, njengoba nje uJehova wayetshilo kuye.
26 Ngemva kwalokho wafaka i-alithare legolide+ phakathi kwetende lokuhlangana, phambi kwekhetheni, 27 ukuze athunqise impepha enukelelayo+ phezu kwalo,+ njengoba nje uJehova wayetshilo kuye.
28 Wasefaka ikhetheni+ lokuvala umnyango wethabanikeli endaweni yalo.
29 UMosi wabeka i-alithare lomnikelo wokutshiswa+ emnyango wethabanikeli, okutsho itende lokuhlangana ukuze anikele umnikelo wokutshiswa+ kanye lomnikelo wamabele kulo, njengoba nje uJehova wayetshilo kuye.
30 Wasefaka inditshi phakathi laphakathi kwetende lokuhlangana kanye le-alithare, wathela amanzi okugeza+ phakathi kwayo. 31 UMosi lo-Aroni kanye lamadodana akhe bageza izandla lenyawo ngamanzi ayephakathi kwayo. 32 Loba nini lapho ababesiya khona etendeni lokuhlangana kumbe besondela e-alithareni babegeza,+ njengoba nje uJehova wayetshilo kuMosi.
33 Wacina ngokulungisa iguma+ elaligombolozele ithabanikeli kanye le-alithare, wasefaka lekhetheni lokuvala igedi leguma.+
UMosi wawuqeda-ke umsebenzi. 34 Ngakho iyezi laqala ukusibekela itende lokuhlangana njalo inkazimulo kaJehova yagcwala ethabanikeli.+ 35 UMosi wayengasenelisi ukungena etendeni lokuhlangana ngoba iyezi lalilokhu liphezu kwalo njalo inkazimulo kaJehova yagcwala ethabanikeli.+
36 Kuzo zonke izigaba zohambo+ lwabo abako-Israyeli babesithi nxa bangabona iyezi lisukuma phezu kwethabanikeli, bahle basuke baqhubeke ngohambo. 37 Kodwa nxa iyezi lingasukumanga babengasuki, babelinda kuze kufike ilanga elizasukuma ngalo.+ 38 Emini iyezi likaJehova laliphezu kwethabanikeli njalo ebusuku umlilo wawuqhubeka uphezu kwethabanikeli phambi kwamehlo abo bonke abendlu ka-Israyeli kuzo zonke izigaba zohambo lwabo.+
NgesiHebheru, “selibabona behlezi esihlalweni sokubelethisa.”
Kumbe, “ibhokisi elenziwe.”
Ibizo leli litsho ukuthi, “Okhutshiweyo,” okutsho ukuthi ohlengwe emanzini.
Kumbe, “esesiba yindoda elamandla.”
Kumbe, “wabalwela.”
Lapha kutshiwo uJethro.
Ibizo leli litsho ukuthi, “Owesinye isizwe.”
NgesiHebheru, “izinsuku ezinengi.”
Kumbe, “kwesixuku.”
NgesiHebheru, “ngizakuba lomlomo wakho.”
NgesiHebheru, “ngizakufundisa.”
Kumbe, “uzakuba ngummeli kaNkulunkulu kuye.”
Kumbe, “ingqamu eyenziwe ngelitshe; insengetshe.”
Lapha kungabe kutshiwo inyawo zengilosi.
Kumbe, “liyethwala imithwalo yenu.”
Kumbe, “bayadlala.”
Kumbe, “Liyadlala.”
Kumbe, “liyadlala.”
Kumbe, “selenze saba lephunga elibi kuFaro lezinceku zakhe.”
Kumbe, “elamandla.”
NgesiHebheru, “engaphakamisa isandla sami.”
NgesiHebheru, “ngingasokwanga ezindebeni.”
NgesiHebheru, “kusiya ngamabutho abo.”
NgesiHebheru, “ngingasokwanga ezindebeni.”
NgesiHebheru, “waba nguNkulunkulu.”
NgesiHebheru, “amabutho.”
Lapha kutshiwo imisele yamanzi eyayisuka kuNayili.
Lo ngumhlobo wempukane ezilumayo.
Lapha kutshiwo abaseGibhithe.
Le yindawo okwakutshiselwa kuyo izitina, insimbi lokunye nje.
Le yindawo okwakutshiselwa kuyo izitina, insimbi lokunye nje.
NgesiHebheru, “ezindlini.”
Lapha kungabe kutshiwo umbane olamandla.
Kumbe, “umbane.”
Lezi yizihlahlakazana zokwenza amalembu elineni ezazilinywa eGibhithe.
Lo ngumhlobo wengqoloyi ongelahlonzi owawulinywa eGibhithe yasendulo.
NgesiHebheru, “ingumjibila kithi.”
Lapha kungabe kutshiwo uMosi.
Kumbe, “uzasivumela ukuthi sithathe.”
Lapha kungabe kutshiwo ngesikhathi ilanga selisiyatshona, sekuqalisa ukuba mnyama.
NgesiHebheru, “inkalo zenu zibotshiwe.”
Kumbe, “ifulawa evutshiweyo yafakwa imvubelo.”
NgesiHebheru, “amabutho.”
Kumbe, “ifulawa evutshiweyo yafakwa imvubelo.”
Lapha kutshiwo amazinyane ezimvu kumbe awembuzi.
Khangela iNgcazelo Yamabala.
NgesiHebheru, “amadodana.”
Lapha kutshiwo abantu ababengayisiwo ma-Israyeli lamaGibhithe.
NgesiHebheru, “amabutho.”
NgesiHebheru, “lamabutho.”
Kumbe, “Ngahlukanisela.”
Khangela iSengezo ku-B15.
Kumbe, “ifulawa evutshiweyo yafakwa imvubelo.”
NgesiHebheru, “lanjengelembu elibotshelwe.”
Lesi yisikhathi esisukela kubo-2 ekuseni kusiya ku-6 ekuseni.
Lesi yisifitshaniso sebizo elithi Jehova ngesiHebheru.
NgesiHebheru, “enhliziyweni yolwandle.”
NgesiHebheru, “zizabanjwa yimihelo yokubeletha.”
Ibizo leli litsho ukuthi, “Ukubaba.”
Kumbe, “esasihlala khona eduze lembiza zenyama sisidla.”
Lapha kungabe kutshiwo ngesikhathi ilanga selisiyatshona, sekuqalisa ukuba mnyama.
I-omeri yayingaba ngamalitha angu-2,2. Khangela iSengezo ku-B14.
Kumbe, “lokugcina isabatha.”
Kumbe, “baphumula.”
Ibizo leli lingabe livela emutshweni wesiHebheru othi, “Kuyini lokhu?”
I-efa yayilingana lamalitha angu-22. Khangela iSengezo ku-B14.
Ibizo leli litsho ukuthi, “Ukulinga.”
Ibizo leli litsho ukuthi, “Ukuxabana.”
Ibizo leli litsho ukuthi, “UJehova uyisibonakaliso sami.”
Lesi yisifitshaniso sebizo elithi Jehova ngesiHebheru.
Ibizo leli litsho ukuthi, “Owezizweni.”
Ibizo leli litsho ukuthi, “UNkulunkulu wami ungumsizi.”
NgesiHebheru, “esandleni seGibhithe.”
Umutsho lo ungabe usitsho ilanga abasuka ngalo eRefidimu.
Kumbe, “inotho yami eligugu.”
Mhlawumbe umuntu lo uyabe egwazwa ngomtshoko.
Kumbe, “lingasondeli kubomkenu.”
Le yindawo okwakutshiselwa kuyo izitina, insimbi lokunye nje.
Kumbe, “abazingcwelise.”
NgesiHebheru, “phambi kobuso bami.”
Kumbe, “Ungalisebenzisi ngendlela engelanhlonipho.”
NgesiHebheru, “osemagedini akho.”
Kumbe, “ngomunye wakho; ngomngane wakho.”
Kumbe, “leminikelo yakho yokuthula.”
NgesiHebheru, “ubunqunu bakho bungabi.”
NgesiHebheru, “ihlengwe.”
Lapha kutshiwo ukuya laye emacansini.
Kumbe, “omunye wakhe, umngane wakhe.”
Ezinye inguqulo zithi, “ngethuluzi.”
NgesiHebheru, “abantwabakhe baphume.”
Kumbe, “lolimala kubi.”
Lapha kutshiwo umama kumbe umntwana.
Ishekheli yayilingana lamagremu angu-11,4. Khangela iSengezo ku-B14.
Kumbe, “umuntu ohluphekayo.”
Kumbe, “ngilesihawu.”
Kumbe, “umbusi.”
Lapho kutshiwo izikhamelo zewayini lezamafutha.
NgesiHebheru, “lelizwi elingamanga.”
Kumbe, “kalacala.”
Kumbe, “Liyayazi impilo yomuntu.”
Khangela iSengezo ku-B15.
Ubizwa langokuthi nguMkhosi Wamaviki kumbe owePhentekhosti.
Ubizwa langokuthi nguMkhosi Wezihonqo kumbe Wamathabanikeli.
Kumbe, “zonke izitha zenu zilifulathele.”
Ezinye inguqulo zithi, “babanjwe ngumhedehede; bethuke.”
Lapha kutshiwo umfula uYufrathe.
NgesiNgisi umbala oyibubende yi-purple.
Khangela iNgcazelo Yamabala leSengezo ku-B5.
Ingalo yayilingana lamasentimitha angu-44,5. Khangela iSengezo ku-B14.
Lapha kutshiwo ububanzi beminwe emine nxa ihlangene kusukela kucilikicane kusiyafika kunkomba, okungaba ngamasentimitha angu-7,4. Khangela iSengezo ku-B14.
Lapha kutshiwo insimbi yokubambisa amalahle esasigelo.
Ithalenta lalingamakhilogremu angu-34,2. Khangela iSengezo ku-B14.
NgesiNgisi umbala oyibubende yi-purple.
Ingalo yayilingana lamasentimitha angu-44,5. Khangela iSengezo ku-B14.
Khangela iSengezo ku-B5.
Kumbe, “okuleringi yokuqala.”
Ingalo yayilingana lamasentimitha angu-44,5. Khangela iSengezo ku-B14.
Kumbe, “umlotha ohlangene lamafutha.” Lapha kutshiwo umlotha owawuhlangene lamafutha emihlatshelo.
Kumbe, “lamaringi akhona.”
Kumbe, “lamaringi.”
NgesiNgisi umbala oyibubende yi-purple.
NgesiNgisi umbala oyibubende yi-purple.
Kumbe, “ibhanti lekhalweni.”
Lapha kutshiwo ububanzi besandla kusukela kucikilicane kusiyafika esithupheni nxa isandla sivuliwe, okungaba ngamasentimitha angu-22,2. Khangela iSengezo ku-B14.
Ilitshe leli eliligugu kalaziwa ukuthi lalinjani.
Kumbe, “eziqeni zelembu le-efodi ezisemahlombe.”
NgesiHebheru, “ugcwalise isandla sabo.”
Kumbe, “lomqhele ongcwele.”
Lapha kutshiwo amafutha asetshenziswa ukugcoba umuntu nxa ebekwa esikhundleni.
NgesiHebheru, “ugcwalise ngayo isandla sika-Aroni lesamadodana akhe.”
Kumbe, “ifutha.”
Kumbe, “ifutha.”
NgesiHebheru, “ongaziwayo,” okutsho lowo ongasiwemuli ka-Aroni.
NgesiHebheru, “ugcwalise isandla sabo.”
Lapha kungabe kutshiwo ngesikhathi ilanga selisiyatshona, sekuqalisa ukuba mnyama.
I-efa yayilingana lamalitha angu-22. Khangela iSengezo ku-B14.
Ihini yayilingana lamalitha angu-3,67. Khangela iSengezo ku-B14.
Ingalo yayilingana lamasentimitha angu-44,5. Khangela iSengezo ku-B14.
Lapha kungabe kutshiwo ngesikhathi ilanga selisiyatshona, sekuqalisa ukuba mnyama.
Ishekheli yayilingana lamagremu angu-11,4. Khangela iSengezo ku-B14.
Kumbe, “seshekheli elingcwele.”
Igera lalilingana lamagremu angu-0,57. Khangela iSengezo ku-B14.
Ishekheli yayilingana lamagremu angu-11,4. Khangela iSengezo ku-B14.
Kumbe, “seshekheli elingcwele.”
Ihini yayilingana lamalitha angu-3,67. Khangela iSengezo ku-B14.
NgesiHebheru, “ongaziwayo,” okutsho lowo ongasiwemuli ka-Aroni.
NgesiHebheru, “sengibize ngebizo.”
NgesiHebheru, “balentamo ezilukhuni.”
Kumbe, “uzisole.”
NgesiHebheru, “inzalo.”
NgesiHebheru, “inzalo.”
Kumbe, “wazisola.”
NgesiHebheru, “abalentamo ezilukhuni.”
NgesiHebheru, “abalentamo ezilukhuni.”
NgesiHebheru, “akhumula.”
Kumbe, “Ngikukhethile.”
Kumbe, “olomusa.”
Kumbe, “lokuthembeka.”
NgesiHebheru, “abalentamo ezilukhuni.”
Kumbe, “zidalwe.”
Khangela iNgcazelo Yamabala.
Kumbe, “sebefeba labonkulunkulu.”
Kumbe, “ngokufeba labonkulunkulu.”
Kumbe, “afebe labonkulunkulu.
Khangela iSengezo ku-B15.
Kumbe, “ligcine isabatha.”
Ubizwa langokuthi nguMkhosi Wezihonqo kumbe Wamathabanikeli.
Lapha kungabe kutshiwo uJehova.
NgesiNgisi umbala oyibubende yi-purple.
NgesiHebheru, “abalenhliziyo ehlakaniphileyo.”
Kumbe, “iminikelo yokuzunguzwa.”
NgesiHebheru, “ngokuhlakanipha kwenhliziyo.”
NgesiHebheru, “wonke amadoda alenhliziyo ehlakaniphileyo.”
NgesiHebheru, “inhliziyo ehlakaniphileyo.”
NgesiNgisi umbala oyibubende yi-purple.
Lapha kungabe kutshiwo uBhezaleli.
Ingalo yayilingana lamasentimitha angu-44,5. Khangela iSengezo ku-B14.
Kumbe, “amaringi.”
Ingalo yayilingana lamasentimitha angu-44,5. Khangela iSengezo ku-B14.
Lapha kutshiwo ububanzi beminwe emine nxa ihlangene kusukela kucilikicane kusiyafika kunkomba, okungaba ngamasentimitha angu-7,4. Khangela iSengezo ku-B14.
Lapha kutshiwo insimbi yokubambisa amalahle esasigelo.
Ithalenta lalingamakhilogremu angu-34,2. Khangela iSengezo ku-B14.
Kumbe, “njengokwenza komenzi wamakha.”
Ingalo yayilingana lamasentimitha angu-44,5. Khangela iSengezo ku-B14.
Lapha kutshiwo izibuko zensimbi ezilolongwe zacazimula kakhulu.
NgesiNgisi umbala oyibubende yi-purple.
Ithalenta lalingamakhilogremu angu-34,2. Khangela iSengezo ku-B14.
Ishekheli yayilingana lamagremu angu-11,4. Khangela iSengezo ku-B14.
Kumbe, “ngeshekheli elingcwele.”
Kumbe, “ngeshekheli elingcwele.”
Kumbe, “ngeshekheli elingcwele.”
Kumbe, “yomnikelo wokuzunguzwa.”
NgesiNgisi umbala oyibubende yi-purple.
Kumbe, “ibhanti lekhalweni.”
Lapha kutshiwo ububanzi besandla kusukela kucikilicane kusiyafika esithupheni nxa isandla sivuliwe, okungaba ngamasentimitha angu-22,2. Khangela iSengezo ku-B14.
Ilitshe leli eliligugu kalaziwa ukuthi lalinjani.
Kumbe, “eziqeni zelembu le-efodi ezisemahlombe.”
Kumbe, “umqhele ongcwele.”